| Library / Tipiṭaka / ཏིཔིཊཀ • Tipiṭaka / ཨངྒུཏྟརནིཀཱཡ • Aṅguttaranikāya |
༩. དེཝཏཱསུཏྟཾ
9. Devatāsuttaṃ
༡༩. ‘‘ཨིམཉྩ, བྷིཀྑཝེ, རཏྟིཾ སམྦཧུལཱ དེཝཏཱ ཨབྷིཀྐནྟཱཡ རཏྟིཡཱ ཨབྷིཀྐནྟཝཎྞཱ ཀེཝལཀཔྤཾ ཛེཏཝནཾ ཨོབྷཱསེཏྭཱ ཡེནཱཧཾ ཏེནུཔསངྐམིཾསུ; ཨུཔསངྐམིཏྭཱ མཾ ཨབྷིཝཱདེཏྭཱ ཨེཀམནྟཾ ཨཊྛཾསུ། ཨེཀམནྟཾ ཋིཏཱ ཁོ, བྷིཀྑཝེ, ཏཱ དེཝཏཱ མཾ ཨེཏདཝོཙུཾ – ‘ཨུཔསངྐམིཾསུ ནོ, བྷནྟེ, པུབྦེ མནུསྶབྷཱུཏཱནཾ པབྦཛིཏཱ ཨགཱརཱནི། ཏེ མཡཾ, བྷནྟེ, པཙྩུཊྛིམྷ, ནོ ཙ ཁོ ཨབྷིཝཱདིམྷ། ཏཱ མཡཾ, བྷནྟེ, ཨཔརིཔུཎྞཀམྨནྟཱ ཝིཔྤཊིསཱརིནིཡོ པཙྩཱནུཏཱཔིནིཡོ ཧཱིནཾ ཀཱཡཾ ཨུཔཔནྣཱ’’’ཏི།
19. ‘‘Imañca, bhikkhave, rattiṃ sambahulā devatā abhikkantāya rattiyā abhikkantavaṇṇā kevalakappaṃ jetavanaṃ obhāsetvā yenāhaṃ tenupasaṅkamiṃsu; upasaṅkamitvā maṃ abhivādetvā ekamantaṃ aṭṭhaṃsu. Ekamantaṃ ṭhitā kho, bhikkhave, tā devatā maṃ etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha, no ca kho abhivādimha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘ཨཔརཱཔི མཾ, བྷིཀྑཝེ, སམྦཧུལཱ དེཝཏཱ ཨུཔསངྐམིཏྭཱ ཨེཏདཝོཙུཾ – ‘ཨུཔསངྐམིཾསུ ནོ, བྷནྟེ, པུབྦེ མནུསྶབྷཱུཏཱནཾ པབྦཛིཏཱ ཨགཱརཱནི། ཏེ མཡཾ, བྷནྟེ, པཙྩུཊྛིམྷ ཨབྷིཝཱདིམྷ 1, ནོ ཙ ཏེསཾ ཨཱསནཾ ཨདམྷ། ཏཱ མཡཾ, བྷནྟེ, ཨཔརིཔུཎྞཀམྨནྟཱ ཝིཔྤཊིསཱརིནིཡོ པཙྩཱནུཏཱཔིནིཡོ ཧཱིནཾ ཀཱཡཾ ཨུཔཔནྣཱ’’’ཏི།
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 2, no ca tesaṃ āsanaṃ adamha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘ཨཔརཱཔི མཾ, བྷིཀྑཝེ, སམྦཧུལཱ དེཝཏཱ ཨུཔསངྐམིཏྭཱ ཨེཏདཝོཙུཾ – ‘ཨུཔསངྐམིཾསུ ནོ, བྷནྟེ, པུབྦེ མནུསྶབྷཱུཏཱནཾ པབྦཛིཏཱ ཨགཱརཱནི། ཏེ མཡཾ, བྷནྟེ, པཙྩུཊྛིམྷ ཨབྷིཝཱདིམྷ 3 ཨཱསནཾ 4 ཨདམྷ, ནོ ཙ ཁོ ཡཐཱསཏྟི ཡཐཱབལཾ སཾཝིབྷཛིམྷ…པེ॰… ཡཐཱསཏྟི ཡཐཱབལཾ 5 སཾཝིབྷཛིམྷ, ནོ ཙ ཁོ ཨུཔནིསཱིདིམྷ དྷམྨསྶཝནཱཡ…པེ॰… ཨུཔནིསཱིདིམྷ 6 དྷམྨསྶཝནཱཡ, ནོ ཙ ཁོ ཨོཧིཏསོཏཱ དྷམྨཾ སུཎིམྷ…པེ॰… ཨོཧིཏསོཏཱ ཙ དྷམྨཾ སུཎིམྷ, ནོ ཙ ཁོ སུཏྭཱ དྷམྨཾ དྷཱརཡིམྷ…པེ॰… སུཏྭཱ ཙ དྷམྨཾ དྷཱརཡིམྷ, ནོ ཙ ཁོ དྷཱཏཱནཾ དྷམྨཱནཾ ཨཏྠཾ ཨུཔཔརིཀྑིམྷ…པེ॰… དྷཱཏཱནཉྩ དྷམྨཱནཾ ཨཏྠཾ ཨུཔཔརིཀྑིམྷ, ནོ ཙ ཁོ ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཾ པཊིཔཛྫིམྷ། ཏཱ མཡཾ, བྷནྟེ, ཨཔརིཔུཎྞཀམྨནྟཱ ཝིཔྤཊིསཱརིནིཡོ པཙྩཱནུཏཱཔིནིཡོ ཧཱིནཾ ཀཱཡཾ ཨུཔཔནྣཱ’’’ཏི།
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 7 āsanaṃ 8 adamha, no ca kho yathāsatti yathābalaṃ saṃvibhajimha…pe… yathāsatti yathābalaṃ 9 saṃvibhajimha, no ca kho upanisīdimha dhammassavanāya…pe… upanisīdimha 10 dhammassavanāya, no ca kho ohitasotā dhammaṃ suṇimha…pe… ohitasotā ca dhammaṃ suṇimha, no ca kho sutvā dhammaṃ dhārayimha…pe… sutvā ca dhammaṃ dhārayimha, no ca kho dhātānaṃ dhammānaṃ atthaṃ upaparikkhimha…pe… dhātānañca dhammānaṃ atthaṃ upaparikkhimha, no ca kho atthamaññāya dhammamaññāya dhammānudhammaṃ paṭipajjimha. Tā mayaṃ, bhante, aparipuṇṇakammantā vippaṭisāriniyo paccānutāpiniyo hīnaṃ kāyaṃ upapannā’’’ti.
‘‘ཨཔརཱཔི མཾ, བྷིཀྑཝེ, སམྦཧུལཱ དེཝཏཱ ཨུཔསངྐམིཏྭཱ ཨེཏདཝོཙུཾ – ‘ཨུཔསངྐམིཾསུ ནོ, བྷནྟེ, པུབྦེ མནུསྶབྷཱུཏཱནཾ པབྦཛིཏཱ ཨགཱརཱནི། ཏེ མཡཾ, བྷནྟེ, པཙྩུཊྛིམྷ ཨབྷིཝཱདིམྷ 11, ཨཱསནཾ 12 ཨདམྷ, ཡཐཱསཏྟི ཡཐཱབལཾ 13 སཾཝིབྷཛིམྷ, ཨུཔནིསཱིདིམྷ 14 དྷམྨསྶཝནཱཡ, ཨོཧིཏསོཏཱ ཙ དྷམྨཾ སུཎིམྷ, སུཏྭཱ ཙ དྷམྨཾ དྷཱརཡིམྷ, དྷཱཏཱནཉྩ དྷམྨཱནཾ ཨཏྠཾ ཨུཔཔརིཀྑིམྷ, ཨཏྠམཉྙཱཡ དྷམྨམཉྙཱཡ དྷམྨཱནུདྷམྨཾ 15 པཊིཔཛྫིམྷ། ཏཱ མཡཾ, བྷནྟེ, པརིཔུཎྞཀམྨནྟཱ ཨཝིཔྤཊིསཱརིནིཡོ ཨཔཙྩཱནུཏཱཔིནིཡོ པཎཱིཏཾ ཀཱཡཾ ཨུཔཔནྣཱ’ཏི། ཨེཏཱནི, བྷིཀྑཝེ, རུཀྑམཱུལཱནི ཨེཏཱནི སུཉྙཱགཱརཱནི། ཛྷཱཡཐ, བྷིཀྑཝེ, མཱ པམཱདཏྠ, མཱ པཙྪཱ ཝིཔྤཊིསཱརིནོ ཨཧུཝཏྠ སེཡྻཐཱཔི ཏཱ པུརིམིཀཱ དེཝཏཱ’’ཏི། ནཝམཾ།
‘‘Aparāpi maṃ, bhikkhave, sambahulā devatā upasaṅkamitvā etadavocuṃ – ‘upasaṅkamiṃsu no, bhante, pubbe manussabhūtānaṃ pabbajitā agārāni. Te mayaṃ, bhante, paccuṭṭhimha abhivādimha 16, āsanaṃ 17 adamha, yathāsatti yathābalaṃ 18 saṃvibhajimha, upanisīdimha 19 dhammassavanāya, ohitasotā ca dhammaṃ suṇimha, sutvā ca dhammaṃ dhārayimha, dhātānañca dhammānaṃ atthaṃ upaparikkhimha, atthamaññāya dhammamaññāya dhammānudhammaṃ 20 paṭipajjimha. Tā mayaṃ, bhante, paripuṇṇakammantā avippaṭisāriniyo apaccānutāpiniyo paṇītaṃ kāyaṃ upapannā’ti. Etāni, bhikkhave, rukkhamūlāni etāni suññāgārāni. Jhāyatha, bhikkhave, mā pamādattha, mā pacchā vippaṭisārino ahuvattha seyyathāpi tā purimikā devatā’’ti. Navamaṃ.
Footnotes:
Related texts:
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / ཨངྒུཏྟརནིཀཱཡ (ཨཊྛཀཐཱ) • Aṅguttaranikāya (aṭṭhakathā) / ༩. དེཝཏཱསུཏྟཝཎྞནཱ • 9. Devatāsuttavaṇṇanā
ཊཱིཀཱ • Tīkā / སུཏྟཔིཊཀ (ཊཱིཀཱ) • Suttapiṭaka (ṭīkā) / ཨངྒུཏྟརནིཀཱཡ (ཊཱིཀཱ) • Aṅguttaranikāya (ṭīkā) / ༥-༩. གཎྜསུཏྟཱདིཝཎྞནཱ • 5-9. Gaṇḍasuttādivaṇṇanā
