| Library / Tipiṭaka / තිපිටක • Tipiṭaka / අඞ්‌ගුත්‌තරනිකාය • Aṅguttaranikāya |
5. දෙවතාසුත්‌තං
5. Devatāsuttaṃ
69. අථ ඛො අඤ්‌ඤතරා දෙවතා අභික්‌කන්‌තාය රත්‌තියා අභික්‌කන්‌තවණ්‌ණා කෙවලකප්‌පං ජෙතවනං ඔභාසෙත්‌වා යෙන භගවා තෙනුපසඞ්‌කමි; උපසඞ්‌කමිත්‌වා භගවන්‌තං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතා ඛො සා දෙවතා භගවන්‌තං එතදවොච – ‘‘ඡයිමෙ, භන්‌තෙ, ධම්‌මා භික්‌ඛුනො අපරිහානාය සංවත්‌තන්‌ති. කතමෙ ඡ? සත්‌ථුගාරවතා, ධම්‌මගාරවතා, සඞ්‌ඝගාරවතා, සික්‌ඛාගාරවතා, සොවචස්‌සතා, කල්‍යාණමිත්‌තතා – ඉමෙ ඛො, භන්‌තෙ, ඡ ධම්‌මා භික්‌ඛුනො අපරිහානාය සංවත්‌තන්‌තී’’ති. ඉදමවොච සා දෙවතා. සමනුඤ්‌ඤො සත්‌ථා අහොසි. අථ ඛො සා දෙවතා ‘‘සමනුඤ්‌ඤො මෙ සත්‌ථා’’ති භගවන්‌තං අභිවාදෙත්‌වා පදක්‌ඛිණං කත්‌වා තත්‌ථෙවන්‌තරධායි.
69. Atha kho aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ aṭṭhāsi. Ekamantaṃ ṭhitā kho sā devatā bhagavantaṃ etadavoca – ‘‘chayime, bhante, dhammā bhikkhuno aparihānāya saṃvattanti. Katame cha? Satthugāravatā, dhammagāravatā, saṅghagāravatā, sikkhāgāravatā, sovacassatā, kalyāṇamittatā – ime kho, bhante, cha dhammā bhikkhuno aparihānāya saṃvattantī’’ti. Idamavoca sā devatā. Samanuñño satthā ahosi. Atha kho sā devatā ‘‘samanuñño me satthā’’ti bhagavantaṃ abhivādetvā padakkhiṇaṃ katvā tatthevantaradhāyi.
අථ ඛො භගවා තස්‌සා රත්‌තියා අච්‌චයෙන භික්‌ඛූ ආමන්‌තෙසි – ‘‘ඉමං , භික්‌ඛවෙ, රත්‌තිං අඤ්‌ඤතරා දෙවතා අභික්‌කන්‌තාය රත්‌තියා අභික්‌කන්‌තවණ්‌ණා කෙවලකප්‌පං ජෙතවනං ඔභාසෙත්‌වා යෙනාහං තෙනුපසඞ්‌කමි; උපසඞ්‌කමිත්‌වා මං අභිවාදෙත්‌වා එකමන්‌තං අට්‌ඨාසි. එකමන්‌තං ඨිතා ඛො, භික්‌ඛවෙ, සා දෙවතා මං එතදවොච – ‘ඡයිමෙ, භන්‌තෙ, ධම්‌මා භික්‌ඛුනො අපරිහානාය සංවත්‌තන්‌ති. කතමෙ ඡ? සත්‌ථුගාරවතා, ධම්‌මගාරවතා, සඞ්‌ඝගාරවතා, සික්‌ඛාගාරවතා, සොවචස්‌සතා, කල්‍යාණමිත්‌තතා – ඉමෙ ඛො, භන්‌තෙ, ඡ ධම්‌මා භික්‌ඛුනො අපරිහානාය සංවත්‌තන්‌තී’ති. ඉදමවොච, භික්‌ඛවෙ, සා දෙවතා. ඉදං වත්‌වා මං අභිවාදෙත්‌වා පදක්‌ඛිණං කත්‌වා තත්‌ථෙවන්‌තරධායී’’ති.
Atha kho bhagavā tassā rattiyā accayena bhikkhū āmantesi – ‘‘imaṃ , bhikkhave, rattiṃ aññatarā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkami; upasaṅkamitvā maṃ abhivādetvā ekamantaṃ aṭṭhāsi. Ekamantaṃ ṭhitā kho, bhikkhave, sā devatā maṃ etadavoca – ‘chayime, bhante, dhammā bhikkhuno aparihānāya saṃvattanti. Katame cha? Satthugāravatā, dhammagāravatā, saṅghagāravatā, sikkhāgāravatā, sovacassatā, kalyāṇamittatā – ime kho, bhante, cha dhammā bhikkhuno aparihānāya saṃvattantī’ti. Idamavoca, bhikkhave, sā devatā. Idaṃ vatvā maṃ abhivādetvā padakkhiṇaṃ katvā tatthevantaradhāyī’’ti.
එවං වුත්‌තෙ ආයස්‌මා සාරිපුත්‌තො භගවන්‌තං අභිවාදෙත්‌වා එතදවොච – ‘‘ඉමස්‌ස ඛො අහං, භන්‌තෙ, භගවතා සංඛිත්‌තෙන භාසිතස්‌ස එවං විත්‌ථාරෙන අත්‌ථං ආජානාමි. ඉධ, භන්‌තෙ, භික්‌ඛු අත්‌තනා ච සත්‌ථුගාරවො හොති සත්‌ථුගාරවතාය ච වණ්‌ණවාදී. යෙ චඤ්‌ඤෙ භික්‌ඛූ න සත්‌ථුගාරවා තෙ ච සත්‌ථුගාරවතාය සමාදපෙති. යෙ චඤ්‌ඤෙ භික්‌ඛූ සත්‌ථුගාරවා තෙසඤ්‌ච වණ්‌ණං භණති භූතං තච්‌ඡං කාලෙන. අත්‌තනා ච ධම්‌මගාරවො හොති…පෙ.… සඞ්‌ඝගාරවො හොති… සික්‌ඛාගාරවො හොති … සුවචො හොති… කල්‍යාණමිත්‌තො හොති කල්‍යාණමිත්‌තතාය ච වණ්‌ණවාදී. යෙ චඤ්‌ඤෙ භික්‌ඛූ න කල්‍යාණමිත්‌තා තෙ ච කල්‍යාණමිත්‌තතාය සමාදපෙති. යෙ චඤ්‌ඤෙ භික්‌ඛූ කල්‍යාණමිත්‌තා තෙසඤ්‌ච වණ්‌ණං භණති භූතං තච්‌ඡං කාලෙන . ඉමස්‌ස ඛො අහං, භන්‌තෙ, භගවතා සංඛිත්‌තෙන භාසිතස්‌ස එවං විත්‌ථාරෙන අත්‌ථං ආජානාමී’’ති.
Evaṃ vutte āyasmā sāriputto bhagavantaṃ abhivādetvā etadavoca – ‘‘imassa kho ahaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmi. Idha, bhante, bhikkhu attanā ca satthugāravo hoti satthugāravatāya ca vaṇṇavādī. Ye caññe bhikkhū na satthugāravā te ca satthugāravatāya samādapeti. Ye caññe bhikkhū satthugāravā tesañca vaṇṇaṃ bhaṇati bhūtaṃ tacchaṃ kālena. Attanā ca dhammagāravo hoti…pe… saṅghagāravo hoti… sikkhāgāravo hoti … suvaco hoti… kalyāṇamitto hoti kalyāṇamittatāya ca vaṇṇavādī. Ye caññe bhikkhū na kalyāṇamittā te ca kalyāṇamittatāya samādapeti. Ye caññe bhikkhū kalyāṇamittā tesañca vaṇṇaṃ bhaṇati bhūtaṃ tacchaṃ kālena . Imassa kho ahaṃ, bhante, bhagavatā saṃkhittena bhāsitassa evaṃ vitthārena atthaṃ ājānāmī’’ti.
‘‘සාධු සාධු, සාරිපුත්‌ත! සාධු ඛො ත්‌වං, සාරිපුත්‌ත, ඉමස්‌ස මයා සංඛිත්‌තෙන භාසිතස්‌ස එවං විත්‌ථාරෙන අත්‌ථං ආජානාසි. ඉධ, සාරිපුත්‌ත, භික්‌ඛු අත්‌තනා ච සත්‌ථුගාරවො හොති සත්‌ථුගාරවතාය ච වණ්‌ණවාදී. යෙ චඤ්‌ඤෙ භික්‌ඛූ න සත්‌ථුගාරවා තෙ ච සත්‌ථුගාරවතාය සමාදපෙති. යෙ චඤ්‌ඤෙ භික්‌ඛූ සත්‌ථුගාරවා තෙසඤ්‌ච වණ්‌ණං භණති භූතං තච්‌ඡං කාලෙන. අත්‌තනා ච ධම්‌මගාරවො හොති…පෙ.… සඞ්‌ඝගාරවො හොති… සික්‌ඛාගාරවො හොති… සුවචො හොති… කල්‍යාණමිත්‌තො හොති කල්‍යාණමිත්‌තතාය ච වණ්‌ණවාදී. යෙ චඤ්‌ඤෙ භික්‌ඛූ න කල්‍යාණමිත්‌තා තෙ ච කල්‍යාණමිත්‌තතාය සමාදපෙති. යෙ චඤ්‌ඤෙ භික්‌ඛූ කල්‍යාණමිත්‌තා තෙසඤ්‌ච වණ්‌ණං භණති භූතං තච්‌ඡං කාලෙන. ඉමස්‌ස ඛො, සාරිපුත්‌ත, මයා සංඛිත්‌තෙන භාසිතස්‌ස එවං විත්‌ථාරෙන අත්‌ථො දට්‌ඨබ්‌බො’’ති. පඤ්‌චමං.
‘‘Sādhu sādhu, sāriputta! Sādhu kho tvaṃ, sāriputta, imassa mayā saṃkhittena bhāsitassa evaṃ vitthārena atthaṃ ājānāsi. Idha, sāriputta, bhikkhu attanā ca satthugāravo hoti satthugāravatāya ca vaṇṇavādī. Ye caññe bhikkhū na satthugāravā te ca satthugāravatāya samādapeti. Ye caññe bhikkhū satthugāravā tesañca vaṇṇaṃ bhaṇati bhūtaṃ tacchaṃ kālena. Attanā ca dhammagāravo hoti…pe… saṅghagāravo hoti… sikkhāgāravo hoti… suvaco hoti… kalyāṇamitto hoti kalyāṇamittatāya ca vaṇṇavādī. Ye caññe bhikkhū na kalyāṇamittā te ca kalyāṇamittatāya samādapeti. Ye caññe bhikkhū kalyāṇamittā tesañca vaṇṇaṃ bhaṇati bhūtaṃ tacchaṃ kālena. Imassa kho, sāriputta, mayā saṃkhittena bhāsitassa evaṃ vitthārena attho daṭṭhabbo’’ti. Pañcamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / අඞ්‌ගුත්‌තරනිකාය (අට්‌ඨකථා) • Aṅguttaranikāya (aṭṭhakathā) / 5. දෙවතාසුත්‌තවණ්‌ණනා • 5. Devatāsuttavaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / අඞ්‌ගුත්‌තරනිකාය (ටීකා) • Aṅguttaranikāya (ṭīkā) / 4-5. සඞ්‌ගණිකාරාමසුත්‌තාදිවණ්‌ණනා • 4-5. Saṅgaṇikārāmasuttādivaṇṇanā
