| Library / Tipiṭaka / তিপিটক • Tipiṭaka / ইতিৰুত্তকপাল়ি • Itivuttakapāḷi |
৩. দেৰসদ্দসুত্তং
3. Devasaddasuttaṃ
৮২. ৰুত্তঞ্হেতং ভগৰতা, ৰুত্তমরহতাতি মে সুতং –
82. Vuttañhetaṃ bhagavatā, vuttamarahatāti me sutaṃ –
‘‘তযোমে, ভিক্খৰে, দেৰেসু দেৰসদ্দা নিচ্ছরন্তি সমযা সমযং উপাদায। কতমে তযো? যস্মিং, ভিক্খৰে, সমযে অরিযসাৰকো কেসমস্সুং ওহারেত্ৰা কাসাযানি ৰত্থানি অচ্ছাদেত্ৰা অগারস্মা অনগারিযং পব্বজ্জায চেতেতি, তস্মিং সমযে 1 দেৰেসু দেৰসদ্দো নিচ্ছরতি – ‘এসো অরিযসাৰকো মারেন সদ্ধিং সঙ্গামায চেতেতী’তি। অযং, ভিক্খৰে, পঠমো দেৰেসু দেৰসদ্দো নিচ্ছরতি সমযা সমযং উপাদায।
‘‘Tayome, bhikkhave, devesu devasaddā niccharanti samayā samayaṃ upādāya. Katame tayo? Yasmiṃ, bhikkhave, samaye ariyasāvako kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajjāya ceteti, tasmiṃ samaye 2 devesu devasaddo niccharati – ‘eso ariyasāvako mārena saddhiṃ saṅgāmāya cetetī’ti. Ayaṃ, bhikkhave, paṭhamo devesu devasaddo niccharati samayā samayaṃ upādāya.
‘‘পুন চপরং, ভিক্খৰে, যস্মিং সমযে অরিযসাৰকো সত্তন্নং বোধিপক্খিযানং ধম্মানং ভাৰনানুযোগমনুযুত্তো ৰিহরতি, তস্মিং সমযে দেৰেসু দেৰসদ্দো নিচ্ছরতি – ‘এসো অরিযসাৰকো মারেন সদ্ধিং সঙ্গামেতী’তি। অযং, ভিক্খৰে, দুতিযো দেৰেসু দেৰসদ্দো নিচ্ছরতি সমযা সমযং উপাদায।
‘‘Puna caparaṃ, bhikkhave, yasmiṃ samaye ariyasāvako sattannaṃ bodhipakkhiyānaṃ dhammānaṃ bhāvanānuyogamanuyutto viharati, tasmiṃ samaye devesu devasaddo niccharati – ‘eso ariyasāvako mārena saddhiṃ saṅgāmetī’ti. Ayaṃ, bhikkhave, dutiyo devesu devasaddo niccharati samayā samayaṃ upādāya.
‘‘পুন চপরং, ভিক্খৰে, যস্মিং সমযে অরিযসাৰকো আসৰানং খযা অনাসৰং চেতোৰিমুত্তিং পঞ্ঞাৰিমুত্তিং দিট্ঠেৰ ধম্মে সযং অভিঞ্ঞা সচ্ছিকত্ৰা উপসম্পজ্জ ৰিহরতি, তস্মিং সমযে দেৰেসু দেৰসদ্দো নিচ্ছরতি – ‘এসো অরিযসাৰকো ৰিজিতসঙ্গামো তমেৰ সঙ্গামসীসং অভিৰিজিয অজ্ঝাৰসতী’তি। অযং, ভিক্খৰে, ততিযো দেৰেসু দেৰসদ্দো নিচ্ছরতি সমযা সমযং উপাদায। ইমে খো, ভিক্খৰে, তযো দেৰেসু দেৰসদ্দা নিচ্ছরন্তি সমযা সমযং উপাদাযা’’তি। এতমত্থং ভগৰা অৰোচ। তত্থেতং ইতি ৰুচ্চতি –
‘‘Puna caparaṃ, bhikkhave, yasmiṃ samaye ariyasāvako āsavānaṃ khayā anāsavaṃ cetovimuttiṃ paññāvimuttiṃ diṭṭheva dhamme sayaṃ abhiññā sacchikatvā upasampajja viharati, tasmiṃ samaye devesu devasaddo niccharati – ‘eso ariyasāvako vijitasaṅgāmo tameva saṅgāmasīsaṃ abhivijiya ajjhāvasatī’ti. Ayaṃ, bhikkhave, tatiyo devesu devasaddo niccharati samayā samayaṃ upādāya. Ime kho, bhikkhave, tayo devesu devasaddā niccharanti samayā samayaṃ upādāyā’’ti. Etamatthaṃ bhagavā avoca. Tatthetaṃ iti vuccati –
‘‘দিস্ৰা ৰিজিতসঙ্গামং, সম্মাসম্বুদ্ধসাৰকং।
‘‘Disvā vijitasaṅgāmaṃ, sammāsambuddhasāvakaṃ;
দেৰতাপি নমস্সন্তি, মহন্তং ৰীতসারদং॥
Devatāpi namassanti, mahantaṃ vītasāradaṃ.
‘‘নমো তে পুরিসাজঞ্ঞ, যো ত্ৰং দুজ্জযমজ্ঝভূ।
‘‘Namo te purisājañña, yo tvaṃ dujjayamajjhabhū;
জেত্ৰান মচ্চুনো সেনং, ৰিমোক্খেন অনাৰরং॥
Jetvāna maccuno senaṃ, vimokkhena anāvaraṃ.
‘‘ইতি হেতং নমস্সন্তি, দেৰতা পত্তমানসং।
‘‘Iti hetaṃ namassanti, devatā pattamānasaṃ;
তঞ্হি তস্স ন পস্সন্তি, যেন মচ্চুৰসং ৰজে’’তি॥
Tañhi tassa na passanti, yena maccuvasaṃ vaje’’ti.
অযম্পি অত্থো ৰুত্তো ভগৰতা, ইতি মে সুতন্তি। ততিযং।
Ayampi attho vutto bhagavatā, iti me sutanti. Tatiyaṃ.
Footnotes:
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / খুদ্দকনিকায (অট্ঠকথা) • Khuddakanikāya (aṭṭhakathā) / ইতিৰুত্তক-অট্ঠকথা • Itivuttaka-aṭṭhakathā / ৩. দেৰসদ্দসুত্তৰণ্ণনা • 3. Devasaddasuttavaṇṇanā
