| Library / Tipiṭaka / ತಿಪಿಟಕ • Tipiṭaka / ಸಂಯುತ್ತನಿಕಾಯ (ಟೀಕಾ) • Saṃyuttanikāya (ṭīkā) |
೩. ದೇವಹಿತಸುತ್ತವಣ್ಣನಾ
3. Devahitasuttavaṇṇanā
೧೯೯. ಉದರವಾತೇಹೀತಿ ವಾತಕತವಿಜ್ಝನತೋದನಾದಿವಸೇನ ಅಪರಾಪರಂ ವತ್ತಮಾನೇಹಿ ಉದರವಾತೇಹಿ, ತಸ್ಸ ವಾ ವಿಕಾರೇಹಿ। ನಿಬದ್ಧುಪಟ್ಠಾಕಕಾಲೇ ಪನ ಧಮ್ಮಭಣ್ಡಾಗಾರಿಕೋವ। ಅರಞ್ಞನ್ತಿ ಭಗವತೋ ಭಿಕ್ಖೂನಞ್ಚ ವಸನಟ್ಠಾನಭೂತಂ ತಪೋವನಂ। ತಂ ನಿದ್ಧೂಮಂ ಹೋತಿ ಉದಕತಾಪನಸ್ಸಪಿ ಅಕರಣತೋ। ತಸ್ಮಾತಿ ಯಸ್ಮಾ ತಸ್ಸ ಉಣ್ಹೋದಕವಿಕ್ಕಿಣನಚರಿಯಾಯ ಜೀವಿಕಾಕಪ್ಪನಂ ಹೋತಿ, ತಸ್ಮಾ।
199.Udaravātehīti vātakatavijjhanatodanādivasena aparāparaṃ vattamānehi udaravātehi, tassa vā vikārehi. Nibaddhupaṭṭhākakāle pana dhammabhaṇḍāgārikova. Araññanti bhagavato bhikkhūnañca vasanaṭṭhānabhūtaṃ tapovanaṃ. Taṃ niddhūmaṃ hoti udakatāpanassapi akaraṇato. Tasmāti yasmā tassa uṇhodakavikkiṇanacariyāya jīvikākappanaṃ hoti, tasmā.
ವತ್ತಮೇತಂ ತಸ್ಸ ಪತಿಕಾರತ್ಥಂ ಪರಿಕಥಾದೀನಮ್ಪಿ ಕಾತುಂ ಲಬ್ಭನತೋ। ಇದಾನಿ ತತ್ಥ ಕಾರಣಮ್ಪಿ ಸವಿಸಯಂ ದಸ್ಸೇತುಂ ‘‘ವಣ್ಣಂ ಹೀ’’ತಿಆದಿ ವುತ್ತಂ। ಭಗವಾ ಹಿ ಆಯಸ್ಮತೋ ಉಪವಾಣಸ್ಸ ದೇವಹಿತಬ್ರಾಹ್ಮಣಸ್ಸ ತಂ ಸಮ್ಭಾವಿತಂ ಭವಿಸ್ಸತಿ ತಿಕಿಚ್ಛಾಪಟಿಯತ್ತಂ, ತಾಯ ಚ ಅತ್ತನೋ ರೋಗಸ್ಸ ವೂಪಸಮನಂ, ತಪ್ಪಸಙ್ಗೇನ ಚ ದೇವಹಿತಬ್ರಾಹ್ಮಣೋ ಮಮ ಸನ್ತಿಕಂ ಆಗನ್ತ್ವಾ ಧಮ್ಮಸ್ಸವನೇನ ಸರಣೇಸು ಸೀಲೇಸು ಚ ಪತಿಟ್ಠಹಿಸ್ಸತೀತಿ ಸಬ್ಬಮಿದಂ ಞತ್ವಾ ಏವಂ ‘‘ಇಙ್ಘ ಮೇ ತ್ವಂ, ಉಪವಾಣ, ಉಣ್ಹೋದಕಂ ಜಾನಾಹೀ’’ತಿ ಅವೋಚ। ಆಗಮನೀಯಪ್ಪಟಿಪದಂ ಪುಬ್ಬಭಾಗಪ್ಪಟಿಪದಂ ಪುಬ್ಬಭಾಗಪ್ಪಟಿಪತ್ತಿಂ ಕಥೇತುಂ ವಟ್ಟತಿ ಅನುತ್ತರಿಮನುಸ್ಸಧಮ್ಮತ್ತಾ। ಸದೇವಕೇನ ಲೋಕೇನಾತಿ ಅನವಸೇಸತೋ ಲೋಕಸ್ಸ ಗಹಣಂ। ಫಲವಿಸೇಸಾಕಙ್ಖಾಯ ಪೂಜೇತಬ್ಬಾತಿ ಪೂಜನೀಯಾ, ತೇ ಏವ ಇಧ ‘‘ಪೂಜನೇಯ್ಯಾ’’ತಿ ವುತ್ತಾ। ತಥಾ ಆದರೇನ ಪೂಜೇತಬ್ಬತಾಯ ಸಕ್ಕಾರಿಯಾ, ಆ-ಕಾರಸ್ಸ ರಸ್ಸತ್ತಂ, ರಿ-ಸದ್ದಸ್ಸ ಚ ರೇ-ಆದೇಸಂ ಕತ್ವಾ ‘‘ಸಕ್ಕರೇಯ್ಯಾ’’ತಿ ವುತ್ತಂ। ‘‘ಅಪಚಯೇಯ್ಯಾ’’ತಿ ವತ್ತಬ್ಬೇ ಯ-ಕಾರಲೋಪಂ ಕತ್ವಾ ‘‘ಅಪಚೇಯ್ಯಾ’’ತಿ ವುತ್ತಂ। ತೇಸನ್ತಿ ಸದೇವಕೇನ ಪೂಜನೇಯ್ಯಾದೀನಂ। ಹರಿತುನ್ತಿ ನೇತುಂ।
Vattametaṃ tassa patikāratthaṃ parikathādīnampi kātuṃ labbhanato. Idāni tattha kāraṇampi savisayaṃ dassetuṃ ‘‘vaṇṇaṃ hī’’tiādi vuttaṃ. Bhagavā hi āyasmato upavāṇassa devahitabrāhmaṇassa taṃ sambhāvitaṃ bhavissati tikicchāpaṭiyattaṃ, tāya ca attano rogassa vūpasamanaṃ, tappasaṅgena ca devahitabrāhmaṇo mama santikaṃ āgantvā dhammassavanena saraṇesu sīlesu ca patiṭṭhahissatīti sabbamidaṃ ñatvā evaṃ ‘‘iṅgha me tvaṃ, upavāṇa, uṇhodakaṃ jānāhī’’ti avoca. Āgamanīyappaṭipadaṃ pubbabhāgappaṭipadaṃ pubbabhāgappaṭipattiṃ kathetuṃ vaṭṭati anuttarimanussadhammattā. Sadevakena lokenāti anavasesato lokassa gahaṇaṃ. Phalavisesākaṅkhāya pūjetabbāti pūjanīyā, te eva idha ‘‘pūjaneyyā’’ti vuttā. Tathā ādarena pūjetabbatāya sakkāriyā, ā-kārassa rassattaṃ, ri-saddassa ca re-ādesaṃ katvā ‘‘sakkareyyā’’ti vuttaṃ. ‘‘Apacayeyyā’’ti vattabbe ya-kāralopaṃ katvā ‘‘apaceyyā’’ti vuttaṃ. Tesanti sadevakena pūjaneyyādīnaṃ. Haritunti netuṃ.
ಏತ್ತಕೇನಪೀತಿ ಉಪಸಙ್ಕಮನಾದಿನಾ ಏತ್ತಕೇನ ಅಪ್ಪಮತ್ತಕೇನಪಿ ಕತವತ್ತೇನ ಅಯಂ ಕಿತ್ತಿ…ಪೇ॰… ಸೋಮನಸ್ಸಜಾತೋ।
Ettakenapīti upasaṅkamanādinā ettakena appamattakenapi katavattena ayaṃ kitti…pe… somanassajāto.
ಯಜಮಾನಸ್ಸಾತಿ ದೇಯ್ಯಧಮ್ಮಂ ದೇನ್ತಸ್ಸ। ದಕ್ಖಿಣಾಯ ಇಜ್ಝನಂ ನಾಮ ವಿಪುಲಫಲಭಾವೋತಿ ಆಹ ‘‘ಮಹಪ್ಫಲೋ ಹೋತೀ’’ತಿ। ವಿದಿತನ್ತಿ ಪಟಿವಿದ್ಧಪಚ್ಚಕ್ಖಕತಂ। ಆಜಾನಾತೀತಿ ವುತ್ಥಭವಾದಿಂ ಪರಿಯಾದಾಯ ಜಾನಾತಿ ಪಟಿವಿಜ್ಝತಿ। ಜಾನಿತ್ವಾತಿ ಚತ್ತಾರಿ ಸಚ್ಚಾನಿ ಮಗ್ಗಪಟಿಪಾಟಿಯಾ ಪಟಿವಿಜ್ಝಿತ್ವಾ। ಅಗ್ಗಪ್ಪತ್ತತಾಯ ಕತಕಿಚ್ಚತಂ ಪತ್ತೋ। ಬ್ರಾಹ್ಮಣೇನ ಅತ್ತನಾ ಕತೋ ಕಾರೋ ಚ ಭಗವತೋ ಏವ ಪಚ್ಚುಪಟ್ಠಾತೀತಿ ತಂ ದಸ್ಸೇನ್ತೋ ‘‘ಇಮಿನಾ ಖೀಣಾಸವೇ ಯಜನಾಕಾರೇನ ಯಜನ್ತಸ್ಸಾ’’ತಿ ವುತ್ತಂ।
Yajamānassāti deyyadhammaṃ dentassa. Dakkhiṇāya ijjhanaṃ nāma vipulaphalabhāvoti āha ‘‘mahapphalo hotī’’ti. Viditanti paṭividdhapaccakkhakataṃ. Ājānātīti vutthabhavādiṃ pariyādāya jānāti paṭivijjhati. Jānitvāti cattāri saccāni maggapaṭipāṭiyā paṭivijjhitvā. Aggappattatāya katakiccataṃ patto. Brāhmaṇena attanā kato kāro ca bhagavato eva paccupaṭṭhātīti taṃ dassento ‘‘iminā khīṇāsave yajanākārena yajantassā’’ti vuttaṃ.
ದೇವಹಿತಸುತ್ತವಣ್ಣನಾ ನಿಟ್ಠಿತಾ।
Devahitasuttavaṇṇanā niṭṭhitā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಸಂಯುತ್ತನಿಕಾಯ • Saṃyuttanikāya / ೩. ದೇವಹಿತಸುತ್ತಂ • 3. Devahitasuttaṃ
ಅಟ್ಠಕಥಾ • Aṭṭhakathā / ಸುತ್ತಪಿಟಕ (ಅಟ್ಠಕಥಾ) • Suttapiṭaka (aṭṭhakathā) / ಸಂಯುತ್ತನಿಕಾಯ (ಅಟ್ಠಕಥಾ) • Saṃyuttanikāya (aṭṭhakathā) / ೩. ದೇವಹಿತಸುತ್ತವಣ್ಣನಾ • 3. Devahitasuttavaṇṇanā
