| Library / Tipiṭaka / д̇ибидага • Tipiṭaka / маж̇жхиманигааяа (адтагат̇аа) • Majjhimanikāya (aṭṭhakathā) |
10. д̣̇звад̣̇ууд̇асуд̇д̇аван̣н̣анаа
10. Devadūtasuttavaṇṇanā
261. звам̣ мз суд̇анд̇и д̣̇звад̣̇ууд̇асуд̇д̇ам̣. д̇ад̇т̇а д̣̇вз аг̇аараад̇иаад̣̇и ассабурасуд̇д̇з вид̇т̇аарид̇амзва.
261.Evaṃme sutanti devadūtasuttaṃ. Tattha dve agārātiādi assapurasutte vitthāritameva.
262. нираяам̣ убабаннаад̇и бхаг̇аваа гад̇т̇ажи нираяад̇о бадтааяа д̣̇зсанам̣ д̣̇звалогзна осаабзд̇и, гад̇т̇ажи д̣̇звалогад̇о бадтааяа нираязна осаабзд̇и. сажз саг̇г̇асамбад̇д̇им̣ вид̇т̇аарзд̇ваа гат̇зд̇угаамо ход̇и, нираяад̣̇угкам̣ згад̣̇зсад̇о гат̇зд̇и, д̇иражчаанаяонид̣̇угкам̣ бзд̇д̇ивисаяад̣̇угкам̣ мануссалогасамбад̇д̇им̣ згад̣̇зсад̇о гат̇зд̇и, саг̇г̇асамбад̇д̇имзва вид̇т̇аарзд̇и. сажз нираяад̣̇угкам̣ вид̇т̇аарзд̇ваа гат̇зд̇угаамо ход̇и, д̣̇звалогамануссалогзсу самбад̇д̇им̣ д̇иражчаанаяонибзд̇д̇ивисаязсу жа д̣̇угкам̣ згад̣̇зсад̇о гат̇зд̇и, нираяад̣̇угкамзва вид̇т̇аарзд̇и. со имасмим̣ суд̇д̇з нираяад̣̇угкам̣ вид̇т̇аарзд̇угаамо, д̇асмаа д̣̇звалогад̇о бадтааяа д̣̇зсанам̣ нираязна осаабзд̇и. д̣̇звалогамануссалогасамбад̇д̇ияо д̇иражчаанаяонибзд̇д̇ивисаяад̣̇угкаани жа згад̣̇зсад̇о гат̇зд̇ваа нираяад̣̇угкамзва вид̇т̇аарзна гат̇зд̇ум̣ д̇амзнам̣, бхигкавз, нираяабаалаад̇иаад̣̇имааха.
262.Nirayaṃ upapannāti bhagavā katthaci nirayato paṭṭhāya desanaṃ devalokena osāpeti, katthaci devalokato paṭṭhāya nirayena osāpeti. Sace saggasampattiṃ vitthāretvā kathetukāmo hoti, nirayadukkhaṃ ekadesato katheti, tiracchānayonidukkhaṃ pettivisayadukkhaṃ manussalokasampattiṃ ekadesato katheti, saggasampattimeva vitthāreti. Sace nirayadukkhaṃ vitthāretvā kathetukāmo hoti, devalokamanussalokesu sampattiṃ tiracchānayonipettivisayesu ca dukkhaṃ ekadesato katheti, nirayadukkhameva vitthāreti. So imasmiṃ sutte nirayadukkhaṃ vitthāretukāmo, tasmā devalokato paṭṭhāya desanaṃ nirayena osāpeti. Devalokamanussalokasampattiyo tiracchānayonipettivisayadukkhāni ca ekadesato kathetvā nirayadukkhameva vitthārena kathetuṃ tamenaṃ, bhikkhave, nirayapālātiādimāha.
д̇ад̇т̇а згажжз т̇зраа ‘‘нираяабаалаа наама над̇т̇и, яанд̇аруубам̣ вияа гаммамзва гааран̣ам̣ гаарзд̇ий’’д̇и вад̣̇анд̇и. д̇зсам̣ д̇ам̣ ‘‘ад̇т̇и нираяз нираяабаалаад̇и, ааманд̇аа, ад̇т̇и жа гааран̣игаа’’д̇иаад̣̇инаа наязна абхид̇хаммз (гат̇аа. 866) бадисзд̇хид̇амзва. яат̇аа хи мануссалогз гаммагааран̣агаарагаа ад̇т̇и, звамзва нираяз нираяабаалаа ад̇т̇ийд̇и. яамасса ран̃н̃од̇и яамарааж̇аа наама взмаанигабзд̇арааж̇аа, згасмим̣ гаалз д̣̇иб̣б̣авимаанз д̣̇иб̣б̣агаббаругкад̣̇иб̣б̣ауяяаанад̣̇иб̣б̣анаадагаад̣̇исамбад̇д̇им̣ анубхавад̇и, згасмим̣ гаалз гаммавибаагам̣, д̇хаммиго рааж̇аа. на жзса згова ход̇и, жад̇уусу бана д̣̇ваарзсу жад̇д̇ааро ж̇анаа хонд̇и. наад̣̇д̣̇асанд̇и ад̇д̇ано санд̇игз бзсид̇асса гассажи д̣̇звад̣̇ууд̇асса абхаавам̣ санд̇хааяа звам̣ вад̣̇ад̇и. ат̇а нам̣ яамо ‘‘нааяам̣ бхаасид̇асса ад̇т̇ам̣ саллагкзд̇ий’’д̇и н̃ад̇ваа саллагкаабзд̇угаамо амбход̇иаад̣̇имааха.
Tattha ekacce therā ‘‘nirayapālā nāma natthi, yantarūpaṃ viya kammameva kāraṇaṃ kāretī’’ti vadanti. Tesaṃ taṃ ‘‘atthi niraye nirayapālāti, āmantā, atthi ca kāraṇikā’’tiādinā nayena abhidhamme (kathā. 866) paṭisedhitameva. Yathā hi manussaloke kammakāraṇakārakā atthi, evameva niraye nirayapālā atthīti. Yamassa raññoti yamarājā nāma vemānikapetarājā, ekasmiṃ kāle dibbavimāne dibbakapparukkhadibbauyyānadibbanāṭakādisampattiṃ anubhavati, ekasmiṃ kāle kammavipākaṃ, dhammiko rājā. Na cesa ekova hoti, catūsu pana dvāresu cattāro janā honti. Nāddasanti attano santike pesitassa kassaci devadūtassa abhāvaṃ sandhāya evaṃ vadati. Atha naṃ yamo ‘‘nāyaṃ bhāsitassa atthaṃ sallakkhetī’’ti ñatvā sallakkhāpetukāmo ambhotiādimāha.
ж̇аад̇ид̇хаммод̇и ж̇аад̇исабхааво, абаримуд̇д̇о ж̇аад̇ияаа, ж̇аад̇и наама маяхам̣ аб̣бханд̇арзязва ад̇т̇ийд̇и. барад̇о ж̇араад̇хаммод̇иаад̣̇ийсуби зсзва наяо.
Jātidhammoti jātisabhāvo, aparimutto jātiyā, jāti nāma mayhaṃ abbhantareyeva atthīti. Parato jarādhammotiādīsupi eseva nayo.
263. батамам̣ д̣̇звад̣̇ууд̇ам̣ самануяун̃ж̇ид̇ваад̇и зд̇т̇а д̣̇ахарагумааро ад̇т̇ад̇о звам̣ вад̣̇ад̇и наама ‘‘бассат̇а, бхо, маяхамби д̇умхаагам̣ вияа хад̇т̇абаад̣̇аа ад̇т̇и, сагз банамхи муд̇д̇агарийсз балибанно, ад̇д̇ано д̇хаммад̇ааяа удтахид̇ваа нхааяид̇ум̣ на саггоми, ахам̣ гилидтаг̇ад̇д̇омхи, нхаабзт̇а манд̇и вад̇д̇умби на саггоми, ж̇аад̇ид̇омхи абаримуд̇д̇ад̇ааяа зд̣̇исо ж̇аад̇о. на ко банаахамзва, д̇умхзби ж̇аад̇ид̇о абаримуд̇д̇аава. яат̇зва хи маяхам̣, звам̣ д̇умхаагамби ж̇аад̇и ааг̇амиссад̇и, ид̇и д̇ассаа бурз ааг̇аманаава галяаан̣ам̣ гарот̇аа’’д̇и. д̇знзса д̣̇звад̣̇ууд̇о наама ж̇аад̇о, важанад̇т̇о бана магхад̣̇звасуд̇д̇з вуд̇д̇ова.
263.Paṭhamaṃ devadūtaṃ samanuyuñjitvāti ettha daharakumāro atthato evaṃ vadati nāma ‘‘passatha, bho, mayhampi tumhākaṃ viya hatthapādā atthi, sake panamhi muttakarīse palipanno, attano dhammatāya uṭṭhahitvā nhāyituṃ na sakkomi, ahaṃ kiliṭṭhagattomhi, nhāpetha manti vattumpi na sakkomi, jātitomhi aparimuttatāya ediso jāto. Na kho panāhameva, tumhepi jātito aparimuttāva. Yatheva hi mayhaṃ, evaṃ tumhākampi jāti āgamissati, iti tassā pure āgamanāva kalyāṇaṃ karothā’’ti. Tenesa devadūto nāma jāto, vacanattho pana maghadevasutte vuttova.
д̣̇уд̇ияам̣ д̣̇звад̣̇ууд̇анд̇и зд̇т̇ааби ж̇арааж̇ин̣н̣асад̇д̇о ад̇т̇ад̇о звам̣ вад̣̇ад̇и наама – ‘‘бассат̇а, бхо, ахамби д̇умхз вияа д̇арун̣о ахосим̣ ууруб̣алаб̣аахуб̣алаж̇аванасамбанно, д̇асса мз д̇аа б̣алаж̇аванасамбад̇д̇ияо анд̇арахид̇аа, виж̇ж̇амаанааби мз хад̇т̇абаад̣̇аа хад̇т̇абаад̣̇агижжам̣ на гаронд̇и, ж̇арааяамхи абаримуд̇д̇ад̇ааяа зд̣̇исо ж̇аад̇о. на ко банаахамзва, д̇умхзби ж̇арааяа абаримуд̇д̇аава. яат̇зва хи маяхам̣, звам̣ д̇умхаагамби ж̇араа ааг̇амиссад̇и, ид̇и д̇ассаа бурз ааг̇аманаава галяаан̣ам̣ гарот̇аа’’д̇и. д̇знзса д̣̇звад̣̇ууд̇о наама ж̇аад̇о.
Dutiyaṃdevadūtanti etthāpi jarājiṇṇasatto atthato evaṃ vadati nāma – ‘‘passatha, bho, ahampi tumhe viya taruṇo ahosiṃ ūrubalabāhubalajavanasampanno, tassa me tā balajavanasampattiyo antarahitā, vijjamānāpi me hatthapādā hatthapādakiccaṃ na karonti, jarāyamhi aparimuttatāya ediso jāto. Na kho panāhameva, tumhepi jarāya aparimuttāva. Yatheva hi mayhaṃ, evaṃ tumhākampi jarā āgamissati, iti tassā pure āgamanāva kalyāṇaṃ karothā’’ti. Tenesa devadūto nāma jāto.
д̇ад̇ияам̣ д̣̇звад̣̇ууд̇анд̇и зд̇т̇ааби г̇илаанасад̇д̇о ад̇т̇ад̇о зва вад̣̇ад̇и наама – ‘‘бассат̇а, бхо, ахамби д̇умхз вияа нирог̇о ахосим̣, сомхи зд̇арахи б̣яаад̇хинаа абхихад̇о сагз муд̇д̇агарийсз балибанно, удтаад̇умби на саггоми, виж̇ж̇амаанааби мз хад̇т̇абаад̣̇аа хад̇т̇абаад̣̇агижжам̣ на гаронд̇и, б̣яаад̇хид̇омхи абаримуд̇д̇ад̇ааяа зд̣̇исо ж̇аад̇о. на ко банаахамзва, д̇умхзби б̣яаад̇хид̇о абаримуд̇д̇аава. яат̇зва хи маяхам̣, звам̣ д̇умхаагам̣ б̣яаад̇хи ааг̇амиссад̇и, ид̇и д̇асса бурз ааг̇аманаава галяаан̣ам̣ гарот̇аа’’д̇и. д̇знзса д̣̇звад̣̇ууд̇о наама ж̇аад̇о.
Tatiyaṃ devadūtanti etthāpi gilānasatto atthato eva vadati nāma – ‘‘passatha, bho, ahampi tumhe viya nirogo ahosiṃ, somhi etarahi byādhinā abhihato sake muttakarīse palipanno, uṭṭhātumpi na sakkomi, vijjamānāpi me hatthapādā hatthapādakiccaṃ na karonti, byādhitomhi aparimuttatāya ediso jāto. Na kho panāhameva, tumhepi byādhito aparimuttāva. Yatheva hi mayhaṃ, evaṃ tumhākaṃ byādhi āgamissati, iti tassa pure āgamanāva kalyāṇaṃ karothā’’ti. Tenesa devadūto nāma jāto.
265. жад̇уд̇т̇ам̣ д̣̇звад̣̇ууд̇анд̇и зд̇т̇а бана гаммагааран̣аа ваа д̣̇звад̣̇ууд̇аад̇и гаад̇аб̣б̣аа гаммагааран̣игаа ваа. д̇ад̇т̇а бана гаммагааран̣абагкз б̣аад̇д̇им̣са д̇аава гаммагааран̣аа ад̇т̇ад̇о звам̣ вад̣̇анд̇и наама – ‘‘маяам̣ ниб̣б̣ад̇д̇амаанаа на ругкз ваа баасаан̣з ваа ниб̣б̣ад̇д̇аама, д̇умхаад̣̇исаанам̣ сарийрз ниб̣б̣ад̇д̇аама, ид̇и амхаагам̣ бурз ниб̣б̣ад̇д̇ид̇ова галяаан̣ам̣ гарот̇аа’’д̇и. д̇знзд̇з д̣̇звад̣̇ууд̇аа наама ж̇аад̇аа. гаммагааран̣игааби ад̇т̇ад̇о звам̣ вад̣̇анд̇и наама – ‘‘маяам̣ д̣̇вад̇д̇им̣са гаммагааран̣аа гаронд̇аа на ругкаад̣̇ийсу гарома, д̇умхаад̣̇исзсу сад̇д̇зсуязва гарома, ид̇и амхаагам̣ д̇умхзсу бурз гаммагааран̣аагаран̣ад̇ова галяаан̣ам̣ гарот̇аа’’д̇и. д̇знзд̇зби д̣̇звад̣̇ууд̇аа наама ж̇аад̇аа.
265.Catutthaṃ devadūtanti ettha pana kammakāraṇā vā devadūtāti kātabbā kammakāraṇikā vā. Tattha pana kammakāraṇapakkhe bāttiṃsa tāva kammakāraṇā atthato evaṃ vadanti nāma – ‘‘mayaṃ nibbattamānā na rukkhe vā pāsāṇe vā nibbattāma, tumhādisānaṃ sarīre nibbattāma, iti amhākaṃ pure nibbattitova kalyāṇaṃ karothā’’ti. Tenete devadūtā nāma jātā. Kammakāraṇikāpi atthato evaṃ vadanti nāma – ‘‘mayaṃ dvattiṃsa kammakāraṇā karontā na rukkhādīsu karoma, tumhādisesu sattesuyeva karoma, iti amhākaṃ tumhesu pure kammakāraṇākaraṇatova kalyāṇaṃ karothā’’ti. Tenetepi devadūtā nāma jātā.
266. бан̃жамам̣ д̣̇звад̣̇ууд̇анд̇и зд̇т̇а мад̇агасад̇д̇о ад̇т̇ад̇о звам̣ вад̣̇ад̇и наама – ‘‘бассат̇а бхо мам̣ аамагасусаанз чад̣д̣ид̇ам̣ уд̣̇д̇хумаад̇агаад̣̇ибхаавам̣ бад̇д̇ам̣, маран̣ад̇омхи абаримуд̇д̇ад̇ааяа зд̣̇исо ж̇аад̇о. на ко банаахамзва, д̇умхзби маран̣ад̇о абаримуд̇д̇аава. яат̇зва хи маяхам̣, звам̣ д̇умхаагамби маран̣ам̣ ааг̇амиссад̇и, ид̇и д̇асса бурз ааг̇аманаава галяаан̣ам̣ гарот̇аа’’д̇и. д̇знзса д̣̇звад̣̇ууд̇о наама ж̇аад̇о.
266.Pañcamaṃ devadūtanti ettha matakasatto atthato evaṃ vadati nāma – ‘‘passatha bho maṃ āmakasusāne chaḍḍitaṃ uddhumātakādibhāvaṃ pattaṃ, maraṇatomhi aparimuttatāya ediso jāto. Na kho panāhameva, tumhepi maraṇato aparimuttāva. Yatheva hi mayhaṃ, evaṃ tumhākampi maraṇaṃ āgamissati, iti tassa pure āgamanāva kalyāṇaṃ karothā’’ti. Tenesa devadūto nāma jāto.
имам̣ бана д̣̇звад̣̇ууд̇аануяог̇ам̣ го лабхад̇и, го на лабхад̇ийд̇и? язна д̇аава б̣ахум̣ баабам̣ гад̇ам̣, со г̇анд̇ваа нираяз ниб̣б̣ад̇д̇ад̇иязва. язна бана барид̇д̇ам̣ баабагаммам̣ гад̇ам̣, со лабхад̇и. яат̇аа хи сабхан̣д̣ам̣ жорам̣ г̇ахзд̇ваа гад̇д̇аб̣б̣амзва гаронд̇и, на винижчинанд̇и. анувиж̇ж̇ид̇ваа г̇ахид̇ам̣ бана винижчаяадтаанам̣ наяанд̇и, со винижчаяам̣ лабхад̇и. звам̣самбад̣̇амзд̇ам̣. барид̇д̇абаабагаммаа хи ад̇д̇ано д̇хаммад̇ааяаби саранд̇и, саарияамаанааби саранд̇и.
Imaṃ pana devadūtānuyogaṃ ko labhati, ko na labhatīti? Yena tāva bahuṃ pāpaṃ kataṃ, so gantvā niraye nibbattatiyeva. Yena pana parittaṃ pāpakammaṃ kataṃ, so labhati. Yathā hi sabhaṇḍaṃ coraṃ gahetvā kattabbameva karonti, na vinicchinanti. Anuvijjitvā gahitaṃ pana vinicchayaṭṭhānaṃ nayanti, so vinicchayaṃ labhati. Evaṃsampadametaṃ. Parittapāpakammā hi attano dhammatāyapi saranti, sāriyamānāpi saranti.
д̇ад̇т̇а д̣̇ийгхаж̇аяанд̇ад̣̇амил̣о наама ад̇д̇ано д̇хаммад̇ааяа сари. со гира д̣̇амил̣о суманаг̇иривихаарз аагаасажзд̇ияам̣ рад̇д̇абадзна бууж̇зси. ат̇а нираяз уссад̣̇асааманд̇з ниб̣б̣ад̇д̇о аг̇г̇иж̇ааласад̣̇д̣̇ам̣ суд̇ваава ад̇д̇ано бууж̇ид̇абадам̣ ануссари, со г̇анд̇ваа саг̇г̇з ниб̣б̣ад̇д̇о. абароби буд̇д̇асса д̣̇ахарабхигкуно калисаадагам̣ д̣̇знд̇о баад̣̇амуулз табзси, маран̣агааламхи бадабадаад̇и сад̣̇д̣̇з нимид̇д̇ам̣ г̇ан̣хи, соби уссад̣̇асааманд̇з ниб̣б̣ад̇д̇о ж̇ааласад̣̇д̣̇зна д̇ам̣ саадагам̣ ануссарид̇ваа саг̇г̇з ниб̣б̣ад̇д̇о. звам̣ д̇аава ад̇д̇ано д̇хаммад̇ааяа гусалам̣ гаммам̣ сарид̇ваа саг̇г̇з ниб̣б̣ад̇д̇ад̇ийд̇и.
Tattha dīghajayantadamiḷo nāma attano dhammatāya sari. So kira damiḷo sumanagirivihāre ākāsacetiyaṃ rattapaṭena pūjesi. Atha niraye ussadasāmante nibbatto aggijālasaddaṃ sutvāva attano pūjitapaṭaṃ anussari, so gantvā sagge nibbatto. Aparopi puttassa daharabhikkhuno khalisāṭakaṃ dento pādamūle ṭhapesi, maraṇakālamhi paṭapaṭāti sadde nimittaṃ gaṇhi, sopi ussadasāmante nibbatto jālasaddena taṃ sāṭakaṃ anussaritvā sagge nibbatto. Evaṃ tāva attano dhammatāya kusalaṃ kammaṃ saritvā sagge nibbattatīti.
ад̇д̇ано д̇хаммад̇ааяа асаранд̇з бана бан̃жа д̣̇звад̣̇ууд̇з бужчад̇и. д̇ад̇т̇а гожи батамзна д̣̇звад̣̇ууд̇зна сарад̇и, гожи д̣̇уд̇ияаад̣̇ийхи. яо бана бан̃жахиби на сарад̇и, д̇ам̣ яамо рааж̇аа саяам̣ саарзд̇и. зго гира амажжо суманабубпагумбхзна махаажзд̇ияам̣ бууж̇зд̇ваа яамасса бад̇д̇им̣ ад̣̇ааси, д̇ам̣ агусалагаммзна нираяз ниб̣б̣ад̇д̇ам̣ яамасса санд̇игам̣ наяим̣су. д̇асмим̣ бан̃жахиби д̣̇звад̣̇ууд̇зхи гусалз асаранд̇з яамо саяам̣ ологзнд̇о д̣̇исваа – ‘‘нану д̇вам̣ махаажзд̇ияам̣ суманабубпагумбхзна бууж̇зд̇ваа маяхам̣ бад̇д̇им̣ ад̣̇аасий’’д̇и саарзси, со д̇асмим̣ гаалз сарид̇ваа д̣̇звалогам̣ г̇ад̇о. яамо бана саяам̣ ологзд̇вааби абассанд̇о – ‘‘махаад̣̇угкам̣ наама анубхависсад̇и аяам̣ сад̇д̇о’’д̇и д̇ун̣хий ход̇и.
Attano dhammatāya asarante pana pañca devadūte pucchati. Tattha koci paṭhamena devadūtena sarati, koci dutiyādīhi. Yo pana pañcahipi na sarati, taṃ yamo rājā sayaṃ sāreti. Eko kira amacco sumanapupphakumbhena mahācetiyaṃ pūjetvā yamassa pattiṃ adāsi, taṃ akusalakammena niraye nibbattaṃ yamassa santikaṃ nayiṃsu. Tasmiṃ pañcahipi devadūtehi kusale asarante yamo sayaṃ olokento disvā – ‘‘nanu tvaṃ mahācetiyaṃ sumanapupphakumbhena pūjetvā mayhaṃ pattiṃ adāsī’’ti sāresi, so tasmiṃ kāle saritvā devalokaṃ gato. Yamo pana sayaṃ oloketvāpi apassanto – ‘‘mahādukkhaṃ nāma anubhavissati ayaṃ satto’’ti tuṇhī hoti.
267. махаанираязд̇и авийжимахаанираяамхи. гим̣ банасса бамаан̣ам̣? аб̣бханд̇арам̣ ааяаамзна жа вид̇т̇аарзна жа яож̇анасад̇ам̣ ход̇и. лохабат̇авий лохачад̣̇анам̣ згзгаа жа бхид̇д̇и наванаваяож̇анигаа ход̇и. бурад̇т̇имааяа бхид̇д̇ияаа ажжи удтид̇аа бажчимам̣ бхид̇д̇им̣ г̇ахзд̇ваа д̇ам̣ винивиж̇жхид̇ваа барад̇о яож̇анасад̇ам̣ г̇ажчад̇и. сзсад̣̇исаасуби зсзва наяо. ид̇и ж̇аалабарияанд̇авасзна ааяаамавид̇т̇аарад̇о адтаарасаяож̇анаад̇хигаани д̇ийн̣и яож̇анасад̇аани, баригкзбад̇о бана наваяож̇анасад̇аани жад̇убан̣н̣аасаяож̇анаани, саманд̇аа бана уссад̣̇зхи сад̣̇д̇хим̣ д̣̇асаяож̇анасахассам̣ ход̇и.
267.Mahānirayeti avīcimahānirayamhi. Kiṃ panassa pamāṇaṃ? Abbhantaraṃ āyāmena ca vitthārena ca yojanasataṃ hoti. Lohapathavī lohachadanaṃ ekekā ca bhitti navanavayojanikā hoti. Puratthimāya bhittiyā acci uṭṭhitā pacchimaṃ bhittiṃ gahetvā taṃ vinivijjhitvā parato yojanasataṃ gacchati. Sesadisāsupi eseva nayo. Iti jālapariyantavasena āyāmavitthārato aṭṭhārasayojanādhikāni tīṇi yojanasatāni, parikkhepato pana navayojanasatāni catupaṇṇāsayojanāni, samantā pana ussadehi saddhiṃ dasayojanasahassaṃ hoti.
268. уб̣бхад̇ам̣ д̇аад̣̇исамзва ход̇ийд̇и зд̇т̇а агганд̇абад̣̇ам̣ яаава адтид̇о д̣̇ал̣хам̣ уд̣̇д̇харид̇умзва на саггаа. аяам̣ банзд̇т̇а ад̇т̇о – хздтад̇о бадтааяа д̣аяхад̇и, убарид̇о бадтааяа жхааяад̇и, ид̇и аггаманагаалз д̣аяхамаанам̣ бан̃н̃ааяад̇и, уд̣̇д̇харан̣агаалз д̇аад̣̇исамзва, д̇асмаа звам̣ вуд̇д̇ам̣. б̣ахусамбад̇д̇од̇и б̣ахууни вассасад̇авассасахассаани самбад̇д̇о.
268.Ubbhataṃ tādisameva hotīti ettha akkantapadaṃ yāva aṭṭhito daḷhaṃ uddharitumeva na sakkā. Ayaṃ panettha attho – heṭṭhato paṭṭhāya ḍayhati, uparito paṭṭhāya jhāyati, iti akkamanakāle ḍayhamānaṃ paññāyati, uddharaṇakāle tādisameva, tasmā evaṃ vuttaṃ. Bahusampattoti bahūni vassasatavassasahassāni sampatto.
гасмаа банзса нараго авийжийд̇и сан̇кам̣ г̇ад̇од̇и. вийжи наама анд̇арам̣ вужжад̇и, д̇ад̇т̇а жа аг̇г̇иж̇аалаанам̣ ваа сад̇д̇аанам̣ ваа д̣̇угкасса ваа анд̇арам̣ над̇т̇и. д̇асмаа со авийжийд̇и сан̇кам̣ г̇ад̇од̇и. д̇асса хи бурад̇т̇имабхид̇д̇ид̇о ж̇аалаа удтид̇аа сам̣сиб̣б̣амаанаа яож̇анасад̇ам̣ г̇анд̇ваа бажчимабхид̇д̇им̣ винивиж̇жхид̇ваа барад̇о яож̇анасад̇ам̣ г̇ажчад̇и. сзсад̣̇исаасуби зсзва наяо.
Kasmā panesa narako avīcīti saṅkhaṃ gatoti. Vīci nāma antaraṃ vuccati, tattha ca aggijālānaṃ vā sattānaṃ vā dukkhassa vā antaraṃ natthi. Tasmā so avīcīti saṅkhaṃ gatoti. Tassa hi puratthimabhittito jālā uṭṭhitā saṃsibbamānā yojanasataṃ gantvā pacchimabhittiṃ vinivijjhitvā parato yojanasataṃ gacchati. Sesadisāsupi eseva nayo.
имзсам̣ чаннам̣ ж̇аалаанам̣ маж̇жхз ниб̣б̣ад̇д̇о д̣̇звад̣̇ад̇д̇о, д̇асса яож̇анасад̇аббамаан̣о ад̇д̇абхааво, д̣̇вз баад̣̇аа яаава г̇обпагаа лохабат̇авим̣ бавидтаа, д̣̇вз хад̇т̇аа яаава ман̣иб̣анд̇хаа лохабхид̇д̇ияо бавидтаа, сийсам̣ яаава бхамугадтид̇о лохачад̣̇анз бавидтам̣, ад̇хобхааг̇зна згам̣ лохасуулам̣ бависид̇ваа гааяам̣ винивиж̇жханд̇ам̣ чад̣̇анз бавидтам̣, баажийнабхид̇д̇ид̇о нигканд̇асуулам̣ хад̣̇аяам̣ винивиж̇жхид̇ваа бажчимабхид̇д̇им̣ бавидтам̣ , уд̇д̇арабхид̇д̇ид̇о нигканд̇асуулам̣ паасугаа винивиж̇жхид̇ваа д̣̇агкин̣абхид̇д̇им̣ бавидтам̣. нижжалз д̇ат̇ааг̇ад̇амхи абарад̣̇д̇хад̇д̇аа нижжалова худ̇ваа бажжад̇ийд̇и гаммасаригкад̇ааяа зд̣̇исо ж̇аад̇о. звам̣ ж̇аалаанам̣ ниранд̇арад̇ааяа авийжи наама.
Imesaṃ channaṃ jālānaṃ majjhe nibbatto devadatto, tassa yojanasatappamāṇo attabhāvo, dve pādā yāva gopphakā lohapathaviṃ paviṭṭhā, dve hatthā yāva maṇibandhā lohabhittiyo paviṭṭhā, sīsaṃ yāva bhamukaṭṭhito lohachadane paviṭṭhaṃ, adhobhāgena ekaṃ lohasūlaṃ pavisitvā kāyaṃ vinivijjhantaṃ chadane paviṭṭhaṃ, pācīnabhittito nikkhantasūlaṃ hadayaṃ vinivijjhitvā pacchimabhittiṃ paviṭṭhaṃ , uttarabhittito nikkhantasūlaṃ phāsukā vinivijjhitvā dakkhiṇabhittiṃ paviṭṭhaṃ. Niccale tathāgatamhi aparaddhattā niccalova hutvā paccatīti kammasarikkhatāya ediso jāto. Evaṃ jālānaṃ nirantaratāya avīci nāma.
аб̣бханд̇арз банасса яож̇анасад̇игз таанз наал̣ияам̣ годдзд̇ваа буурид̇абидтам̣ вияа сад̇д̇аа ниранд̇араа, ‘‘имасмим̣ таанз сад̇д̇о ад̇т̇и, имасмим̣ над̇т̇ий’’д̇и на вад̇д̇аб̣б̣ам̣, г̇ажчанд̇аанам̣ тид̇аанам̣ нисиннаанам̣ нибаннаанам̣ анд̇о над̇т̇и, г̇ажчанд̇з ваа тид̇з ваа нисиннз ваа нибаннз ваа ан̃н̃аман̃н̃ам̣ на б̣аад̇ханд̇и. звам̣ сад̇д̇аанам̣ ниранд̇арад̇ааяа авийжи.
Abbhantare panassa yojanasatike ṭhāne nāḷiyaṃ koṭṭetvā pūritapiṭṭhaṃ viya sattā nirantarā, ‘‘imasmiṃ ṭhāne satto atthi, imasmiṃ natthī’’ti na vattabbaṃ, gacchantānaṃ ṭhitānaṃ nisinnānaṃ nipannānaṃ anto natthi, gacchante vā ṭhite vā nisinne vā nipanne vā aññamaññaṃ na bādhanti. Evaṃ sattānaṃ nirantaratāya avīci.
гааяад̣̇ваарз бана ча убзгкаасахаг̇ад̇аани жид̇д̇аани уббаж̇ж̇анд̇и, згам̣ д̣̇угкасахаг̇ад̇ам̣. звам̣ санд̇зби яат̇аа ж̇ивхаг̇г̇з ча мад̇хуб̣инд̣̇ууни табзд̇ваа згасмим̣ д̇амб̣алохаб̣инд̣̇умхи табид̇з ануд̣̇аханаб̣алавад̇ааяа д̇ад̣̇зва бан̃н̃ааяад̇и, ид̇араани аб̣б̣охааригаани хонд̇и, звам̣ ануд̣̇аханаб̣алавад̇ааяа д̣̇угкамзвзд̇т̇а ниранд̇арам̣, ид̇араани аб̣б̣охааригаанийд̇и. звам̣ д̣̇угкасса ниранд̇арад̇ааяа авийжи.
Kāyadvāre pana cha upekkhāsahagatāni cittāni uppajjanti, ekaṃ dukkhasahagataṃ. Evaṃ santepi yathā jivhagge cha madhubindūni ṭhapetvā ekasmiṃ tambalohabindumhi ṭhapite anudahanabalavatāya tadeva paññāyati, itarāni abbohārikāni honti, evaṃ anudahanabalavatāya dukkhamevettha nirantaraṃ, itarāni abbohārikānīti. Evaṃ dukkhassa nirantaratāya avīci.
269. маханд̇од̇и яож̇анасад̇иго. со д̇ад̇т̇а бад̇ад̇ийд̇и зго баад̣̇о махаанираяз ход̇и, зго г̇уут̇анираяз нибад̇ад̇и. суужимукаад̇и суужисад̣̇исамукаа, д̇з хад̇т̇иг̇ийваббамаан̣аа згад̣̇он̣иганаавааббамаан̣аа ваа хонд̇и.
269.Mahantoti yojanasatiko. So tattha patatīti eko pādo mahāniraye hoti, eko gūthaniraye nipatati. Sūcimukhāti sūcisadisamukhā, te hatthigīvappamāṇā ekadoṇikanāvāppamāṇā vā honti.
гуггуланираяод̇и яож̇анасад̇аббамаан̣ова анд̇о гуудааг̇аарамад̇д̇авид̇ажжид̇аан̇г̇аарабун̣н̣о аад̣̇ид̇д̇ачаариганираяо, яад̇т̇а бад̇ид̇абад̇ид̇аа гуд̣̇руусагараасимхи кид̇д̇апаалаваасисилаад̣̇ийни вияа хздтимад̇аламзва г̇ан̣ханд̇и.
Kukkulanirayoti yojanasatappamāṇova anto kūṭāgāramattavitaccitaaṅgārapuṇṇo ādittachārikanirayo, yattha patitapatitā kudrūsakarāsimhi khittaphālavāsisilādīni viya heṭṭhimatalameva gaṇhanti.
ааробзнд̇ийд̇и аяад̣̇ан̣д̣зхи бот̇знд̇аа ааробзнд̇и. д̇зсам̣ аароханагаалз д̇з ган̣дагаа ад̇хомукаа хонд̇и, ороханагаалз уд̣̇д̇хам̣мукаа.
Āropentīti ayadaṇḍehi pothentā āropenti. Tesaṃ ārohanakāle te kaṇṭakā adhomukhā honti, orohanakāle uddhaṃmukhā.
ваад̇зрид̇аанийд̇и гаммамаязна ваад̇зна жалид̇аани. хад̇т̇амби чинд̣̇анд̇ийд̇и палагз мам̣сам̣ вияа годдаяамаанаани чинд̣̇анд̇и. сажз удтааяа балааяад̇и, аяобаагааро самудтахид̇ваа баригкибад̇и, хздтаа курад̇хаараа самудтаад̇и.
Vāteritānīti kammamayena vātena calitāni. Hatthampi chindantīti phalake maṃsaṃ viya koṭṭayamānāni chindanti. Sace uṭṭhāya palāyati, ayopākāro samuṭṭhahitvā parikkhipati, heṭṭhā khuradhārā samuṭṭhāti.
каарод̣̇агаа над̣̇ийд̇и взд̇аран̣ий наама д̇амб̣алоханад̣̇ий. д̇ад̇т̇а аяомаяаани караваалига-богкарабад̇д̇аани, хздтаа курад̇хаараа убхосу д̇ийрзсу взд̇д̇алад̇аа жа гусад̇ин̣аани жа. со д̇ад̇т̇а д̣̇угкаа д̇иб̣б̣аа караад̇и со д̇ад̇т̇а уд̣̇д̇хан̃жа ад̇хо жа вуяхамаано богкарабад̇д̇зсу чиж̇ж̇ад̇и. син̇гхаадагасан̣таанааяа караваалигааяа ган̣дагзхи виж̇жхияад̇и, курад̇хаараахи паалияад̇и, убхосу д̇ийрзсу гусад̇ин̣зхи вилзкад̇и, взд̇д̇алад̇аахи аагад̣дхияад̇и, д̇игкасад̇д̇ийхи паалияад̇и.
Khārodakā nadīti vetaraṇī nāma tambalohanadī. Tattha ayomayāni kharavālika-pokkharapattāni, heṭṭhā khuradhārā ubhosu tīresu vettalatā ca kusatiṇāni ca. So tattha dukkhā tibbā kharāti so tattha uddhañca adho ca vuyhamāno pokkharapattesu chijjati. Siṅghāṭakasaṇṭhānāya kharavālikāya kaṇṭakehi vijjhiyati, khuradhārāhi phāliyati, ubhosu tīresu kusatiṇehi vilekhati, vettalatāhi ākaḍḍhiyati, tikkhasattīhi phāliyati.
270. д̇ад̇д̇зна аяосан̇гунаад̇и д̇зна ж̇иг̇ажчид̇омхийд̇и вуд̇д̇з маханд̇ам̣ лохабажчим̣ лохаг̇ул̣аанам̣ буурзд̇ваа д̇ам̣ убаг̇ажчанд̇и, со лохаг̇ул̣абхаавам̣ н̃ад̇ваа д̣̇анд̇з сампусзд̇и, ат̇асса д̇з д̇ад̇д̇зна аяосан̇гунаа мукам̣ виваранд̇и, д̇амб̣алохад̇хаарзхи маханд̇зна лохагадаахзна д̇амб̣алохам̣ убанзд̇ваа звамзвам̣ гаронд̇и. буна махаанираязд̇и звам̣ бан̃жавид̇хаб̣анд̇ханад̇о бадтааяа яаава д̇амб̣алохабаанаа д̇амб̣алохабаанад̇о бадтааяа буна бан̃жавид̇хаб̣анд̇ханаад̣̇ийни гаарзд̇ваа махаанираяз багкибанд̇и. д̇ад̇т̇а гожи бан̃жавид̇хаб̣анд̇ханзнзва мужжад̇и, гожи д̣̇уд̇иязна, гожи д̇ад̇иязна, гожи д̇амб̣алохабаанзна мужжад̇и, гаммз бана абаригкийн̣з буна махаанираяз багкибанд̇и.
270.Tattenaayosaṅkunāti tena jigacchitomhīti vutte mahantaṃ lohapacchiṃ lohaguḷānaṃ pūretvā taṃ upagacchanti, so lohaguḷabhāvaṃ ñatvā dante samphuseti, athassa te tattena ayosaṅkunā mukhaṃ vivaranti, tambalohadhārehi mahantena lohakaṭāhena tambalohaṃ upanetvā evamevaṃ karonti. Puna mahānirayeti evaṃ pañcavidhabandhanato paṭṭhāya yāva tambalohapānā tambalohapānato paṭṭhāya puna pañcavidhabandhanādīni kāretvā mahāniraye pakkhipanti. Tattha koci pañcavidhabandhaneneva muccati, koci dutiyena, koci tatiyena, koci tambalohapānena muccati, kamme pana aparikkhīṇe puna mahāniraye pakkhipanti.
ид̣̇ам̣ бана суд̇д̇ам̣ г̇ан̣ханд̇о зго д̣̇ахарабхигку, – ‘‘бханд̇з, зд̇д̇агам̣ д̣̇угкаманубхавид̇асад̇д̇ам̣ бунаби махаанираяз багкибанд̇ий’’д̇и ааха. аама, аавусо, гаммз абаригкийн̣з бунаббунам̣ звам̣ гаронд̇ийд̇и. д̇идтад̇у, бханд̇з, уд̣̇д̣̇зсо, гаммадтаанамзва гат̇зт̇аад̇и гаммадтаанам̣ гат̇аабзд̇ваа сод̇аабанно худ̇ваа ааг̇амма уд̣̇д̣̇зсам̣ аг̇г̇ахзси. ан̃н̃зсамби имасмим̣ бад̣̇зсз уд̣̇д̣̇зсам̣ табзд̇ваа арахад̇д̇ам̣ бад̇д̇аанам̣ г̇ан̣анаа над̇т̇и. саб̣б̣аб̣уд̣̇д̇хаанан̃жзд̇ам̣ суд̇д̇ам̣ авиж̇ахид̇амзва ход̇и.
Idaṃ pana suttaṃ gaṇhanto eko daharabhikkhu, – ‘‘bhante, ettakaṃ dukkhamanubhavitasattaṃ punapi mahāniraye pakkhipantī’’ti āha. Āma, āvuso, kamme aparikkhīṇe punappunaṃ evaṃ karontīti. Tiṭṭhatu, bhante, uddeso, kammaṭṭhānameva kathethāti kammaṭṭhānaṃ kathāpetvā sotāpanno hutvā āgamma uddesaṃ aggahesi. Aññesampi imasmiṃ padese uddesaṃ ṭhapetvā arahattaṃ pattānaṃ gaṇanā natthi. Sabbabuddhānañcetaṃ suttaṃ avijahitameva hoti.
271. хийнагааяуубаг̇аад̇и хийнагааяам̣ убаг̇ад̇аа худ̇ваа. убаад̣̇аанзд̇и д̇ан̣хаад̣̇идтиг̇ахан̣з. ж̇аад̇имаран̣асамбхавзд̇и ж̇аад̇ияаа жа маран̣асса жа гааран̣абхууд̇з. анубаад̣̇аад̇и жад̇уухи убаад̣̇аанзхи анубаад̣̇ияид̇ваа. ж̇аад̇имаран̣асан̇каязд̇и ж̇аад̇имаран̣асан̇каяасан̇каад̇з ниб̣б̣аанз вимужжанд̇и.
271.Hīnakāyūpagāti hīnakāyaṃ upagatā hutvā. Upādāneti taṇhādiṭṭhigahaṇe. Jātimaraṇasambhaveti jātiyā ca maraṇassa ca kāraṇabhūte. Anupādāti catūhi upādānehi anupādiyitvā. Jātimaraṇasaṅkhayeti jātimaraṇasaṅkhayasaṅkhāte nibbāne vimuccanti.
д̣̇идтад̇хаммаабхиниб̣б̣уд̇аад̇и д̣̇идтад̇хаммз имасмим̣язва ад̇д̇абхаавз саб̣б̣агилзсаниб̣б̣аанзна ниб̣б̣уд̇аа. саб̣б̣ад̣̇угкам̣ убажжаг̇унд̇и саб̣б̣ад̣̇угкаад̇игганд̇аа наама хонд̇и.
Diṭṭhadhammābhinibbutāti diṭṭhadhamme imasmiṃyeva attabhāve sabbakilesanibbānena nibbutā. Sabbadukkhaṃ upaccagunti sabbadukkhātikkantā nāma honti.
бабан̃жасууд̣̇анияаа маж̇жхиманигааяадтагат̇ааяа
Papañcasūdaniyā majjhimanikāyaṭṭhakathāya
д̣̇звад̣̇ууд̇асуд̇д̇аван̣н̣анаа нидтид̇аа.
Devadūtasuttavaṇṇanā niṭṭhitā.
д̇ад̇ияаваг̇г̇аван̣н̣анаа нидтид̇аа.
Tatiyavaggavaṇṇanā niṭṭhitā.
Related texts:
д̇ибидага (муула) • Tipiṭaka (Mūla) / суд̇д̇абидага • Suttapiṭaka / маж̇жхиманигааяа • Majjhimanikāya / 10. д̣̇звад̣̇ууд̇асуд̇д̇ам̣ • 10. Devadūtasuttaṃ
дийгаа • Tīkā / суд̇д̇абидага (дийгаа) • Suttapiṭaka (ṭīkā) / маж̇жхиманигааяа (дийгаа) • Majjhimanikāya (ṭīkā) / 10. д̣̇звад̣̇ууд̇асуд̇д̇аван̣н̣анаа • 10. Devadūtasuttavaṇṇanā
