| Library / Tipiṭaka / තිපිටක • Tipiṭaka / සංයුත්‌තනිකාය (ටීකා) • Saṃyuttanikāya (ṭīkā) |
3. දෙවහිතසුත්‌තවණ්‌ණනා
3. Devahitasuttavaṇṇanā
199. උදරවාතෙහීති වාතකතවිජ්‌ඣනතොදනාදිවසෙන අපරාපරං වත්‌තමානෙහි උදරවාතෙහි, තස්‌ස වා විකාරෙහි. නිබද්‌ධුපට්‌ඨාකකාලෙ පන ධම්‌මභණ්‌ඩාගාරිකොව. අරඤ්‌ඤන්‌ති භගවතො භික්‌ඛූනඤ්‌ච වසනට්‌ඨානභූතං තපොවනං. තං නිද්‌ධූමං හොති උදකතාපනස්‌සපි අකරණතො. තස්‌මාති යස්‌මා තස්‌ස උණ්‌හොදකවික්‌කිණනචරියාය ජීවිකාකප්‌පනං හොති, තස්‌මා.
199.Udaravātehīti vātakatavijjhanatodanādivasena aparāparaṃ vattamānehi udaravātehi, tassa vā vikārehi. Nibaddhupaṭṭhākakāle pana dhammabhaṇḍāgārikova. Araññanti bhagavato bhikkhūnañca vasanaṭṭhānabhūtaṃ tapovanaṃ. Taṃ niddhūmaṃ hoti udakatāpanassapi akaraṇato. Tasmāti yasmā tassa uṇhodakavikkiṇanacariyāya jīvikākappanaṃ hoti, tasmā.
වත්‌තමෙතං තස්‌ස පතිකාරත්‌ථං පරිකථාදීනම්‌පි කාතුං ලබ්‌භනතො. ඉදානි තත්‌ථ කාරණම්‌පි සවිසයං දස්‌සෙතුං ‘‘වණ්‌ණං හී’’තිආදි වුත්‌තං. භගවා හි ආයස්‌මතො උපවාණස්‌ස දෙවහිතබ්‍රාහ්‌මණස්‌ස තං සම්‌භාවිතං භවිස්‌සති තිකිච්‌ඡාපටියත්‌තං, තාය ච අත්‌තනො රොගස්‌ස වූපසමනං, තප්‌පසඞ්‌ගෙන ච දෙවහිතබ්‍රාහ්‌මණො මම සන්‌තිකං ආගන්‌ත්‌වා ධම්‌මස්‌සවනෙන සරණෙසු සීලෙසු ච පතිට්‌ඨහිස්‌සතීති සබ්‌බමිදං ඤත්‌වා එවං ‘‘ඉඞ්‌ඝ මෙ ත්‌වං, උපවාණ, උණ්‌හොදකං ජානාහී’’ති අවොච. ආගමනීයප්‌පටිපදං පුබ්‌බභාගප්‌පටිපදං පුබ්‌බභාගප්‌පටිපත්‌තිං කථෙතුං වට්‌ටති අනුත්‌තරිමනුස්‌සධම්‌මත්‌තා. සදෙවකෙන ලොකෙනාති අනවසෙසතො ලොකස්‌ස ගහණං. ඵලවිසෙසාකඞ්‌ඛාය පූජෙතබ්‌බාති පූජනීයා, තෙ එව ඉධ ‘‘පූජනෙය්‍යා’’ති වුත්‌තා. තථා ආදරෙන පූජෙතබ්‌බතාය සක්‌කාරියා, ආ-කාරස්‌ස රස්‌සත්‌තං, රි-සද්‌දස්‌ස ච රෙ-ආදෙසං කත්‌වා ‘‘සක්‌කරෙය්‍යා’’ති වුත්‌තං. ‘‘අපචයෙය්‍යා’’ති වත්‌තබ්‌බෙ ය-කාරලොපං කත්‌වා ‘‘අපචෙය්‍යා’’ති වුත්‌තං. තෙසන්‌ති සදෙවකෙන පූජනෙය්‍යාදීනං. හරිතුන්‌ති නෙතුං.
Vattametaṃ tassa patikāratthaṃ parikathādīnampi kātuṃ labbhanato. Idāni tattha kāraṇampi savisayaṃ dassetuṃ ‘‘vaṇṇaṃ hī’’tiādi vuttaṃ. Bhagavā hi āyasmato upavāṇassa devahitabrāhmaṇassa taṃ sambhāvitaṃ bhavissati tikicchāpaṭiyattaṃ, tāya ca attano rogassa vūpasamanaṃ, tappasaṅgena ca devahitabrāhmaṇo mama santikaṃ āgantvā dhammassavanena saraṇesu sīlesu ca patiṭṭhahissatīti sabbamidaṃ ñatvā evaṃ ‘‘iṅgha me tvaṃ, upavāṇa, uṇhodakaṃ jānāhī’’ti avoca. Āgamanīyappaṭipadaṃ pubbabhāgappaṭipadaṃ pubbabhāgappaṭipattiṃ kathetuṃ vaṭṭati anuttarimanussadhammattā. Sadevakena lokenāti anavasesato lokassa gahaṇaṃ. Phalavisesākaṅkhāya pūjetabbāti pūjanīyā, te eva idha ‘‘pūjaneyyā’’ti vuttā. Tathā ādarena pūjetabbatāya sakkāriyā, ā-kārassa rassattaṃ, ri-saddassa ca re-ādesaṃ katvā ‘‘sakkareyyā’’ti vuttaṃ. ‘‘Apacayeyyā’’ti vattabbe ya-kāralopaṃ katvā ‘‘apaceyyā’’ti vuttaṃ. Tesanti sadevakena pūjaneyyādīnaṃ. Haritunti netuṃ.
එත්‌තකෙනපීති උපසඞ්‌කමනාදිනා එත්‌තකෙන අප්‌පමත්‌තකෙනපි කතවත්‌තෙන අයං කිත්‌ති…පෙ.… සොමනස්‌සජාතො.
Ettakenapīti upasaṅkamanādinā ettakena appamattakenapi katavattena ayaṃ kitti…pe… somanassajāto.
යජමානස්‌සාති දෙය්‍යධම්‌මං දෙන්‌තස්‌ස. දක්‌ඛිණාය ඉජ්‌ඣනං නාම විපුලඵලභාවොති ආහ ‘‘මහප්‌ඵලො හොතී’’ති. විදිතන්‌ති පටිවිද්‌ධපච්‌චක්‌ඛකතං. ආජානාතීති වුත්‌ථභවාදිං පරියාදාය ජානාති පටිවිජ්‌ඣති. ජානිත්‌වාති චත්‌තාරි සච්‌චානි මග්‌ගපටිපාටියා පටිවිජ්‌ඣිත්‌වා. අග්‌ගප්‌පත්‌තතාය කතකිච්‌චතං පත්‌තො. බ්‍රාහ්‌මණෙන අත්‌තනා කතො කාරො ච භගවතො එව පච්‌චුපට්‌ඨාතීති තං දස්‌සෙන්‌තො ‘‘ඉමිනා ඛීණාසවෙ යජනාකාරෙන යජන්‌තස්‌සා’’ති වුත්‌තං.
Yajamānassāti deyyadhammaṃ dentassa. Dakkhiṇāya ijjhanaṃ nāma vipulaphalabhāvoti āha ‘‘mahapphalo hotī’’ti. Viditanti paṭividdhapaccakkhakataṃ. Ājānātīti vutthabhavādiṃ pariyādāya jānāti paṭivijjhati. Jānitvāti cattāri saccāni maggapaṭipāṭiyā paṭivijjhitvā. Aggappattatāya katakiccataṃ patto. Brāhmaṇena attanā kato kāro ca bhagavato eva paccupaṭṭhātīti taṃ dassento ‘‘iminā khīṇāsave yajanākārena yajantassā’’ti vuttaṃ.
දෙවහිතසුත්‌තවණ්‌ණනා නිට්‌ඨිතා.
Devahitasuttavaṇṇanā niṭṭhitā.
Related texts:
තිපිටක (මූල) • Tipiṭaka (Mūla) / සුත්‌තපිටක • Suttapiṭaka / සංයුත්‌තනිකාය • Saṃyuttanikāya / 3. දෙවහිතසුත්‌තං • 3. Devahitasuttaṃ
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 3. දෙවහිතසුත්‌තවණ්‌ණනා • 3. Devahitasuttavaṇṇanā
