| Library / Tipiṭaka / ติปิฎก • Tipiṭaka / อปทานปาฬิ • Apadānapāḷi |
๘. ธชทายกเตฺถรอปทานํ
8. Dhajadāyakattheraapadānaṃ
๕๗.
57.
‘‘ปทุมุตฺตรพุทฺธสฺส, โพธิยา ปาทปุตฺตเม;
‘‘Padumuttarabuddhassa, bodhiyā pādaputtame;
หโฎฺฐ หเฎฺฐน จิเตฺตน, ธชมาโรปยิํ อหํฯ
Haṭṭho haṭṭhena cittena, dhajamāropayiṃ ahaṃ.
๕๘.
58.
‘‘ปติตปตฺตานิ คณฺหิตฺวา, พหิทฺธา ฉฑฺฑยิํ อหํ;
‘‘Patitapattāni gaṇhitvā, bahiddhā chaḍḍayiṃ ahaṃ;
อโนฺตสุทฺธํ พหิสุทฺธํ, อธิมุตฺตมนาสวํฯ
Antosuddhaṃ bahisuddhaṃ, adhimuttamanāsavaṃ.
๕๙.
59.
‘‘สมฺมุขา วิย สมฺพุทฺธํ, อวนฺทิํ โพธิมุตฺตมํ;
‘‘Sammukhā viya sambuddhaṃ, avandiṃ bodhimuttamaṃ;
ปทุมุตฺตโร โลกวิทู, อาหุตีนํ ปฎิคฺคโหฯ
Padumuttaro lokavidū, āhutīnaṃ paṭiggaho.
๖๐.
60.
‘‘ภิกฺขุสเงฺฆ ฐิโต สตฺถา, อิมา คาถา อภาสถ;
‘‘Bhikkhusaṅghe ṭhito satthā, imā gāthā abhāsatha;
‘‘‘อิมินา ธชทาเนน, อุปฎฺฐาเนน จูภยํฯ
‘‘‘Iminā dhajadānena, upaṭṭhānena cūbhayaṃ.
๖๑.
61.
‘‘‘กปฺปานํ สตสหสฺสํ, ทุคฺคติํ โส น คจฺฉติ;
‘‘‘Kappānaṃ satasahassaṃ, duggatiṃ so na gacchati;
เทเวสุ เทวโสภคฺยํ, อนุโภสฺสตินปฺปกํฯ
Devesu devasobhagyaṃ, anubhossatinappakaṃ.
๖๒.
62.
‘‘‘อเนกสตกฺขตฺตุญฺจ , ราชา รเฎฺฐ ภวิสฺสติ;
‘‘‘Anekasatakkhattuñca , rājā raṭṭhe bhavissati;
อุคฺคโต นาม นาเมน, จกฺกวตฺตี ภวิสฺสติฯ
Uggato nāma nāmena, cakkavattī bhavissati.
๖๓.
63.
‘‘‘สมฺปตฺติํ อนุโภตฺวาน, สุกฺกมูเลน โจทิโต;
‘‘‘Sampattiṃ anubhotvāna, sukkamūlena codito;
โคตมสฺส ภควโต, สาสเนภิรมิสฺสติ’ฯ
Gotamassa bhagavato, sāsanebhiramissati’.
๖๔.
64.
‘‘ปธานปหิตโตฺตมฺหิ, อุปสโนฺต นิรูปธิ;
‘‘Padhānapahitattomhi, upasanto nirūpadhi;
ธาเรมิ อนฺติมํ เทหํ, สมฺมาสมฺพุทฺธสาสเนฯ
Dhāremi antimaṃ dehaṃ, sammāsambuddhasāsane.
๖๕.
65.
๖๖.
66.
‘‘ปฎิสมฺภิทา จตโสฺส…เป.… กตํ พุทฺธสฺส สาสนํ’’ฯ
‘‘Paṭisambhidā catasso…pe… kataṃ buddhassa sāsanaṃ’’.
อิตฺถํ สุทํ อายสฺมา ธชทายโก เถโร อิมา คาถาโย อภาสิตฺถาติฯ
Itthaṃ sudaṃ āyasmā dhajadāyako thero imā gāthāyo abhāsitthāti.
ธชทายกเตฺถรสฺสาปทานํ อฎฺฐมํฯ
Dhajadāyakattherassāpadānaṃ aṭṭhamaṃ.
Footnotes:
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / อปทาน-อฎฺฐกถา • Apadāna-aṭṭhakathā / ๘. ธชทายกเตฺถรอปทานวณฺณนา • 8. Dhajadāyakattheraapadānavaṇṇanā
