| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. ဒေဝဟိတသုတ္တဝဏ္ဏနာ
3. Devahitasuttavaṇṇanā
၁၉၉. ဥဒရဝာတေဟီတိ ဝာတကတဝိဇ္ဈနတောဒနာဒိဝသေန အပရာပရံ ဝတ္တမာနေဟိ ဥဒရဝာတေဟိ, တသ္သ ဝာ ဝိကာရေဟိ။ နိဗဒ္ဓုပဋ္ဌာကကာလေ ပန ဓမ္မဘဏ္ဍာဂာရိကောဝ။ အရညန္တိ ဘဂဝတော ဘိက္ခူနဉ္စ ဝသနဋ္ဌာနဘူတံ တပောဝနံ။ တံ နိဒ္ဓူမံ ဟောတိ ဥဒကတာပနသ္သပိ အကရဏတော။ တသ္မာတိ ယသ္မာ တသ္သ ဥဏ္ဟောဒကဝိက္ကိဏနစရိယာယ ဇီဝိကာကပ္ပနံ ဟောတိ, တသ္မာ။
199.Udaravātehīti vātakatavijjhanatodanādivasena aparāparaṃ vattamānehi udaravātehi, tassa vā vikārehi. Nibaddhupaṭṭhākakāle pana dhammabhaṇḍāgārikova. Araññanti bhagavato bhikkhūnañca vasanaṭṭhānabhūtaṃ tapovanaṃ. Taṃ niddhūmaṃ hoti udakatāpanassapi akaraṇato. Tasmāti yasmā tassa uṇhodakavikkiṇanacariyāya jīvikākappanaṃ hoti, tasmā.
ဝတ္တမေတံ တသ္သ ပတိကာရတ္ထံ ပရိကထာဒီနမ္ပိ ကာတုံ လဗ္ဘနတော။ ဣဒာနိ တတ္ထ ကာရဏမ္ပိ သဝိသယံ ဒသ္သေတုံ ‘‘ဝဏ္ဏံ ဟီ’’တိအာဒိ ဝုတ္တံ။ ဘဂဝာ ဟိ အာယသ္မတော ဥပဝာဏသ္သ ဒေဝဟိတဗ္ရာဟ္မဏသ္သ တံ သမ္ဘာဝိတံ ဘဝိသ္သတိ တိကိစ္ဆာပဋိယတ္တံ, တာယ စ အတ္တနော ရောဂသ္သ ဝူပသမနံ, တပ္ပသင္ဂေန စ ဒေဝဟိတဗ္ရာဟ္မဏော မမ သန္တိကံ အာဂန္တ္ဝာ ဓမ္မသ္သဝနေန သရဏေသု သီလေသု စ ပတိဋ္ဌဟိသ္သတီတိ သဗ္ဗမိဒံ ဉတ္ဝာ ဧဝံ ‘‘ဣင္ဃ မေ တ္ဝံ, ဥပဝာဏ, ဥဏ္ဟောဒကံ ဇာနာဟီ’’တိ အဝောစ။ အာဂမနီယပ္ပဋိပဒံ ပုဗ္ဗဘာဂပ္ပဋိပဒံ ပုဗ္ဗဘာဂပ္ပဋိပတ္တိံ ကထေတုံ ဝဋ္ဋတိ အနုတ္တရိမနုသ္သဓမ္မတ္တာ။ သဒေဝကေန လောကေနာတိ အနဝသေသတော လောကသ္သ ဂဟဏံ။ ဖလဝိသေသာကင္ခာယ ပူဇေတဗ္ဗာတိ ပူဇနီယာ, တေ ဧဝ ဣဓ ‘‘ပူဇနေယ္ယာ’’တိ ဝုတ္တာ။ တထာ အာဒရေန ပူဇေတဗ္ဗတာယ သက္ကာရိယာ, အာ-ကာရသ္သ ရသ္သတ္တံ, ရိ-သဒ္ဒသ္သ စ ရေ-အာဒေသံ ကတ္ဝာ ‘‘သက္ကရေယ္ယာ’’တိ ဝုတ္တံ။ ‘‘အပစယေယ္ယာ’’တိ ဝတ္တဗ္ဗေ ယ-ကာရလောပံ ကတ္ဝာ ‘‘အပစေယ္ယာ’’တိ ဝုတ္တံ။ တေသန္တိ သဒေဝကေန ပူဇနေယ္ယာဒီနံ။ ဟရိတုန္တိ နေတုံ။
Vattametaṃ tassa patikāratthaṃ parikathādīnampi kātuṃ labbhanato. Idāni tattha kāraṇampi savisayaṃ dassetuṃ ‘‘vaṇṇaṃ hī’’tiādi vuttaṃ. Bhagavā hi āyasmato upavāṇassa devahitabrāhmaṇassa taṃ sambhāvitaṃ bhavissati tikicchāpaṭiyattaṃ, tāya ca attano rogassa vūpasamanaṃ, tappasaṅgena ca devahitabrāhmaṇo mama santikaṃ āgantvā dhammassavanena saraṇesu sīlesu ca patiṭṭhahissatīti sabbamidaṃ ñatvā evaṃ ‘‘iṅgha me tvaṃ, upavāṇa, uṇhodakaṃ jānāhī’’ti avoca. Āgamanīyappaṭipadaṃ pubbabhāgappaṭipadaṃ pubbabhāgappaṭipattiṃ kathetuṃ vaṭṭati anuttarimanussadhammattā. Sadevakena lokenāti anavasesato lokassa gahaṇaṃ. Phalavisesākaṅkhāya pūjetabbāti pūjanīyā, te eva idha ‘‘pūjaneyyā’’ti vuttā. Tathā ādarena pūjetabbatāya sakkāriyā, ā-kārassa rassattaṃ, ri-saddassa ca re-ādesaṃ katvā ‘‘sakkareyyā’’ti vuttaṃ. ‘‘Apacayeyyā’’ti vattabbe ya-kāralopaṃ katvā ‘‘apaceyyā’’ti vuttaṃ. Tesanti sadevakena pūjaneyyādīnaṃ. Haritunti netuṃ.
ဧတ္တကေနပီတိ ဥပသင္ကမနာဒိနာ ဧတ္တကေန အပ္ပမတ္တကေနပိ ကတဝတ္တေန အယံ ကိတ္တိ။ပေ.။ သောမနသ္သဇာတော။
Ettakenapīti upasaṅkamanādinā ettakena appamattakenapi katavattena ayaṃ kitti…pe… somanassajāto.
ယဇမာနသ္သာတိ ဒေယ္ယဓမ္မံ ဒေန္တသ္သ။ ဒက္ခိဏာယ ဣဇ္ဈနံ နာမ ဝိပုလဖလဘာဝောတိ အာဟ ‘‘မဟပ္ဖလော ဟောတီ’’တိ။ ဝိဒိတန္တိ ပဋိဝိဒ္ဓပစ္စက္ခကတံ။ အာဇာနာတီတိ ဝုတ္ထဘဝာဒိံ ပရိယာဒာယ ဇာနာတိ ပဋိဝိဇ္ဈတိ။ ဇာနိတ္ဝာတိ စတ္တာရိ သစ္စာနိ မဂ္ဂပဋိပာဋိယာ ပဋိဝိဇ္ဈိတ္ဝာ။ အဂ္ဂပ္ပတ္တတာယ ကတကိစ္စတံ ပတ္တော။ ဗ္ရာဟ္မဏေန အတ္တနာ ကတော ကာရော စ ဘဂဝတော ဧဝ ပစ္စုပဋ္ဌာတီတိ တံ ဒသ္သေန္တော ‘‘ဣမိနာ ခီဏာသဝေ ယဇနာကာရေန ယဇန္တသ္သာ’’တိ ဝုတ္တံ။
Yajamānassāti deyyadhammaṃ dentassa. Dakkhiṇāya ijjhanaṃ nāma vipulaphalabhāvoti āha ‘‘mahapphalo hotī’’ti. Viditanti paṭividdhapaccakkhakataṃ. Ājānātīti vutthabhavādiṃ pariyādāya jānāti paṭivijjhati. Jānitvāti cattāri saccāni maggapaṭipāṭiyā paṭivijjhitvā. Aggappattatāya katakiccataṃ patto. Brāhmaṇena attanā kato kāro ca bhagavato eva paccupaṭṭhātīti taṃ dassento ‘‘iminā khīṇāsave yajanākārena yajantassā’’ti vuttaṃ.
ဒေဝဟိတသုတ္တဝဏ္ဏနာ နိဋ္ဌိတာ။
Devahitasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. ဒေဝဟိတသုတ္တံ • 3. Devahitasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. ဒေဝဟိတသုတ္တဝဏ္ဏနာ • 3. Devahitasuttavaṇṇanā
