Library / Tipiṭaka / ติปิฎก • Tipiṭaka / อิติวุตฺตกปาฬิ • Itivuttakapāḷi

    ๑๐. เทวทตฺตสุตฺตํ

    10. Devadattasuttaṃ

    ๘๙. วุตฺตเญฺหตํ ภควตา, วุตฺตมรหตาติ เม สุตํ –

    89. Vuttañhetaṃ bhagavatā, vuttamarahatāti me sutaṃ –

    ‘‘ตีหิ, ภิกฺขเว, อสทฺธเมฺมหิ อภิภูโต ปริยาทินฺนจิโตฺต เทวทโตฺต อาปายิโก เนรยิโก กปฺปโฎฺฐ อเตกิโจฺฉฯ กตเมหิ ตีหิ? ปาปิจฺฉตาย, ภิกฺขเว, อภิภูโต ปริยาทินฺนจิโตฺต เทวทโตฺต อาปายิโก เนรยิโก กปฺปโฎฺฐ อเตกิโจฺฉฯ ปาปมิตฺตตาย, ภิกฺขเว, อภิภูโต ปริยาทินฺนจิโตฺต เทวทโตฺต อาปายิโก เนรยิโก กปฺปโฎฺฐ อเตกิโจฺฉฯ สติ โข ปน อุตฺตริกรณีเย 1 โอรมตฺตเกน วิเสสาธิคเมน 2 อนฺตรา โวสานํ อาปาทิฯ อิเมหิ โข, ภิกฺขเว, ตีหิ อสทฺธเมฺมหิ อภิภูโต ปริยาทินฺนจิโตฺต เทวทโตฺต อาปายิโก เนรยิโก กปฺปโฎฺฐ อเตกิโจฺฉ’’ติฯ เอตมตฺถํ ภควา อโวจฯ ตเตฺถตํ อิติ วุจฺจติ –

    ‘‘Tīhi, bhikkhave, asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho. Katamehi tīhi? Pāpicchatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Pāpamittatāya, bhikkhave, abhibhūto pariyādinnacitto devadatto āpāyiko nerayiko kappaṭṭho atekiccho. Sati kho pana uttarikaraṇīye 3 oramattakena visesādhigamena 4 antarā vosānaṃ āpādi. Imehi kho, bhikkhave, tīhi asaddhammehi abhibhūto pariyādinnacitto devadatto āpāyiko nerayiko kappaṭṭho atekiccho’’ti. Etamatthaṃ bhagavā avoca. Tatthetaṃ iti vuccati –

    ‘‘มา ชาตุ โกจิ โลกสฺมิํ, ปาปิโจฺฉ อุทปชฺชถ;

    ‘‘Mā jātu koci lokasmiṃ, pāpiccho udapajjatha;

    ตทมินาปิ ชานาถ, ปาปิจฺฉานํ ยถา คติฯ

    Tadamināpi jānātha, pāpicchānaṃ yathā gati.

    ‘‘ปณฺฑิโตติ สมญฺญาโต, ภาวิตโตฺตติ สมฺมโต;

    ‘‘Paṇḍitoti samaññāto, bhāvitattoti sammato;

    ชลํว ยสสา อฎฺฐา, เทวทโตฺตติ วิสฺสุโต 5ฯ

    Jalaṃva yasasā aṭṭhā, devadattoti vissuto 6.

    ‘‘โส ปมาณมนุจิโณฺณ 7, อาสชฺช นํ ตถาคตํ;

    ‘‘So pamāṇamanuciṇṇo 8, āsajja naṃ tathāgataṃ;

    อวีจินิรยํ ปโตฺต, จตุทฺวารํ ภยานกํฯ

    Avīcinirayaṃ patto, catudvāraṃ bhayānakaṃ.

    ‘‘อทุฎฺฐสฺส หิ โย ทุเพฺภ, ปาปกมฺมํ อกุพฺพโต;

    ‘‘Aduṭṭhassa hi yo dubbhe, pāpakammaṃ akubbato;

    ตเมว ปาปํ ผุสติ 9, ทุฎฺฐจิตฺตํ อนาทรํฯ

    Tameva pāpaṃ phusati 10, duṭṭhacittaṃ anādaraṃ.

    ‘‘สมุทฺทํ วิสกุเมฺภน, โย มเญฺญยฺย ปทูสิตุํ;

    ‘‘Samuddaṃ visakumbhena, yo maññeyya padūsituṃ;

    น โส เตน ปทูเสยฺย, เภสฺมา หิ อุทธิ มหาฯ

    Na so tena padūseyya, bhesmā hi udadhi mahā.

    ‘‘เอวเมว 11 ตถาคตํ, โย วาเทน วิหิํสติ;

    ‘‘Evameva 12 tathāgataṃ, yo vādena vihiṃsati;

    สมฺมคฺคตํ 13 สนฺตจิตฺตํ, วาโท ตมฺหิ น รูหติฯ

    Sammaggataṃ 14 santacittaṃ, vādo tamhi na rūhati.

    ‘‘ตาทิสํ มิตฺตํ กุเพฺพถ, ตญฺจ เสเวยฺย ปณฺฑิโต;

    ‘‘Tādisaṃ mittaṃ kubbetha, tañca seveyya paṇḍito;

    ยสฺส มคฺคานุโค ภิกฺขุ, ขยํ ทุกฺขสฺส ปาปุเณ’’ติฯ

    Yassa maggānugo bhikkhu, khayaṃ dukkhassa pāpuṇe’’ti.

    อยมฺปิ อโตฺถ วุโตฺต ภควตา, อิติ เม สุตนฺติฯ ทสมํฯ

    Ayampi attho vutto bhagavatā, iti me sutanti. Dasamaṃ.

    จตุโตฺถ วโคฺค นิฎฺฐิโตฯ

    Catuttho vaggo niṭṭhito.

    ตสฺสุทฺทานํ –

    Tassuddānaṃ –

    วิตกฺกาสกฺการสทฺท, จวนโลเก อสุภํ;

    Vitakkāsakkārasadda, cavanaloke asubhaṃ;

    ธมฺมอนฺธการมลํ, เทวทเตฺตน เต ทสาติฯ

    Dhammaandhakāramalaṃ, devadattena te dasāti.




    Next: ๕. ปญฺจมวโคฺค • 5. Pañcamavaggo




    Footnotes:
    1. อุตฺตริํ กรณีเย (สฺยา.)
    2. วิเสสาธิคเมน จ (สฺยา. ปี.)
    3. uttariṃ karaṇīye (syā.)
    4. visesādhigamena ca (syā. pī.)
    5. เม สุตํ (ปาฬิยํ)
    6. me sutaṃ (pāḷiyaṃ)
    7. ปมาทมนุจิโณฺณ (ก. สี. สฺยา. ปี.), สมานมนุจิโณฺณ (อฎฺฐ.)
    8. pamādamanuciṇṇo (ka. sī. syā. pī.), samānamanuciṇṇo (aṭṭha.)
    9. ผุเสฺสติ (สฺยา.)
    10. phusseti (syā.)
    11. เอวเมตํ (สฺยา.)
    12. evametaṃ (syā.)
    13. สมคฺคตํ (สี. ก.)
    14. samaggataṃ (sī. ka.)



    Related texts:



    อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อิติวุตฺตก-อฎฺฐกถา • Itivuttaka-aṭṭhakathā / ๑๐. เทวทตฺตสุตฺตวณฺณนา • 10. Devadattasuttavaṇṇanā


    © 1991-2023 The Titi Tudorancea Bulletin | Titi Tudorancea® is a Registered Trademark | Terms of use and privacy policy
    Contact