| Library / Tipiṭaka / திபிடக • Tipiṭaka / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) |
6. தே³வதூ³தஸுத்தவண்ணனா
6. Devadūtasuttavaṇṇanā
36. ச²ட்டே² தே³வதூ³தானீதி தே³வதூ³தா. அயங் பனெத்த² வசனத்தோ² – தே³வோதி மச்சு, தஸ்ஸ தூ³தாதி தே³வதூ³தா. ஜிண்ணப்³யாதி⁴மதா ஹி ஸங்வேக³ஜனநட்டே²ன ‘‘இதா³னி தே மச்சுஸமீபங் க³ந்தப்³ப³’’ந்தி சோதெ³ந்தி விய, தஸ்மா தே³வதூ³தாதி வுச்சந்தி. தே³வா விய தூ³தாதிபி தே³வதூ³தா. யதா² ஹி அலங்கதபடியத்தாய தே³வதாய ஆகாஸே ட²த்வா ‘‘த்வங் அஸுகதி³வஸே மரிஸ்ஸஸீ’’தி வுத்தே தஸ்ஸா வசனங் ஸத்³தா⁴தப்³ப³ங் ஹோதி; ஏவமேவங் ஜிண்ணப்³யாதி⁴மதாபி தி³ஸ்ஸமானா ‘‘த்வம்பி ஏவங்த⁴ம்மோ’’தி சோதெ³ந்தி விய, தேஸஞ்ச தங் வசனங் அனஞ்ஞதா²பா⁴விதாய தே³வதாய ப்³யாகரணஸதி³ஸமேவ ஹோதீதி தே³வா விய தூ³தாதி தே³வதூ³தா. விஸுத்³தி⁴தே³வானங் தூ³தாதிபி தே³வதூ³தா. ஸப்³ப³போ³தி⁴ஸத்தா ஹி ஜிண்ணப்³யாதி⁴மதபப்³ப³ஜிதே தி³ஸ்வாவ ஸங்வேக³ங் ஆபஜ்ஜித்வா நிக்க²ம்ம பப்³ப³ஜிங்ஸு. ஏவங் விஸுத்³தி⁴தே³வானங் தூ³தாதிபி தே³வதூ³தா. இத⁴ பன லிங்க³விபல்லாஸேன ‘‘தே³வதூ³தானீ’’தி வுத்தங்.
36. Chaṭṭhe devadūtānīti devadūtā. Ayaṃ panettha vacanattho – devoti maccu, tassa dūtāti devadūtā. Jiṇṇabyādhimatā hi saṃvegajananaṭṭhena ‘‘idāni te maccusamīpaṃ gantabba’’nti codenti viya, tasmā devadūtāti vuccanti. Devā viya dūtātipi devadūtā. Yathā hi alaṅkatapaṭiyattāya devatāya ākāse ṭhatvā ‘‘tvaṃ asukadivase marissasī’’ti vutte tassā vacanaṃ saddhātabbaṃ hoti; evamevaṃ jiṇṇabyādhimatāpi dissamānā ‘‘tvampi evaṃdhammo’’ti codenti viya, tesañca taṃ vacanaṃ anaññathābhāvitāya devatāya byākaraṇasadisameva hotīti devā viya dūtāti devadūtā. Visuddhidevānaṃ dūtātipi devadūtā. Sabbabodhisattā hi jiṇṇabyādhimatapabbajite disvāva saṃvegaṃ āpajjitvā nikkhamma pabbajiṃsu. Evaṃ visuddhidevānaṃ dūtātipi devadūtā. Idha pana liṅgavipallāsena ‘‘devadūtānī’’ti vuttaṃ.
காயேன து³ச்சரிதந்திஆதி³ கஸ்மா ஆரத்³த⁴ங்? தே³வதூ³தானுயுஞ்ஜனட்டா²னுபக்கமகம்மத³ஸ்ஸனத்த²ங். இமினா ஹி கம்மேன அயங் ஸத்தோ நிரயே நிப்³ப³த்ததி, அத² நங் தத்த² யமோ ராஜா தே³வதூ³தே ஸமனுயுஞ்ஜதி. தத்த² காயேன து³ச்சரிதங் சரதீதி காயத்³வாரேன திவித⁴ங் து³ச்சரிதங் சரதி. வாசாயாதி வசீத்³வாரேன சதுப்³பி³த⁴ங் து³ச்சரிதங் சரதி. மனஸாதி மனொத்³வாரேன திவித⁴ங் து³ச்சரிதங் சரதி.
Kāyenaduccaritantiādi kasmā āraddhaṃ? Devadūtānuyuñjanaṭṭhānupakkamakammadassanatthaṃ. Iminā hi kammena ayaṃ satto niraye nibbattati, atha naṃ tattha yamo rājā devadūte samanuyuñjati. Tattha kāyena duccaritaṃ caratīti kāyadvārena tividhaṃ duccaritaṃ carati. Vācāyāti vacīdvārena catubbidhaṃ duccaritaṃ carati. Manasāti manodvārena tividhaṃ duccaritaṃ carati.
தமேனங், பி⁴க்க²வே, நிரயபாலாதி எத்த² ஏகச்சே தே²ரா ‘‘நிரயபாலா நாம நத்தி², யந்தரூபங் விய கம்மமேவ காரணங் காரேதீ’’தி வத³ந்தி. தங் ‘‘அத்தி² நிரயே நிரயபாலாதி, ஆமந்தா. அத்தி² ச காரணிகா’’திஆதி³னா நயேன அபி⁴த⁴ம்மே (கதா²॰ 866) படிஸேதி⁴தமேவ. யதா² ஹி மனுஸ்ஸலோகே கம்மகாரணகாரகா அத்தி², ஏவமேவ நிரயே நிரயபாலா அத்தீ²தி. யமஸ்ஸ ரஞ்ஞோதி யமராஜா நாம வேமானிகபேதராஜா. ஏகஸ்மிங் காலே தி³ப்³ப³விமானே தி³ப்³ப³கப்பருக்க²தி³ப்³ப³உய்யானதி³ப்³ப³னாடகாதி³ஸப்³ப³ஸம்பத்திங் அனுப⁴வதி, ஏகஸ்மிங் காலே கம்மவிபாகங், த⁴ம்மிகோ ராஜா, ந சேஸ ஏகோவ ஹோதி, சதூஸு பன த்³வாரேஸு சத்தாரோ ஜனா ஹொந்தி. அமத்தெய்யோதி மாது ஹிதோ மத்தெய்யோ, மாதரி ஸம்மா படிபன்னோதி அத்தோ². ந மத்தெய்யோதி அமத்தெய்யோ, மாதரி மிச்சா² படிபன்னோதி அத்தோ². ஸேஸபதே³ஸுபி ஏஸேவ நயோ. அப்³ரஹ்மஞ்ஞோதி எத்த² ச கீ²ணாஸவா ப்³ராஹ்மணா நாம, தேஸு மிச்சா² படிபன்னோ அப்³ரஹ்மஞ்ஞோ நாம.
Tamenaṃ, bhikkhave, nirayapālāti ettha ekacce therā ‘‘nirayapālā nāma natthi, yantarūpaṃ viya kammameva kāraṇaṃ kāretī’’ti vadanti. Taṃ ‘‘atthi niraye nirayapālāti, āmantā. Atthi ca kāraṇikā’’tiādinā nayena abhidhamme (kathā. 866) paṭisedhitameva. Yathā hi manussaloke kammakāraṇakārakā atthi, evameva niraye nirayapālā atthīti. Yamassaraññoti yamarājā nāma vemānikapetarājā. Ekasmiṃ kāle dibbavimāne dibbakapparukkhadibbauyyānadibbanāṭakādisabbasampattiṃ anubhavati, ekasmiṃ kāle kammavipākaṃ, dhammiko rājā, na cesa ekova hoti, catūsu pana dvāresu cattāro janā honti. Amatteyyoti mātu hito matteyyo, mātari sammā paṭipannoti attho. Na matteyyoti amatteyyo, mātari micchā paṭipannoti attho. Sesapadesupi eseva nayo. Abrahmaññoti ettha ca khīṇāsavā brāhmaṇā nāma, tesu micchā paṭipanno abrahmañño nāma.
ஸமனுயுஞ்ஜதீதி அனுயோக³வத்தங் ஆரோபெந்தோ புச்ச²தி, லத்³தி⁴ங் பதிட்டா²பெந்தோ பன ஸமனுக்³கா³ஹதி நாம, காரணங் புச்ச²ந்தோ ஸமனுபா⁴ஸதி நாம. நாத்³த³ஸந்தி அத்தனோ ஸந்திகே பஹிதஸ்ஸ கஸ்ஸசி தே³வதூ³தஸ்ஸ அபா⁴வங் ஸந்தா⁴ய ஏவங் வத³தி.
Samanuyuñjatīti anuyogavattaṃ āropento pucchati, laddhiṃ patiṭṭhāpento pana samanuggāhati nāma, kāraṇaṃ pucchanto samanubhāsati nāma. Nāddasanti attano santike pahitassa kassaci devadūtassa abhāvaṃ sandhāya evaṃ vadati.
அத² நங் யமோ ‘‘நாயங் பா⁴ஸிதஸ்ஸ அத்த²ங் ஸல்லக்கே²தீ’’தி ஞத்வா அத்த²ங் ஸல்லக்கா²பேதுகாமோ அம்போ⁴திஆதி³மாஹ. தத்த² ஜிண்ணந்தி ஜராஜிண்ணங். கோ³பானஸிவங்கந்தி கோ³பானஸீ விய வங்கங். பொ⁴க்³க³ந்தி ப⁴க்³க³ங். இமினாபிஸ்ஸ வங்கபா⁴வமேவ தீ³பேதி. த³ண்ட³பராயணந்தி த³ண்ட³படிஸரணங் த³ண்ட³து³தியங். பவேத⁴மானந்தி கம்பமானங். ஆதுரந்தி ஜராதுரங். க²ண்ட³த³ந்தந்தி ஜரானுபா⁴வேன க²ண்டி³தத³ந்தங். பலிதகேஸந்தி பண்ட³ரகேஸங். விலூனந்தி லுஞ்சித்வா க³ஹிதகேஸங் விய க²ல்லாடங். க²லிதஸிரந்தி மஹாக²ல்லாடஸீஸங். வலிதந்தி ஸஞ்ஜாதவலிங். திலகாஹதக³த்தந்தி ஸேததிலககாளதிலகேஹி விகிண்ணஸரீரங். ஜராத⁴ம்மோதி ஜராஸபா⁴வோ, அபரிமுத்தோ ஜராய, ஜரா நாம மய்ஹங் அப்³ப⁴ந்தரேயேவ பவத்ததீதி. பரதோ ப்³யாதி⁴த⁴ம்மோ மரணத⁴ம்மோதி பத³த்³வயேபி ஏஸேவ நயோ.
Atha naṃ yamo ‘‘nāyaṃ bhāsitassa atthaṃ sallakkhetī’’ti ñatvā atthaṃ sallakkhāpetukāmo ambhotiādimāha. Tattha jiṇṇanti jarājiṇṇaṃ. Gopānasivaṅkanti gopānasī viya vaṅkaṃ. Bhogganti bhaggaṃ. Imināpissa vaṅkabhāvameva dīpeti. Daṇḍaparāyaṇanti daṇḍapaṭisaraṇaṃ daṇḍadutiyaṃ. Pavedhamānanti kampamānaṃ. Āturanti jarāturaṃ. Khaṇḍadantanti jarānubhāvena khaṇḍitadantaṃ. Palitakesanti paṇḍarakesaṃ. Vilūnanti luñcitvā gahitakesaṃ viya khallāṭaṃ. Khalitasiranti mahākhallāṭasīsaṃ. Valitanti sañjātavaliṃ. Tilakāhatagattanti setatilakakāḷatilakehi vikiṇṇasarīraṃ. Jarādhammoti jarāsabhāvo, aparimutto jarāya, jarā nāma mayhaṃ abbhantareyeva pavattatīti. Parato byādhidhammo maraṇadhammoti padadvayepi eseva nayo.
பட²மங் தே³வதூ³தங் ஸமனுயுஞ்ஜித்வாதி எத்த² ஜராஜிண்ணஸத்தோ அத்த²தோ ஏவங் வத³தி நாம – ‘‘பஸ்ஸத², போ⁴, அஹம்பி தும்ஹே விய தருணோ அஹோஸிங் ஊருப³லீ பா³ஹுப³லீ ஜவஸம்பன்னோ, தஸ்ஸ மே தா ப³லஜவஸம்பத்தியோ அந்தரஹிதா, விஜ்ஜமானாபி மே ஹத்த²பாதா³ ஹத்த²பாத³கிச்சங் ந கரொந்தி, ஜராயம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி ஜராய அபரிமுத்தாவ. யதே²வ ஹி மய்ஹங், ஏவங் தும்ஹாகம்பி ஜரா ஆக³மிஸ்ஸதி. இதி தஸ்ஸா புரே ஆக³மனாவ கல்யாணங் கரோதா²’’தி . தேனேவேஸ தே³வதூ³தோ நாம ஜாதோ. ஆபா³தி⁴கந்தி பா³தி⁴கங். து³க்கி²தந்தி து³க்க²ப்பத்தங். பா³ள்ஹகி³லானந்தி அதி⁴மத்தகி³லானங்.
Paṭhamaṃ devadūtaṃ samanuyuñjitvāti ettha jarājiṇṇasatto atthato evaṃ vadati nāma – ‘‘passatha, bho, ahampi tumhe viya taruṇo ahosiṃ ūrubalī bāhubalī javasampanno, tassa me tā balajavasampattiyo antarahitā, vijjamānāpi me hatthapādā hatthapādakiccaṃ na karonti, jarāyamhi aparimuttatāya ediso jāto. Na kho panāhameva, tumhepi jarāya aparimuttāva. Yatheva hi mayhaṃ, evaṃ tumhākampi jarā āgamissati. Iti tassā pure āgamanāva kalyāṇaṃ karothā’’ti . Tenevesa devadūto nāma jāto. Ābādhikanti bādhikaṃ. Dukkhitanti dukkhappattaṃ. Bāḷhagilānanti adhimattagilānaṃ.
து³தியங் தே³வதூ³தந்தி எத்த²பி கி³லானஸத்தோ அத்த²தோ ஏவங் வத³தி நாம – ‘‘பஸ்ஸத², போ⁴, அஹம்பி தும்ஹே விய நிரோகோ³ அஹோஸிங், ஸொம்ஹி ஏதரஹி ப்³யாதி⁴னா அபி⁴ஹதோ, ஸகே முத்தகரீஸே பலிபன்னோ, உட்டா²தும்பி ந ஸக்கோமி. விஜ்ஜமானாபி மே ஹத்த²பாதா³ ஹத்த²பாத³கிச்சங் ந கரொந்தி, ப்³யாதி⁴தொம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி ப்³யாதி⁴தோ அபரிமுத்தாவ. யதே²வ ஹி மய்ஹங், ஏவங் தும்ஹாகம்பி ப்³யாதி⁴ ஆக³மிஸ்ஸதி. இதி தஸ்ஸ புரே ஆக³மனாவ கல்யாணங் கரோதா²’’தி. தேனேவேஸ தே³வதூ³தோ நாம ஜாதோ.
Dutiyaṃ devadūtanti etthapi gilānasatto atthato evaṃ vadati nāma – ‘‘passatha, bho, ahampi tumhe viya nirogo ahosiṃ, somhi etarahi byādhinā abhihato, sake muttakarīse palipanno, uṭṭhātumpi na sakkomi. Vijjamānāpi me hatthapādā hatthapādakiccaṃ na karonti, byādhitomhi aparimuttatāya ediso jāto. Na kho panāhameva, tumhepi byādhito aparimuttāva. Yatheva hi mayhaṃ, evaṃ tumhākampi byādhi āgamissati. Iti tassa pure āgamanāva kalyāṇaṃ karothā’’ti. Tenevesa devadūto nāma jāto.
ஏகாஹமதந்திஆதீ³ஸு ஏகாஹங் மதஸ்ஸ அஸ்ஸாதி ஏகாஹமதோ, தங் ஏகாஹமதங். பரதோ பத³த்³வயேபி ஏஸேவ நயோ. ப⁴ஸ்தா விய வாயுனா உத்³த⁴ங் ஜீவிதபரியாதா³னா யதா²க்கமங் ஸமுக்³க³தேன ஸூனபா⁴வேன உத்³து⁴மாதத்தா உத்³து⁴மாதகங். வினீலோ வுச்சதி விபரிபி⁴ன்னவண்ணோ, வினீலோவ வினீலகோ, தங் வினீலகங். படிகூலத்தா வா குச்சி²தங் வினீலந்தி வினீலகங். விபுப்³ப³கந்தி விஸ்ஸந்த³மானபுப்³ப³கங், பரிபி⁴ன்னட்டா²னே ஹி பக்³க⁴ரிதேன புப்³பே³ன பலிமக்கி²தந்தி அத்தோ².
Ekāhamatantiādīsu ekāhaṃ matassa assāti ekāhamato, taṃ ekāhamataṃ. Parato padadvayepi eseva nayo. Bhastā viya vāyunā uddhaṃ jīvitapariyādānā yathākkamaṃ samuggatena sūnabhāvena uddhumātattā uddhumātakaṃ. Vinīlo vuccati viparibhinnavaṇṇo, vinīlova vinīlako, taṃ vinīlakaṃ. Paṭikūlattā vā kucchitaṃ vinīlanti vinīlakaṃ. Vipubbakanti vissandamānapubbakaṃ, paribhinnaṭṭhāne hi paggharitena pubbena palimakkhitanti attho.
ததியங் தே³வதூ³தந்தி எத்த² மதகஸத்தோ அத்த²தோ ஏவங் வத³தி நாம – ‘‘பஸ்ஸத², போ⁴, மங் ஆமகஸுஸானே ச²ட்³டி³தங் உத்³து⁴மாதகாதி³பா⁴வப்பத்தங், மரணதொம்ஹி அபரிமுத்ததாய ஏதி³ஸோ ஜாதோ. ந கோ² பனாஹமேவ, தும்ஹேபி மரணதோ அபரிமுத்தா. யதே²வ ஹி மய்ஹங், ஏவங் தும்ஹாகம்பி மரணங் ஆக³மிஸ்ஸதி. இதி தஸ்ஸ புரே ஆக³மனாவ கல்யாணங் கரோதா²’’தி. தேனேவஸ்ஸ தே³வதூ³தோ நாம ஜாதோ.
Tatiyaṃdevadūtanti ettha matakasatto atthato evaṃ vadati nāma – ‘‘passatha, bho, maṃ āmakasusāne chaḍḍitaṃ uddhumātakādibhāvappattaṃ, maraṇatomhi aparimuttatāya ediso jāto. Na kho panāhameva, tumhepi maraṇato aparimuttā. Yatheva hi mayhaṃ, evaṃ tumhākampi maraṇaṃ āgamissati. Iti tassa pure āgamanāva kalyāṇaṃ karothā’’ti. Tenevassa devadūto nāma jāto.
இமங் பன தே³வதூ³தானுயோக³ங் கோ லப⁴தி, கோ ந லப⁴தி? யேன தாவ ப³ஹுங் பாபங் கதங், ஸோ க³ந்த்வா நிரயே நிப்³ப³த்ததியேவ. யேன பன பரித்தங் பாபங் கதங், ஸோ லப⁴தி. யதா² ஹி ஸப⁴ண்ட³ங் சோரங் க³ஹெத்வா கத்தப்³ப³மேவ கரொந்தி ந வினிச்சி²னந்தி. அனுவிஜ்ஜித்வா க³ஹிதங் பன வினிச்ச²யட்டா²னங் நயந்தி, ஸோ வினிச்ச²யங் லப⁴தி. ஏவங்ஸம்பத³மேதங். பரித்தபாபகம்மா ஹி அத்தனோ த⁴ம்மதாயபி ஸரந்தி, ஸாரீயமானாபி ஸரந்தி.
Imaṃ pana devadūtānuyogaṃ ko labhati, ko na labhati? Yena tāva bahuṃ pāpaṃ kataṃ, so gantvā niraye nibbattatiyeva. Yena pana parittaṃ pāpaṃ kataṃ, so labhati. Yathā hi sabhaṇḍaṃ coraṃ gahetvā kattabbameva karonti na vinicchinanti. Anuvijjitvā gahitaṃ pana vinicchayaṭṭhānaṃ nayanti, so vinicchayaṃ labhati. Evaṃsampadametaṃ. Parittapāpakammā hi attano dhammatāyapi saranti, sārīyamānāpi saranti.
தத்த² தீ³க⁴ஜயந்தத³மிளோ நாம அத்தனோ த⁴ம்மதாய ஸரி. ஸோ கிர த³மிளோ ஸுமனகி³ரிமஹாவிஹாரே ஆகாஸசேதியங் ரத்தபடேன பூஜேஸி, அத² நிரயே உஸ்ஸத³ஸாமந்தே நிப்³ப³த்தோ அக்³கி³ஜாலஸத்³த³ங் ஸுத்வாவ அத்தனா பூஜிதபடங் அனுஸ்ஸரி, ஸோ க³ந்த்வா ஸக்³கே³ நிப்³ப³த்தோ. அபரோபி புத்தஸ்ஸ த³ஹரபி⁴க்கு²னோ க²லிஸாடகங் தெ³ந்தோ பாத³மூலே ட²பேஸி, மரணகாலம்ஹி படபடாதி ஸத்³தே³ நிமித்தங் க³ண்ஹி , ஸோபி உஸ்ஸத³ஸாமந்தே நிப்³ப³த்தோ ஜாலஸத்³தே³ன தங் ஸாடகங் அனுஸ்ஸரித்வா ஸக்³கே³ நிப்³ப³த்தோ. ஏவங் தாவ அத்தனோ த⁴ம்மதாய குஸலங் கம்மங் ஸரித்வா ஸக்³கே³ நிப்³ப³த்ததீதி.
Tattha dīghajayantadamiḷo nāma attano dhammatāya sari. So kira damiḷo sumanagirimahāvihāre ākāsacetiyaṃ rattapaṭena pūjesi, atha niraye ussadasāmante nibbatto aggijālasaddaṃ sutvāva attanā pūjitapaṭaṃ anussari, so gantvā sagge nibbatto. Aparopi puttassa daharabhikkhuno khalisāṭakaṃ dento pādamūle ṭhapesi, maraṇakālamhi paṭapaṭāti sadde nimittaṃ gaṇhi , sopi ussadasāmante nibbatto jālasaddena taṃ sāṭakaṃ anussaritvā sagge nibbatto. Evaṃ tāva attano dhammatāya kusalaṃ kammaṃ saritvā sagge nibbattatīti.
அத்தனோ த⁴ம்மதாய அஸரந்தே பன தயோ தே³வதூ³தே புச்ச²தி. தத்த² கோசி பட²மேன தே³வதூ³தேன ஸரதி, கோசி து³தியததியேஹி, கோசி தீஹிபி நஸ்ஸரதி. தங் யமோ ராஜா தி³ஸ்வா ஸயங் ஸாரேதி. ஏகோ கிர அமச்சோ ஸுமனபுப்ப²கும்பே⁴ன மஹாசேதியங் பூஜெத்வா யமஸ்ஸ பத்திங் அதா³ஸி, தங் அகுஸலகம்மேன நிரயே நிப்³ப³த்தங் யமஸ்ஸ ஸந்திகங் நயிங்ஸு. தஸ்மிங் தீஹிபி தே³வதூ³தேஹி குஸலங் அஸரந்தே யமோ ஸயங் ஓலோகெந்தோ தி³ஸ்வா – ‘‘நனு த்வங் மஹாசேதியங் ஸுமனபுப்ப²கும்பே⁴ன பூஜெத்வா மய்ஹங் பத்திங் அதா³ஸீ’’தி ஸாரேஸி, ஸோ தஸ்மிங் காலே ஸரித்வா தே³வலோகங் க³தோ . யமோ பன ஸயங் ஓலோகெத்வாபி அபஸ்ஸந்தோ – ‘‘மஹாது³க்க²ங் நாம அனுப⁴விஸ்ஸதி அயங் ஸத்தோ’’தி துண்ஹீ அஹோஸி.
Attano dhammatāya asarante pana tayo devadūte pucchati. Tattha koci paṭhamena devadūtena sarati, koci dutiyatatiyehi, koci tīhipi nassarati. Taṃ yamo rājā disvā sayaṃ sāreti. Eko kira amacco sumanapupphakumbhena mahācetiyaṃ pūjetvā yamassa pattiṃ adāsi, taṃ akusalakammena niraye nibbattaṃ yamassa santikaṃ nayiṃsu. Tasmiṃ tīhipi devadūtehi kusalaṃ asarante yamo sayaṃ olokento disvā – ‘‘nanu tvaṃ mahācetiyaṃ sumanapupphakumbhena pūjetvā mayhaṃ pattiṃ adāsī’’ti sāresi, so tasmiṃ kāle saritvā devalokaṃ gato . Yamo pana sayaṃ oloketvāpi apassanto – ‘‘mahādukkhaṃ nāma anubhavissati ayaṃ satto’’ti tuṇhī ahosi.
தத்தங் அயோகி²லந்தி திகா³வுதங் அத்தபா⁴வங் ஸம்பஜ்ஜலிதாய லோஹபத²வியா உத்தானகங் நிபஜ்ஜாபெத்வா த³க்கி²ணஹத்தே² தாலப்பமாணங் அயஸூலங் பவேஸெந்தி, ததா² வாமஹத்தா²தீ³ஸு. யதா² ச தங் உத்தானகங் நிபஜ்ஜாபெத்வா, ஏவங் உரேனபி வாமபஸ்ஸேனபி த³க்கி²ணபஸ்ஸேனபி நிபஜ்ஜாபெத்வா தே தங் கம்மகாரணங் கரொந்தியேவ. ஸங்வேஸெத்வாதி ஜலிதாய லோஹபத²வியா திகா³வுதங் அத்தபா⁴வங் நிபஜ்ஜாபெத்வா. குடா²ரீஹீதி மஹதீஹி கே³ஹஸ்ஸ ஏகபக்க²ச்ச²த³னமத்தாஹி குடா²ரீஹி தச்ச²ந்தி, லோஹிதங் நதீ³ ஹுத்வா ஸந்த³தி, லோஹபத²விதோ ஜாலா உட்ட²ஹித்வா தச்சி²தட்டா²னங் க³ண்ஹாதி, மஹாது³க்க²ங் உப்பஜ்ஜதி. தச்ச²ந்தா பன ஸுத்தாஹதங் கரித்வா தா³ருங் விய அட்ட²ங்ஸம்பி ச²ளங்ஸம்பி கரொந்தி. வாஸீஹீதி மஹாஸுப்பப்பமாணாஹி வாஸீஹி. ரதே² யோஜெத்வாதி ஸத்³தி⁴ங் யுக³யொத்தபக்க²ரத²சக்ககுப்³ப³ரபாஜனேஹி ஸப்³ப³தோ பஜ்ஜலிதே ரதே² யோஜெத்வா. மஹந்தந்தி மஹாகூடாகா³ரப்பமாணங். ஆரோபெந்தீதி ஸம்பஜ்ஜலிதேஹி அயமுக்³க³ரேஹி போதெ²ந்தா ஆரோபெந்தி. ஸகிம்பி உத்³த⁴ந்தி ஸுபக்குதி²தாய உக்க²லியா பக்கி²த்ததண்டு³லா விய உத்³த⁴மதோ⁴திரியஞ்ச க³ச்ச²தி. மஹானிரயேதி அவீசிமஹானிரயம்ஹி.
Tattaṃ ayokhilanti tigāvutaṃ attabhāvaṃ sampajjalitāya lohapathaviyā uttānakaṃ nipajjāpetvā dakkhiṇahatthe tālappamāṇaṃ ayasūlaṃ pavesenti, tathā vāmahatthādīsu. Yathā ca taṃ uttānakaṃ nipajjāpetvā, evaṃ urenapi vāmapassenapi dakkhiṇapassenapi nipajjāpetvā te taṃ kammakāraṇaṃ karontiyeva. Saṃvesetvāti jalitāya lohapathaviyā tigāvutaṃ attabhāvaṃ nipajjāpetvā. Kuṭhārīhīti mahatīhi gehassa ekapakkhacchadanamattāhi kuṭhārīhi tacchanti, lohitaṃ nadī hutvā sandati, lohapathavito jālā uṭṭhahitvā tacchitaṭṭhānaṃ gaṇhāti, mahādukkhaṃ uppajjati. Tacchantā pana suttāhataṃ karitvā dāruṃ viya aṭṭhaṃsampi chaḷaṃsampi karonti. Vāsīhīti mahāsuppappamāṇāhi vāsīhi. Rathe yojetvāti saddhiṃ yugayottapakkharathacakkakubbarapājanehi sabbato pajjalite rathe yojetvā. Mahantanti mahākūṭāgārappamāṇaṃ. Āropentīti sampajjalitehi ayamuggarehi pothentā āropenti. Sakimpi uddhanti supakkuthitāya ukkhaliyā pakkhittataṇḍulā viya uddhamadhotiriyañca gacchati. Mahānirayeti avīcimahānirayamhi.
பா⁴க³ஸோ மிதோதி பா⁴கே³ ட²பெத்வா விப⁴த்தோ. பரியந்தோதி பரிக்கி²த்தோ. அயஸாதி உபரி அயபட்டேன சா²தி³தோ. ஸமந்தா யோஜனஸதங், ப²ரித்வா திட்ட²தீதி ஏவங் ப²ரித்வா திட்ட²தி, யதா² தங் ஸமந்தா யோஜனஸதே ட²த்வா ஓலோகெந்தஸ்ஸ அக்கீ²னி யமககோ³ளகா விய நிக்க²மந்தி.
Bhāgasomitoti bhāge ṭhapetvā vibhatto. Pariyantoti parikkhitto. Ayasāti upari ayapaṭṭena chādito. Samantā yojanasataṃ, pharitvā tiṭṭhatīti evaṃ pharitvā tiṭṭhati, yathā taṃ samantā yojanasate ṭhatvā olokentassa akkhīni yamakagoḷakā viya nikkhamanti.
ஹீனகாயூபகா³தி ஹீனங் காயங் உபக³தா ஹுத்வா. உபாதா³னேதி தண்ஹாதி³ட்டி²க்³க³ஹணே. ஜாதிமரணஸம்ப⁴வேதி ஜாதியா ச மரணஸ்ஸ ச காரணபூ⁴தே. அனுபாதா³தி சதூஹி உபாதா³னேஹி அனுபாதி³யித்வா. ஜாதிமரணஸங்க²யேதி ஜாதிமரணஸங்க²யஸங்கா²தே நிப்³பா³னே விமுச்சந்தி. தி³ட்ட²த⁴ம்மாபி⁴னிப்³பு³தாதி தி³ட்ட²த⁴ம்மே இமஸ்மிங்யேவ அத்தபா⁴வே ஸப்³ப³கிலேஸனிப்³பா³னேன நிப்³பு³தா. ஸப்³ப³து³க்க²ங் உபச்சகு³ந்தி ஸகலவட்டது³க்க²ங் அதிக்கந்தா.
Hīnakāyūpagāti hīnaṃ kāyaṃ upagatā hutvā. Upādāneti taṇhādiṭṭhiggahaṇe. Jātimaraṇasambhaveti jātiyā ca maraṇassa ca kāraṇabhūte. Anupādāti catūhi upādānehi anupādiyitvā. Jātimaraṇasaṅkhayeti jātimaraṇasaṅkhayasaṅkhāte nibbāne vimuccanti. Diṭṭhadhammābhinibbutāti diṭṭhadhamme imasmiṃyeva attabhāve sabbakilesanibbānena nibbutā. Sabbadukkhaṃ upaccagunti sakalavaṭṭadukkhaṃ atikkantā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. தே³வதூ³தஸுத்தங் • 6. Devadūtasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / அங்கு³த்தரனிகாய (டீகா) • Aṅguttaranikāya (ṭīkā) / 6. தே³வதூ³தஸுத்தவண்ணனா • 6. Devadūtasuttavaṇṇanā
