| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. দেৰহিতসুত্তং
3. Devahitasuttaṃ
১৯৯. সাৰত্থিনিদানং । তেন খো পন সমযেন ভগৰা ৰাতেহাবাধিকো হোতি; আযস্মা চ উপৰাণো ভগৰতো উপট্ঠাকো হোতি। অথ খো ভগৰা আযস্মন্তং উপৰাণং আমন্তেসি – ‘‘ইঙ্ঘ মে ত্ৰং, উপৰাণ, উণ্হোদকং জানাহী’’তি। ‘‘এৰং, ভন্তে’’তি খো আযস্মা উপৰাণো ভগৰতো পটিস্সুত্ৰা নিৰাসেত্ৰা পত্তচীৰরমাদায যেন দেৰহিতস্স ব্রাহ্মণস্স নিৰেসনং তেনুপসঙ্কমি; উপসঙ্কমিত্ৰা তুণ্হীভূতো একমন্তং অট্ঠাসি। অদ্দসা খো দেৰহিতো ব্রাহ্মণো আযস্মন্তং উপৰাণং তুণ্হীভূতং একমন্তং ঠিতং। দিস্ৰান আযস্মন্তং উপৰাণং গাথায অজ্ঝভাসি –
199. Sāvatthinidānaṃ . Tena kho pana samayena bhagavā vātehābādhiko hoti; āyasmā ca upavāṇo bhagavato upaṭṭhāko hoti. Atha kho bhagavā āyasmantaṃ upavāṇaṃ āmantesi – ‘‘iṅgha me tvaṃ, upavāṇa, uṇhodakaṃ jānāhī’’ti. ‘‘Evaṃ, bhante’’ti kho āyasmā upavāṇo bhagavato paṭissutvā nivāsetvā pattacīvaramādāya yena devahitassa brāhmaṇassa nivesanaṃ tenupasaṅkami; upasaṅkamitvā tuṇhībhūto ekamantaṃ aṭṭhāsi. Addasā kho devahito brāhmaṇo āyasmantaṃ upavāṇaṃ tuṇhībhūtaṃ ekamantaṃ ṭhitaṃ. Disvāna āyasmantaṃ upavāṇaṃ gāthāya ajjhabhāsi –
‘‘তুণ্হীভূতো ভৰং তিট্ঠং, মুণ্ডো সঙ্ঘাটিপারুতো।
‘‘Tuṇhībhūto bhavaṃ tiṭṭhaṃ, muṇḍo saṅghāṭipāruto;
কিং পত্থযানো কিং এসং, কিং নু যাচিতুমাগতো’’তি॥
Kiṃ patthayāno kiṃ esaṃ, kiṃ nu yācitumāgato’’ti.
‘‘অরহং সুগতো লোকে, ৰাতেহাবাধিকো মুনি।
‘‘Arahaṃ sugato loke, vātehābādhiko muni;
সচে উণ্হোদকং অত্থি, মুনিনো দেহি ব্রাহ্মণ॥
Sace uṇhodakaṃ atthi, munino dehi brāhmaṇa.
‘‘পূজিতো পূজনেয্যানং, সক্করেয্যান সক্কতো।
‘‘Pūjito pūjaneyyānaṃ, sakkareyyāna sakkato;
অথ খো দেৰহিতো ব্রাহ্মণো উণ্হোদকস্স কাজং পুরিসেন গাহাপেত্ৰা ফাণিতস্স চ পুটং আযস্মতো উপৰাণস্স পাদাসি। অথ খো আযস্মা উপৰাণো যেন ভগৰা তেনুপসঙ্কমি; উপসঙ্কমিত্ৰা ভগৰন্তং উণ্হোদকেন ন্হাপেত্ৰা 3 উণ্হোদকেন ফাণিতং আলোলেত্ৰা ভগৰতো পাদাসি। অথ খো ভগৰতো আবাধো পটিপ্পস্সম্ভি।
Atha kho devahito brāhmaṇo uṇhodakassa kājaṃ purisena gāhāpetvā phāṇitassa ca puṭaṃ āyasmato upavāṇassa pādāsi. Atha kho āyasmā upavāṇo yena bhagavā tenupasaṅkami; upasaṅkamitvā bhagavantaṃ uṇhodakena nhāpetvā 4 uṇhodakena phāṇitaṃ āloletvā bhagavato pādāsi. Atha kho bhagavato ābādho paṭippassambhi.
অথ খো দেৰহিতো ব্রাহ্মণো যেন ভগৰা তেনুপসঙ্কমি; উপসঙ্কমিত্ৰা ভগৰতা সদ্ধিং সম্মোদি। সম্মোদনীযং কথং সারণীযং ৰীতিসারেত্ৰা একমন্তং নিসীদি। একমন্তং নিসিন্নো খো দেৰহিতো ব্রাহ্মণো ভগৰন্তং গাথায অজ্ঝভাসি –
Atha kho devahito brāhmaṇo yena bhagavā tenupasaṅkami; upasaṅkamitvā bhagavatā saddhiṃ sammodi. Sammodanīyaṃ kathaṃ sāraṇīyaṃ vītisāretvā ekamantaṃ nisīdi. Ekamantaṃ nisinno kho devahito brāhmaṇo bhagavantaṃ gāthāya ajjhabhāsi –
‘‘কত্থ দজ্জা দেয্যধম্মং, কত্থ দিন্নং মহপ্ফলং।
‘‘Kattha dajjā deyyadhammaṃ, kattha dinnaṃ mahapphalaṃ;
কথঞ্হি যজমানস্স, কথং ইজ্ঝতি দক্খিণা’’তি॥
Kathañhi yajamānassa, kathaṃ ijjhati dakkhiṇā’’ti.
‘‘পুব্বেনিৰাসং যো ৰেদী, সগ্গাপাযঞ্চ পস্সতি।
‘‘Pubbenivāsaṃ yo vedī, saggāpāyañca passati;
অথো জাতিক্খযং পত্তো, অভিঞ্ঞাৰোসিতো মুনি॥
Atho jātikkhayaṃ patto, abhiññāvosito muni.
‘‘এত্থ দজ্জা দেয্যধম্মং, এত্থ দিন্নং মহপ্ফলং।
‘‘Ettha dajjā deyyadhammaṃ, ettha dinnaṃ mahapphalaṃ;
এৰঞ্হি যজমানস্স, এৰং ইজ্ঝতি দক্খিণা’’তি॥
Evañhi yajamānassa, evaṃ ijjhati dakkhiṇā’’ti.
এৰং ৰুত্তে, দেৰহিতো ব্রাহ্মণো ভগৰন্তং এতদৰোচ – ‘‘অভিক্কন্তং ভো গোতম…পে॰… উপাসকং মং ভৰং গোতমো ধারেতু অজ্জতগ্গে পাণুপেতং সরণং গত’’ন্তি।
Evaṃ vutte, devahito brāhmaṇo bhagavantaṃ etadavoca – ‘‘abhikkantaṃ bho gotama…pe… upāsakaṃ maṃ bhavaṃ gotamo dhāretu ajjatagge pāṇupetaṃ saraṇaṃ gata’’nti.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. দেৰহিতসুত্তৰণ্ণনা • 3. Devahitasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. দেৰহিতসুত্তৰণ্ণনা • 3. Devahitasuttavaṇṇanā
