| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. தே³வஸபா⁴க³ஸுத்தங்
6. Devasabhāgasuttaṃ
1032. ‘‘சதூஹி, பி⁴க்க²வே, த⁴ம்மேஹி ஸமன்னாக³தங் அத்தமனா தே³வா ஸபா⁴க³தங் கதெ²ந்தி. கதமேஹி சதூஹி? இத⁴, பி⁴க்க²வே, அரியஸாவகோ பு³த்³தே⁴ அவேச்சப்பஸாதே³ன ஸமன்னாக³தோ ஹோதி – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. யா தா தே³வதா பு³த்³தே⁴ அவேச்சப்பஸாதே³ன ஸமன்னாக³தா இதோ சுதா தத்ரூபபன்னா தாஸங் ஏவங் ஹோதி – ‘யதா²ரூபேன கோ² மயங் பு³த்³தே⁴ அவேச்சப்பஸாதே³ன ஸமன்னாக³தா ததோ சுதா இதூ⁴பபன்னா, அரியஸாவகோபி ததா²ரூபேன பு³த்³தே⁴ அவேச்சப்பஸாதே³ன ஸமன்னாக³தோ ஏஹீதி தே³வானங் ஸந்திகே’’’தி.
1032. ‘‘Catūhi, bhikkhave, dhammehi samannāgataṃ attamanā devā sabhāgataṃ kathenti. Katamehi catūhi? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Yā tā devatā buddhe aveccappasādena samannāgatā ito cutā tatrūpapannā tāsaṃ evaṃ hoti – ‘yathārūpena kho mayaṃ buddhe aveccappasādena samannāgatā tato cutā idhūpapannā, ariyasāvakopi tathārūpena buddhe aveccappasādena samannāgato ehīti devānaṃ santike’’’ti.
‘‘புன சபரங், பி⁴க்க²வே, அரியஸாவகோ த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தோ ஹோதி அக²ண்டே³ஹி…பே॰… ஸமாதி⁴ஸங்வத்தனிகேஹி. யா தா தே³வதா அரியகந்தேஹி ஸீலேஹி ஸமன்னாக³தா இதோ சுதா தத்ரூபபன்னா தாஸங் ஏவங் ஹோதி – ‘யதா²ரூபேஹி கோ² மயங் அரியகந்தேஹி ஸீலேஹி ஸமன்னாக³தா ததோ சுதா இதூ⁴பபன்னா, அரியஸாவகோபி ததா²ரூபேஹி அரியகந்தேஹி ஸீலேஹி ஸமன்னாக³தோ ஏஹீதி தே³வானங் ஸந்திகே’தி. இமேஹி கோ², பி⁴க்க²வே, சதூஹி த⁴ம்மேஹி ஸமன்னாக³தங் அத்தமனா தே³வா ஸபா⁴க³தங் கதெ²ந்தீ’’தி. ச²ட்ட²ங்.
‘‘Puna caparaṃ, bhikkhave, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Yā tā devatā ariyakantehi sīlehi samannāgatā ito cutā tatrūpapannā tāsaṃ evaṃ hoti – ‘yathārūpehi kho mayaṃ ariyakantehi sīlehi samannāgatā tato cutā idhūpapannā, ariyasāvakopi tathārūpehi ariyakantehi sīlehi samannāgato ehīti devānaṃ santike’ti. Imehi kho, bhikkhave, catūhi dhammehi samannāgataṃ attamanā devā sabhāgataṃ kathentī’’ti. Chaṭṭhaṃ.
