Library / Tipiṭaka / तिपिटक • Tipiṭaka / इतिवुत्तकपाळि • Itivuttakapāḷi

    १०. देवदत्तसुत्तं

    10. Devadattasuttaṃ

    ८९. वुत्तञ्हेतं भगवता, वुत्तमरहताति मे सुतं –

    89. Vuttañhetaṃ bhagavatā, vuttamarahatāti me sutaṃ –

    ‘‘तीहि, भिक्खवे, असद्धम्मेहि अभिभूतो परियादिन्‍नचित्तो देवदत्तो आपायिको नेरयिको कप्पट्ठो अतेकिच्छो। कतमेहि तीहि? पापिच्छताय, भिक्खवे, अभिभूतो परियादिन्‍नचित्तो देवदत्तो आपायिको नेरयिको कप्पट्ठो अतेकिच्छो। पापमित्तताय, भिक्खवे, अभिभूतो परियादिन्‍नचित्तो देवदत्तो आपायिको नेरयिको कप्पट्ठो अतेकिच्छो। सति खो पन उत्तरिकरणीये 1 ओरमत्तकेन विसेसाधिगमेन 2 अन्तरा वोसानं आपादि। इमेहि खो, भिक्खवे, तीहि असद्धम्मेहि अभिभूतो परियादिन्‍नचित्तो देवदत्तो आपायिको नेरयिको कप्पट्ठो अतेकिच्छो’’ति। एतमत्थं भगवा अवोच। तत्थेतं इति वुच्‍चति –

    ‘‘Tīhi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi tīhi? Pāpicchatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Pāpamittatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Sati kho pana uttarikaraṇīye 3 oramattakena visesādhigamena 4 antarā vosānaṃ āpādi. Imehi kho, bhikkhave, tīhi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho’’ti. Etamatthaṃ bhagavā avoca. Tatthetaṃ iti vuccati –

    ‘‘मा जातु कोचि लोकस्मिं, पापिच्छो उदपज्‍जथ।

    ‘‘Mā jātu koci lokasmiṃ, pāpiccho udapajjatha;

    तदमिनापि जानाथ, पापिच्छानं यथा गति॥

    Tadamināpi jānātha, pāpicchānaṃ yathā gati.

    ‘‘पण्डितोति समञ्‍ञातो, भावितत्तोति सम्मतो।

    ‘‘Paṇḍitoti samaññāto, bhāvitattoti sammato;

    जलंव यससा अट्ठा, देवदत्तोति विस्सुतो 5॥

    Jalaṃva yasasā aṭṭhā, devadattoti vissuto 6.

    ‘‘सो पमाणमनुचिण्णो 7, आसज्‍ज नं तथागतं।

    ‘‘So pamāṇamanuciṇṇo 8, āsajja naṃ tathāgataṃ;

    अवीचिनिरयं पत्तो, चतुद्वारं भयानकं॥

    Avīcinirayaṃ patto, catudvāraṃ bhayānakaṃ.

    ‘‘अदुट्ठस्स हि यो दुब्भे, पापकम्मं अकुब्बतो।

    ‘‘Aduṭṭhassa hi yo dubbhe, pāpakammaṃ akubbato;

    तमेव पापं फुसति 9, दुट्ठचित्तं अनादरं॥

    Tameva pāpaṃ phusati 10, duṭṭhacittaṃ anādaraṃ.

    ‘‘समुद्दं विसकुम्भेन, यो मञ्‍ञेय्य पदूसितुं।

    ‘‘Samuddaṃ visakumbhena, yo maññeyya padūsituṃ;

    न सो तेन पदूसेय्य, भेस्मा हि उदधि महा॥

    Na so tena padūseyya, bhesmā hi udadhi mahā.

    ‘‘एवमेव 11 तथागतं, यो वादेन विहिंसति।

    ‘‘Evameva 12 tathāgataṃ, yo vādena vihiṃsati;

    सम्मग्गतं 13 सन्तचित्तं, वादो तम्हि न रूहति॥

    Sammaggataṃ 14 santacittaṃ, vādo tamhi na rūhati.

    ‘‘तादिसं मित्तं कुब्बेथ, तञ्‍च सेवेय्य पण्डितो।

    ‘‘Tādisaṃ mittaṃ kubbetha, tañca seveyya paṇḍito;

    यस्स मग्गानुगो भिक्खु, खयं दुक्खस्स पापुणे’’ति॥

    Yassa maggānugo bhikkhu, khayaṃ dukkhassa pāpuṇe’’ti.

    अयम्पि अत्थो वुत्तो भगवता, इति मे सुतन्ति। दसमं।

    Ayampi attho vutto bhagavatā, iti me sutanti. Dasamaṃ.

    चतुत्थो वग्गो निट्ठितो।

    Catuttho vaggo niṭṭhito.

    तस्सुद्दानं –

    Tassuddānaṃ –

    वितक्‍कासक्‍कारसद्द, चवनलोके असुभं।

    Vitakkāsakkārasadda, cavanaloke asubhaṃ;

    धम्मअन्धकारमलं, देवदत्तेन ते दसाति॥

    Dhammaandhakāramalaṃ, devadattena te dasāti.




    Next: ५. पञ्‍चमवग्गो • 5. Pañcamavaggo




    Footnotes:
    1. उत्तरिं करणीये (स्या॰)
    2. विसेसाधिगमेन च (स्या॰ पी॰)
    3. uttariṃ karaṇīye (syā.)
    4. visesādhigamena ca (syā. pī.)
    5. मे सुतं (पाळियं)
    6. me sutaṃ (pāḷiyaṃ)
    7. पमादमनुचिण्णो (क॰ सी॰ स्या॰ पी॰), समानमनुचिण्णो (अट्ठ॰)
    8. pamādamanuciṇṇo (ka. sī. syā. pī.), samānamanuciṇṇo (aṭṭha.)
    9. फुस्सेति (स्या॰)
    10. phusseti (syā.)
    11. एवमेतं (स्या॰)
    12. evametaṃ (syā.)
    13. समग्गतं (सी॰ क॰)
    14. samaggataṃ (sī. ka.)



    Related texts:



    अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / इतिवुत्तक-अट्ठकथा • Itivuttaka-aṭṭhakathā / १०. देवदत्तसुत्तवण्णना • 10. Devadattasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact