| Library / Tipiṭaka / திபிடக • Tipiṭaka / அங்கு³த்தரனிகாய (டீகா) • Aṅguttaranikāya (ṭīkā) |
8-9. தே³வாஸுரஸங்கா³மஸுத்தாதி³வண்ணனா
8-9. Devāsurasaṅgāmasuttādivaṇṇanā
39-40. அட்ட²மே அபி⁴யிங்ஸூதி கதா³ அபி⁴யிங்ஸு? யதா³ ப³லவந்தோ அஹேஸுங், ததா³. தத்ராயமனுபுப்³பி³கதா² (ஸங்॰ நி॰ அட்ட²॰ 1.1.247; ஸாரத்த²॰ டீ॰ 1.வேரஞ்ஜகண்ட³வண்ணனா) – ஸக்கோ கிர மக³த⁴ரட்டே² மசலகா³மகே மகோ⁴ நாம மாணவோ ஹுத்வா தெத்திங்ஸ புரிஸே க³ஹெத்வா கல்யாணகம்மங் கரொந்தோ ஸத்த வதபதா³னி பூரெத்வா தத்த² காலங்கதோ தே³வலோகே நிப்³ப³த்தி. தங் ப³லவகம்மானுபா⁴வேன ஸபரிஸங் ஸேஸதே³வதா த³ஸஹி டா²னேஹி அதி⁴க³ண்ஹந்தங் தி³ஸ்வா ‘‘ஆக³ந்துகதே³வபுத்தா ஆக³தா’’தி நேவாஸிகா க³ந்த⁴பானங் ஸஜ்ஜயிங்ஸு. ஸக்கோ ஸகபரிஸாய ஸஞ்ஞங் அதா³ஸி ‘‘மாரிஸா மா க³ந்த⁴பானங் பிவித்த², பிவனாகாரமத்தமேவ த³ஸ்ஸேதா²’’தி. தே ததா² அகங்ஸு. நேவாஸிகதே³வதா ஸுவண்ணஸரகேஹி உபனீதங் க³ந்த⁴பானங் யாவத³த்த²ங் பிவித்வா மத்தா தத்த² தத்த² ஸுவண்ணபத²வியங் பதித்வா ஸயிங்ஸு. ஸக்கோ ‘‘க³ண்ஹத² புத்தஹதாய புத்தே’’தி தே பாதே³ஸு க³ஹெத்வா ஸினேருபாதே³ கி²பாபேஸி. ஸக்கஸ்ஸ புஞ்ஞதேஜேன தத³னுவத்தகாபி ஸப்³பே³ தத்தே²வ பதிங்ஸு. தே ஸினேருவேமஜ்ஜ²காலே ஸஞ்ஞங் லபி⁴த்வா, ‘‘தாதா, ஸுரங் ந பிவிம்ஹ, ஸுரங் ந பிவிம்ஹா’’தி ஆஹங்ஸு. ததோ பட்டா²ய அஸுரா நாம ஜாதா. அத² நேஸங் கம்மபச்சயஉதுஸமுட்டா²னங் ஸினேருஸ்ஸ ஹெட்டி²மதலே த³ஸயோஜனஸஹஸ்ஸங் அஸுரப⁴வனங் நிப்³ப³த்தி. ஸக்கோ தேஸங் நிவத்தித்வா அனாக³மனத்தா²ய ஆரக்க²ங் ட²பேஸி. யங் ஸந்தா⁴ய வுத்தங் –
39-40. Aṭṭhame abhiyiṃsūti kadā abhiyiṃsu? Yadā balavanto ahesuṃ, tadā. Tatrāyamanupubbikathā (saṃ. ni. aṭṭha. 1.1.247; sārattha. ṭī. 1.verañjakaṇḍavaṇṇanā) – sakko kira magadharaṭṭhe macalagāmake magho nāma māṇavo hutvā tettiṃsa purise gahetvā kalyāṇakammaṃ karonto satta vatapadāni pūretvā tattha kālaṅkato devaloke nibbatti. Taṃ balavakammānubhāvena saparisaṃ sesadevatā dasahi ṭhānehi adhigaṇhantaṃ disvā ‘‘āgantukadevaputtā āgatā’’ti nevāsikā gandhapānaṃ sajjayiṃsu. Sakko sakaparisāya saññaṃ adāsi ‘‘mārisā mā gandhapānaṃ pivittha, pivanākāramattameva dassethā’’ti. Te tathā akaṃsu. Nevāsikadevatā suvaṇṇasarakehi upanītaṃ gandhapānaṃ yāvadatthaṃ pivitvā mattā tattha tattha suvaṇṇapathaviyaṃ patitvā sayiṃsu. Sakko ‘‘gaṇhatha puttahatāya putte’’ti te pādesu gahetvā sinerupāde khipāpesi. Sakkassa puññatejena tadanuvattakāpi sabbe tattheva patiṃsu. Te sineruvemajjhakāle saññaṃ labhitvā, ‘‘tātā, suraṃ na pivimha, suraṃ na pivimhā’’ti āhaṃsu. Tato paṭṭhāya asurā nāma jātā. Atha nesaṃ kammapaccayautusamuṭṭhānaṃ sinerussa heṭṭhimatale dasayojanasahassaṃ asurabhavanaṃ nibbatti. Sakko tesaṃ nivattitvā anāgamanatthāya ārakkhaṃ ṭhapesi. Yaṃ sandhāya vuttaṃ –
‘‘அந்தரா த்³வின்னங் அயுஜ்ஜ²புரானங்,
‘‘Antarā dvinnaṃ ayujjhapurānaṃ,
பஞ்சவிதா⁴ ட²பிதா அபி⁴ரக்கா²;
Pañcavidhā ṭhapitā abhirakkhā;
உரக³-கரோடி-பயஸ்ஸ ச ஹாரீ,
Uraga-karoṭi-payassa ca hārī,
மத³னயுதா சதுரோ ச மஹத்தா²’’தி. (ஸங்॰ நி॰ அட்ட²॰ 1.1.247; ஸாரத்த²॰ டீ॰ 1.1 வேரஞ்ஜகண்ட³வண்ணனா);
Madanayutā caturo ca mahatthā’’ti. (saṃ. ni. aṭṭha. 1.1.247; sārattha. ṭī. 1.1 verañjakaṇḍavaṇṇanā);
த்³வே நக³ரானி ஹி யுத்³தே⁴ன க³ஹேதுங் அஸக்குணெய்யதாய அயுஜ்ஜ²புரானி நாம ஜாதானி தே³வனக³ரஞ்ச அஸுரனக³ரஞ்ச. யதா³ ஹி அஸுரா ப³லவந்தோ ஹொந்தி, அத² தே³வேஹி பலாயித்வா தே³வனக³ரங் பவிஸித்வா த்³வாரே பித³ஹிதே அஸுரானங் ஸதஸஹஸ்ஸம்பி கிஞ்சி காதுங் ந ஸக்கோதி. யதா³ தே³வா ப³லவந்தோ ஹொந்தி, அதா²ஸுரேஹி பலாயித்வா அஸுரனக³ரஸ்ஸ த்³வாரே பித³ஹிதே ஸக்கானங் ஸதஸஹஸ்ஸம்பி கிஞ்சி காதுங் ந ஸக்கோதி. இதி இமானி த்³வே நக³ரானி அயுஜ்ஜ²புரானி நாம. தேஸங் அந்தரா ஏதேஸு உரகா³தீ³ஸு பஞ்சஸு டா²னேஸு ஸக்கேன ஆரக்கா² ட²பிதா. தத்த² உரக³ஸத்³தே³ன நாகா³ க³ஹிதா. தே ஹி உத³கே ப³லவந்தோ ஹொந்தி, தஸ்மா ஸினேருஸ்ஸ பட²மாலிந்தே³ ஏதேஸங் ஆரக்கா². கரோடிஸத்³தே³ன ஸுபண்ணா க³ஹிதா. தேஸங் கிர கரோடி நாம பானபோ⁴ஜனங், தேன தங் நாமங் லபி⁴ங்ஸு, து³தியாலிந்தே³ தேஸங் ஆரக்கா². பயஸ்ஸஹாரிஸத்³தே³ன கும்ப⁴ண்டா³ க³ஹிதா, தா³னவரக்க²ஸா கிர தே, ததியாலிந்தே³ தேஸங் ஆரக்கா². மத³னயுதஸத்³தே³ன யக்கா² க³ஹிதா. விஸமசாரினோ கிர தே யுஜ்ஜ²ஸொண்டா³, சதுத்தா²லிந்தே³ தேஸங் ஆரக்கா². சதுரோ ச மஹத்தாதி சத்தாரோ மஹாராஜானோ வுத்தா, பஞ்சமாலிந்தே³ தேஸங் ஆரக்கா², தஸ்மா யதி³ அஸுரா குபிதாவிலசித்தா தே³வபுரங் உபயந்தி யுஜ்ஜி²துங். யங் கி³ரினோ பட²மங் பரிப⁴ண்ட³ங், தங் உரகா³ படிபா³ஹயந்தி. ஏவங் ஸேஸேஸு ஸேஸா.
Dve nagarāni hi yuddhena gahetuṃ asakkuṇeyyatāya ayujjhapurāni nāma jātāni devanagarañca asuranagarañca. Yadā hi asurā balavanto honti, atha devehi palāyitvā devanagaraṃ pavisitvā dvāre pidahite asurānaṃ satasahassampi kiñci kātuṃ na sakkoti. Yadā devā balavanto honti, athāsurehi palāyitvā asuranagarassa dvāre pidahite sakkānaṃ satasahassampi kiñci kātuṃ na sakkoti. Iti imāni dve nagarāni ayujjhapurāni nāma. Tesaṃ antarā etesu uragādīsu pañcasu ṭhānesu sakkena ārakkhā ṭhapitā. Tattha uragasaddena nāgā gahitā. Te hi udake balavanto honti, tasmā sinerussa paṭhamālinde etesaṃ ārakkhā. Karoṭisaddena supaṇṇā gahitā. Tesaṃ kira karoṭi nāma pānabhojanaṃ, tena taṃ nāmaṃ labhiṃsu, dutiyālinde tesaṃ ārakkhā. Payassahārisaddena kumbhaṇḍā gahitā, dānavarakkhasā kira te, tatiyālinde tesaṃ ārakkhā. Madanayutasaddena yakkhā gahitā. Visamacārino kira te yujjhasoṇḍā, catutthālinde tesaṃ ārakkhā. Caturo ca mahattāti cattāro mahārājāno vuttā, pañcamālinde tesaṃ ārakkhā, tasmā yadi asurā kupitāvilacittā devapuraṃ upayanti yujjhituṃ. Yaṃ girino paṭhamaṃ paribhaṇḍaṃ, taṃ uragā paṭibāhayanti. Evaṃ sesesu sesā.
தே பன அஸுரா ஆயுவண்ணயஸஇஸ்ஸரியஸம்பத்தீஹி தாவதிங்ஸஸதி³ஸாவ, தஸ்மா அந்தரா அத்தானங் அஜானித்வா பாடலியா புப்பி²தாய ‘‘ந இத³ங் தே³வனக³ரங், தத்த² பாரிச்ச²த்தகோ புப்ப²தி, இத⁴ பன சித்தபாடலீ, ஜரஸக்கேனாம்ஹாகங் ஸுரங் பாயெத்வா வஞ்சிதா, தே³வனக³ரஞ்ச நோ க³ஹிதங், க³ச்சா²ம, தேன ஸத்³தி⁴ங் யுஜ்ஜி²ஸ்ஸாமா’’தி ஹத்தி²அஸ்ஸரதே² ஆருய்ஹ ஸுவண்ணரஜதமணிப²லகானி க³ஹெத்வா யுத்³த⁴ஸஜ்ஜா ஹுத்வா அஸுரபே⁴ரியோ வாதெ³ந்தா மஹாஸமுத்³தே³ உத³கங் த்³விதா⁴ பெ⁴த்வா உட்ட²ஹந்தி. தே தே³வே வுட்டே² வம்மிகமக்கி²கா வம்மிகங் விய ஸினேருங் ஆருஹிதுங் ஆரப⁴ந்தி. அத² நேஸங் பட²மங் நாகே³ஹி ஸத்³தி⁴ங் யுத்³த⁴ங் ஹோதி. தஸ்மிங் கோ² பன யுத்³தே⁴ ந கஸ்ஸசி ச²வி வா சம்மங் வா சி²ஜ்ஜதி, ந லோஹிதங் உப்பஜ்ஜதி, கேவலங் குமாரகானங் தா³ருமெண்ட³கயுத்³த⁴ங் விய அஞ்ஞமஞ்ஞஸந்தாஸனமத்தமேவ ஹோதி. கோடிஸதாபி கோடிஸஹஸ்ஸாபி நாகா³ தேஹி ஸத்³தி⁴ங் யுஜ்ஜி²த்வா தே அஸுரபுரங்யேவ பவேஸெத்வா நிவத்தந்தி. யதா³ பன அஸுரா ப³லவந்தோ ஹொந்தி, அத² நாகா³ ஓஸக்கித்வா து³தியே ஆலிந்தே³ ஸுபண்ணேஹி ஸத்³தி⁴ங் ஏகதோவ ஹுத்வா யுஜ்ஜ²ந்தி. ஏஸ நயோ ஸுபண்ணாதீ³ஸுபி. யதா³ பன தானி பஞ்சபி டா²னானி அஸுரா மத்³த³ந்தி, ததா³ ஏகதோ ஸம்பிண்டி³தானிபி தானி பஞ்ச ப³லானி ஓஸக்கந்தி. அத² சத்தாரோ மஹாராஜானோ க³ந்த்வா ஸக்கஸ்ஸ தங் பவத்திங் ஆரோசெந்தி. ஸக்கோ தேஸங் வசனங் ஸுத்வா தி³யட்³ட⁴யோஜனஸதிகங் வேஜயந்தரத²ங் ஆருய்ஹ ஸயங் வா நிக்க²மதி, ஏகங் புத்தங் வா பேஸேதி. யதா³ தே³வா புன அபச்சாக³மனாய அஸுரே ஜினிங்ஸு, ததா³ ஸக்கோ அஸுரே பலாபெத்வா பஞ்சஸு டா²னேஸு ஆரக்க²ங் த³த்வா வேதி³யபாதே³ வஜிரஹத்தா² இந்த³படிமாயோ ட²பேஸி. அஸுரா காலேன காலங் உட்ட²ஹித்வா படிமாயோ தி³ஸ்வா ‘‘ஸக்கோ அப்பமத்தோ திட்ட²தீ’’தி ததோவ நிவத்தந்தி. இத⁴ பன யதா³ அஸுரானங் ஜயோ அஹோஸி, தே³வானங் பராஜயோ, தங் ஸந்தா⁴யேதங் வுத்தங் – ‘‘பராஜிதா ச, பி⁴க்க²வே, தே³வா அபயிங்ஸுயேவ உத்தரேனாபி⁴முகா², அபி⁴யிங்ஸு அஸுரா’’தி.
Te pana asurā āyuvaṇṇayasaissariyasampattīhi tāvatiṃsasadisāva, tasmā antarā attānaṃ ajānitvā pāṭaliyā pupphitāya ‘‘na idaṃ devanagaraṃ, tattha pāricchattako pupphati, idha pana cittapāṭalī, jarasakkenāmhākaṃ suraṃ pāyetvā vañcitā, devanagarañca no gahitaṃ, gacchāma, tena saddhiṃ yujjhissāmā’’ti hatthiassarathe āruyha suvaṇṇarajatamaṇiphalakāni gahetvā yuddhasajjā hutvā asurabheriyo vādentā mahāsamudde udakaṃ dvidhā bhetvā uṭṭhahanti. Te deve vuṭṭhe vammikamakkhikā vammikaṃ viya sineruṃ āruhituṃ ārabhanti. Atha nesaṃ paṭhamaṃ nāgehi saddhiṃ yuddhaṃ hoti. Tasmiṃ kho pana yuddhe na kassaci chavi vā cammaṃ vā chijjati, na lohitaṃ uppajjati, kevalaṃ kumārakānaṃ dārumeṇḍakayuddhaṃ viya aññamaññasantāsanamattameva hoti. Koṭisatāpi koṭisahassāpi nāgā tehi saddhiṃ yujjhitvā te asurapuraṃyeva pavesetvā nivattanti. Yadā pana asurā balavanto honti, atha nāgā osakkitvā dutiye ālinde supaṇṇehi saddhiṃ ekatova hutvā yujjhanti. Esa nayo supaṇṇādīsupi. Yadā pana tāni pañcapi ṭhānāni asurā maddanti, tadā ekato sampiṇḍitānipi tāni pañca balāni osakkanti. Atha cattāro mahārājāno gantvā sakkassa taṃ pavattiṃ ārocenti. Sakko tesaṃ vacanaṃ sutvā diyaḍḍhayojanasatikaṃ vejayantarathaṃ āruyha sayaṃ vā nikkhamati, ekaṃ puttaṃ vā peseti. Yadā devā puna apaccāgamanāya asure jiniṃsu, tadā sakko asure palāpetvā pañcasu ṭhānesu ārakkhaṃ datvā vediyapāde vajirahatthā indapaṭimāyo ṭhapesi. Asurā kālena kālaṃ uṭṭhahitvā paṭimāyo disvā ‘‘sakko appamatto tiṭṭhatī’’ti tatova nivattanti. Idha pana yadā asurānaṃ jayo ahosi, devānaṃ parājayo, taṃ sandhāyetaṃ vuttaṃ – ‘‘parājitā ca, bhikkhave, devā apayiṃsuyeva uttarenābhimukhā, abhiyiṃsu asurā’’ti.
த³க்கி²ணாபி⁴முகா² ஹுத்வாதி சக்கவாளபப்³ப³தாபி⁴முகா² ஹுத்வா. அஸுரா கிர தே³வேஹி பராஜிதா பலாயந்தா சக்கவாளபப்³ப³தாபி⁴முக²ங் க³ந்த்வா சக்கவாளமஹாஸமுத்³த³பிட்டி²யங் ரஜதபட்டவண்ணே வாலிகாபுலினே யத்த² பண்ணகுடியோ மாபெத்வா இஸயோ வஸந்தி, தத்த² க³ந்த்வா இஸீனங் அஸ்ஸமபதே³ன க³ச்ச²ந்தா ‘‘ஸக்கோ இமேஹி ஸத்³தி⁴ங் மந்தெத்வா அம்ஹே நாஸேதி, க³ண்ஹத² புத்தஹதாய புத்தே’’தி குபிதா அஸ்ஸமபதே³ பானீயக⁴டசங்கமனபண்ணஸாலாதீ³னி வித்³த⁴ங்ஸெந்தி. இஸயோ அரஞ்ஞதோ ப²லாப²லங் ஆதா³ய ஆக³தா தி³ஸ்வா புன து³க்கே²ன படிபாகதிகங் கரொந்தி, தேபி புனப்புனங் ததே²வ பராஜிதா க³ந்த்வா வினாஸெந்தி. தேன வுத்தங் – ‘‘பராஜிதா ச கோ², பி⁴க்க²வே, அஸுரா அபயிங்ஸுயேவ த³க்கி²ணேனாபி⁴முகா²’’தி. நவமங் உத்தானத்த²மேவ.
Dakkhiṇābhimukhā hutvāti cakkavāḷapabbatābhimukhā hutvā. Asurā kira devehi parājitā palāyantā cakkavāḷapabbatābhimukhaṃ gantvā cakkavāḷamahāsamuddapiṭṭhiyaṃ rajatapaṭṭavaṇṇe vālikāpuline yattha paṇṇakuṭiyo māpetvā isayo vasanti, tattha gantvā isīnaṃ assamapadena gacchantā ‘‘sakko imehi saddhiṃ mantetvā amhe nāseti, gaṇhatha puttahatāya putte’’ti kupitā assamapade pānīyaghaṭacaṅkamanapaṇṇasālādīni viddhaṃsenti. Isayo araññato phalāphalaṃ ādāya āgatā disvā puna dukkhena paṭipākatikaṃ karonti, tepi punappunaṃ tatheva parājitā gantvā vināsenti. Tena vuttaṃ – ‘‘parājitā ca kho, bhikkhave, asurā apayiṃsuyeva dakkhiṇenābhimukhā’’ti. Navamaṃ uttānatthameva.
தே³வாஸுரஸங்கா³மஸுத்தாதி³வண்ணனா நிட்டி²தா.
Devāsurasaṅgāmasuttādivaṇṇanā niṭṭhitā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / அங்கு³த்தரனிகாய • Aṅguttaranikāya
8. தே³வாஸுரஸங்கா³மஸுத்தங் • 8. Devāsurasaṅgāmasuttaṃ
9. நாக³ஸுத்தங் • 9. Nāgasuttaṃ
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / அங்கு³த்தரனிகாய (அட்ட²கதா²) • Aṅguttaranikāya (aṭṭhakathā)
8. தே³வாஸுரஸங்கா³மஸுத்தவண்ணனா • 8. Devāsurasaṅgāmasuttavaṇṇanā
9. நாக³ஸுத்தவண்ணனா • 9. Nāgasuttavaṇṇanā
