Devī Upanishad

॥ devī upaniṣat ॥

॥ atha devyupaniṣat ॥
atharvavedīya śāktopaniṣat ॥

śrīdevyupaniṣadvidyāvedyāpārasukhākṛti ।
traipadaṃ brahmacaitanyaṃ rāmacandrapadaṃ bhaje ॥

oṃ bhadraṃ karṇebhiḥ śṛṇuyāma devāḥ
bhadraṃ paśyemākṣabhiryajatrāḥ ।
sthirairaṅgaistuṣṭuvām̐sastanūbhi-
vyaśema devahitaṃ yadāyuḥ ॥

svasti na indro vṛddhaśravāḥ
svasti naḥ pūṣā viśvavedāḥ ।
svasti nastārkṣyo ariṣṭanemiḥ
svasti no bṛhaspatirdadhhātu ॥

oṃ śāntiḥ śāntiḥ śāntiḥ ॥

hariḥ oṃ ॥

sarve vai devā devīmupatasthuḥ । kāsi tvaṃ mahādevi ।
sābravīdahaṃ brahmasvarūpiṇī । mattaḥ prakṛtipuruṣātmakaṃ
jagacchūnyaṃ cāśūnyaṃ ca ।
ahamānandānānandāḥ vijñānāvijñāne aham । brahmā brahmaṇi
veditavye । ityāhātharvaṇi śrutiḥ ॥ 1॥

ahaṃ pañcabhūtānyapañcabhūtāni । ahamakhilaṃ jagat ।
vedo'hamavedo'ham । vidyāhamavidyāham । ajāhamanajāham ।
adhaścordhvaṃ ca tiryakcāham ।
ahaṃ rudrebhirvasubhiścarāmyahamādityairuta viśvadevaiḥ ।
ahaṃ mitrāvaruṇāvubhau bibharmyahamindrāgnī ahamaśvināvubhau ।
ahaṃ somaṃ tvaṣṭāraṃ pūṣaṇaṃ bhagaṃ dadhāmyaham ।
viṣṇumurukramaṃ brahmāṇamuta prajāpatiṃ dadhāmi । ahaṃ
dadhāmi draviṇaṃ haviṣmate suprāvye 3 yajamānāya sunvate ॥ 2॥

ahaṃ rāṣṭrī saṅgamanī vasūnāmahaṃ suve pitaramasya
mūrdhanmama yonirapsvantaḥ samudre । ya evaṃ veda sa
devīpadamāpnoti । te devā abruvan ।
namo devyai mahādevyai śivāyai satataṃ namaḥ ।
namaḥ prakṛtyai bhadrāyai niyatāḥ praṇatāḥ sma tām ॥ 3॥

tāmagnivarṇāṃ tapasā jvalantīṃ vairocanīṃ karmaphaleṣu juṣṭām ।
durgāṃ devīṃ śaraṇamahaṃ prapadye sutarāṃ nāśayate tamaḥ ॥ 4॥

devīṃ vācamajanayanta devāstāṃ viśvarūpāḥ paśavo vadanti
। sā no mandreśamūrjaṃ duhānā dhenurvāgasmānupasuṣṭutaitu ॥ 5॥

kālarātriṃ brahmastutāṃ vaiṣṇavīṃ skandamātaram ।
sarasvatīmaditiṃ dakṣaduhitaraṃ namāmaḥ pāvanāṃ śivām ॥ 6॥

mahālakṣmīśca vidmahe sarvasiddhiśca dhīmahi ।
tanno devī pracodayāt ॥ 7॥

aditirhyajaniṣṭa dakṣa yā duhitā tava । tāṃ devā
anvajāyanta bhadrā amṛtabandhavaḥ ॥ 8॥

kāmo yoniḥ kāmakalā vajrapāṇirguhā hasā ।
mātariśvābhramindraḥ punarguhā sakalā māyayā ca
punaḥ kośā viśvamātā divi dyom ॥ 9॥

eṣātmaśaktiḥ । eṣā viśvamohinī
pāśāṅkuśadhanurbāṇadharā । eṣā śrīmahāvidyā ।
ya evaṃ veda sa śokaṃ tarati ।
namaste astu bhagavati bhavati mātarasmānpātu sarvataḥ ।
saiṣāṣṭau vasavaḥ । saiṣaikādaśa rudrāḥ । saiṣā
dvādaśādityāḥ । saiṣā viśvedevāḥ
somapā asomapāśca । saiṣā yātudhānu asurā rakṣāṃsi
piśācayakṣāḥ siddhāḥ ।
saiṣā sattvarajastamāṃsi । saiṣā prajāpatīndramanavaḥ ।
saiṣā grahā nakṣatrajyotīṃṣi
kalākāṣṭhādikālarūpiṇī । tāmahaṃ praṇaumi nityam ।
tāpāpahāriṇīṃ devīṃ bhuktimuktipradāyinīm ।
anantāṃ vijayāṃ śuddhāṃ śaraṇyāṃ śivadāṃ śivām ॥ 10॥

viyadākārasaṃyuktaṃ vītihotrasamanvitam । ardhendulasitaṃ
devyā bījaṃ sarvārthasādhakam ॥ 11॥

evamekākṣaraṃ mantraṃ yatayaḥ śuddhacetasaḥ ।
dhyāyanti paramānandamayā jñānāmburāśayaḥ ॥ 12॥

vāṅmayā brahmabhūtasmātṣaṣṭhaṃ vaktrasamanvitam । sūryo
vāmaśrotrabinduḥ saṃyutāṣṭakatṛtīyakaḥ ॥ 13॥

nārāyaṇena saṃyukto vāyuścādharasaṃyutaḥ । vicce
navārṇako'rṇaḥ syānmahadānandadāyakaḥ ॥ 14॥

hṛtpuṇḍarīkamadhyasthāṃ prātaḥsūryasamaprabhām ।
pāśāṅkuśadharāṃ saumyāṃ varadābhayahastakām ।
trinetrāṃ raktavasanāṃ bhaktakāmadughāṃ bhaje ॥ 15॥

namāmi tvāmahaṃ devīṃ mahābhayavināśinīm ।
mahādurgapraśamanīṃ mahākāruṇyarūpiṇīm ॥ 16॥

yasyāḥ svarūpaṃ brahmādayo na jānanti tasmāducyate'jñeyā ।
yasyā anto na vidyate tasmāducyate'nantā ।
yasyā grahaṇaṃ nopalabhyate tasmāducyate'lakṣyā । yasyā
jananaṃ nopalabhyate tasmāducyate'jā ।
ekaiva sarvatra vartate tasmāducyata ekā । ekaiva viśvarūpiṇī
tasmāducyate naikā 'ta evocyate'jñeyānantālakṣyājaikā naiketi ।
mantrāṇāṃ mātṛkā devī śabdānāṃ jñānarūpiṇī ।
jñānānāṃ cinmayātītā śūnyānāṃ śūnyasākṣiṇī ॥ 17॥

yasyāḥ parataraṃ nāsti saiṣā durgā prakīrtitā ।
[durgātsaṃtrāyate yasmāddevī durgeti kathyate] ॥ 18॥

[prapadye śaraṇaṃ devīṃ duṃdurge duritaṃ hara] ॥

tāṃ durgāṃ durgamāṃ devīṃ durācāravighātinīm ।
namāmi bhavabhīto'haṃ saṃsārārṇavatāriṇīm ॥ 19॥

idamatharvaśīrṣaṃ yo'dhīte
pañcātharvaśīrṣajapaphalamavāpnoti ।
idamatharvaśīrṣaṃ jñātvā yo'rcāṃ sthāpayati ।
śatalakṣaṃ prajaptvāpi so'rcāsiddhiṃ ca vindati ।
śatamaṣṭottaraṃ cāsyāḥ puraścaryāvidhiḥ smṛtaḥ ॥ 20॥

daśavāraṃ paṭhedyastu sadyaḥ pāpaiḥ pramucyate । mahādurgāṇi
tarati mahādevyāḥ prasādataḥ ॥ 21॥

prātaradhīyāno rātrikṛtaṃ pāpaṃ nāśayati ।
sāyamadhīyāno divasakṛtaṃ pāpaṃ nāśayati ।
tatsāyaṃ prātaḥ prayuñjānaḥ pāpo'pāpo bhavati । niśīthe
turīyasandhyāyāṃ japtvā vāksiddhirbhavati ।
nūtanapratimāyāṃ japtvā devatāsāṃnidhyaṃ bhavati ।
prāṇapratiṣṭhāyāṃ japtvā prāṇānāṃ pratiṣṭhā bhavati ।
bhaumāśvinyāṃ mahādevī saṃnidhau japtvā mahāmṛtyuṃ tarati
। ya evaṃ vedetyupaniṣat ॥ 22॥

oṃ bhadraṃ karṇebhiḥ śṛṇuyāma devā
bhadraṃ paśyemākṣabhiryajatrāḥ ।
sthirairaṅgaistuṣṭuvām̐sastanūbhi-
rvyaśema devahitaṃ yadāyuḥ ॥

svasti na indro vṛddhaśravāḥ
svasti naḥ pūṣā viśvavedāḥ ।
svasti nastārkṣyo ariṣṭanemiḥ
svasti no bṛhaspatirdadhātu ॥

oṃ śāntiḥ śāntiḥ śāntiḥ ॥

॥ iti śrīdevyupaniṣatsamāptā ॥