| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
6. தே³வதூ³தஸுத்தவண்ணனா
6. Devadūtasuttavaṇṇanā
36. ச²ட்டே² தே³வதூ³தானீதி லிங்க³விபல்லாஸங் கத்வா வுத்தந்தி ஆஹ ‘‘தே³வதூ³தா’’தி, உப⁴யலிங்க³ங் வா ஏதங் பத³ங், தஸ்மா நபுங்ஸகலிங்க³வஸேன பாளியங் வுத்தஸ்ஸ புல்லிங்க³வஸேன அத்த²த³ஸ்ஸனங் கதங். தே³வோதி மச்சூதி அபி⁴ப⁴வனட்டே²ன ஸத்தானங் அத்தனோ வஸே வத்தாபனதோ மச்சுராஜா ‘‘தே³வோ’’தி வுச்சதி. யதா² ஹி தே³வோ பகதிஸத்தே அபி⁴ப⁴வதி, ஏவங் மச்சு ஸப்³ப³ஸத்தே அபி⁴ப⁴வதி, தஸ்மா தே³வோ வியாதி தே³வோ. ‘‘தஸ்ஸ தூ³தா’’தி வத்வா இதா³னிஸ்ஸ தூ³தே தேஸங் தூ³தபா⁴வஞ்ச விபா⁴வேதுங் ‘‘ஜிண்ணப்³யாதி⁴மதா ஹீ’’திஆதி³ வுத்தங். தேன சோத³னத்தே²ன தே³வஸ்ஸ தூ³தா வியாதி தே³வதூ³தாதி த³ஸ்ஸேதி. ‘‘அஹங் அஸுகங் பமத்³தி³துங் ஆக³மிஸ்ஸாமி, துவங் தஸ்ஸ கேஸே க³ஹெத்வா மா விஸ்ஸஜ்ஜேஹீ’’தி மச்சுதே³வஸ்ஸ ஆணாகரா தூ³தா வியாதி ஹி தூ³தாதி வுச்சந்தி.
36. Chaṭṭhe devadūtānīti liṅgavipallāsaṃ katvā vuttanti āha ‘‘devadūtā’’ti, ubhayaliṅgaṃ vā etaṃ padaṃ, tasmā napuṃsakaliṅgavasena pāḷiyaṃ vuttassa pulliṅgavasena atthadassanaṃ kataṃ. Devoti maccūti abhibhavanaṭṭhena sattānaṃ attano vase vattāpanato maccurājā ‘‘devo’’ti vuccati. Yathā hi devo pakatisatte abhibhavati, evaṃ maccu sabbasatte abhibhavati, tasmā devo viyāti devo. ‘‘Tassa dūtā’’ti vatvā idānissa dūte tesaṃ dūtabhāvañca vibhāvetuṃ ‘‘jiṇṇabyādhimatā hī’’tiādi vuttaṃ. Tena codanatthena devassa dūtā viyāti devadūtāti dasseti. ‘‘Ahaṃ asukaṃ pamaddituṃ āgamissāmi, tuvaṃ tassa kese gahetvā mā vissajjehī’’ti maccudevassa āṇākarā dūtā viyāti hi dūtāti vuccanti.
இதா³னி ஸத்³தா⁴தப்³ப³ட்டே²ன தே³வா விய தூ³தாதி தே³வதூ³தாதி த³ஸ்ஸெந்தோ ‘‘தே³வா விய தூ³தா’’திஆதி³மாஹ. தத்த² அலங்கதப்படியத்தாயாதி இத³ங் அத்தனோ தி³ப்³பா³னுபா⁴வங் ஆவிகத்வா டி²தாயாதி த³ஸ்ஸனத்த²ங் வுத்தங். தே³வதாய ப்³யாகரணஸதி³ஸமேவ ஹோதி ந சிரஸ்ஸேவ ஜராப்³யாதி⁴மரணஸ்ஸ ஸம்ப⁴வதோ. விஸுத்³தி⁴தே³வானந்தி கீ²ணாஸவப்³ரஹ்மானங். தே ஹி சரிமப⁴வே போ³தி⁴ஸத்தானங் ஜிண்ணாதி³பே⁴த³ங் த³ஸ்ஸெந்தி, தஸ்மா அந்திமப⁴விகபோ³தி⁴ஸத்தானங் விஸுத்³தி⁴தே³வேஹி உபட்டா²பிதபா⁴வங் உபாதா³ய தத³ஞ்ஞேஸம்பி தேஹி அனுபட்டா²பிதானம்பி ததா² வோஹரிதப்³ப³தா பரியாயஸித்³தா⁴தி வேதி³தப்³பா³. தி³ஸ்வாவாதி விஸுத்³தி⁴தே³வேஹி த³ஸ்ஸிதே தி³ஸ்வாவ. ததோயேவ ஹி தே விஸுத்³தி⁴தே³வானங் தூ³தா வுத்தா.
Idāni saddhātabbaṭṭhena devā viya dūtāti devadūtāti dassento ‘‘devā viya dūtā’’tiādimāha. Tattha alaṅkatappaṭiyattāyāti idaṃ attano dibbānubhāvaṃ āvikatvā ṭhitāyāti dassanatthaṃ vuttaṃ. Devatāya byākaraṇasadisameva hoti na cirasseva jarābyādhimaraṇassa sambhavato. Visuddhidevānanti khīṇāsavabrahmānaṃ. Te hi carimabhave bodhisattānaṃ jiṇṇādibhedaṃ dassenti, tasmā antimabhavikabodhisattānaṃ visuddhidevehi upaṭṭhāpitabhāvaṃ upādāya tadaññesampi tehi anupaṭṭhāpitānampi tathā voharitabbatā pariyāyasiddhāti veditabbā. Disvāvāti visuddhidevehi dassite disvāva. Tatoyeva hi te visuddhidevānaṃ dūtā vuttā.
கஸ்மா ஆரத்³த⁴ந்தி கேவலங் தே³வதூ³தே ஏவ ஸரூபதோ அத³ஸ்ஸெத்வாதி அதி⁴ப்பாயோ. தே³வானங் தூ³தானங் த³ஸ்ஸனூபாயத்தா ததா² வுத்தந்தி த³ஸ்ஸெந்தோ ‘‘தே³வதூ³தா…பே॰… ஸமனுயுஞ்ஜதீ’’தி ஆஹ. தத்த² தே³வதூ³தா…பே॰… த³ஸ்ஸனத்த²ந்தி தே³வதூ³தானங் அனுயுஞ்ஜனட்டா²னூபக³ஸ்ஸ கம்மஸ்ஸ த³ஸ்ஸனத்த²ங்.
Kasmā āraddhanti kevalaṃ devadūte eva sarūpato adassetvāti adhippāyo. Devānaṃ dūtānaṃ dassanūpāyattā tathā vuttanti dassento ‘‘devadūtā…pe… samanuyuñjatī’’ti āha. Tattha devadūtā…pe… dassanatthanti devadūtānaṃ anuyuñjanaṭṭhānūpagassa kammassa dassanatthaṃ.
ஏகச்சே தே²ராதி அந்த⁴காதி³கே விஞ்ஞாணவாதி³னோ ச ஸந்தா⁴ய வத³தி. நேரயிகே நிரயே பாலெந்தி ததோ நிக்³க³ந்துங் அப்பதா³னவஸேன ரக்க²ந்தீதி நிரயபாலா. அத² வா நிரயபாலதாய நேரயிகானங் நிரயது³க்கே²ன பரியோனத்³தா⁴ய அலங் ஸமத்தா²தி நிரயபாலா. தந்தி ‘‘நத்தி² நிரயபாலா’’தி வசனங். படிஸேதி⁴தமேவாதி ‘‘அத்தி² நிரயேஸு நிரயபாலா அத்தி² ச காரணிகா’’திஆதி³னா நயேன அபி⁴த⁴ம்மே (கதா²॰ 866) படிஸேதி⁴தமேவ. யதி³ நிரயபாலா நாம ந ஸியுங், கம்மகாரணாபி ந ப⁴வெய்ய. ஸதி ஹி காரணிகே கம்மகாரணாய ப⁴விதப்³ப³ந்தி அதி⁴ப்பாயோ. தேனாஹ ‘‘யதா² ஹீ’’திஆதி³. எத்தா²ஹ – ‘‘கிங் பனேதே நிரயபாலா நேரயிகா, உதா³ஹு அனேரயிகா’’தி. கிஞ்செத்த² – யதி³ தாவ நேரயிகா நிரயஸங்வத்தனியேன கம்மேன நிப்³ப³த்தா, ஸயம்பி நிரயது³க்க²ங் பச்சனுப⁴வெய்யுங், ததா² ஸதி அஞ்ஞேஸங் நேரயிகானங் கா⁴தனாய அஸமத்தா² ஸியுங், ‘‘இமே நேரயிகா இமே நிரயபாலா’’தி வவத்தா²னஞ்ச ந ஸியா. யே ச யே கா⁴தெந்தி, தேஹி ஸமானரூபப³லப்பமாணேஹி இதரேஸங் ப⁴யஸந்தாஸா ந ஸியுங். அத² அனேரயிகா, நேஸங் தத்த² கத²ங் ஸம்ப⁴வோதி? வுச்சதே – அனேரயிகா நிரயபாலா அனிரயக³திஸங்வத்தனியகம்மனிப்³ப³த்திதோ. நிரயூபபத்திஸங்வத்தனியகம்மதோ ஹி அஞ்ஞேனேவ கம்முனா தே நிப்³ப³த்தந்தி ரக்க²ஸஜாதிகத்தா. ததா² ஹி வத³ந்தி ஸப்³ப³த்தி²வாதி³னோ –
Ekacce therāti andhakādike viññāṇavādino ca sandhāya vadati. Nerayike niraye pālenti tato niggantuṃ appadānavasena rakkhantīti nirayapālā. Atha vā nirayapālatāya nerayikānaṃ nirayadukkhena pariyonaddhāya alaṃ samatthāti nirayapālā. Tanti ‘‘natthi nirayapālā’’ti vacanaṃ. Paṭisedhitamevāti ‘‘atthi nirayesu nirayapālā atthi ca kāraṇikā’’tiādinā nayena abhidhamme (kathā. 866) paṭisedhitameva. Yadi nirayapālā nāma na siyuṃ, kammakāraṇāpi na bhaveyya. Sati hi kāraṇike kammakāraṇāya bhavitabbanti adhippāyo. Tenāha ‘‘yathā hī’’tiādi. Etthāha – ‘‘kiṃ panete nirayapālā nerayikā, udāhu anerayikā’’ti. Kiñcettha – yadi tāva nerayikā nirayasaṃvattaniyena kammena nibbattā, sayampi nirayadukkhaṃ paccanubhaveyyuṃ, tathā sati aññesaṃ nerayikānaṃ ghātanāya asamatthā siyuṃ, ‘‘ime nerayikā ime nirayapālā’’ti vavatthānañca na siyā. Ye ca ye ghātenti, tehi samānarūpabalappamāṇehi itaresaṃ bhayasantāsā na siyuṃ. Atha anerayikā, nesaṃ tattha kathaṃ sambhavoti? Vuccate – anerayikā nirayapālā anirayagatisaṃvattaniyakammanibbattito. Nirayūpapattisaṃvattaniyakammato hi aññeneva kammunā te nibbattanti rakkhasajātikattā. Tathā hi vadanti sabbatthivādino –
‘‘கோதா⁴ குரூரகம்மந்தா, பாபாபி⁴ருசினோ ததா²;
‘‘Kodhā kurūrakammantā, pāpābhirucino tathā;
து³க்கி²தேஸு ச நந்த³ந்தி, ஜாயந்தி யமரக்க²ஸா’’தி.
Dukkhitesu ca nandanti, jāyanti yamarakkhasā’’ti.
தத்த² யதே³கே வத³ந்தி ‘‘யாதனாது³க்க²ங் படிஸங்வேதெ³ய்யுங், அத² வா அஞ்ஞமஞ்ஞங் கா⁴தெய்யு’’ந்திஆதி³, தயித³ங் அஸாரங் நிரயபாலானங் நேரயிகபா⁴வஸ்ஸேவ அபா⁴வதோ. யதி³பி அனேரயிகா நிரயபாலா, அயோமயாய பன ஆதி³த்தாய ஸம்பஜ்ஜலிதாய ஸஜோதிபூ⁴தாய நிரயபூ⁴மியா பரிக்கமமானா கத²ங் தா³ஹது³க்க²ங் நானுப⁴வந்தீதி? கம்மானுபா⁴வதோ. யதா² ஹி இத்³தி⁴மந்தோ சேதோவஸிப்பத்தா மஹாமொக்³க³ல்லானாத³யோ நேரயிகே அனுகம்பந்தா இத்³தி⁴ப³லேன நிரயபூ⁴மிங் உபக³தா தா³ஹது³க்கே²ன ந பா³தீ⁴யந்தி, ஏவங் ஸம்பத³மித³ங் த³ட்ட²ப்³ப³ங்.
Tattha yadeke vadanti ‘‘yātanādukkhaṃ paṭisaṃvedeyyuṃ, atha vā aññamaññaṃ ghāteyyu’’ntiādi, tayidaṃ asāraṃ nirayapālānaṃ nerayikabhāvasseva abhāvato. Yadipi anerayikā nirayapālā, ayomayāya pana ādittāya sampajjalitāya sajotibhūtāya nirayabhūmiyā parikkamamānā kathaṃ dāhadukkhaṃ nānubhavantīti? Kammānubhāvato. Yathā hi iddhimanto cetovasippattā mahāmoggallānādayo nerayike anukampantā iddhibalena nirayabhūmiṃ upagatā dāhadukkhena na bādhīyanti, evaṃ sampadamidaṃ daṭṭhabbaṃ.
இத்³தி⁴விஸயஸ்ஸ அசிந்தெய்யபா⁴வதோதி சே? இத³ம்பி தங்ஸமானங் கம்மவிபாகஸ்ஸ அசிந்தெய்யபா⁴வதோ. ததா²ரூபேன ஹி கம்முனா தே நிப்³ப³த்தா யதா² நிரயது³க்கே²ன அபா³தி⁴தா ஏவ ஹுத்வா நேரயிகே கா⁴தெந்தி, ந செத்தகேன பா³ஹிரவிஸயாபா⁴வோ யுஜ்ஜதி இட்டா²னிட்ட²தாய பச்சேகங் த்³வாரபுரிஸேஸுபி விப⁴த்தஸபா⁴வத்தா. ததா² ஹி ஏகச்சஸ்ஸ த்³வாரஸ்ஸ புரிஸஸ்ஸ ச இட்ட²ங் ஏகச்சஸ்ஸ அனிட்ட²ங், ஏகச்சஸ்ஸ ச அனிட்ட²ங் ஏகச்சஸ்ஸ இட்ட²ங் ஹோதி. ஏவஞ்ச கத்வா யதே³கே வத³ந்தி ‘‘நத்தி² கம்மவஸேன தேஜஸா பரூபதாபன’’ந்திஆதி³, தத³பாஹதங் ஹோதி. யங் பன வத³ந்தி ‘‘அனேரயிகானங் தேஸங் கத²ங் தத்த² ஸம்ப⁴வோ’’தி நிரயே நேரயிகானங் யாதனாஸப்³பா⁴வபா⁴வதோ. நேரயிகஸத்தயாதனாயொக்³க³ஞ்ஹி அத்தபா⁴வங் நிப்³ப³த்தெந்தங் கம்மங் தாதி³ஸனிகந்தி வினாமிதங் நிரயட்டா²னே ஏவ நிப்³ப³த்தேதி. தே ஹி நேரயிகேஹி அதி⁴கதரப³லாரோஹபரிணாஹா அதிவிய ப⁴யானகத³ஸ்ஸனா குரூரதரபயோகா³ ச ஹொந்தி. ஏதேனேவ தத்த² நேரயிகானங் விபா³த⁴ககாகஸுனகா²தீ³னம்பி நிப்³ப³த்தியா அத்தி²பா⁴வோ ஸங்வண்ணிதோதி த³ட்ட²ப்³போ³.
Iddhivisayassa acinteyyabhāvatoti ce? Idampi taṃsamānaṃ kammavipākassa acinteyyabhāvato. Tathārūpena hi kammunā te nibbattā yathā nirayadukkhena abādhitā eva hutvā nerayike ghātenti, na cettakena bāhiravisayābhāvo yujjati iṭṭhāniṭṭhatāya paccekaṃ dvārapurisesupi vibhattasabhāvattā. Tathā hi ekaccassa dvārassa purisassa ca iṭṭhaṃ ekaccassa aniṭṭhaṃ, ekaccassa ca aniṭṭhaṃ ekaccassa iṭṭhaṃ hoti. Evañca katvā yadeke vadanti ‘‘natthi kammavasena tejasā parūpatāpana’’ntiādi, tadapāhataṃ hoti. Yaṃ pana vadanti ‘‘anerayikānaṃ tesaṃ kathaṃ tattha sambhavo’’ti niraye nerayikānaṃ yātanāsabbhāvabhāvato. Nerayikasattayātanāyoggañhi attabhāvaṃ nibbattentaṃ kammaṃ tādisanikanti vināmitaṃ nirayaṭṭhāne eva nibbatteti. Te hi nerayikehi adhikatarabalārohapariṇāhā ativiya bhayānakadassanā kurūratarapayogā ca honti. Eteneva tattha nerayikānaṃ vibādhakakākasunakhādīnampi nibbattiyā atthibhāvo saṃvaṇṇitoti daṭṭhabbo.
கத²மஞ்ஞக³திகேஹி அஞ்ஞக³திகபா³த⁴னந்தி ச ந வத்தப்³ப³ங் அஞ்ஞத்தா²பி ததா² த³ஸ்ஸனதோ. யங் பனேகே வத³ந்தி ‘‘அஸத்தஸபா⁴வா ஏவ நிரயே நிரயபாலா நிரயே ஸுனகா²த³யோ சா’’தி, தம்பேதேஸங் மதிமத்தங் அஞ்ஞத்த² ததா² அத³ஸ்ஸனதோ. ந ஹி காசி அத்தி² தாதி³ஸீ த⁴ம்மப்பவத்தி, யா அஸத்தஸபா⁴வா, ஸம்பதிஸத்தேஹி அப்பயோஜிதா ச அத்த²கிச்சங் ஸாதெ⁴ந்தீ தி³ட்ட²புப்³பா³. பேதானங் பானீயனிவாரகானங் த³ண்டா³தி³ஹத்தா²னஞ்ச புரிஸானங் ஸப்³பா⁴வே அஸத்தபா⁴வே ச விஸேஸகாரணங் நத்தீ²தி தாதி³ஸானங் ஸப்³பா⁴வே கிங் பாபகானங் வத்தப்³ப³ங். ஸுபினோபகா⁴தோபி அத்த²கிச்சஸமத்த²தாய அப்பமாணங் த³ஸ்ஸனாதி³மத்தேனபி தத³த்த²ஸித்³தி⁴தோ. ததா² ஹி ஸுபினே ஆஹாரூபபோ⁴கா³தி³னா ந அத்த²ஸித்³தி⁴, இத்³தி⁴னிம்மானரூபங் பனெத்த² லத்³த⁴பரிஹாரங் இத்³தி⁴விஸயஸ்ஸ அசிந்தெய்யபா⁴வதோ. இதா⁴பி கம்மவிபாகஸ்ஸ அசிந்தெய்யபா⁴வதோதி சே? தங் ந, அஸித்³த⁴த்தா. நேரயிகானங் கம்மவிபாகோ நிரயபாலாதி ஸித்³த⁴மெத்தங், வுத்தனயேன பாளிதோ ச தேஸங் ஸத்தபா⁴வோ ஏவ ஸித்³தோ⁴. ஸக்கா ஹி வத்துங் ஸத்தஸங்கா²தா நிரயபாலஸஞ்ஞிதா த⁴ம்மப்பவத்தி ஸாபி⁴ஸந்தி⁴கபரூபகா⁴தி அத்த²கிச்சஸப்³பா⁴வதோ ஓஜாஹாராதி³ ரக்க²ஸஸந்ததி விய. அபி⁴ஸந்தி⁴புப்³ப³கதா செத்த² ந ஸக்கா படிக்கி²பிதுங் ததா² ததா² அபி⁴ஸந்தி⁴யா கா⁴தனதோ. ததோ ஏவ ந ஸங்கா⁴தபப்³ப³தேஹி அனேகந்திகதா. யே பன வத³ந்தி ‘‘பூ⁴தவிஸேஸா ஏவ தே வண்ணஸண்டா²னாதி³விஸேஸவந்தோ பே⁴ரவாகாரா நரகபாலாதி ஸமஞ்ஞங் லப⁴ந்தீ’’தி, தத³ஸித்³த⁴ங் உஜுகமேவ பாளியங் ‘‘அத்தி² நிரயே நிரயபாலா’’தி வாத³ஸ்ஸ பதிட்டா²பிதத்தா.
Kathamaññagatikehi aññagatikabādhananti ca na vattabbaṃ aññatthāpi tathā dassanato. Yaṃ paneke vadanti ‘‘asattasabhāvā eva niraye nirayapālā niraye sunakhādayo cā’’ti, tampetesaṃ matimattaṃ aññattha tathā adassanato. Na hi kāci atthi tādisī dhammappavatti, yā asattasabhāvā, sampatisattehi appayojitā ca atthakiccaṃ sādhentī diṭṭhapubbā. Petānaṃ pānīyanivārakānaṃ daṇḍādihatthānañca purisānaṃ sabbhāve asattabhāve ca visesakāraṇaṃ natthīti tādisānaṃ sabbhāve kiṃ pāpakānaṃ vattabbaṃ. Supinopaghātopi atthakiccasamatthatāya appamāṇaṃ dassanādimattenapi tadatthasiddhito. Tathā hi supine āhārūpabhogādinā na atthasiddhi, iddhinimmānarūpaṃ panettha laddhaparihāraṃ iddhivisayassa acinteyyabhāvato. Idhāpi kammavipākassa acinteyyabhāvatoti ce? Taṃ na, asiddhattā. Nerayikānaṃ kammavipāko nirayapālāti siddhamettaṃ, vuttanayena pāḷito ca tesaṃ sattabhāvo eva siddho. Sakkā hi vattuṃ sattasaṅkhātā nirayapālasaññitā dhammappavatti sābhisandhikaparūpaghāti atthakiccasabbhāvato ojāhārādi rakkhasasantati viya. Abhisandhipubbakatā cettha na sakkā paṭikkhipituṃ tathā tathā abhisandhiyā ghātanato. Tato eva na saṅghātapabbatehi anekantikatā. Ye pana vadanti ‘‘bhūtavisesā eva te vaṇṇasaṇṭhānādivisesavanto bheravākārā narakapālāti samaññaṃ labhantī’’ti, tadasiddhaṃ ujukameva pāḷiyaṃ ‘‘atthi niraye nirayapālā’’ti vādassa patiṭṭhāpitattā.
அபிச யதா² அரியவினயே நரகபாலானங் பூ⁴தமத்ததா அஸித்³தா⁴, ததா² பஞ்ஞத்திமத்தவாதி³னோபி பூ⁴தமத்ததா அஸித்³தா⁴ ஸப்³ப³ஸோ ரூபத⁴ம்மானங் அத்தி²பா⁴வஸ்ஸேவ அப்படிஜானநதோ. ந ஹி தஸ்ஸ பூ⁴தானி நாம பரமத்த²தோ ஸந்தி. யதி³ பரமத்த²ங் க³ஹெத்வா வோஹரதி, அத² கஸ்மா சக்கு²ரூபாதீ³னி படிக்கி²பதீதி? திட்ட²தேஸா அனவட்டி²ததக்கானங் அப்பஹீனவிபல்லாஸானங் வாத³வீமங்ஸா. ஏவங் அத்தே²வ நிரயே நிரயபாலாதி நிட்ட²மெத்த² க³ந்தப்³ப³ங். ஸதி ச நேஸங் ஸப்³பா⁴வே அஸதிபி பா³ஹிரே விஸயே நரகே விய தே³ஸாதி³னியமோ ஹோதீதி வாதோ³ ந ஸிஜ்ஜ²தி, ஸதி ஏவ பன பா³ஹிரே விஸயே தே³ஸாதி³னியமோதி த³ட்ட²ப்³ப³ங்.
Apica yathā ariyavinaye narakapālānaṃ bhūtamattatā asiddhā, tathā paññattimattavādinopi bhūtamattatā asiddhā sabbaso rūpadhammānaṃ atthibhāvasseva appaṭijānanato. Na hi tassa bhūtāni nāma paramatthato santi. Yadi paramatthaṃ gahetvā voharati, atha kasmā cakkhurūpādīni paṭikkhipatīti? Tiṭṭhatesā anavaṭṭhitatakkānaṃ appahīnavipallāsānaṃ vādavīmaṃsā. Evaṃ attheva niraye nirayapālāti niṭṭhamettha gantabbaṃ. Sati ca nesaṃ sabbhāve asatipi bāhire visaye narake viya desādiniyamo hotīti vādo na sijjhati, sati eva pana bāhire visaye desādiniyamoti daṭṭhabbaṃ.
தே³வதூ³தஸராபனவஸேன ஸத்தே யதூ²பசிதே புஞ்ஞகம்மே யமேதி நியமேதீதி யமோ. தஸ்ஸ யமஸ்ஸ வேமானிகபேதானங் ராஜபா⁴வதோ ரஞ்ஞோ. தேனாஹ ‘‘யமராஜா நாம வேமானிகபேதராஜா’’தி. கம்மவிபாகந்தி அகுஸலகம்மவிபாகங். வேமானிகபேதா ஹி கண்ஹஸுக்கவஸேன மிஸ்ஸகங் கம்மங் கத்வா வினிபாதிகதே³வதா விய ஸுக்கேன கம்முனா படிஸந்தி⁴ங் க³ண்ஹந்தி. ததா² ஹி மக்³க³ப²லபா⁴கி³னோபி ஹொந்தி, பவத்தியங் பன கம்மானுரூபங் கதா³சி புஞ்ஞப²லங், கதா³சி அபுஞ்ஞப²லங் பச்சனுப⁴வந்தி. யேஸங் பன அரியமக்³கோ³ உப்பஜ்ஜதி, தேஸங் மக்³கா³தி⁴க³மதோ பட்டா²ய புஞ்ஞப²லமேவ உப்பஜ்ஜதீதி த³ட்ட²ப்³ப³ங். அபுஞ்ஞப²லங் புப்³பே³ விய கடுகங் ந ஹோதி, மனுஸ்ஸத்தபா⁴வே டி²தானங் விய முது³கமேவ ஹோதீதி அபரே. த⁴ம்மிகோ ராஜாதி எத்த² தஸ்ஸ த⁴ம்மிகபா⁴வோ த⁴ம்மதே³வபுத்தஸ்ஸ விய உப்பத்தினியதோ த⁴ம்மதாவஸேன வேதி³தப்³போ³. த்³வாரேஸூதி அவீசிமஹானரகஸ்ஸ சதூஸு த்³வாரேஸு. கீ²ணாஸவா ப்³ராஹ்மணா நாம உக்கட்ட²னித்³தே³ஸேன.
Devadūtasarāpanavasena satte yathūpacite puññakamme yameti niyametīti yamo. Tassa yamassa vemānikapetānaṃ rājabhāvato rañño. Tenāha ‘‘yamarājā nāma vemānikapetarājā’’ti. Kammavipākanti akusalakammavipākaṃ. Vemānikapetā hi kaṇhasukkavasena missakaṃ kammaṃ katvā vinipātikadevatā viya sukkena kammunā paṭisandhiṃ gaṇhanti. Tathā hi maggaphalabhāginopi honti, pavattiyaṃ pana kammānurūpaṃ kadāci puññaphalaṃ, kadāci apuññaphalaṃ paccanubhavanti. Yesaṃ pana ariyamaggo uppajjati, tesaṃ maggādhigamato paṭṭhāya puññaphalameva uppajjatīti daṭṭhabbaṃ. Apuññaphalaṃ pubbe viya kaṭukaṃ na hoti, manussattabhāve ṭhitānaṃ viya mudukameva hotīti apare. Dhammiko rājāti ettha tassa dhammikabhāvo dhammadevaputtassa viya uppattiniyato dhammatāvasena veditabbo. Dvāresūti avīcimahānarakassa catūsu dvāresu. Khīṇāsavā brāhmaṇā nāma ukkaṭṭhaniddesena.
அனுயோக³வத்தந்தி அனுயோகே³ கதே வத்திதப்³ப³வத்தங். ஆரோபெந்தோதி காராபெந்தோ, அத்தனோ புச்ச²ங் உத்³தி³ஸ்ஸ படிவசனங் தா³பெந்தோ புச்ச²தி. பரஸ்ஸ ஹி அதி⁴ப்பாயங் ஞாதுங் இச்ச²ந்தோ தது³பக³ங் பயோக³ங் கரொந்தோ புச்ச²தி நாம. லத்³தி⁴ந்தி கா³ஹங். பதிட்டா²பெந்தோதி தத்த² நிச்சகாலங் காராபெந்தோ. காரணங் புச்ச²ந்தோதி யுத்திங் புச்ச²ந்தோ. ஸமனுபா⁴ஸதீதி யதா²னுயுத்தமத்த²ங் விபூ⁴தங் கத்வா கதே²தி.
Anuyogavattanti anuyoge kate vattitabbavattaṃ. Āropentoti kārāpento, attano pucchaṃ uddissa paṭivacanaṃ dāpento pucchati. Parassa hi adhippāyaṃ ñātuṃ icchanto tadupagaṃ payogaṃ karonto pucchati nāma. Laddhinti gāhaṃ. Patiṭṭhāpentoti tattha niccakālaṃ kārāpento. Kāraṇaṃ pucchantoti yuttiṃ pucchanto. Samanubhāsatīti yathānuyuttamatthaṃ vibhūtaṃ katvā katheti.
ஜிண்ணந்தி ஜராபத்தியா ஜிண்ணங். ஏகச்சோ த³ஹரகாலதோ பட்டா²ய பண்டு³ரோகா³தி³னா அபி⁴பூ⁴தகாயதாய ஜிண்ணஸதி³ஸோ ஹோதி, அயங் ந ததா² ஜராபத்தியா ஜிண்ணோதி த³ஸ்ஸேதி. கோ³பானஸீ விய வங்கந்தி வங்ககோ³பானஸீ விய வங்கங். ந ஹி வங்கபா⁴வஸ்ஸ நித³ஸ்ஸனத்த²ங் அவங்ககோ³பானஸீ க³ய்ஹதி. ப⁴க்³க³ந்தி ப⁴க்³க³ஸரீரங் கடியங் ப⁴க்³க³காயத்தா. தேனாஹ ‘‘இமினாபிஸ்ஸ வங்கபா⁴வமேவ தீ³பேதீ’’தி. த³ண்ட³படிஸரணந்தி டா²னக³மனேஸு த³ண்டோ³ படிஸரணங் ஏதஸ்ஸாதி த³ண்ட³படிஸரணங் தேன வினா வத்திதுங் அஸமத்த²த்தா. தேனாஹ ‘‘த³ண்ட³து³திய’’ந்தி. ஜராதுரந்தி ஜராய பத்த²தஸங்கிலந்தகாயங். ஸப்³ப³ஸோ கிமிஹதங் விய மஹாக²ல்லாடங் ஸீஸமஸ்ஸாதி மஹாக²ல்லாடஸீஸங். ஸஞ்ஜாதவலிந்தி ஸமந்ததோ ஜாதவலிகங். ஜராத⁴ம்மோதி ஜராபகதிகோ. தேனாஹ ‘‘ஜராஸபா⁴வோ’’தி. ஸபா⁴வோ ச நாம தேஜோதா⁴துயா உண்ஹதா விய ந கதா³சி விக³ச்ச²தீதி ஆஹ ‘‘அபரிமுத்தோ ஜராயா’’திஆதி³.
Jiṇṇanti jarāpattiyā jiṇṇaṃ. Ekacco daharakālato paṭṭhāya paṇḍurogādinā abhibhūtakāyatāya jiṇṇasadiso hoti, ayaṃ na tathā jarāpattiyā jiṇṇoti dasseti. Gopānasī viya vaṅkanti vaṅkagopānasī viya vaṅkaṃ. Na hi vaṅkabhāvassa nidassanatthaṃ avaṅkagopānasī gayhati. Bhagganti bhaggasarīraṃ kaṭiyaṃ bhaggakāyattā. Tenāha ‘‘imināpissa vaṅkabhāvameva dīpetī’’ti. Daṇḍapaṭisaraṇanti ṭhānagamanesu daṇḍo paṭisaraṇaṃ etassāti daṇḍapaṭisaraṇaṃ tena vinā vattituṃ asamatthattā. Tenāha ‘‘daṇḍadutiya’’nti. Jarāturanti jarāya patthatasaṃkilantakāyaṃ. Sabbaso kimihataṃ viya mahākhallāṭaṃ sīsamassāti mahākhallāṭasīsaṃ. Sañjātavalinti samantato jātavalikaṃ. Jarādhammoti jarāpakatiko. Tenāha ‘‘jarāsabhāvo’’ti. Sabhāvo ca nāma tejodhātuyā uṇhatā viya na kadāci vigacchatīti āha ‘‘aparimutto jarāyā’’tiādi.
அத்த²தோ ஏவங் வத³தி நாம, வாசாய அவத³ந்தோபி அத்தா²பத்திதோ ஏவங் வத³ந்தோ விய ஹோதி விஞ்ஞூனந்தி அத்தோ². தருணோ அஹோஸிங் யொப்³ப³னேன ஸமன்னாக³தோ. ஊரூனங் ப³லங் ஏதஸ்ஸ அத்தீ²தி ஊருப³லீ. தேன தூ³ரேபி க³மனாக³மனலங்க⁴னாதி³ஸமத்த²தங் த³ஸ்ஸேதி, பா³ஹுப³லீதி பன இமினா ஹத்தே²ஹி காதப்³ப³கிச்சஸமத்த²தங், ஜவக்³க³ஹணேன வேக³ஸா பவத்திஸமத்த²தங். அந்தரஹிதாதி நட்டா². எத்த² ச ந கோ² பனாஹந்திஆதி³ ஜராய தே³வதூ³தபா⁴வத³ஸ்ஸனங். தேனாஹ ‘‘தேனேஸ தே³வதூ³தோ நாம ஜாதோ’’தி. ஆபா³த⁴ஸ்ஸ அத்தி²தாய ஆபா³தி⁴கங். விவித⁴ங் து³க்க²ங் ஆத³ஹதீதி ப்³யாதி⁴, விஸேஸேன வா ஆதி⁴யதி ஏதேனாதி ப்³யாதி⁴, ப்³யாதி⁴ ஸங்ஜாதோ ஏதஸ்ஸாதி ப்³யாதி⁴தங். ஏஸ நயோ து³க்கி²தந்தி எத்தா²பி.
Atthato evaṃ vadati nāma, vācāya avadantopi atthāpattito evaṃ vadanto viya hoti viññūnanti attho. Taruṇo ahosiṃ yobbanena samannāgato. Ūrūnaṃ balaṃ etassa atthīti ūrubalī. Tena dūrepi gamanāgamanalaṅghanādisamatthataṃ dasseti, bāhubalīti pana iminā hatthehi kātabbakiccasamatthataṃ, javaggahaṇena vegasā pavattisamatthataṃ. Antarahitāti naṭṭhā. Ettha ca na kho panāhantiādi jarāya devadūtabhāvadassanaṃ. Tenāha ‘‘tenesa devadūto nāma jāto’’ti. Ābādhassa atthitāya ābādhikaṃ. Vividhaṃ dukkhaṃ ādahatīti byādhi, visesena vā ādhiyati etenāti byādhi, byādhi saṃjāto etassāti byādhitaṃ. Esa nayo dukkhitanti etthāpi.
து³தியங் தே³வதூ³தந்தி எத்தா²பி வுத்தனயேனேவ அத்தோ² வேதி³தப்³போ³. ப்³யாதி⁴னா அபி⁴ஹதோதி ப்³யாதி⁴னா பா³தி⁴தோ, உபத்³து³தோதி அத்தோ².
Dutiyaṃ devadūtanti etthāpi vuttanayeneva attho veditabbo. Byādhinā abhihatoti byādhinā bādhito, upaddutoti attho.
விபரிபி⁴ன்னவண்ணோதி விபரிபி⁴ன்னநீலவண்ணோ. தஞ்ஹி யத்த² யத்த² க³ஹிதபுப்³ப³கங், தத்த² தத்த² பண்டு³வண்ணங், மங்ஸுஸ்ஸத³ட்டா²னே ரத்தவண்ணங், யேபு⁴ய்யேன ச நீலஸாடகபாருதங் விய ஹோதி. தேன வுத்தங் ‘‘விபரிபி⁴ன்னநீலவண்ணோ’’தி.
Viparibhinnavaṇṇoti viparibhinnanīlavaṇṇo. Tañhi yattha yattha gahitapubbakaṃ, tattha tattha paṇḍuvaṇṇaṃ, maṃsussadaṭṭhāne rattavaṇṇaṃ, yebhuyyena ca nīlasāṭakapārutaṃ viya hoti. Tena vuttaṃ ‘‘viparibhinnanīlavaṇṇo’’ti.
‘‘கோ லப⁴தி, கோ ந லப⁴தீ’’தி நிரயுபக³ஸ்ஸேவ வஸேனாயங் விசாரணாதி ‘‘யேன தாவ ப³ஹு பாபங் கத’’ந்திஆதி³ ஆரத்³த⁴ங். ப³ஹு பாபங் கதந்தி ப³ஹுஸோ பாபங் கதங். தேன பாபஸ்ஸ ப³ஹுலீகரணமாஹ. ப³ஹூதி வா மஹந்தங். மஹத்தோ²பி ஹி ப³ஹுஸத்³தோ³ தி³ஸ்ஸதி ‘‘ப³ஹு வத கதங் அஸ்ஸா’’திஆதீ³ஸு, க³ருகந்தி வுத்தங் ஹோதி. ஸோ க³ருகங் ப³ஹுலங் வா பாபங் கத்வா டி²தோ நிரயே நிப்³ப³த்ததியேவ, ந யமபுரிஸேஹி யமஸ்ஸ ஸந்திகங் நீயதீதி. பரித்தந்தி பமாணபரித்ததாய காலபரித்ததாய ச பரித்தங். புரிமஸ்மிங் அத்தே² அக³ரூதி அத்தோ², து³தியஸ்மிங் அப³ஹுலந்தி. யதா²வுத்தமத்த²ங் உபமாய விபா⁴வேதுங் ‘‘யதா² ஹீ’’திஆதி³ வுத்தங். கத்தப்³ப³மேவ கரொந்தீதி த³ண்ட³மேவ கரொந்தி. அனுவிஜ்ஜித்வாதி வீமங்ஸித்வா. வினிச்ச²யட்டா²னந்தி அட்டகரணட்டா²னங். பரித்தபாபகம்மாதி து³ப்³ப³லபாபகம்மா. அத்தனோ த⁴ம்மதாயாதி பரேஹி அஸாரியமானேபி அத்தனோ த⁴ம்மதாய ஸரந்தி. தே ஹி பாபகம்மஸ்ஸ து³ப்³ப³லபா⁴வதோ கதூபசிதஸ்ஸ ச ஓகாஸாரஹகுஸலகம்மஸ்ஸ ப³லவபா⁴வதோ அத்தனோ த⁴ம்மதாயபி ஸரந்தி. ஸாரியமானாபீதி ‘‘இத³ங் நாம தயா கதங் புஞ்ஞகம்ம’’ந்தி பரேஹி ஸாரியமானாபி.
‘‘Kolabhati, ko na labhatī’’ti nirayupagasseva vasenāyaṃ vicāraṇāti ‘‘yena tāva bahu pāpaṃ kata’’ntiādi āraddhaṃ. Bahu pāpaṃ katanti bahuso pāpaṃ kataṃ. Tena pāpassa bahulīkaraṇamāha. Bahūti vā mahantaṃ. Mahatthopi hi bahusaddo dissati ‘‘bahu vata kataṃ assā’’tiādīsu, garukanti vuttaṃ hoti. So garukaṃ bahulaṃ vā pāpaṃ katvā ṭhito niraye nibbattatiyeva, na yamapurisehi yamassa santikaṃ nīyatīti. Parittanti pamāṇaparittatāya kālaparittatāya ca parittaṃ. Purimasmiṃ atthe agarūti attho, dutiyasmiṃ abahulanti. Yathāvuttamatthaṃ upamāya vibhāvetuṃ ‘‘yathā hī’’tiādi vuttaṃ. Kattabbameva karontīti daṇḍameva karonti. Anuvijjitvāti vīmaṃsitvā. Vinicchayaṭṭhānanti aṭṭakaraṇaṭṭhānaṃ. Parittapāpakammāti dubbalapāpakammā. Attano dhammatāyāti parehi asāriyamānepi attano dhammatāya saranti. Te hi pāpakammassa dubbalabhāvato katūpacitassa ca okāsārahakusalakammassa balavabhāvato attano dhammatāyapi saranti. Sāriyamānāpīti ‘‘idaṃ nāma tayā kataṃ puññakamma’’nti parehi sāriyamānāpi.
ஆகாஸசேதியந்தி கி³ரிஸிக²ரே அப்³போ⁴காஸே விவடங்க³ணே கதசேதியங். ரத்தபடேனாதி ரத்தவண்ணேன படேன பூஜேஸி படாகங் கத்வா. அக்³கி³ஜாலஸத்³த³ந்தி படபடாயந்தங் நரகே அக்³கி³ஜாலஸத்³த³ங் ஸுத்வாவ. அத்தனா பூஜிதபடங் அனுஸ்ஸரீதி ததா³ படாகாய வாதப்பஹாரஸத்³தே³ நிமித்தஸ்ஸ க³ஹிதத்தா ‘‘மயா ததா³ ஆகாஸசேதியே பூஜிதரத்தபடஸத்³தோ³ வியா’’தி அத்தனா பூஜிதபடங் அனுஸ்ஸரி.
Ākāsacetiyanti girisikhare abbhokāse vivaṭaṅgaṇe katacetiyaṃ. Rattapaṭenāti rattavaṇṇena paṭena pūjesi paṭākaṃ katvā. Aggijālasaddanti paṭapaṭāyantaṃ narake aggijālasaddaṃ sutvāva. Attanā pūjitapaṭaṃ anussarīti tadā paṭākāya vātappahārasadde nimittassa gahitattā ‘‘mayā tadā ākāsacetiye pūjitarattapaṭasaddo viyā’’ti attanā pūjitapaṭaṃ anussari.
ஸுமனபுப்ப²கும்பே⁴னாதி கும்ப⁴பரிமாணேன ஸுமனபுப்ப²ராஸினா. ‘‘த³ஸாதி⁴கங் நாளிஸஹஸ்ஸகும்ப⁴’’ந்தி கேசி, ‘‘பஞ்சஅம்ப³ண’’ந்தி அபரே. தீஹிபி ந ஸரதி ப³லவதோ பாபகம்மேன ப்³யாமோஹிதோ. துண்ஹீ அஹோஸீதி ‘‘கம்மாரஹோ அய’’ந்தி தத்த² படிகாரங் அபஸ்ஸந்தோ துண்ஹீ அஹோஸி.
Sumanapupphakumbhenāti kumbhaparimāṇena sumanapuppharāsinā. ‘‘Dasādhikaṃ nāḷisahassakumbha’’nti keci, ‘‘pañcaambaṇa’’nti apare. Tīhipina sarati balavato pāpakammena byāmohito. Tuṇhī ahosīti ‘‘kammāraho aya’’nti tattha paṭikāraṃ apassanto tuṇhī ahosi.
ஏகபக்க²ச்ச²த³னமத்தாஹீதி மஜ்ஜி²மப்பமாணஸ்ஸ கே³ஹஸ்ஸ ஏகச்ச²த³னப்பமாணேஹி. ஸுத்தாஹதங் கரித்வாதி காளஸுத்தங் பாதெத்வா. யதா² ரதோ² ஸப்³ப³ஸோ பஜ்ஜலிதோ ஹோதி அயோமயோ, ஏவங் யுகா³த³யோபிஸ்ஸ பஜ்ஜலிதா ஸஜோதிபூ⁴தா ஏவ ஹொந்தீதி ஆஹ ‘‘ஸத்³தி⁴ங்…பே॰… ரதே² யோஜெத்வா’’தி. மஹாகூடாகா³ரப்பமாணந்தி ஸத்தபூ⁴மகமஹாகூடாகா³ரப்பமாணங்.
Ekapakkhacchadanamattāhīti majjhimappamāṇassa gehassa ekacchadanappamāṇehi. Suttāhataṃ karitvāti kāḷasuttaṃ pātetvā. Yathā ratho sabbaso pajjalito hoti ayomayo, evaṃ yugādayopissa pajjalitā sajotibhūtā eva hontīti āha ‘‘saddhiṃ…pe… rathe yojetvā’’ti. Mahākūṭāgārappamāṇanti sattabhūmakamahākūṭāgārappamāṇaṃ.
விப⁴த்தோதி ஸத்தானங் ஸாதா⁴ரணேன பாபகம்முனா விப⁴த்தோ. ஹீனங் காயந்தி ஹீனங் ஸத்தனிகாயங், ஹீனங் வா அத்தபா⁴வங். உபாதா³னேதி சதுப்³பி³தே⁴ உபாதா³னே. அத்த²தோ பன தண்ஹாதி³ட்டி²க்³கா³ஹோதி ஆஹ ‘‘தண்ஹாதி³ட்டி²க்³க³ஹணே’’தி . ஸம்ப⁴வதி ஜராமரணங் ஏதேனாதி ஸம்ப⁴வோ, உபாதா³னந்தி ஆஹ ‘‘ஜாதியா ச மரணஸ்ஸ ச² காரணபூ⁴தே’’தி. அனுபாதா³தி அனுபாதா³ய. தேனாஹ ‘‘அனுபாதி³யித்வா’’தி. ஸகலவட்டது³க்க²ங் அதிக்கந்தாதி சரிமசித்தனிரோதே⁴ன வட்டது³க்க²ஸ்ஸ கிலேஸானம்பி அஸம்ப⁴வதோ ஸப்³ப³ங் வட்டது³க்க²ங் அதிக்கந்தா.
Vibhattoti sattānaṃ sādhāraṇena pāpakammunā vibhatto. Hīnaṃ kāyanti hīnaṃ sattanikāyaṃ, hīnaṃ vā attabhāvaṃ. Upādāneti catubbidhe upādāne. Atthato pana taṇhādiṭṭhiggāhoti āha ‘‘taṇhādiṭṭhiggahaṇe’’ti . Sambhavati jarāmaraṇaṃ etenāti sambhavo, upādānanti āha ‘‘jātiyā ca maraṇassa cha kāraṇabhūte’’ti. Anupādāti anupādāya. Tenāha ‘‘anupādiyitvā’’ti. Sakalavaṭṭadukkhaṃ atikkantāti carimacittanirodhena vaṭṭadukkhassa kilesānampi asambhavato sabbaṃ vaṭṭadukkhaṃ atikkantā.
தே³வதூ³தஸுத்தவண்ணனா நிட்டி²தா.
Devadūtasuttavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya / 6. தே³வதூ³தஸுத்தங் • 6. Devadūtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā) / 6. தே³வதூ³தஸுத்தவண்ணனா • 6. Devadūtasuttavaṇṇanā
