| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
১০. দেৰদত্তসুত্তং
10. Devadattasuttaṃ
৮৯. ৰুত্তঞ্হেতং ভগৰতা, ৰুত্তমরহতাতি মে সুতং –
89. Vuttañhetaṃ bhagavatā, vuttamarahatāti me sutaṃ –
‘‘তীহি, ভিক্খৰে, অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। কতমেহি তীহি? পাপিচ্ছতায, ভিক্খৰে, অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। পাপমিত্ততায, ভিক্খৰে, অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো। সতি খো পন উত্তরিকরণীযে 1 ওরমত্তকেন ৰিসেসাধিগমেন 2 অন্তরা ৰোসানং আপাদি। ইমেহি খো, ভিক্খৰে, তীহি অসদ্ধম্মেহি অভিভূতো পরিযাদিন্নচিত্তো দেৰদত্তো আপাযিকো নেরযিকো কপ্পট্ঠো অতেকিচ্ছো’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Tīhi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi tīhi? Pāpicchatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Pāpamittatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Sati kho pana uttarikaraṇīye 3 oramattakena visesādhigamena 4 antarā vosānaṃ āpādi. Imehi kho, bhikkhave, tīhi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho’’ti. Etamatthaṃ bhagavā avoca. Tatthetaṃ iti vuccati –
‘‘মা জাতু কোচি লোকস্মিং, পাপিচ্ছো উদপজ্জথ।
‘‘Mā jātu koci lokasmiṃ, pāpiccho udapajjatha;
তদমিনাপি জানাথ, পাপিচ্ছানং যথা গতি॥
Tadamināpi jānātha, pāpicchānaṃ yathā gati.
‘‘পণ্ডিতোতি সমঞ্ঞাতো, ভাৰিতত্তোতি সম্মতো।
‘‘Paṇḍitoti samaññāto, bhāvitattoti sammato;
অৰীচিনিরযং পত্তো, চতুদ্ৰারং ভযানকং॥
Avīcinirayaṃ patto, catudvāraṃ bhayānakaṃ.
‘‘অদুট্ঠস্স হি যো দুব্ভে, পাপকম্মং অকুব্বতো।
‘‘Aduṭṭhassa hi yo dubbhe, pāpakammaṃ akubbato;
‘‘সমুদ্দং ৰিসকুম্ভেন, যো মঞ্ঞেয্য পদূসিতুং।
‘‘Samuddaṃ visakumbhena, yo maññeyya padūsituṃ;
ন সো তেন পদূসেয্য, ভেস্মা হি উদধি মহা॥
Na so tena padūseyya, bhesmā hi udadhi mahā.
‘‘তাদিসং মিত্তং কুব্বেথ, তঞ্চ সেৰেয্য পণ্ডিতো।
‘‘Tādisaṃ mittaṃ kubbetha, tañca seveyya paṇḍito;
যস্স মগ্গানুগো ভিক্খু, খযং দুক্খস্স পাপুণে’’তি॥
Yassa maggānugo bhikkhu, khayaṃ dukkhassa pāpuṇe’’ti.
অযম্পি অত্থো ৰুত্তো ভগৰতা, ইতি মে সুতন্তি। দসমং।
Ayampi attho vutto bhagavatā, iti me sutanti. Dasamaṃ.
চতুত্থো ৰগ্গো নিট্ঠিতো।
Catuttho vaggo niṭṭhito.
তস্সুদ্দানং –
Tassuddānaṃ –
ৰিতক্কাসক্কারসদ্দ, চৰনলোকে অসুভং।
Vitakkāsakkārasadda, cavanaloke asubhaṃ;
ধম্মঅন্ধকারমলং, দেৰদত্তেন তে দসাতি॥
Dhammaandhakāramalaṃ, devadattena te dasāti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ১০. দেৰদত্তসুত্তৰণ্ণনা • 10. Devadattasuttavaṇṇanā
