| Library / Tipiṭaka / তিপিটক • Tipiṭaka / মজ্ঝিমনিকায (অট্ঠকথা) • Majjhimanikāya (aṭṭhakathā) |
১০. দেৰদূতসুত্তৰণ্ণনা
10. Devadūtasuttavaṇṇanā
২৬১. এৰং মে সুতন্তি দেৰদূতসুত্তং। তত্থ দ্ৰে অগারাতিআদি অস্সপুরসুত্তে ৰিত্থারিতমেৰ।
261.Evaṃme sutanti devadūtasuttaṃ. Tattha dve agārātiādi assapurasutte vitthāritameva.
২৬২. নিরযং উপপন্নাতি ভগৰা কত্থচি নিরযতো পট্ঠায দেসনং দেৰলোকেন ওসাপেতি, কত্থচি দেৰলোকতো পট্ঠায নিরযেন ওসাপেতি। সচে সগ্গসম্পত্তিং ৰিত্থারেত্ৰা কথেতুকামো হোতি, নিরযদুক্খং একদেসতো কথেতি, তিরচ্ছানযোনিদুক্খং পেত্তিৰিসযদুক্খং মনুস্সলোকসম্পত্তিং একদেসতো কথেতি, সগ্গসম্পত্তিমেৰ ৰিত্থারেতি। সচে নিরযদুক্খং ৰিত্থারেত্ৰা কথেতুকামো হোতি, দেৰলোকমনুস্সলোকেসু সম্পত্তিং তিরচ্ছানযোনিপেত্তিৰিসযেসু চ দুক্খং একদেসতো কথেতি, নিরযদুক্খমেৰ ৰিত্থারেতি। সো ইমস্মিং সুত্তে নিরযদুক্খং ৰিত্থারেতুকামো, তস্মা দেৰলোকতো পট্ঠায দেসনং নিরযেন ওসাপেতি। দেৰলোকমনুস্সলোকসম্পত্তিযো তিরচ্ছানযোনিপেত্তিৰিসযদুক্খানি চ একদেসতো কথেত্ৰা নিরযদুক্খমেৰ ৰিত্থারেন কথেতুং তমেনং, ভিক্খৰে, নিরযপালাতিআদিমাহ।
262.Nirayaṃ upapannāti bhagavā katthaci nirayato paṭṭhāya desanaṃ devalokena osāpeti, katthaci devalokato paṭṭhāya nirayena osāpeti. Sace saggasampattiṃ vitthāretvā kathetukāmo hoti, nirayadukkhaṃ ekadesato katheti, tiracchānayonidukkhaṃ pettivisayadukkhaṃ manussalokasampattiṃ ekadesato katheti, saggasampattimeva vitthāreti. Sace nirayadukkhaṃ vitthāretvā kathetukāmo hoti, devalokamanussalokesu sampattiṃ tiracchānayonipettivisayesu ca dukkhaṃ ekadesato katheti, nirayadukkhameva vitthāreti. So imasmiṃ sutte nirayadukkhaṃ vitthāretukāmo, tasmā devalokato paṭṭhāya desanaṃ nirayena osāpeti. Devalokamanussalokasampattiyo tiracchānayonipettivisayadukkhāni ca ekadesato kathetvā nirayadukkhameva vitthārena kathetuṃ tamenaṃ, bhikkhave, nirayapālātiādimāha.
তত্থ একচ্চে থেরা ‘‘নিরযপালা নাম নত্থি, যন্তরূপং ৰিয কম্মমেৰ কারণং কারেতী’’তি ৰদন্তি। তেসং তং ‘‘অত্থি নিরযে নিরযপালাতি, আমন্তা, অত্থি চ কারণিকা’’তিআদিনা নযেন অভিধম্মে (কথা॰ ৮৬৬) পটিসেধিতমেৰ। যথা হি মনুস্সলোকে কম্মকারণকারকা অত্থি, এৰমেৰ নিরযে নিরযপালা অত্থীতি। যমস্স রঞ্ঞোতি যমরাজা নাম ৰেমানিকপেতরাজা, একস্মিং কালে দিব্বৰিমানে দিব্বকপ্পরুক্খদিব্বউয্যানদিব্বনাটকাদিসম্পত্তিং অনুভৰতি, একস্মিং কালে কম্মৰিপাকং, ধম্মিকো রাজা। ন চেস একোৰ হোতি, চতূসু পন দ্ৰারেসু চত্তারো জনা হোন্তি। নাদ্দসন্তি অত্তনো সন্তিকে পেসিতস্স কস্সচি দেৰদূতস্স অভাৰং সন্ধায এৰং ৰদতি। অথ নং যমো ‘‘নাযং ভাসিতস্স অত্থং সল্লক্খেতী’’তি ঞত্ৰা সল্লক্খাপেতুকামো অম্ভোতিআদিমাহ।
Tattha ekacce therā ‘‘nirayapālā nāma natthi, yantarūpaṃ viya kammameva kāraṇaṃ kāretī’’ti vadanti. Tesaṃ taṃ ‘‘atthi niraye nirayapālāti, āmantā, atthi ca kāraṇikā’’tiādinā nayena abhidhamme (kathā. 866) paṭisedhitameva. Yathā hi manussaloke kammakāraṇakārakā atthi, evameva niraye nirayapālā atthīti. Yamassa raññoti yamarājā nāma vemānikapetarājā, ekasmiṃ kāle dibbavimāne dibbakapparukkhadibbauyyānadibbanāṭakādisampattiṃ anubhavati, ekasmiṃ kāle kammavipākaṃ, dhammiko rājā. Na cesa ekova hoti, catūsu pana dvāresu cattāro janā honti. Nāddasanti attano santike pesitassa kassaci devadūtassa abhāvaṃ sandhāya evaṃ vadati. Atha naṃ yamo ‘‘nāyaṃ bhāsitassa atthaṃ sallakkhetī’’ti ñatvā sallakkhāpetukāmo ambhotiādimāha.
জাতিধম্মোতি জাতিসভাৰো, অপরিমুত্তো জাতিযা, জাতি নাম ময্হং অব্ভন্তরেযেৰ অত্থীতি। পরতো জরাধম্মোতিআদীসুপি এসেৰ নযো।
Jātidhammoti jātisabhāvo, aparimutto jātiyā, jāti nāma mayhaṃ abbhantareyeva atthīti. Parato jarādhammotiādīsupi eseva nayo.
২৬৩. পঠমং দেৰদূতং সমনুযুঞ্জিত্ৰাতি এত্থ দহরকুমারো অত্থতো এৰং ৰদতি নাম ‘‘পস্সথ, ভো, ময্হম্পি তুম্হাকং ৰিয হত্থপাদা অত্থি, সকে পনম্হি মুত্তকরীসে পলিপন্নো, অত্তনো ধম্মতায উট্ঠহিত্ৰা ন্হাযিতুং ন সক্কোমি, অহং কিলিট্ঠগত্তোম্হি, ন্হাপেথ মন্তি ৰত্তুম্পি ন সক্কোমি, জাতিতোম্হি অপরিমুত্ততায এদিসো জাতো। ন খো পনাহমেৰ, তুম্হেপি জাতিতো অপরিমুত্তাৰ। যথেৰ হি ময্হং, এৰং তুম্হাকম্পি জাতি আগমিস্সতি, ইতি তস্সা পুরে আগমনাৰ কল্যাণং করোথা’’তি। তেনেস দেৰদূতো নাম জাতো, ৰচনত্থো পন মঘদেৰসুত্তে ৰুত্তোৰ।
263.Paṭhamaṃ devadūtaṃ samanuyuñjitvāti ettha daharakumāro atthato evaṃ vadati nāma ‘‘passatha, bho, mayhampi tumhākaṃ viya hatthapādā atthi, sake panamhi muttakarīse palipanno, attano dhammatāya uṭṭhahitvā nhāyituṃ na sakkomi, ahaṃ kiliṭṭhagattomhi, nhāpetha manti vattumpi na sakkomi, jātitomhi aparimuttatāya ediso jāto. Na kho panāhameva, tumhepi jātito aparimuttāva. Yatheva hi mayhaṃ, evaṃ tumhākampi jāti āgamissati, iti tassā pure āgamanāva kalyāṇaṃ karothā’’ti. Tenesa devadūto nāma jāto, vacanattho pana maghadevasutte vuttova.
দুতিযং দেৰদূতন্তি এত্থাপি জরাজিণ্ণসত্তো অত্থতো এৰং ৰদতি নাম – ‘‘পস্সথ, ভো, অহম্পি তুম্হে ৰিয তরুণো অহোসিং ঊরুবলবাহুবলজৰনসম্পন্নো, তস্স মে তা বলজৰনসম্পত্তিযো অন্তরহিতা, ৰিজ্জমানাপি মে হত্থপাদা হত্থপাদকিচ্চং ন করোন্তি, জরাযম্হি অপরিমুত্ততায এদিসো জাতো। ন খো পনাহমেৰ, তুম্হেপি জরায অপরিমুত্তাৰ। যথেৰ হি ময্হং, এৰং তুম্হাকম্পি জরা আগমিস্সতি, ইতি তস্সা পুরে আগমনাৰ কল্যাণং করোথা’’তি। তেনেস দেৰদূতো নাম জাতো।
Dutiyaṃdevadūtanti etthāpi jarājiṇṇasatto atthato evaṃ vadati nāma – ‘‘passatha, bho, ahampi tumhe viya taruṇo ahosiṃ ūrubalabāhubalajavanasampanno, tassa me tā balajavanasampattiyo antarahitā, vijjamānāpi me hatthapādā hatthapādakiccaṃ na karonti, jarāyamhi aparimuttatāya ediso jāto. Na kho panāhameva, tumhepi jarāya aparimuttāva. Yatheva hi mayhaṃ, evaṃ tumhākampi jarā āgamissati, iti tassā pure āgamanāva kalyāṇaṃ karothā’’ti. Tenesa devadūto nāma jāto.
ততিযং দেৰদূতন্তি এত্থাপি গিলানসত্তো অত্থতো এৰ ৰদতি নাম – ‘‘পস্সথ, ভো, অহম্পি তুম্হে ৰিয নিরোগো অহোসিং, সোম্হি এতরহি ব্যাধিনা অভিহতো সকে মুত্তকরীসে পলিপন্নো, উট্ঠাতুম্পি ন সক্কোমি, ৰিজ্জমানাপি মে হত্থপাদা হত্থপাদকিচ্চং ন করোন্তি, ব্যাধিতোম্হি অপরিমুত্ততায এদিসো জাতো। ন খো পনাহমেৰ, তুম্হেপি ব্যাধিতো অপরিমুত্তাৰ। যথেৰ হি ময্হং, এৰং তুম্হাকং ব্যাধি আগমিস্সতি, ইতি তস্স পুরে আগমনাৰ কল্যাণং করোথা’’তি। তেনেস দেৰদূতো নাম জাতো।
Tatiyaṃ devadūtanti etthāpi gilānasatto atthato eva vadati nāma – ‘‘passatha, bho, ahampi tumhe viya nirogo ahosiṃ, somhi etarahi byādhinā abhihato sake muttakarīse palipanno, uṭṭhātumpi na sakkomi, vijjamānāpi me hatthapādā hatthapādakiccaṃ na karonti, byādhitomhi aparimuttatāya ediso jāto. Na kho panāhameva, tumhepi byādhito aparimuttāva. Yatheva hi mayhaṃ, evaṃ tumhākaṃ byādhi āgamissati, iti tassa pure āgamanāva kalyāṇaṃ karothā’’ti. Tenesa devadūto nāma jāto.
২৬৫. চতুত্থং দেৰদূতন্তি এত্থ পন কম্মকারণা ৰা দেৰদূতাতি কাতব্বা কম্মকারণিকা ৰা। তত্থ পন কম্মকারণপক্খে বাত্তিংস তাৰ কম্মকারণা অত্থতো এৰং ৰদন্তি নাম – ‘‘মযং নিব্বত্তমানা ন রুক্খে ৰা পাসাণে ৰা নিব্বত্তাম, তুম্হাদিসানং সরীরে নিব্বত্তাম, ইতি অম্হাকং পুরে নিব্বত্তিতোৰ কল্যাণং করোথা’’তি। তেনেতে দেৰদূতা নাম জাতা। কম্মকারণিকাপি অত্থতো এৰং ৰদন্তি নাম – ‘‘মযং দ্ৰত্তিংস কম্মকারণা করোন্তা ন রুক্খাদীসু করোম, তুম্হাদিসেসু সত্তেসুযেৰ করোম, ইতি অম্হাকং তুম্হেসু পুরে কম্মকারণাকরণতোৰ কল্যাণং করোথা’’তি। তেনেতেপি দেৰদূতা নাম জাতা।
265.Catutthaṃ devadūtanti ettha pana kammakāraṇā vā devadūtāti kātabbā kammakāraṇikā vā. Tattha pana kammakāraṇapakkhe bāttiṃsa tāva kammakāraṇā atthato evaṃ vadanti nāma – ‘‘mayaṃ nibbattamānā na rukkhe vā pāsāṇe vā nibbattāma, tumhādisānaṃ sarīre nibbattāma, iti amhākaṃ pure nibbattitova kalyāṇaṃ karothā’’ti. Tenete devadūtā nāma jātā. Kammakāraṇikāpi atthato evaṃ vadanti nāma – ‘‘mayaṃ dvattiṃsa kammakāraṇā karontā na rukkhādīsu karoma, tumhādisesu sattesuyeva karoma, iti amhākaṃ tumhesu pure kammakāraṇākaraṇatova kalyāṇaṃ karothā’’ti. Tenetepi devadūtā nāma jātā.
২৬৬. পঞ্চমং দেৰদূতন্তি এত্থ মতকসত্তো অত্থতো এৰং ৰদতি নাম – ‘‘পস্সথ ভো মং আমকসুসানে ছড্ডিতং উদ্ধুমাতকাদিভাৰং পত্তং, মরণতোম্হি অপরিমুত্ততায এদিসো জাতো। ন খো পনাহমেৰ, তুম্হেপি মরণতো অপরিমুত্তাৰ। যথেৰ হি ময্হং, এৰং তুম্হাকম্পি মরণং আগমিস্সতি, ইতি তস্স পুরে আগমনাৰ কল্যাণং করোথা’’তি। তেনেস দেৰদূতো নাম জাতো।
266.Pañcamaṃ devadūtanti ettha matakasatto atthato evaṃ vadati nāma – ‘‘passatha bho maṃ āmakasusāne chaḍḍitaṃ uddhumātakādibhāvaṃ pattaṃ, maraṇatomhi aparimuttatāya ediso jāto. Na kho panāhameva, tumhepi maraṇato aparimuttāva. Yatheva hi mayhaṃ, evaṃ tumhākampi maraṇaṃ āgamissati, iti tassa pure āgamanāva kalyāṇaṃ karothā’’ti. Tenesa devadūto nāma jāto.
ইমং পন দেৰদূতানুযোগং কো লভতি, কো ন লভতীতি? যেন তাৰ বহুং পাপং কতং, সো গন্ত্ৰা নিরযে নিব্বত্ততিযেৰ। যেন পন পরিত্তং পাপকম্মং কতং, সো লভতি। যথা হি সভণ্ডং চোরং গহেত্ৰা কত্তব্বমেৰ করোন্তি, ন ৰিনিচ্ছিনন্তি। অনুৰিজ্জিত্ৰা গহিতং পন ৰিনিচ্ছযট্ঠানং নযন্তি, সো ৰিনিচ্ছযং লভতি। এৰংসম্পদমেতং। পরিত্তপাপকম্মা হি অত্তনো ধম্মতাযপি সরন্তি, সারিযমানাপি সরন্তি।
Imaṃ pana devadūtānuyogaṃ ko labhati, ko na labhatīti? Yena tāva bahuṃ pāpaṃ kataṃ, so gantvā niraye nibbattatiyeva. Yena pana parittaṃ pāpakammaṃ kataṃ, so labhati. Yathā hi sabhaṇḍaṃ coraṃ gahetvā kattabbameva karonti, na vinicchinanti. Anuvijjitvā gahitaṃ pana vinicchayaṭṭhānaṃ nayanti, so vinicchayaṃ labhati. Evaṃsampadametaṃ. Parittapāpakammā hi attano dhammatāyapi saranti, sāriyamānāpi saranti.
তত্থ দীঘজযন্তদমিল়ো নাম অত্তনো ধম্মতায সরি। সো কির দমিল়ো সুমনগিরিৰিহারে আকাসচেতিযং রত্তপটেন পূজেসি। অথ নিরযে উস্সদসামন্তে নিব্বত্তো অগ্গিজালসদ্দং সুত্ৰাৰ অত্তনো পূজিতপটং অনুস্সরি, সো গন্ত্ৰা সগ্গে নিব্বত্তো। অপরোপি পুত্তস্স দহরভিক্খুনো খলিসাটকং দেন্তো পাদমূলে ঠপেসি, মরণকালম্হি পটপটাতি সদ্দে নিমিত্তং গণ্হি, সোপি উস্সদসামন্তে নিব্বত্তো জালসদ্দেন তং সাটকং অনুস্সরিত্ৰা সগ্গে নিব্বত্তো। এৰং তাৰ অত্তনো ধম্মতায কুসলং কম্মং সরিত্ৰা সগ্গে নিব্বত্ততীতি।
Tattha dīghajayantadamiḷo nāma attano dhammatāya sari. So kira damiḷo sumanagirivihāre ākāsacetiyaṃ rattapaṭena pūjesi. Atha niraye ussadasāmante nibbatto aggijālasaddaṃ sutvāva attano pūjitapaṭaṃ anussari, so gantvā sagge nibbatto. Aparopi puttassa daharabhikkhuno khalisāṭakaṃ dento pādamūle ṭhapesi, maraṇakālamhi paṭapaṭāti sadde nimittaṃ gaṇhi, sopi ussadasāmante nibbatto jālasaddena taṃ sāṭakaṃ anussaritvā sagge nibbatto. Evaṃ tāva attano dhammatāya kusalaṃ kammaṃ saritvā sagge nibbattatīti.
অত্তনো ধম্মতায অসরন্তে পন পঞ্চ দেৰদূতে পুচ্ছতি। তত্থ কোচি পঠমেন দেৰদূতেন সরতি, কোচি দুতিযাদীহি। যো পন পঞ্চহিপি ন সরতি, তং যমো রাজা সযং সারেতি। একো কির অমচ্চো সুমনপুপ্ফকুম্ভেন মহাচেতিযং পূজেত্ৰা যমস্স পত্তিং অদাসি, তং অকুসলকম্মেন নিরযে নিব্বত্তং যমস্স সন্তিকং নযিংসু। তস্মিং পঞ্চহিপি দেৰদূতেহি কুসলে অসরন্তে যমো সযং ওলোকেন্তো দিস্ৰা – ‘‘ননু ত্ৰং মহাচেতিযং সুমনপুপ্ফকুম্ভেন পূজেত্ৰা ময্হং পত্তিং অদাসী’’তি সারেসি, সো তস্মিং কালে সরিত্ৰা দেৰলোকং গতো। যমো পন সযং ওলোকেত্ৰাপি অপস্সন্তো – ‘‘মহাদুক্খং নাম অনুভৰিস্সতি অযং সত্তো’’তি তুণ্হী হোতি।
Attano dhammatāya asarante pana pañca devadūte pucchati. Tattha koci paṭhamena devadūtena sarati, koci dutiyādīhi. Yo pana pañcahipi na sarati, taṃ yamo rājā sayaṃ sāreti. Eko kira amacco sumanapupphakumbhena mahācetiyaṃ pūjetvā yamassa pattiṃ adāsi, taṃ akusalakammena niraye nibbattaṃ yamassa santikaṃ nayiṃsu. Tasmiṃ pañcahipi devadūtehi kusale asarante yamo sayaṃ olokento disvā – ‘‘nanu tvaṃ mahācetiyaṃ sumanapupphakumbhena pūjetvā mayhaṃ pattiṃ adāsī’’ti sāresi, so tasmiṃ kāle saritvā devalokaṃ gato. Yamo pana sayaṃ oloketvāpi apassanto – ‘‘mahādukkhaṃ nāma anubhavissati ayaṃ satto’’ti tuṇhī hoti.
২৬৭. মহানিরযেতি অৰীচিমহানিরযম্হি। কিং পনস্স পমাণং? অব্ভন্তরং আযামেন চ ৰিত্থারেন চ যোজনসতং হোতি। লোহপথৰী লোহছদনং একেকা চ ভিত্তি নৰনৰযোজনিকা হোতি। পুরত্থিমায ভিত্তিযা অচ্চি উট্ঠিতা পচ্ছিমং ভিত্তিং গহেত্ৰা তং ৰিনিৰিজ্ঝিত্ৰা পরতো যোজনসতং গচ্ছতি। সেসদিসাসুপি এসেৰ নযো। ইতি জালপরিযন্তৰসেন আযামৰিত্থারতো অট্ঠারসযোজনাধিকানি তীণি যোজনসতানি, পরিক্খেপতো পন নৰযোজনসতানি চতুপণ্ণাসযোজনানি, সমন্তা পন উস্সদেহি সদ্ধিং দসযোজনসহস্সং হোতি।
267.Mahānirayeti avīcimahānirayamhi. Kiṃ panassa pamāṇaṃ? Abbhantaraṃ āyāmena ca vitthārena ca yojanasataṃ hoti. Lohapathavī lohachadanaṃ ekekā ca bhitti navanavayojanikā hoti. Puratthimāya bhittiyā acci uṭṭhitā pacchimaṃ bhittiṃ gahetvā taṃ vinivijjhitvā parato yojanasataṃ gacchati. Sesadisāsupi eseva nayo. Iti jālapariyantavasena āyāmavitthārato aṭṭhārasayojanādhikāni tīṇi yojanasatāni, parikkhepato pana navayojanasatāni catupaṇṇāsayojanāni, samantā pana ussadehi saddhiṃ dasayojanasahassaṃ hoti.
২৬৮. উব্ভতং তাদিসমেৰ হোতীতি এত্থ অক্কন্তপদং যাৰ অট্ঠিতো দল়্হং উদ্ধরিতুমেৰ ন সক্কা। অযং পনেত্থ অত্থো – হেট্ঠতো পট্ঠায ডয্হতি, উপরিতো পট্ঠায ঝাযতি, ইতি অক্কমনকালে ডয্হমানং পঞ্ঞাযতি, উদ্ধরণকালে তাদিসমেৰ, তস্মা এৰং ৰুত্তং। বহুসম্পত্তোতি বহূনি ৰস্সসতৰস্সসহস্সানি সম্পত্তো।
268.Ubbhataṃ tādisameva hotīti ettha akkantapadaṃ yāva aṭṭhito daḷhaṃ uddharitumeva na sakkā. Ayaṃ panettha attho – heṭṭhato paṭṭhāya ḍayhati, uparito paṭṭhāya jhāyati, iti akkamanakāle ḍayhamānaṃ paññāyati, uddharaṇakāle tādisameva, tasmā evaṃ vuttaṃ. Bahusampattoti bahūni vassasatavassasahassāni sampatto.
কস্মা পনেস নরকো অৰীচীতি সঙ্খং গতোতি। ৰীচি নাম অন্তরং ৰুচ্চতি, তত্থ চ অগ্গিজালানং ৰা সত্তানং ৰা দুক্খস্স ৰা অন্তরং নত্থি। তস্মা সো অৰীচীতি সঙ্খং গতোতি। তস্স হি পুরত্থিমভিত্তিতো জালা উট্ঠিতা সংসিব্বমানা যোজনসতং গন্ত্ৰা পচ্ছিমভিত্তিং ৰিনিৰিজ্ঝিত্ৰা পরতো যোজনসতং গচ্ছতি। সেসদিসাসুপি এসেৰ নযো।
Kasmā panesa narako avīcīti saṅkhaṃ gatoti. Vīci nāma antaraṃ vuccati, tattha ca aggijālānaṃ vā sattānaṃ vā dukkhassa vā antaraṃ natthi. Tasmā so avīcīti saṅkhaṃ gatoti. Tassa hi puratthimabhittito jālā uṭṭhitā saṃsibbamānā yojanasataṃ gantvā pacchimabhittiṃ vinivijjhitvā parato yojanasataṃ gacchati. Sesadisāsupi eseva nayo.
ইমেসং ছন্নং জালানং মজ্ঝে নিব্বত্তো দেৰদত্তো, তস্স যোজনসতপ্পমাণো অত্তভাৰো, দ্ৰে পাদা যাৰ গোপ্ফকা লোহপথৰিং পৰিট্ঠা, দ্ৰে হত্থা যাৰ মণিবন্ধা লোহভিত্তিযো পৰিট্ঠা, সীসং যাৰ ভমুকট্ঠিতো লোহছদনে পৰিট্ঠং, অধোভাগেন একং লোহসূলং পৰিসিত্ৰা কাযং ৰিনিৰিজ্ঝন্তং ছদনে পৰিট্ঠং, পাচীনভিত্তিতো নিক্খন্তসূলং হদযং ৰিনিৰিজ্ঝিত্ৰা পচ্ছিমভিত্তিং পৰিট্ঠং , উত্তরভিত্তিতো নিক্খন্তসূলং ফাসুকা ৰিনিৰিজ্ঝিত্ৰা দক্খিণভিত্তিং পৰিট্ঠং। নিচ্চলে তথাগতম্হি অপরদ্ধত্তা নিচ্চলোৰ হুত্ৰা পচ্চতীতি কম্মসরিক্খতায এদিসো জাতো। এৰং জালানং নিরন্তরতায অৰীচি নাম।
Imesaṃ channaṃ jālānaṃ majjhe nibbatto devadatto, tassa yojanasatappamāṇo attabhāvo, dve pādā yāva gopphakā lohapathaviṃ paviṭṭhā, dve hatthā yāva maṇibandhā lohabhittiyo paviṭṭhā, sīsaṃ yāva bhamukaṭṭhito lohachadane paviṭṭhaṃ, adhobhāgena ekaṃ lohasūlaṃ pavisitvā kāyaṃ vinivijjhantaṃ chadane paviṭṭhaṃ, pācīnabhittito nikkhantasūlaṃ hadayaṃ vinivijjhitvā pacchimabhittiṃ paviṭṭhaṃ , uttarabhittito nikkhantasūlaṃ phāsukā vinivijjhitvā dakkhiṇabhittiṃ paviṭṭhaṃ. Niccale tathāgatamhi aparaddhattā niccalova hutvā paccatīti kammasarikkhatāya ediso jāto. Evaṃ jālānaṃ nirantaratāya avīci nāma.
অব্ভন্তরে পনস্স যোজনসতিকে ঠানে নাল়িযং কোট্টেত্ৰা পূরিতপিট্ঠং ৰিয সত্তা নিরন্তরা, ‘‘ইমস্মিং ঠানে সত্তো অত্থি, ইমস্মিং নত্থী’’তি ন ৰত্তব্বং, গচ্ছন্তানং ঠিতানং নিসিন্নানং নিপন্নানং অন্তো নত্থি, গচ্ছন্তে ৰা ঠিতে ৰা নিসিন্নে ৰা নিপন্নে ৰা অঞ্ঞমঞ্ঞং ন বাধন্তি। এৰং সত্তানং নিরন্তরতায অৰীচি।
Abbhantare panassa yojanasatike ṭhāne nāḷiyaṃ koṭṭetvā pūritapiṭṭhaṃ viya sattā nirantarā, ‘‘imasmiṃ ṭhāne satto atthi, imasmiṃ natthī’’ti na vattabbaṃ, gacchantānaṃ ṭhitānaṃ nisinnānaṃ nipannānaṃ anto natthi, gacchante vā ṭhite vā nisinne vā nipanne vā aññamaññaṃ na bādhanti. Evaṃ sattānaṃ nirantaratāya avīci.
কাযদ্ৰারে পন ছ উপেক্খাসহগতানি চিত্তানি উপ্পজ্জন্তি, একং দুক্খসহগতং। এৰং সন্তেপি যথা জিৰ্হগ্গে ছ মধুবিন্দূনি ঠপেত্ৰা একস্মিং তম্বলোহবিন্দুম্হি ঠপিতে অনুদহনবলৰতায তদেৰ পঞ্ঞাযতি, ইতরানি অব্বোহারিকানি হোন্তি, এৰং অনুদহনবলৰতায দুক্খমেৰেত্থ নিরন্তরং, ইতরানি অব্বোহারিকানীতি। এৰং দুক্খস্স নিরন্তরতায অৰীচি।
Kāyadvāre pana cha upekkhāsahagatāni cittāni uppajjanti, ekaṃ dukkhasahagataṃ. Evaṃ santepi yathā jivhagge cha madhubindūni ṭhapetvā ekasmiṃ tambalohabindumhi ṭhapite anudahanabalavatāya tadeva paññāyati, itarāni abbohārikāni honti, evaṃ anudahanabalavatāya dukkhamevettha nirantaraṃ, itarāni abbohārikānīti. Evaṃ dukkhassa nirantaratāya avīci.
২৬৯. মহন্তোতি যোজনসতিকো। সো তত্থ পততীতি একো পাদো মহানিরযে হোতি, একো গূথনিরযে নিপততি। সূচিমুখাতি সূচিসদিসমুখা, তে হত্থিগীৰপ্পমাণা একদোণিকনাৰাপ্পমাণা ৰা হোন্তি।
269.Mahantoti yojanasatiko. So tattha patatīti eko pādo mahāniraye hoti, eko gūthaniraye nipatati. Sūcimukhāti sūcisadisamukhā, te hatthigīvappamāṇā ekadoṇikanāvāppamāṇā vā honti.
কুক্কুলনিরযোতি যোজনসতপ্পমাণোৰ অন্তো কূটাগারমত্তৰিতচ্চিতঅঙ্গারপুণ্ণো আদিত্তছারিকনিরযো, যত্থ পতিতপতিতা কুদ্রূসকরাসিম্হি খিত্তফালৰাসিসিলাদীনি ৰিয হেট্ঠিমতলমেৰ গণ্হন্তি।
Kukkulanirayoti yojanasatappamāṇova anto kūṭāgāramattavitaccitaaṅgārapuṇṇo ādittachārikanirayo, yattha patitapatitā kudrūsakarāsimhi khittaphālavāsisilādīni viya heṭṭhimatalameva gaṇhanti.
আরোপেন্তীতি অযদণ্ডেহি পোথেন্তা আরোপেন্তি। তেসং আরোহনকালে তে কণ্টকা অধোমুখা হোন্তি, ওরোহনকালে উদ্ধংমুখা।
Āropentīti ayadaṇḍehi pothentā āropenti. Tesaṃ ārohanakāle te kaṇṭakā adhomukhā honti, orohanakāle uddhaṃmukhā.
ৰাতেরিতানীতি কম্মমযেন ৰাতেন চলিতানি। হত্থম্পি ছিন্দন্তীতি ফলকে মংসং ৰিয কোট্টযমানানি ছিন্দন্তি। সচে উট্ঠায পলাযতি, অযোপাকারো সমুট্ঠহিত্ৰা পরিক্খিপতি, হেট্ঠা খুরধারা সমুট্ঠাতি।
Vāteritānīti kammamayena vātena calitāni. Hatthampi chindantīti phalake maṃsaṃ viya koṭṭayamānāni chindanti. Sace uṭṭhāya palāyati, ayopākāro samuṭṭhahitvā parikkhipati, heṭṭhā khuradhārā samuṭṭhāti.
খারোদকা নদীতি ৰেতরণী নাম তম্বলোহনদী। তত্থ অযোমযানি খরৰালিক-পোক্খরপত্তানি, হেট্ঠা খুরধারা উভোসু তীরেসু ৰেত্তলতা চ কুসতিণানি চ। সো তত্থ দুক্খা তিব্বা খরাতি সো তত্থ উদ্ধঞ্চ অধো চ ৰুয্হমানো পোক্খরপত্তেসু ছিজ্জতি। সিঙ্ঘাটকসণ্ঠানায খরৰালিকায কণ্টকেহি ৰিজ্ঝিযতি, খুরধারাহি ফালিযতি, উভোসু তীরেসু কুসতিণেহি ৰিলেখতি, ৰেত্তলতাহি আকড্ঢিযতি, তিক্খসত্তীহি ফালিযতি।
Khārodakā nadīti vetaraṇī nāma tambalohanadī. Tattha ayomayāni kharavālika-pokkharapattāni, heṭṭhā khuradhārā ubhosu tīresu vettalatā ca kusatiṇāni ca. So tattha dukkhā tibbā kharāti so tattha uddhañca adho ca vuyhamāno pokkharapattesu chijjati. Siṅghāṭakasaṇṭhānāya kharavālikāya kaṇṭakehi vijjhiyati, khuradhārāhi phāliyati, ubhosu tīresu kusatiṇehi vilekhati, vettalatāhi ākaḍḍhiyati, tikkhasattīhi phāliyati.
২৭০. তত্তেন অযোসঙ্কুনাতি তেন জিগচ্ছিতোম্হীতি ৰুত্তে মহন্তং লোহপচ্ছিং লোহগুল়ানং পূরেত্ৰা তং উপগচ্ছন্তি, সো লোহগুল়ভাৰং ঞত্ৰা দন্তে সম্ফুসেতি, অথস্স তে তত্তেন অযোসঙ্কুনা মুখং ৰিৰরন্তি, তম্বলোহধারেহি মহন্তেন লোহকটাহেন তম্বলোহং উপনেত্ৰা এৰমেৰং করোন্তি। পুন মহানিরযেতি এৰং পঞ্চৰিধবন্ধনতো পট্ঠায যাৰ তম্বলোহপানা তম্বলোহপানতো পট্ঠায পুন পঞ্চৰিধবন্ধনাদীনি কারেত্ৰা মহানিরযে পক্খিপন্তি। তত্থ কোচি পঞ্চৰিধবন্ধনেনেৰ মুচ্চতি, কোচি দুতিযেন, কোচি ততিযেন, কোচি তম্বলোহপানেন মুচ্চতি, কম্মে পন অপরিক্খীণে পুন মহানিরযে পক্খিপন্তি।
270.Tattenaayosaṅkunāti tena jigacchitomhīti vutte mahantaṃ lohapacchiṃ lohaguḷānaṃ pūretvā taṃ upagacchanti, so lohaguḷabhāvaṃ ñatvā dante samphuseti, athassa te tattena ayosaṅkunā mukhaṃ vivaranti, tambalohadhārehi mahantena lohakaṭāhena tambalohaṃ upanetvā evamevaṃ karonti. Puna mahānirayeti evaṃ pañcavidhabandhanato paṭṭhāya yāva tambalohapānā tambalohapānato paṭṭhāya puna pañcavidhabandhanādīni kāretvā mahāniraye pakkhipanti. Tattha koci pañcavidhabandhaneneva muccati, koci dutiyena, koci tatiyena, koci tambalohapānena muccati, kamme pana aparikkhīṇe puna mahāniraye pakkhipanti.
ইদং পন সুত্তং গণ্হন্তো একো দহরভিক্খু, – ‘‘ভন্তে, এত্তকং দুক্খমনুভৰিতসত্তং পুনপি মহানিরযে পক্খিপন্তী’’তি আহ। আম, আৰুসো, কম্মে অপরিক্খীণে পুনপ্পুনং এৰং করোন্তীতি। তিট্ঠতু, ভন্তে, উদ্দেসো, কম্মট্ঠানমেৰ কথেথাতি কম্মট্ঠানং কথাপেত্ৰা সোতাপন্নো হুত্ৰা আগম্ম উদ্দেসং অগ্গহেসি। অঞ্ঞেসম্পি ইমস্মিং পদেসে উদ্দেসং ঠপেত্ৰা অরহত্তং পত্তানং গণনা নত্থি। সব্ববুদ্ধানঞ্চেতং সুত্তং অৰিজহিতমেৰ হোতি।
Idaṃ pana suttaṃ gaṇhanto eko daharabhikkhu, – ‘‘bhante, ettakaṃ dukkhamanubhavitasattaṃ punapi mahāniraye pakkhipantī’’ti āha. Āma, āvuso, kamme aparikkhīṇe punappunaṃ evaṃ karontīti. Tiṭṭhatu, bhante, uddeso, kammaṭṭhānameva kathethāti kammaṭṭhānaṃ kathāpetvā sotāpanno hutvā āgamma uddesaṃ aggahesi. Aññesampi imasmiṃ padese uddesaṃ ṭhapetvā arahattaṃ pattānaṃ gaṇanā natthi. Sabbabuddhānañcetaṃ suttaṃ avijahitameva hoti.
২৭১. হীনকাযূপগাতি হীনকাযং উপগতা হুত্ৰা। উপাদানেতি তণ্হাদিট্ঠিগহণে। জাতিমরণসম্ভৰেতি জাতিযা চ মরণস্স চ কারণভূতে। অনুপাদাতি চতূহি উপাদানেহি অনুপাদিযিত্ৰা। জাতিমরণসঙ্খযেতি জাতিমরণসঙ্খযসঙ্খাতে নিব্বানে ৰিমুচ্চন্তি।
271.Hīnakāyūpagāti hīnakāyaṃ upagatā hutvā. Upādāneti taṇhādiṭṭhigahaṇe. Jātimaraṇasambhaveti jātiyā ca maraṇassa ca kāraṇabhūte. Anupādāti catūhi upādānehi anupādiyitvā. Jātimaraṇasaṅkhayeti jātimaraṇasaṅkhayasaṅkhāte nibbāne vimuccanti.
দিট্ঠধম্মাভিনিব্বুতাতি দিট্ঠধম্মে ইমস্মিংযেৰ অত্তভাৰে সব্বকিলেসনিব্বানেন নিব্বুতা। সব্বদুক্খং উপচ্চগুন্তি সব্বদুক্খাতিক্কন্তা নাম হোন্তি।
Diṭṭhadhammābhinibbutāti diṭṭhadhamme imasmiṃyeva attabhāve sabbakilesanibbānena nibbutā. Sabbadukkhaṃ upaccagunti sabbadukkhātikkantā nāma honti.
পপঞ্চসূদনিযা মজ্ঝিমনিকাযট্ঠকথায
Papañcasūdaniyā majjhimanikāyaṭṭhakathāya
দেৰদূতসুত্তৰণ্ণনা নিট্ঠিতা।
Devadūtasuttavaṇṇanā niṭṭhitā.
ততিযৰগ্গৰণ্ণনা নিট্ঠিতা।
Tatiyavaggavaṇṇanā niṭṭhitā.
Related texts:
তিপিটক (মূল) • Tipiṭaka (Mūla) / সুত্তপিটক • Suttapiṭaka / মজ্ঝিমনিকায • Majjhimanikāya / ১০. দেৰদূতসুত্তং • 10. Devadūtasuttaṃ
টীকা • Tīkā / সুত্তপিটক (টীকা) • Suttapiṭaka (ṭīkā) / মজ্ঝিমনিকায (টীকা) • Majjhimanikāya (ṭīkā) / ১০. দেৰদূতসুত্তৰণ্ণনা • 10. Devadūtasuttavaṇṇanā
