| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
6. දෙවසභාගසුත්‌තං
6. Devasabhāgasuttaṃ
1032. ‘‘චතූහි, භික්‌ඛවෙ, ධම්‌මෙහි සමන්‌නාගතං අත්‌තමනා දෙවා සභාගතං කථෙන්‌ති. කතමෙහි චතූහි? ඉධ, භික්‌ඛවෙ, අරියසාවකො බුද්‌ධෙ අවෙච්‌චප්‌පසාදෙන සමන්‌නාගතො හොති – ඉතිපි සො භගවා…පෙ.… සත්‌ථා දෙවමනුස්‌සානං බුද්‌ධො භගවාති. යා තා දෙවතා බුද්‌ධෙ අවෙච්‌චප්‌පසාදෙන සමන්‌නාගතා ඉතො චුතා තත්‍රූපපන්‌නා තාසං එවං හොති – ‘යථාරූපෙන ඛො මයං බුද්‌ධෙ අවෙච්‌චප්‌පසාදෙන සමන්‌නාගතා තතො චුතා ඉධූපපන්‌නා, අරියසාවකොපි තථාරූපෙන බුද්‌ධෙ අවෙච්‌චප්‌පසාදෙන සමන්‌නාගතො එහීති දෙවානං සන්‌තිකෙ’’’ති.
1032. ‘‘Catūhi, bhikkhave, dhammehi samannāgataṃ attamanā devā sabhāgataṃ kathenti. Katamehi catūhi? Idha, bhikkhave, ariyasāvako buddhe aveccappasādena samannāgato hoti – itipi so bhagavā…pe… satthā devamanussānaṃ buddho bhagavāti. Yā tā devatā buddhe aveccappasādena samannāgatā ito cutā tatrūpapannā tāsaṃ evaṃ hoti – ‘yathārūpena kho mayaṃ buddhe aveccappasādena samannāgatā tato cutā idhūpapannā, ariyasāvakopi tathārūpena buddhe aveccappasādena samannāgato ehīti devānaṃ santike’’’ti.
‘‘පුන චපරං, භික්‌ඛවෙ, අරියසාවකො ධම්‌මෙ…පෙ.… සඞ්‌ඝෙ…පෙ.… අරියකන්‌තෙහි සීලෙහි සමන්‌නාගතො හොති අඛණ්‌ඩෙහි…පෙ.… සමාධිසංවත්‌තනිකෙහි. යා තා දෙවතා අරියකන්‌තෙහි සීලෙහි සමන්‌නාගතා ඉතො චුතා තත්‍රූපපන්‌නා තාසං එවං හොති – ‘යථාරූපෙහි ඛො මයං අරියකන්‌තෙහි සීලෙහි සමන්‌නාගතා තතො චුතා ඉධූපපන්‌නා, අරියසාවකොපි තථාරූපෙහි අරියකන්‌තෙහි සීලෙහි සමන්‌නාගතො එහීති දෙවානං සන්‌තිකෙ’ති. ඉමෙහි ඛො, භික්‌ඛවෙ, චතූහි ධම්‌මෙහි සමන්‌නාගතං අත්‌තමනා දෙවා සභාගතං කථෙන්‌තී’’ති. ඡට්‌ඨං.
‘‘Puna caparaṃ, bhikkhave, ariyasāvako dhamme…pe… saṅghe…pe… ariyakantehi sīlehi samannāgato hoti akhaṇḍehi…pe… samādhisaṃvattanikehi. Yā tā devatā ariyakantehi sīlehi samannāgatā ito cutā tatrūpapannā tāsaṃ evaṃ hoti – ‘yathārūpehi kho mayaṃ ariyakantehi sīlehi samannāgatā tato cutā idhūpapannā, ariyasāvakopi tathārūpehi ariyakantehi sīlehi samannāgato ehīti devānaṃ santike’ti. Imehi kho, bhikkhave, catūhi dhammehi samannāgataṃ attamanā devā sabhāgataṃ kathentī’’ti. Chaṭṭhaṃ.
