| Library / Tipiṭaka / திபிடக • Tipiṭaka / மஜ்ஜி²மனிகாய (டீகா) • Majjhimanikāya (ṭīkā) |
10. தே³வதூ³தஸுத்தவண்ணனா
10. Devadūtasuttavaṇṇanā
261. த்³வே அகா³ராதிஆதீ³தி ஆதி³-ஸத்³தே³ன ‘‘ஸத்³வாரா…பே॰… அனுவிசரந்தேபீ’’தி ஏதமத்த²ங் ஸங்க³ண்ஹாதி. எத்தகமேவ ஹி அஸ்ஸபுரஸுத்தே (ம॰ நி॰ 1.432; ம॰ நி॰ அட்ட²॰ 1.432) வித்தா²ரிதங் வேதி³தப்³ப³ங். ‘‘தி³ப்³பே³ன சக்கு²னா’’திஆதி³ பன விஸுத்³தி⁴மக்³கே³ (விஸுத்³தி⁴॰ 2.397) ததா² வித்தா²ரிதம்பி ஸுத்தஸங்வண்ணனா ஹோதீதி கத்வா, ‘‘அஸ்ஸபுரஸுத்தே வித்தா²ரிதமேவா’’தி வுத்தங்.
261.Dveagārātiādīti ādi-saddena ‘‘sadvārā…pe… anuvicarantepī’’ti etamatthaṃ saṅgaṇhāti. Ettakameva hi assapurasutte (ma. ni. 1.432; ma. ni. aṭṭha. 1.432) vitthāritaṃ veditabbaṃ. ‘‘Dibbena cakkhunā’’tiādi pana visuddhimagge (visuddhi. 2.397) tathā vitthāritampi suttasaṃvaṇṇanā hotīti katvā, ‘‘assapurasutte vitthāritamevā’’ti vuttaṃ.
262. நிரயதோ பட்டா²ய தே³ஸனங் தே³வலோகேன ஓஸாபேதீதி ஸங்கிலேஸத⁴ம்மேஹி ஸங்வேஜெத்வா வோதா³னத⁴ம்மேஹி நிட்டா²பெந்தோ. து³தியங் பன வுத்தவிபரியாயேன வேதி³தப்³ப³ங், ததி³த³ங் வேனெய்யஜ்ஜா²ஸயவிஸிட்ட²ந்தி த³ட்ட²ப்³ப³ங். இதா³னி ஸங்கி²பித்வா வுத்தமத்த²ங் விவரிதுங், ‘‘ஸசே’’திஆதி³ வுத்தங். ஸோதி ப⁴க³வா.
262.Nirayato paṭṭhāya desanaṃ devalokena osāpetīti saṃkilesadhammehi saṃvejetvā vodānadhammehi niṭṭhāpento. Dutiyaṃ pana vuttavipariyāyena veditabbaṃ, tadidaṃ veneyyajjhāsayavisiṭṭhanti daṭṭhabbaṃ. Idāni saṅkhipitvā vuttamatthaṃ vivarituṃ, ‘‘sace’’tiādi vuttaṃ. Soti bhagavā.
ஏகச்சே தே²ராதி (கதா²॰ அனுடீ॰ 866-868; அ॰ நி॰ டீ॰ 2.3.36) அந்த⁴காதி³கே, விஞ்ஞாணவாதி³னோ ச ஸந்தா⁴ய வத³தி. நேரயிகே நிரயே பாலெந்தி ததோ நிக்³க³ந்துமப்பதா³னவஸேன ரக்க²ந்தீதி நிரயபாலா. நேரயிகானங் நரகது³க்கே²ன பரியோனத்³தா⁴ய அலங் ஸமத்தா²தி வா நிரயபாலா. தந்தி ‘‘நத்தி² நிரயபாலா’’திவசனங். படிஸேதி⁴தமேவாதி ‘‘அத்தி² நிரயே நிரயபாலா, அத்தி² ச காரணிகா’’திஆதி³னா நயேன அபி⁴த⁴ம்மே (கதா²॰ 866) படிஸேதி⁴தமேவ. யதி³ நிரயபாலா நாம ந ஸியுங், கம்மகாரணாபி ந ப⁴வெய்ய. ஸதி ஹி காரணிகே கம்மகாரணாய ப⁴விதப்³ப³ந்தி அதி⁴ப்பாயோ. தேனாஹ ‘‘யதா² ஹீ’’திஆதி³. எத்தா²ஹ – ‘‘கிங் பனேதே நிரயபாலா நேரயிகா, உதா³ஹு அனேரயிகா’’தி. கிஞ்செத்த² – யதி³ தாவ நேரயிகா, இமே நிரயஸங்வத்தனியேன கம்முனா நிப்³ப³த்தாதி ஸயம்பி நிரயது³க்க²ங் அனுப⁴வெய்யுங், ததா² ஸதி அஞ்ஞேஸங் நேரயிகானங் யாதனாய அஸமத்தா² ஸியுங், ‘‘இமே நேரயிகா, இமே நிரயபாலா’’தி வவத்தா²னஞ்ச ந ஸியா, யே ச யே யாதெந்தி, தேஹி ஸமானரூபப³லப்பமாணேஹி இதரேஸங் ப⁴யஸந்தாஸா ந ஸியுங். அத² அனேரயிகா, நேஸங் தத்த² கத²ங் ஸம்ப⁴வோதி வுச்சதே – அனேரயிகா நிரயபாலா அனிரயக³திஸங்வத்தனியகம்மனிப்³ப³த்திதோ. நிரயூபபத்திஸங்வத்தனியகம்மதோ ஹி அஞ்ஞேனேவ கம்முனா தே நிப்³ப³த்தந்தி ரக்க²ஸஜாதிகத்தா. ததா² ஹி வத³ந்தி ஸப்³ப³த்தி²வாதி³னோ –
Ekaccetherāti (kathā. anuṭī. 866-868; a. ni. ṭī. 2.3.36) andhakādike, viññāṇavādino ca sandhāya vadati. Nerayike niraye pālenti tato niggantumappadānavasena rakkhantīti nirayapālā. Nerayikānaṃ narakadukkhena pariyonaddhāya alaṃ samatthāti vā nirayapālā. Tanti ‘‘natthi nirayapālā’’tivacanaṃ. Paṭisedhitamevāti ‘‘atthi niraye nirayapālā, atthi ca kāraṇikā’’tiādinā nayena abhidhamme (kathā. 866) paṭisedhitameva. Yadi nirayapālā nāma na siyuṃ, kammakāraṇāpi na bhaveyya. Sati hi kāraṇike kammakāraṇāya bhavitabbanti adhippāyo. Tenāha ‘‘yathā hī’’tiādi. Etthāha – ‘‘kiṃ panete nirayapālā nerayikā, udāhu anerayikā’’ti. Kiñcettha – yadi tāva nerayikā, ime nirayasaṃvattaniyena kammunā nibbattāti sayampi nirayadukkhaṃ anubhaveyyuṃ, tathā sati aññesaṃ nerayikānaṃ yātanāya asamatthā siyuṃ, ‘‘ime nerayikā, ime nirayapālā’’ti vavatthānañca na siyā, ye ca ye yātenti, tehi samānarūpabalappamāṇehi itaresaṃ bhayasantāsā na siyuṃ. Atha anerayikā, nesaṃ tattha kathaṃ sambhavoti vuccate – anerayikā nirayapālā anirayagatisaṃvattaniyakammanibbattito. Nirayūpapattisaṃvattaniyakammato hi aññeneva kammunā te nibbattanti rakkhasajātikattā. Tathā hi vadanti sabbatthivādino –
‘‘கோத⁴னா குரூரகம்மந்தா, பாபாபி⁴ருசினோ ஸதா³;
‘‘Kodhanā kurūrakammantā, pāpābhirucino sadā;
து³க்கி²தேஸு ச நந்த³ந்தி, ஜாயந்தி யமரக்க²ஸா’’தி. (கதா²॰ அனுடீ॰ 866-868; அ॰ நி॰ டீ॰ 2.3.36);
Dukkhitesu ca nandanti, jāyanti yamarakkhasā’’ti. (kathā. anuṭī. 866-868; a. ni. ṭī. 2.3.36);
தத்த² யதே³கே வத³ந்தி ‘‘யாதனாது³க்க²ங் படிஸங்வேதெ³ய்யுங், அத² வா அஞ்ஞமஞ்ஞங் யாதெய்யு’’ந்திஆதி³, தயித³ங் அஸாரங் நிரயபாலானங் நேரயிகபா⁴வஸ்ஸேவ அபா⁴வதோ. யதி³பி அனேரயிகா நிரயபாலா, அயோமயாய பன ஆதி³த்தாய ஸம்பஜ்ஜலிதாய ஸஜோதிபூ⁴தாய நிரயபூ⁴மியா பரிக்கமமானா கத²ங் தா³ஹது³க்க²ங் நானுப⁴வந்தீதி? கம்மானுபா⁴வதோ. யதா² ஹி இத்³தி⁴மந்தோ சேதோவஸிப்பத்தா மஹாமொக்³க³ல்லானாத³யோ நேரயிகே அனுகம்பந்தா இத்³தி⁴ப³லேன நிரயபூ⁴மிங் உபக³தா தா³ஹது³க்கே²ன ந பா³தீ⁴யந்தி, ஏவங்ஸம்பத³மித³ங் த³ட்ட²ப்³ப³ங்.
Tattha yadeke vadanti ‘‘yātanādukkhaṃ paṭisaṃvedeyyuṃ, atha vā aññamaññaṃ yāteyyu’’ntiādi, tayidaṃ asāraṃ nirayapālānaṃ nerayikabhāvasseva abhāvato. Yadipi anerayikā nirayapālā, ayomayāya pana ādittāya sampajjalitāya sajotibhūtāya nirayabhūmiyā parikkamamānā kathaṃ dāhadukkhaṃ nānubhavantīti? Kammānubhāvato. Yathā hi iddhimanto cetovasippattā mahāmoggallānādayo nerayike anukampantā iddhibalena nirayabhūmiṃ upagatā dāhadukkhena na bādhīyanti, evaṃsampadamidaṃ daṭṭhabbaṃ.
இத்³தி⁴விஸயஸ்ஸ அசிந்தெய்யபா⁴வதோதி சே? இத³ம்பி தங்ஸமானங் கம்மவிபாகஸ்ஸ அசிந்தெய்யபா⁴வதோ. ததா²ரூபேன ஹி கம்முனா தே நிப்³ப³த்தா. யதா² நிரயது³க்கே²ன அபா³தி⁴தா ஏவ ஹுத்வா நேரயிகே யாதெந்தி, ந செத்தகேன பா³ஹிரவிஸயாபா⁴வோ யுஜ்ஜதி இட்டா²னிட்ட²தாய பச்சேகங் த்³வாரபுரிஸேஸு விப⁴த்தஸபா⁴வத்தா. ததா² ஹி ஏகச்சஸ்ஸ த்³வாரஸ்ஸ புரிஸஸ்ஸ ச இட்ட²ங் ஏகச்சஸ்ஸ அனிட்ட²ங், ஏகச்சஸ்ஸ ச அனிட்ட²ங் ஏகச்சஸ்ஸ இட்ட²ங் ஹோதி. ஏவஞ்ச கத்வா யதே³கே வத³ந்தி – ‘‘நத்தி² கம்மவஸேன தேஜஸா பரூபதாபன’’ந்திஆதி³, தத³பாஹதங் ஹோதி. யங் பன வத³ந்தி – ‘‘அனேரயிகானங் நேஸங் கத²ங் தத்த² ஸம்ப⁴வோ’’தி நிரயே நேரயிகானங் யாதனாஸப்³பா⁴வதோ. நேரயிகஸத்தயாதனாயொக்³யஞ்ஹி அத்தபா⁴வங் நிப்³ப³த்தெந்தங் கம்மங் தாதி³ஸனிகந்திவினாமிதங் நிரயட்டா²னேயேவ நிப்³ப³த்தேதி. தே ச நேரயிகேஹி அதி⁴கதரப³லாரோஹபரிணாஹா அதிவிய ப⁴யானகத³ஸ்ஸனா குரூரதரபயோகா³ ச ஹொந்தி. ஏதேனேவ தத்த² நேரயிகானங் விபா³த⁴ககாகஸுனகா²தீ³னம்பி நிப்³ப³த்தி ஸங்வண்ணிதாதி த³ட்ட²ப்³ப³ங்.
Iddhivisayassa acinteyyabhāvatoti ce? Idampi taṃsamānaṃ kammavipākassa acinteyyabhāvato. Tathārūpena hi kammunā te nibbattā. Yathā nirayadukkhena abādhitā eva hutvā nerayike yātenti, na cettakena bāhiravisayābhāvo yujjati iṭṭhāniṭṭhatāya paccekaṃ dvārapurisesu vibhattasabhāvattā. Tathā hi ekaccassa dvārassa purisassa ca iṭṭhaṃ ekaccassa aniṭṭhaṃ, ekaccassa ca aniṭṭhaṃ ekaccassa iṭṭhaṃ hoti. Evañca katvā yadeke vadanti – ‘‘natthi kammavasena tejasā parūpatāpana’’ntiādi, tadapāhataṃ hoti. Yaṃ pana vadanti – ‘‘anerayikānaṃ nesaṃ kathaṃ tattha sambhavo’’ti niraye nerayikānaṃ yātanāsabbhāvato. Nerayikasattayātanāyogyañhi attabhāvaṃ nibbattentaṃ kammaṃ tādisanikantivināmitaṃ nirayaṭṭhāneyeva nibbatteti. Te ca nerayikehi adhikatarabalārohapariṇāhā ativiya bhayānakadassanā kurūratarapayogā ca honti. Eteneva tattha nerayikānaṃ vibādhakakākasunakhādīnampi nibbatti saṃvaṇṇitāti daṭṭhabbaṃ.
கத²ங் அஞ்ஞக³திகேஹி அஞ்ஞக³திகபா³த⁴னந்தி ச ந வத்தப்³ப³ங் அஞ்ஞத்தா²பி ததா² த³ஸ்ஸனதோ. யங் பனேகே வத³ந்தி – ‘‘அஸத்தஸபா⁴வா ஏவ நிரயபாலா நிரயஸுனகா²த³யோ சா’’தி தம்பி தேஸங் மதிமத்தங் அஞ்ஞத்த² ததா² அத³ஸ்ஸனதோ. ந ஹி காசி அத்தி² தாதி³ஸீ த⁴ம்மப்பவத்தி, யா அஸத்தஸபா⁴வா, ஸம்பதிஸத்தேஹி அப்பயோஜிதா ச ஸத்தகிச்சங் ஸாதெ⁴ந்தீ தி³ட்ட²புப்³பா³. பேதானங் பானீயனிவாரகானங் த³ண்டா³தி³ஹத்த²புரிஸானம்பி ஸப்³பா⁴வே, அஸத்தபா⁴வே ச விஸேஸகாரணங் நத்தி². ஸுபினோபகா⁴தோபி அத்தி², கிச்சஸமத்த²தா பன அப்பமாணங் த³ஸ்ஸனாதி³மத்தேனபி தத³த்த²ஸித்³தி⁴தோ. ததா² ஹி ஸுபினே ஆஹாரூபபோ⁴கா³தி³னா ந அத்த²ஸித்³தி⁴, இத்³தி⁴னிம்மானரூபங் பனெத்த² லத்³த⁴பரிஹாரங் இத்³தி⁴விஸயஸ்ஸ அசிந்தெய்யபா⁴வதோ. இதா⁴பி கம்மவிபாகஸ்ஸ அசிந்தெய்யபா⁴வதோதி சே? தங் ந, அஸித்³த⁴த்தா. நேரயிகானங் கம்மவிபாகதோ நிரயபாலாதி அஸித்³த⁴மேதங், வுத்தனயேன பன பாளிதோ ச தேஸங் ஸத்தபா⁴வோ ஏவ ஸித்³தோ⁴தி. ஸக்கா ஹி வத்துங், ‘‘ஸத்தஸங்கா²தா நிரயபாலஸஞ்ஞிதா த⁴ம்மப்பவத்தி ஸாபி⁴ஸந்தி⁴கபரூபகா⁴தீ அத்தி² கிச்சஸப்³பா⁴வதோ ஓஜாஹாராதி³ரக்க²ஸஸந்ததி வியா’’தி. அபி⁴ஸந்தி⁴புப்³ப³கதா செத்த² ந ஸக்கா படிக்கி²பிதுங் ததா² ததா² அபி⁴ஸந்தி⁴யா யாதனதோ, ததோ ஏவ ந ஸங்கா⁴தபப்³ப³தாதீ³ஹி அனேகந்திகதா. யே பன வத³ந்தி – ‘‘பூ⁴தவிஸேஸா ஏவ ஏதே வண்ணஸண்டா²னாதி³விஸேஸவந்தோ பே⁴ரவாகாரா ‘நரகபாலா’தி ஸமஞ்ஞங் லப⁴ந்தீ’’தி. தத³ஸித்³த⁴ங் உஜுகமேவ பாளியங், – ‘‘அத்தி² நிரயேஸு நிரயபாலா’’தி (கதா²॰ 866) வாத³ஸ்ஸ பதிட்டா²பிதத்தா.
Kathaṃ aññagatikehi aññagatikabādhananti ca na vattabbaṃ aññatthāpi tathā dassanato. Yaṃ paneke vadanti – ‘‘asattasabhāvā eva nirayapālā nirayasunakhādayo cā’’ti tampi tesaṃ matimattaṃ aññattha tathā adassanato. Na hi kāci atthi tādisī dhammappavatti, yā asattasabhāvā, sampatisattehi appayojitā ca sattakiccaṃ sādhentī diṭṭhapubbā. Petānaṃ pānīyanivārakānaṃ daṇḍādihatthapurisānampi sabbhāve, asattabhāve ca visesakāraṇaṃ natthi. Supinopaghātopi atthi, kiccasamatthatā pana appamāṇaṃ dassanādimattenapi tadatthasiddhito. Tathā hi supine āhārūpabhogādinā na atthasiddhi, iddhinimmānarūpaṃ panettha laddhaparihāraṃ iddhivisayassa acinteyyabhāvato. Idhāpi kammavipākassa acinteyyabhāvatoti ce? Taṃ na, asiddhattā. Nerayikānaṃ kammavipākato nirayapālāti asiddhametaṃ, vuttanayena pana pāḷito ca tesaṃ sattabhāvo eva siddhoti. Sakkā hi vattuṃ, ‘‘sattasaṅkhātā nirayapālasaññitā dhammappavatti sābhisandhikaparūpaghātī atthi kiccasabbhāvato ojāhārādirakkhasasantati viyā’’ti. Abhisandhipubbakatā cettha na sakkā paṭikkhipituṃ tathā tathā abhisandhiyā yātanato, tato eva na saṅghātapabbatādīhi anekantikatā. Ye pana vadanti – ‘‘bhūtavisesā eva ete vaṇṇasaṇṭhānādivisesavanto bheravākārā ‘narakapālā’ti samaññaṃ labhantī’’ti. Tadasiddhaṃ ujukameva pāḷiyaṃ, – ‘‘atthi nirayesu nirayapālā’’ti (kathā. 866) vādassa patiṭṭhāpitattā.
அபிச யதா² அரியவினயே நரகபாலானங் பூ⁴தமத்ததா அஸித்³தா⁴, ததா² பஞ்ஞத்திமத்தவாதி³னோபி தேஸங் பூ⁴தமத்ததா அஸித்³தா⁴வ ஸப்³ப³ஸோ ரூபத⁴ம்மானங் அத்தி² பா⁴வஸ்ஸேவ அப்படிஜானநதோ. ந ஹி தஸ்ஸ பூ⁴தானி நாம பரமத்த²தோ ஸந்தி. யதி³ பரமத்த²ங் க³ஹெத்வா வோஹரதி, அத² கஸ்மா சக்கு²ரூபாதீ³னி படிக்கி²பதீதி? திட்ட²தேஸா அனவட்டி²ததக்கானங் அப்பஹீனஸம்மோஹவிபல்லாஸானங் வாத³வீமங்ஸா, ஏவங், ‘‘அத்தே²வ நிரயே நிரயபாலா’’தி நிட்ட²மெத்த² க³ந்தப்³ப³ங். ஸதி ச நேஸங் ஸப்³பா⁴வே, அஸதிபி பா³ஹிரே விஸயே நரகே விய தே³ஸாதி³னியமோ ஹோதீதி வாதோ³ ந ஸிஜ்ஜ²தி, ஸதி ஏவ பன பா³ஹிரே விஸயே தே³ஸாதி³னியமோதி த³ட்ட²ப்³ப³ங்.
Apica yathā ariyavinaye narakapālānaṃ bhūtamattatā asiddhā, tathā paññattimattavādinopi tesaṃ bhūtamattatā asiddhāva sabbaso rūpadhammānaṃ atthi bhāvasseva appaṭijānanato. Na hi tassa bhūtāni nāma paramatthato santi. Yadi paramatthaṃ gahetvā voharati, atha kasmā cakkhurūpādīni paṭikkhipatīti? Tiṭṭhatesā anavaṭṭhitatakkānaṃ appahīnasammohavipallāsānaṃ vādavīmaṃsā, evaṃ, ‘‘attheva niraye nirayapālā’’ti niṭṭhamettha gantabbaṃ. Sati ca nesaṃ sabbhāve, asatipi bāhire visaye narake viya desādiniyamo hotīti vādo na sijjhati, sati eva pana bāhire visaye desādiniyamoti daṭṭhabbaṃ.
தே³வதூ³தஸராபனவஸேன ஸத்தே யதூ²பசிதே புஞ்ஞகம்மே யமேதி நியமேதீதி யமோ, தஸ்ஸ யமஸ்ஸ வேமானிகபேதானங் ராஜபா⁴வதோ ரஞ்ஞோ. தேனாஹ – ‘‘யமராஜா நாம வேமானிகபேதராஜா’’தி. கம்மவிபாகந்தி அகுஸலகம்மவிபாகங். வேமானிகபேதாதி கண்ஹஸுக்கவஸேன மிஸ்ஸககம்மங் கத்வா வினிபாதிகதே³வதா விய ஸுக்கேன கம்முனா படிஸந்தி⁴ங் க³ண்ஹந்தி. ததா² ஹி தே மக்³க³ப²லபா⁴கி³னோபி ஹொந்தி, பவத்தியங் பன கம்மானுரூபங் கதா³சி புஞ்ஞப²லங், கதா³சி அபுஞ்ஞப²லங் பச்சனுப⁴வந்தி. யேஸங் பன அரியமக்³கோ³ உப்பஜ்ஜதி, தேஸங் மக்³கா³தி⁴க³மதோ பட்டா²ய புஞ்ஞப²லமேவ உப்பஜ்ஜதீதி த³ட்ட²ப்³ப³ங். அபுஞ்ஞப²லங் புப்³பே³ விய கடுகங் ந ஹோதி. மனுஸ்ஸத்தபா⁴வே டி²தானங் முது³கமேவ ஹோதீதி அபரே. த⁴ம்மிகோ ராஜாதி எத்த² தஸ்ஸ த⁴ம்மிகபா⁴வோ த⁴ம்மதே³வபுத்தஸ்ஸ விய உப்பத்தினியமிதத⁴ம்மவஸேனேவ வேதி³தப்³போ³. த்³வாரேஸூதி அவீசிமஹானரகஸ்ஸ சதூஸு த்³வாரேஸு.
Devadūtasarāpanavasena satte yathūpacite puññakamme yameti niyametīti yamo, tassa yamassa vemānikapetānaṃ rājabhāvato rañño. Tenāha – ‘‘yamarājā nāma vemānikapetarājā’’ti. Kammavipākanti akusalakammavipākaṃ. Vemānikapetāti kaṇhasukkavasena missakakammaṃ katvā vinipātikadevatā viya sukkena kammunā paṭisandhiṃ gaṇhanti. Tathā hi te maggaphalabhāginopi honti, pavattiyaṃ pana kammānurūpaṃ kadāci puññaphalaṃ, kadāci apuññaphalaṃ paccanubhavanti. Yesaṃ pana ariyamaggo uppajjati, tesaṃ maggādhigamato paṭṭhāya puññaphalameva uppajjatīti daṭṭhabbaṃ. Apuññaphalaṃ pubbe viya kaṭukaṃ na hoti. Manussattabhāve ṭhitānaṃ mudukameva hotīti apare. Dhammiko rājāti ettha tassa dhammikabhāvo dhammadevaputtassa viya uppattiniyamitadhammavaseneva veditabbo. Dvāresūti avīcimahānarakassa catūsu dvāresu.
ஜாதித⁴ம்மோதி கம்மகிலேஸவஸேன ஜாதிபகதிகோ. தேனாஹ ‘‘ஜாதிஸபா⁴வோ’’தி. ஸபா⁴வோ ச நாம தேஜோதா⁴துயா உண்ஹதா விய ந கதா³சிபி விக³ச்ச²தீதி ஆஹ ‘‘அபரிமுத்தோ ஜாதியா’’திஆதி³.
Jātidhammoti kammakilesavasena jātipakatiko. Tenāha ‘‘jātisabhāvo’’ti. Sabhāvo ca nāma tejodhātuyā uṇhatā viya na kadācipi vigacchatīti āha ‘‘aparimutto jātiyā’’tiādi.
263. இதா³னி ஜாதியா தே³வதூ³தபா⁴வங் நித்³தா⁴ரெத்வா த³ஸ்ஸேதுங், ‘‘த³ஹரகுமாரோ’’திஆதி³ வுத்தங். அத்த²தோ ஏவங் வத³தி நாமாதி வாசாய அவத³ந்தோபி அத்தா²பத்திதோ ஏவங் வத³ந்தோ விய ஹோதி விஞ்ஞூனந்தி அத்தோ². ஏவங் தும்ஹாகம்பி ஜாதி ஆக³மிஸ்ஸதீதி ஏவங் ஸங்கிலிட்ட²ஜேகு³ச்ச²அஸமத்த²த³ஹராவத்தா² ஜாதி தும்ஹாகங் ஆக³மிஸ்ஸதி. காமஞ்சாயங் ஆக³தா ஏவ, ஸா பன அதீதானாக³தாய உபரிபி ஆக³மனாய பயோகோ³ இச்சி²தப்³போ³, அனாக³தாய ந இச்சி²தப்³போ³தி ஆஹ ‘‘ஜாதி ஆக³மிஸ்ஸதீ’’தி. தேனேவாஹ – ‘‘இதி தஸ்ஸா…பே॰… கரோதா²’’தி. தேனாதி தேன காரணேன விஞ்ஞூனங் வேத³வத்து²பா⁴வேனாதி அத்தோ².
263. Idāni jātiyā devadūtabhāvaṃ niddhāretvā dassetuṃ, ‘‘daharakumāro’’tiādi vuttaṃ. Atthato evaṃ vadati nāmāti vācāya avadantopi atthāpattito evaṃ vadanto viya hoti viññūnanti attho. Evaṃ tumhākampi jāti āgamissatīti evaṃ saṃkiliṭṭhajegucchaasamatthadaharāvatthā jāti tumhākaṃ āgamissati. Kāmañcāyaṃ āgatā eva, sā pana atītānāgatāya uparipi āgamanāya payogo icchitabbo, anāgatāya na icchitabboti āha ‘‘jāti āgamissatī’’ti. Tenevāha – ‘‘iti tassā…pe… karothā’’ti. Tenāti tena kāraṇena viññūnaṃ vedavatthubhāvenāti attho.
ஊருப³லந்தி ஊருப³லீ. தேன தூ³ரேபி க³மனாக³மனலங்க⁴னாதி³ஸமத்த²தங் த³ஸ்ஸேதி, பா³ஹுப³லந்தி பன இமினா ஹத்தே²ஹி காதப்³ப³கிச்சஸமத்த²தங், ஜவக்³க³ஹணேன வேக³ஸ்ஸ பவத்திஸமத்த²தங். அந்தரஹிதா நட்டா². ஸேஸங் பட²மதே³வதூ³தே வுத்தனயமேவ.
Ūrubalanti ūrubalī. Tena dūrepi gamanāgamanalaṅghanādisamatthataṃ dasseti, bāhubalanti pana iminā hatthehi kātabbakiccasamatthataṃ, javaggahaṇena vegassa pavattisamatthataṃ. Antarahitā naṭṭhā. Sesaṃ paṭhamadevadūte vuttanayameva.
விவித⁴ங் து³க்க²ங் ஆத³ஹதீதி ப்³யாதி⁴, விஸேஸேன வா ஆதீ⁴யதி ஏதேனாதி ப்³யாதி⁴, தேன ப்³யாதி⁴னா. அபி⁴ஹதோதி பா³தி⁴தோ, உபத்³து³தோதி அத்தோ².
Vividhaṃ dukkhaṃ ādahatīti byādhi, visesena vā ādhīyati etenāti byādhi, tena byādhinā. Abhihatoti bādhito, upaddutoti attho.
265. காரணா நாம ‘‘ஹத்த²ச்சே²தா³தி³பே⁴தா³ அதி⁴கபீளா கரீயதி ஏதாயா’’தி கத்வா யாதனா, ஸா ஏவ காரணிகேஹி காதப்³ப³ட்டே²ன கம்மந்தி கம்மகாரணா யாதனாகம்மந்தி அத்தோ².
265. Kāraṇā nāma ‘‘hatthacchedādibhedā adhikapīḷā karīyati etāyā’’ti katvā yātanā, sā eva kāraṇikehi kātabbaṭṭhena kammanti kammakāraṇā yātanākammanti attho.
266. ப³ஹுங் பாபங் கதந்தி ப³ஹுஸோ பாபங் கதங். தேன பாபஸ்ஸ ப³ஹுலீகரணமாஹ. ப³ஹூதி வா மஹந்தங். மஹத்தோ²பி ஹி ப³ஹுஸத்³தோ³ தி³ஸ்ஸதி, ‘‘ப³ஹு வத கதங் அஸ்ஸா’’திஆதீ³ஸு, க³ருகந்தி வுத்தங் ஹோதி. ஸோதி க³ருகங் ப³ஹுலங் வா பாபங் கத்வா டி²தோ நிரயே நிப்³ப³த்ததியேவ, ந யமபுரிஸேஹி யமஸ்ஸ ஸந்திகங் நீயதி. பரித்தந்தி பமாணபரித்ததாய காலபரித்ததாய ச பரித்தங், புரிமஸ்மிங் பக்கே² அக³ருந்தி அத்தோ², து³தியஸ்மிங் அப³ஹுலந்தி. யதா²வுத்தமத்த²ங் உபமாய விபா⁴வேதுங், ‘‘யதா² ஹீ’’திஆதி³ வுத்தங். கத்தப்³ப³மேவாதி த³ண்ட³மேவ. அனுவிஜ்ஜித்வா வீமங்ஸித்வா. வினிச்ச²யட்டா²னந்தி அட்டகரணட்டா²னங். பரித்தபாபகம்மாதி து³ப்³ப³லபாபகம்மா. தே ஹி பாபகம்மஸ்ஸ து³ப்³ப³லபா⁴வதோ கதூபசிதஸ்ஸ ச ஓகாஸாரஹகுஸலகம்மஸ்ஸ ப³லவபா⁴வதோ அத்தனோ த⁴ம்மதாயபி ஸரந்தி.
266.Bahuṃ pāpaṃ katanti bahuso pāpaṃ kataṃ. Tena pāpassa bahulīkaraṇamāha. Bahūti vā mahantaṃ. Mahatthopi hi bahusaddo dissati, ‘‘bahu vata kataṃ assā’’tiādīsu, garukanti vuttaṃ hoti. Soti garukaṃ bahulaṃ vā pāpaṃ katvā ṭhito niraye nibbattatiyeva, na yamapurisehi yamassa santikaṃ nīyati. Parittanti pamāṇaparittatāya kālaparittatāya ca parittaṃ, purimasmiṃ pakkhe agarunti attho, dutiyasmiṃ abahulanti. Yathāvuttamatthaṃ upamāya vibhāvetuṃ, ‘‘yathā hī’’tiādi vuttaṃ. Kattabbamevāti daṇḍameva. Anuvijjitvā vīmaṃsitvā. Vinicchayaṭṭhānanti aṭṭakaraṇaṭṭhānaṃ. Parittapāpakammāti dubbalapāpakammā. Te hi pāpakammassa dubbalabhāvato katūpacitassa ca okāsārahakusalakammassa balavabhāvato attano dhammatāyapi saranti.
ஆகாஸசேதியந்தி கி³ரிஸிக²ரே விவடங்க³ணே கதசேதியங். அக்³கி³ஜாலஸத்³த³ந்தி ‘‘படபடா’’தி பவத்தமானங் அக்³கி³ஜாலாய ஸத்³த³ங் ஸுத்வா, ‘‘மயா ததா³ ஆகாஸசேதியே பூஜிதரத்தபடா வியா’’தி அத்தனோ பூஜிதபடங் அனுஸ்ஸரி. பஞ்சஹிபி ந ஸரதீதி ப³லவதா பாபகம்மேன ப்³யாமோஹிதோ பஞ்ச ஸஞ்ஞாணானி ந க³ண்ஹாதி. துண்ஹீ ஹோதி கம்மாரஹோ அயந்தி தத்த² பதீகாரங் அபஸ்ஸந்தோ.
Ākāsacetiyanti girisikhare vivaṭaṅgaṇe katacetiyaṃ. Aggijālasaddanti ‘‘paṭapaṭā’’ti pavattamānaṃ aggijālāya saddaṃ sutvā, ‘‘mayā tadā ākāsacetiye pūjitarattapaṭā viyā’’ti attano pūjitapaṭaṃ anussari. Pañcahipi na saratīti balavatā pāpakammena byāmohito pañca saññāṇāni na gaṇhāti. Tuṇhī hoti kammāraho ayanti tattha patīkāraṃ apassanto.
267. அவீசிமஹானிரயோ உப்³பே³தே⁴னபி யோஜனஸதமேவாதி வத³ந்தி. நவனவயோஜனிகா ஹோதி புது²லதோ. மஹானிரயஸ்ஸ மஹந்தத்தா ததா²பி பி⁴த்திஸதங் யோஜனஸஹஸ்ஸங் ஹோதீதி உஸ்ஸத³ஸ்ஸ ஸப்³ப³ஸ்ஸ பரிக்கே²பதோ ‘‘த³ஸயோஜனஸஹஸ்ஸங் ஹோதீ’’தி வுத்தங்.
267. Avīcimahānirayo ubbedhenapi yojanasatamevāti vadanti. Navanavayojanikā hoti puthulato. Mahānirayassa mahantattā tathāpi bhittisataṃ yojanasahassaṃ hotīti ussadassa sabbassa parikkhepato ‘‘dasayojanasahassaṃ hotī’’ti vuttaṃ.
268. ஜா²யதீதி படிபாகதிகங் ஹோதி. தாதி³ஸமேவாதி புரிமஸதி³ஸத்தா ‘‘உப்³ப⁴தங் ஸதி³ஸமேவ ஹோதீ’’தி ஏவங் வுத்தங். ப³ஹுஸம்பத்தோதி வா ப³ஹுட்டா²னங் அதிக்கமித்வா புரத்தி²மத்³வாரங் ஸம்பத்தோ ஹோதி.
268.Jhāyatīti paṭipākatikaṃ hoti. Tādisamevāti purimasadisattā ‘‘ubbhataṃ sadisameva hotī’’ti evaṃ vuttaṃ. Bahusampattoti vā bahuṭṭhānaṃ atikkamitvā puratthimadvāraṃ sampatto hoti.
ச²ன்னங் ஜாலானந்தி சதூஹி தி³ஸாஹி ஹெட்டா² உபரி ச உப்³ப⁴தானங் ச²ன்னங் ஜாலானங். ஸத்தானங் நிரந்தரதா நிரயஸங்வத்தனியகம்மகதானஞ்ச ப³ஹுபா⁴வதோ ஜாலானங் தாவ ஸத்தானஞ்ச நிரந்தரத்தா அவீசி ஹோது; து³க்க²ஸ்ஸ பன கத²ங் நிரந்தரதாதி தங் த³ஸ்ஸெந்தோ, ‘‘காயத்³வாரே…பே॰… ஏகங் து³க்க²ஸஹக³த’’ந்திஆதி³மாஹ. தத்த² ஆவஜ்ஜனங் ஸம்படிச்ச²னங் ஸந்தீரணங் வொட்ட²ப்³ப³னங் த்³வே ததா³ரம்மணசித்தானீதி ச² உபெக்கா²ஸஹக³தானி. ஏவங் ஸந்தேபீதி யதி³பி தத்த² உபெக்கா²ஸஹக³தசித்தானிபி பவத்தந்தி உபெக்கா²வேத³னாபி லத்³தா⁴வஸரா; து³க்க²வேத³னா பன ப³லவதரா நிஸிதனிஸிதேன திகி²ணேன ஸத்தே²ன நிரந்தரங் ஸரீரங் சி²ந்த³ந்தீ விய து³க்க²ங் உபனெந்தீ விய தா வேத³னா அபி⁴ப⁴வந்தீ அஜ்ஜொ²த்த²ரந்தீ உப்பஜ்ஜந்தீ நிரந்தரா விய ஹோதி. தேனாஹ ‘‘அனுத³ஹனப³லவதாயா’’திஆதி³. உபெக்கா²வேத³னாதி வா தத்த² அதிவிய அனிட்ட²ப²லதாய அனிட்டா²ரம்மணா உபெக்கா²வேத³னா து³க்கா²தி வுச்சதி, யதா² இட்ட²ப²லப³ஹுதாய இட்டா²ரம்மணா ஜா²னாதி³பரியாபன்னே ச ஸுக³திப⁴வே ச உபெக்கா²வேத³னா ஸுகா²தி வுச்சதி, ஏவங் து³க்க²ஸ்ஸ நிரந்தரதாய அவீசீதி வேதி³தப்³ப³ங்.
Channaṃ jālānanti catūhi disāhi heṭṭhā upari ca ubbhatānaṃ channaṃ jālānaṃ. Sattānaṃ nirantaratā nirayasaṃvattaniyakammakatānañca bahubhāvato jālānaṃ tāva sattānañca nirantarattā avīci hotu; dukkhassa pana kathaṃ nirantaratāti taṃ dassento, ‘‘kāyadvāre…pe… ekaṃ dukkhasahagata’’ntiādimāha. Tattha āvajjanaṃ sampaṭicchanaṃ santīraṇaṃ voṭṭhabbanaṃ dve tadārammaṇacittānīti cha upekkhāsahagatāni. Evaṃ santepīti yadipi tattha upekkhāsahagatacittānipi pavattanti upekkhāvedanāpi laddhāvasarā; dukkhavedanā pana balavatarā nisitanisitena tikhiṇena satthena nirantaraṃ sarīraṃ chindantī viya dukkhaṃ upanentī viya tā vedanā abhibhavantī ajjhottharantī uppajjantī nirantarā viya hoti. Tenāha ‘‘anudahanabalavatāyā’’tiādi. Upekkhāvedanāti vā tattha ativiya aniṭṭhaphalatāya aniṭṭhārammaṇā upekkhāvedanā dukkhāti vuccati, yathā iṭṭhaphalabahutāya iṭṭhārammaṇā jhānādipariyāpanne ca sugatibhave ca upekkhāvedanā sukhāti vuccati, evaṃ dukkhassa nirantaratāya avīcīti veditabbaṃ.
269. ஏகோ பாதோ³ மஹானிரயே ஹோதி, ஏகோ கூ³த²னிரயே நிபததி, கம்மவேகு³க்கி²த்தோ அந்தரா பத³மாவஹதி ஸேஸாரம்ப⁴தாய. ஹத்தி²கீ³வப்பமாணா பரிணாஹேன. ஏகதோ³ணிகனாவாப்பமாணா ஆயாமேன.
269.Ekopādo mahāniraye hoti, eko gūthaniraye nipatati, kammavegukkhitto antarā padamāvahati sesārambhatāya. Hatthigīvappamāṇā pariṇāhena. Ekadoṇikanāvāppamāṇā āyāmena.
பொக்க²ரபத்தானீதி கு²ரதா⁴ராஸதி³ஸானி திகி²ணக்³கா³னி அயோஸூலமயானேவ பது³மபத்தானி. ஹெட்டா² கு²ரதா⁴ராதி ஹெட்டா²பூ⁴மியங் நிக்கி²த்தா, வெத்தலதாயோ ச திகி²ணதா⁴ரகண்டகா அயோமயா ஏவ. தேனாஹ – ‘‘ஸோ தத்த² து³க்கா²’’திஆதி³. குஸதிணானீதி குஸதிணஜாதிதாய ததா² வுத்தானி. க²ரவாலிகாதி க²ரா திகி²ணகோடிகா ஸிங்கா⁴டகஸண்டா²னா வாலிகா.
Pokkharapattānīti khuradhārāsadisāni tikhiṇaggāni ayosūlamayāneva padumapattāni. Heṭṭhā khuradhārāti heṭṭhābhūmiyaṃ nikkhittā, vettalatāyo ca tikhiṇadhārakaṇṭakā ayomayā eva. Tenāha – ‘‘so tattha dukkhā’’tiādi. Kusatiṇānīti kusatiṇajātitāya tathā vuttāni. Kharavālikāti kharā tikhiṇakoṭikā siṅghāṭakasaṇṭhānā vālikā.
270. த³ந்தே ஸம்பு²ஸேதீதி ஹெட்டி²மத³ந்தே யதா² கிஞ்சி முகே² பக்கி²பிதுங் ந ஸக்கா, ஏவங் ஸுபு²ஸிதே கரோதி. தம்ப³லோஹபானதோ பட்டா²யாதி வுத்தகாரணதோ படிலோமதோபி ஏவங் கம்மகாரணானங் காரணமாஹ. து³தியேனாதி குடா²ரீஹி தச்ச²னேன. ததியேனாதி வாஸீஹி தச்ச²னேன. அவிஜஹிதமேவ ஸங்வேக³ஹேதுதாய லோகஸ்ஸ மஹதோ அத்த²ஸ்ஸ ஸங்வத்தனதோ.
270.Dante samphusetīti heṭṭhimadante yathā kiñci mukhe pakkhipituṃ na sakkā, evaṃ suphusite karoti. Tambalohapānato paṭṭhāyāti vuttakāraṇato paṭilomatopi evaṃ kammakāraṇānaṃ kāraṇamāha. Dutiyenāti kuṭhārīhi tacchanena. Tatiyenāti vāsīhi tacchanena. Avijahitameva saṃvegahetutāya lokassa mahato atthassa saṃvattanato.
271. ஹீனகாயங் ஹீனங் வா அத்தபா⁴வங் உபக³தா. உபாதா³னேதி சதுப்³பி³தே⁴பி உபாதா³னே. தங் அத்த²தோ தண்ஹாதி³ட்டி²க்³கா³ஹோதி ஆஹ ‘‘தண்ஹாதி³ட்டி²க³ஹணே’’தி. ஸம்ப⁴வதி ஜராமரணங் ஏதேனாதி ஸம்ப⁴வோ, உபாதா³னந்தி ஆஹ – ‘‘ஜாதியா மரணஸ்ஸ ச காரணபூ⁴தே’’தி. அனுபாதா³தி அனுபாதா³ய. தேனாஹ ‘‘அனுபாதி³யித்வா’’தி.
271.Hīnakāyaṃ hīnaṃ vā attabhāvaṃ upagatā. Upādāneti catubbidhepi upādāne. Taṃ atthato taṇhādiṭṭhiggāhoti āha ‘‘taṇhādiṭṭhigahaṇe’’ti. Sambhavati jarāmaraṇaṃ etenāti sambhavo, upādānanti āha – ‘‘jātiyā maraṇassa ca kāraṇabhūte’’ti. Anupādāti anupādāya. Tenāha ‘‘anupādiyitvā’’ti.
ஸப்³ப³து³க்கா²திக்கந்தா நாமாதி ஸகலம்பி வட்டது³க்க²ங் அதிக்கந்தா ஏவ ஹொந்தி சரிமசித்தனிரோதே⁴ன வட்டது³க்க²லேஸஸ்ஸபி அஸம்ப⁴வதோ.
Sabbadukkhātikkantā nāmāti sakalampi vaṭṭadukkhaṃ atikkantā eva honti carimacittanirodhena vaṭṭadukkhalesassapi asambhavato.
தே³வதூ³தஸுத்தவண்ணனாய லீனத்த²ப்பகாஸனா ஸமத்தா.
Devadūtasuttavaṇṇanāya līnatthappakāsanā samattā.
நிட்டி²தா ச ஸுஞ்ஞதவக்³க³வண்ணனா.
Niṭṭhitā ca suññatavaggavaṇṇanā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / மஜ்ஜி²மனிகாய • Majjhimanikāya / 10. தே³வதூ³தஸுத்தங் • 10. Devadūtasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / மஜ்ஜி²மனிகாய (அட்ட²கதா²) • Majjhimanikāya (aṭṭhakathā) / 10. தே³வதூ³தஸுத்தவண்ணனா • 10. Devadūtasuttavaṇṇanā
