| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. தே³வஹிதஸுத்தவண்ணனா
3. Devahitasuttavaṇṇanā
199. ததியே வாதேஹீதி உத³ரவாதேஹி. ப⁴க³வதோ கிர ச²ப்³ப³ஸ்ஸானி து³க்கரகாரிகங் கரொந்தஸ்ஸ பஸதமுக்³க³யூஸாதீ³னி ஆஹாரயதோ து³ப்³போ⁴ஜனேன சேவ து³க்க²ஸெய்யாய ச உத³ரவாதோ குப்பி. அபரபா⁴கே³ ஸம்போ³தி⁴ங் பத்வா பணீதபோ⁴ஜனங் பு⁴ஞ்ஜந்தஸ்ஸாபி அந்தரந்தரா ஸோ ஆபா³தோ⁴ அத்தானங் த³ஸ்ஸேதியேவ. தங் ஸந்தா⁴யேதங் வுத்தங். உபட்டா²கோ ஹோதீதி பட²மபோ³தி⁴யங் அனிப³த்³து⁴பட்டா²ககாலே உபட்டா²கோ ஹோதி. தஸ்மிங் கிர காலே ஸத்து²அஸீதிமஹாதே²ரேஸு உபட்டா²கோ அபூ⁴தபுப்³போ³ நாம நத்தி². நாக³ஸமாலோ உபவானோ ஸுனக்க²த்தோ சுந்தோ³ ஸமணுத்³தே³ஸோ ஸாக³தோ போ³தி⁴ மேகி⁴யோதி இமே பன பாளியங் ஆக³துபட்டா²கா. இமஸ்மிங் பன காலே உபவானத்தே²ரோ பாதோவ உட்டா²ய பரிவேணஸம்மஜ்ஜனங் த³ந்தகட்ட²தா³னங் ந்ஹானோத³கபரியாத³னங் பத்தசீவரங் க³ஹெத்வா அனுக³மனந்தி ஸப்³ப³ங் ப⁴க³வதோ உபட்டா²னமகாஸி. உபஸங்கமீதி பட²மபோ³தி⁴யங் கிர வீஸதி வஸ்ஸானி நித்³தூ⁴மங் அரஞ்ஞமேவ ஹோதி, பி⁴க்கு²ஸங்க⁴ஸ்ஸ உத³கதாபனம்பி ந ப⁴க³வதா அனுஞ்ஞாதங். ஸோ ச ப்³ராஹ்மணோ உத்³த⁴னபாளிங் ப³ந்தா⁴பெத்வா மஹாசாடியோ உத்³த⁴னமாரோபெத்வா உண்ஹோத³கங் காரெத்வா, ந்ஹானீயசுண்ணாதீ³ஹி ஸத்³தி⁴ங் தங் விக்கிணந்தோ ஜீவிகங் கப்பேதி. ந்ஹாயிதுகாமா தத்த² க³ந்த்வா மூலங் த³த்வா ந்ஹாயித்வா க³ந்தே⁴ விலிம்பித்வா மாலங் பிளந்தி⁴த்வா பக்கமந்தி. தஸ்மா தே²ரோ தத்த² உபஸங்கமி.
199. Tatiye vātehīti udaravātehi. Bhagavato kira chabbassāni dukkarakārikaṃ karontassa pasatamuggayūsādīni āhārayato dubbhojanena ceva dukkhaseyyāya ca udaravāto kuppi. Aparabhāge sambodhiṃ patvā paṇītabhojanaṃ bhuñjantassāpi antarantarā so ābādho attānaṃ dassetiyeva. Taṃ sandhāyetaṃ vuttaṃ. Upaṭṭhāko hotīti paṭhamabodhiyaṃ anibaddhupaṭṭhākakāle upaṭṭhāko hoti. Tasmiṃ kira kāle satthuasītimahātheresu upaṭṭhāko abhūtapubbo nāma natthi. Nāgasamālo upavāno sunakkhatto cundo samaṇuddeso sāgato bodhi meghiyoti ime pana pāḷiyaṃ āgatupaṭṭhākā. Imasmiṃ pana kāle upavānatthero pātova uṭṭhāya pariveṇasammajjanaṃ dantakaṭṭhadānaṃ nhānodakapariyādanaṃ pattacīvaraṃ gahetvā anugamananti sabbaṃ bhagavato upaṭṭhānamakāsi. Upasaṅkamīti paṭhamabodhiyaṃ kira vīsati vassāni niddhūmaṃ araññameva hoti, bhikkhusaṅghassa udakatāpanampi na bhagavatā anuññātaṃ. So ca brāhmaṇo uddhanapāḷiṃ bandhāpetvā mahācāṭiyo uddhanamāropetvā uṇhodakaṃ kāretvā, nhānīyacuṇṇādīhi saddhiṃ taṃ vikkiṇanto jīvikaṃ kappeti. Nhāyitukāmā tattha gantvā mūlaṃ datvā nhāyitvā gandhe vilimpitvā mālaṃ piḷandhitvā pakkamanti. Tasmā thero tattha upasaṅkami.
கிங் பத்த²யானோதி கிங் இச்ச²ந்தோ. கிங் ஏஸந்தி கிங் க³வேஸந்தோ. பூஜிதோ பூஜனெய்யானந்தி இத³ங் தே²ரோ த³ஸப³லஸ்ஸ வண்ணங் கதே²துமாரபி⁴. கி³லானபே⁴ஸஜ்ஜத்த²ங் க³தேன கிர கி³லானஸ்ஸ வண்ணோ கதே²தப்³போ³தி வத்தமேதங். வண்ணங் ஹி ஸுத்வா மனுஸ்ஸா ஸக்கச்சங் பே⁴ஸஜ்ஜங் தா³தப்³ப³ங் மஞ்ஞந்தி. ஸப்பாயபே⁴ஸஜ்ஜங் லத்³தா⁴ கி³லானோ கி²ப்பமேவ வுட்டா²தி. கதெ²ந்தேன ச ஜா²னவிமொக்க²ஸமாபத்திமக்³க³ப²லானி ஆரப்³ப⁴ கதே²துங் ந வட்டதி. ‘‘ஸீலவா லஜ்ஜீ குக்குச்சகோ ப³ஹுஸ்ஸுதோ ஆக³மத⁴ரோ வங்ஸானுரக்க²கோ’’தி ஏவங் பன ஆக³மனீயபடிபத³ங்யேவ கதே²துங் வட்டதி. பூஜனெய்யானந்தி அஸீதிமஹாதே²ரா ஸதே³வகேன லோகேன பூஜேதப்³பா³தி பூஜனெய்யா. தேயேவ ஸக்காதப்³பா³தி ஸக்கரெய்யா. தேஸங்யேவ அபசிதி கத்தப்³பா³தி அபசெய்யா. ப⁴க³வா தேஸங் பூஜிதோ ஸக்கதோ அபசிதோ ச, இச்சஸ்ஸ தங் கு³ணங் பகாஸெந்தோ தே²ரோ ஏவமாஹ. ஹாதவேதி ஹரிதுங்.
Kiṃ patthayānoti kiṃ icchanto. Kiṃ esanti kiṃ gavesanto. Pūjito pūjaneyyānanti idaṃ thero dasabalassa vaṇṇaṃ kathetumārabhi. Gilānabhesajjatthaṃ gatena kira gilānassa vaṇṇo kathetabboti vattametaṃ. Vaṇṇaṃ hi sutvā manussā sakkaccaṃ bhesajjaṃ dātabbaṃ maññanti. Sappāyabhesajjaṃ laddhā gilāno khippameva vuṭṭhāti. Kathentena ca jhānavimokkhasamāpattimaggaphalāni ārabbha kathetuṃ na vaṭṭati. ‘‘Sīlavā lajjī kukkuccako bahussuto āgamadharo vaṃsānurakkhako’’ti evaṃ pana āgamanīyapaṭipadaṃyeva kathetuṃ vaṭṭati. Pūjaneyyānanti asītimahātherā sadevakena lokena pūjetabbāti pūjaneyyā. Teyeva sakkātabbāti sakkareyyā. Tesaṃyeva apaciti kattabbāti apaceyyā. Bhagavā tesaṃ pūjito sakkato apacito ca, iccassa taṃ guṇaṃ pakāsento thero evamāha. Hātaveti harituṃ.
பா²ணிதஸ்ஸ ச புடந்தி மஹந்தங் நிச்சா²ரிகங் கு³ளபிண்ட³ங். ஸோ கிர ‘‘கிங் ஸமணஸ்ஸ கோ³தமஸ்ஸ அபா²ஸுக’’ந்தி? புச்சி²த்வா, ‘‘உத³ரவாதோ’’தி ஸுத்வா, ‘‘தேன ஹி மயமெத்த² பே⁴ஸஜ்ஜங் ஜானாம, இதோ தோ²கேன உத³கேன இத³ங் பா²ணிதங் ஆலோளெத்வா ந்ஹானபரியோஸானே பாதுங் தே³த², இதி உண்ஹோத³கேன ப³ஹி பரிஸேதோ³ ப⁴விஸ்ஸதி, இமினா அந்தோதி ஏவங் ஸமணஸ்ஸ கோ³தமஸ்ஸ பா²ஸுகங் ப⁴விஸ்ஸதீ’’தி வத்வா தே²ரஸ்ஸ பத்தே பக்கி²பித்வா அதா³ஸி.
Phāṇitassa ca puṭanti mahantaṃ nicchārikaṃ guḷapiṇḍaṃ. So kira ‘‘kiṃ samaṇassa gotamassa aphāsuka’’nti? Pucchitvā, ‘‘udaravāto’’ti sutvā, ‘‘tena hi mayamettha bhesajjaṃ jānāma, ito thokena udakena idaṃ phāṇitaṃ āloḷetvā nhānapariyosāne pātuṃ detha, iti uṇhodakena bahi parisedo bhavissati, iminā antoti evaṃ samaṇassa gotamassa phāsukaṃ bhavissatī’’ti vatvā therassa patte pakkhipitvā adāsi.
உபஸங்கமீதி தஸ்மிங் கிர ஆபா³தே⁴ படிப்பஸ்ஸத்³தே⁴ ‘‘தே³வஹிதேன ததா²க³தஸ்ஸ பே⁴ஸஜ்ஜங் தி³ன்னங், தேனேவ ரோகோ³ வூபஸந்தோ, அஹோ தா³னங் பரமதா³னங் ப்³ராஹ்மணஸ்ஸா’’தி கதா² வித்தா²ரிதா ஜாதா. தங் ஸுத்வா கித்திகாமோ ப்³ராஹ்மணோ ‘‘எத்தகேனபி தாவ மே அயங் கித்திஸத்³தோ³ அப்³பு⁴க்³க³தோ’’தி ஸோமனஸ்ஸஜாதோ அத்தனா கதபா⁴வங் ஜானாபேதுகாமோ தாவதகேனேவ த³ஸப³லே விஸ்ஸாஸங் ஆபஜ்ஜித்வா உபஸங்கமி.
Upasaṅkamīti tasmiṃ kira ābādhe paṭippassaddhe ‘‘devahitena tathāgatassa bhesajjaṃ dinnaṃ, teneva rogo vūpasanto, aho dānaṃ paramadānaṃ brāhmaṇassā’’ti kathā vitthāritā jātā. Taṃ sutvā kittikāmo brāhmaṇo ‘‘ettakenapi tāva me ayaṃ kittisaddo abbhuggato’’ti somanassajāto attanā katabhāvaṃ jānāpetukāmo tāvatakeneva dasabale vissāsaṃ āpajjitvā upasaṅkami.
த³ஜ்ஜாதி த³தெ³ய்ய. கத²ங் ஹி யஜமானஸ்ஸாதி கேன காரணேன யஜந்தஸ்ஸ. இஜ்ஜ²தீதி ஸமிஜ்ஜ²தி மஹப்ப²லோ ஹோதி. யோவேதீ³தி யோ அவேதி³ அஞ்ஞாஸி, விதி³தங் பாகடமகாஸி ‘‘யோவேதீ’’திபி பாடோ², யோ அவேதி ஜானாதீதி அத்தோ². பஸ்ஸதீதி தி³ப்³ப³சக்கு²னா பஸ்ஸதி. ஜாதிக்க²யந்தி அரஹத்தங். அபி⁴ஞ்ஞாவோஸிதோதி ஜானித்வா வோஸிதோ வோஸானங் கதகிச்சதங் பத்தோ. ஏவங் ஹி யஜமானஸ்ஸாதி இமினா கீ²ணாஸவே யஜனாகாரேன யஜந்தஸ்ஸ. ததியங்.
Dajjāti dadeyya. Kathaṃ hi yajamānassāti kena kāraṇena yajantassa. Ijjhatīti samijjhati mahapphalo hoti. Yovedīti yo avedi aññāsi, viditaṃ pākaṭamakāsi ‘‘yovetī’’tipi pāṭho, yo aveti jānātīti attho. Passatīti dibbacakkhunā passati. Jātikkhayanti arahattaṃ. Abhiññāvositoti jānitvā vosito vosānaṃ katakiccataṃ patto. Evaṃ hi yajamānassāti iminā khīṇāsave yajanākārena yajantassa. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. தே³வஹிதஸுத்தங் • 3. Devahitasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. தே³வஹிதஸுத்தவண்ணனா • 3. Devahitasuttavaṇṇanā
