| Library / Tipiṭaka / တိပိဋက • Tipiṭaka / အင္ဂုတ္တရနိကာယ (အဋ္ဌကထာ) • Aṅguttaranikāya (aṭṭhakathā) |
၈. ဒေဝာသုရသင္ဂာမသုတ္တဝဏ္ဏနာ
8. Devāsurasaṅgāmasuttavaṇṇanā
၃၉. အဋ္ဌမေ သမုပဗ္ယူဠ္ဟော အဟောသီတိ ပစ္စုပဋ္ဌိတော အဟောသိ။ သင္ဂာမေယ္ယာမာတိ သင္ဂာမံ ကရေယ္ယာမ ယုဇ္ဈေယ္ယာမ။ အပယိံသုယေဝာတိ ပလာယိံသုယေဝ။ ဥတ္တရေနာဘိမုခာတိ ဥတ္တရာမုခာ ဟုတ္ဝာ။ အဘိယန္တေ ဝာတိ အနုဗန္ဓန္တိယေဝ။ ဘီရုတ္တာနဂတေနာတိ ဘီရုတ္တာနံ ဘယနိဝာရဏံ ပတိဋ္ဌာနံ ဂတေန။ အကရဏီယာတိ ယုဒ္ဓေန ကိဉ္စိ အကတ္တဗ္ဗာ။ ကသ္မာ ပန နေသံ သင္ဂာမော ဟောတီတိ? အသုရာ ဟိ ပုဗ္ဗေ တာဝတိံသဝာသိနော, တေ စိတ္တပာဋလိယာ ပုပ္ဖနကာလေ ဒိဗ္ဗပာရိစ္ဆတ္တကပုပ္ဖံ အနုသ္သရန္တိ။ တတော ဥပ္ပန္နကောဓာ ‘‘ဂဏ္ဟထ ဒေဝေ’’တိ သမ္မုခသမ္မုခဋ္ဌာနေနေဝ သိနေရုံ အဘိရုဟန္တိ, ဒေဝာပိ နိက္ခမန္တိ။ တေသံ ဂောပာလကဒာရကာနံ အညမညံ ဒဏ္ဍကေဟိ ပဟရဏသဒိသံ ယုဒ္ဓံ ဟောတိ။ သက္ကော ဒေဝရာဇာ ဟေဋ္ဌာ ပဉ္စသု ဌာနေသု အာရက္ခံ ဌပေတ္ဝာ ဥပရိ ဒေဝပုရံ ပရိဝာရေတ္ဝာ အတ္တသဒိသာ ဝဇိရဟတ္ထာ ပဋိမာ ဌပာပေသိ။ အသုရာ ဟေဋ္ဌာ ပဉ္စ ဌာနာနိ ပဋိဗာဟိတ္ဝာ အဘိရုဠ္ဟာ ဣန္ဒပဋိမာယော ဒိသ္ဝာ နိဝတ္တိတ္ဝာ အသုရပုရမေဝ ဂစ္ဆန္တိ။
39. Aṭṭhame samupabyūḷho ahosīti paccupaṭṭhito ahosi. Saṅgāmeyyāmāti saṅgāmaṃ kareyyāma yujjheyyāma. Apayiṃsuyevāti palāyiṃsuyeva. Uttarenābhimukhāti uttarāmukhā hutvā. Abhiyante vāti anubandhantiyeva. Bhīruttānagatenāti bhīruttānaṃ bhayanivāraṇaṃ patiṭṭhānaṃ gatena. Akaraṇīyāti yuddhena kiñci akattabbā. Kasmā pana nesaṃ saṅgāmo hotīti? Asurā hi pubbe tāvatiṃsavāsino, te cittapāṭaliyā pupphanakāle dibbapāricchattakapupphaṃ anussaranti. Tato uppannakodhā ‘‘gaṇhatha deve’’ti sammukhasammukhaṭṭhāneneva sineruṃ abhiruhanti, devāpi nikkhamanti. Tesaṃ gopālakadārakānaṃ aññamaññaṃ daṇḍakehi paharaṇasadisaṃ yuddhaṃ hoti. Sakko devarājā heṭṭhā pañcasu ṭhānesu ārakkhaṃ ṭhapetvā upari devapuraṃ parivāretvā attasadisā vajirahatthā paṭimā ṭhapāpesi. Asurā heṭṭhā pañca ṭhānāni paṭibāhitvā abhiruḷhā indapaṭimāyo disvā nivattitvā asurapurameva gacchanti.
ဒက္ခိဏေနာဘိမုခာတိ ဒက္ခိဏာမုခာ ဟုတ္ဝာ။ အပဒံ ဝဓိတ္ဝာတိ နိပ္ပဒံ နိရဝသေသံ ဝဓိတ္ဝာ။ အဒသ္သနံ ဂတောတိ မာရောပိ ဝဋ္ဋပာဒကံ ကတ္ဝာ ရူပာဝစရစတုတ္ထဇ္ဈာနံ သမာပန္နသ္သ စိတ္တံ ဇာနာတိ, တဒေဝ ဝိပသ္သနာပာဒကံ ကတ္ဝာ သမာပန္နသ္သ စိတ္တံ ဇာနာတိ။ အရူပာဝစရသမာပတ္တိ ပန ဝဋ္ဋပာဒာ ဝာ ဟောတု ဝိပသ္သနာပာဒာ ဝာ, တံ သမာပန္နသ္သ မာရော စိတ္တံ န ဇာနာတိ။ တေန ဝုတ္တံ – ‘‘အဒသ္သနံ ဂတော ပာပိမတော’’တိ။
Dakkhiṇenābhimukhāti dakkhiṇāmukhā hutvā. Apadaṃ vadhitvāti nippadaṃ niravasesaṃ vadhitvā. Adassanaṃ gatoti māropi vaṭṭapādakaṃ katvā rūpāvacaracatutthajjhānaṃ samāpannassa cittaṃ jānāti, tadeva vipassanāpādakaṃ katvā samāpannassa cittaṃ jānāti. Arūpāvacarasamāpatti pana vaṭṭapādā vā hotu vipassanāpādā vā, taṃ samāpannassa māro cittaṃ na jānāti. Tena vuttaṃ – ‘‘adassanaṃ gato pāpimato’’ti.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / အင္ဂုတ္တရနိကာယ • Aṅguttaranikāya / ၈. ဒေဝာသုရသင္ဂာမသုတ္တံ • 8. Devāsurasaṅgāmasuttaṃ
ဋီကာ • Tīkā / သုတ္တပိဋက (ဋီကာ) • Suttapiṭaka (ṭīkā) / အင္ဂုတ္တရနိကာယ (ဋီကာ) • Aṅguttaranikāya (ṭīkā) / ၈-၉. ဒေဝာသုရသင္ဂာမသုတ္တာဒိဝဏ္ဏနာ • 8-9. Devāsurasaṅgāmasuttādivaṇṇanā
