| Library / Tipiṭaka / តិបិដក • Tipiṭaka / សំយុត្តនិកាយ (ដីកា) • Saṃyuttanikāya (ṭīkā) |
៣. ទេវហិតសុត្តវណ្ណនា
3. Devahitasuttavaṇṇanā
១៩៩. ឧទរវាតេហីតិ វាតកតវិជ្ឈនតោទនាទិវសេន អបរាបរំ វត្តមានេហិ ឧទរវាតេហិ, តស្ស វា វិការេហិ។ និពទ្ធុបដ្ឋាកកាលេ បន ធម្មភណ្ឌាគារិកោវ។ អរញ្ញន្តិ ភគវតោ ភិក្ខូនញ្ច វសនដ្ឋានភូតំ តបោវនំ។ តំ និទ្ធូមំ ហោតិ ឧទកតាបនស្សបិ អករណតោ។ តស្មាតិ យស្មា តស្ស ឧណ្ហោទកវិក្កិណនចរិយាយ ជីវិកាកប្បនំ ហោតិ, តស្មា។
199.Udaravātehīti vātakatavijjhanatodanādivasena aparāparaṃ vattamānehi udaravātehi, tassa vā vikārehi. Nibaddhupaṭṭhākakāle pana dhammabhaṇḍāgārikova. Araññanti bhagavato bhikkhūnañca vasanaṭṭhānabhūtaṃ tapovanaṃ. Taṃ niddhūmaṃ hoti udakatāpanassapi akaraṇato. Tasmāti yasmā tassa uṇhodakavikkiṇanacariyāya jīvikākappanaṃ hoti, tasmā.
វត្តមេតំ តស្ស បតិការត្ថំ បរិកថាទីនម្បិ កាតុំ លព្ភនតោ។ ឥទានិ តត្ថ ការណម្បិ សវិសយំ ទស្សេតុំ ‘‘វណ្ណំ ហី’’តិអាទិ វុត្តំ។ ភគវា ហិ អាយស្មតោ ឧបវាណស្ស ទេវហិតព្រាហ្មណស្ស តំ សម្ភាវិតំ ភវិស្សតិ តិកិច្ឆាបដិយត្តំ, តាយ ច អត្តនោ រោគស្ស វូបសមនំ, តប្បសង្គេន ច ទេវហិតព្រាហ្មណោ មម សន្តិកំ អាគន្ត្វា ធម្មស្សវនេន សរណេសុ សីលេសុ ច បតិដ្ឋហិស្សតីតិ សព្ពមិទំ ញត្វា ឯវំ ‘‘ឥង្ឃ មេ ត្វំ, ឧបវាណ, ឧណ្ហោទកំ ជានាហី’’តិ អវោច។ អាគមនីយប្បដិបទំ បុព្ពភាគប្បដិបទំ បុព្ពភាគប្បដិបត្តិំ កថេតុំ វដ្ដតិ អនុត្តរិមនុស្សធម្មត្តា។ សទេវកេន លោកេនាតិ អនវសេសតោ លោកស្ស គហណំ។ ផលវិសេសាកង្ខាយ បូជេតព្ពាតិ បូជនីយា, តេ ឯវ ឥធ ‘‘បូជនេយ្យា’’តិ វុត្តា។ តថា អាទរេន បូជេតព្ពតាយ សក្ការិយា, អា-ការស្ស រស្សត្តំ, រិ-សទ្ទស្ស ច រេ-អាទេសំ កត្វា ‘‘សក្ករេយ្យា’’តិ វុត្តំ។ ‘‘អបចយេយ្យា’’តិ វត្តព្ពេ យ-ការលោបំ កត្វា ‘‘អបចេយ្យា’’តិ វុត្តំ។ តេសន្តិ សទេវកេន បូជនេយ្យាទីនំ។ ហរិតុន្តិ នេតុំ។
Vattametaṃ tassa patikāratthaṃ parikathādīnampi kātuṃ labbhanato. Idāni tattha kāraṇampi savisayaṃ dassetuṃ ‘‘vaṇṇaṃ hī’’tiādi vuttaṃ. Bhagavā hi āyasmato upavāṇassa devahitabrāhmaṇassa taṃ sambhāvitaṃ bhavissati tikicchāpaṭiyattaṃ, tāya ca attano rogassa vūpasamanaṃ, tappasaṅgena ca devahitabrāhmaṇo mama santikaṃ āgantvā dhammassavanena saraṇesu sīlesu ca patiṭṭhahissatīti sabbamidaṃ ñatvā evaṃ ‘‘iṅgha me tvaṃ, upavāṇa, uṇhodakaṃ jānāhī’’ti avoca. Āgamanīyappaṭipadaṃ pubbabhāgappaṭipadaṃ pubbabhāgappaṭipattiṃ kathetuṃ vaṭṭati anuttarimanussadhammattā. Sadevakena lokenāti anavasesato lokassa gahaṇaṃ. Phalavisesākaṅkhāya pūjetabbāti pūjanīyā, te eva idha ‘‘pūjaneyyā’’ti vuttā. Tathā ādarena pūjetabbatāya sakkāriyā, ā-kārassa rassattaṃ, ri-saddassa ca re-ādesaṃ katvā ‘‘sakkareyyā’’ti vuttaṃ. ‘‘Apacayeyyā’’ti vattabbe ya-kāralopaṃ katvā ‘‘apaceyyā’’ti vuttaṃ. Tesanti sadevakena pūjaneyyādīnaṃ. Haritunti netuṃ.
ឯត្តកេនបីតិ ឧបសង្កមនាទិនា ឯត្តកេន អប្បមត្តកេនបិ កតវត្តេន អយំ កិត្តិ…បេ.… សោមនស្សជាតោ។
Ettakenapīti upasaṅkamanādinā ettakena appamattakenapi katavattena ayaṃ kitti…pe… somanassajāto.
យជមានស្សាតិ ទេយ្យធម្មំ ទេន្តស្ស។ ទក្ខិណាយ ឥជ្ឈនំ នាម វិបុលផលភាវោតិ អាហ ‘‘មហប្ផលោ ហោតី’’តិ។ វិទិតន្តិ បដិវិទ្ធបច្ចក្ខកតំ។ អាជានាតីតិ វុត្ថភវាទិំ បរិយាទាយ ជានាតិ បដិវិជ្ឈតិ។ ជានិត្វាតិ ចត្តារិ សច្ចានិ មគ្គបដិបាដិយា បដិវិជ្ឈិត្វា។ អគ្គប្បត្តតាយ កតកិច្ចតំ បត្តោ។ ព្រាហ្មណេន អត្តនា កតោ ការោ ច ភគវតោ ឯវ បច្ចុបដ្ឋាតីតិ តំ ទស្សេន្តោ ‘‘ឥមិនា ខីណាសវេ យជនាការេន យជន្តស្សា’’តិ វុត្តំ។
Yajamānassāti deyyadhammaṃ dentassa. Dakkhiṇāya ijjhanaṃ nāma vipulaphalabhāvoti āha ‘‘mahapphalo hotī’’ti. Viditanti paṭividdhapaccakkhakataṃ. Ājānātīti vutthabhavādiṃ pariyādāya jānāti paṭivijjhati. Jānitvāti cattāri saccāni maggapaṭipāṭiyā paṭivijjhitvā. Aggappattatāya katakiccataṃ patto. Brāhmaṇena attanā kato kāro ca bhagavato eva paccupaṭṭhātīti taṃ dassento ‘‘iminā khīṇāsave yajanākārena yajantassā’’ti vuttaṃ.
ទេវហិតសុត្តវណ្ណនា និដ្ឋិតា។
Devahitasuttavaṇṇanā niṭṭhitā.
Related texts:
តិបិដក (មូល) • Tipiṭaka (Mūla) / សុត្តបិដក • Suttapiṭaka / សំយុត្តនិកាយ • Saṃyuttanikāya / ៣. ទេវហិតសុត្តំ • 3. Devahitasuttaṃ
អដ្ឋកថា • Aṭṭhakathā / សុត្តបិដក (អដ្ឋកថា) • Suttapiṭaka (aṭṭhakathā) / សំយុត្តនិកាយ (អដ្ឋកថា) • Saṃyuttanikāya (aṭṭhakathā) / ៣. ទេវហិតសុត្តវណ្ណនា • 3. Devahitasuttavaṇṇanā
