| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
8. த⁴ஜதா³யகத்தே²ரஅபதா³னவண்ணனா
8. Dhajadāyakattheraapadānavaṇṇanā
பது³முத்தரபு³த்³த⁴ஸ்ஸாதிஆதி³கங் ஆயஸ்மதோ த⁴ஜதா³யகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ பது³முத்தரஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய ஸத்த²ரி பஸீதி³த்வா ஸுந்த³ரேஹி அனேகேஹி வத்தே²ஹி த⁴ஜங் காராபெத்வா த⁴ஜபூஜங் அகாஸி. ஸோ தேன புஞ்ஞகம்மேன உப்பன்னுப்பன்னப⁴வே உச்சகுலே நிப்³ப³த்தோ பூஜனியோ அஹோஸி. அபரபா⁴கே³ இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே நிப்³ப³த்தோ வுத்³தி⁴மன்வாய புத்ததா³ரேஹி வட்³டி⁴த்வா மஹாபோ⁴கோ³ யஸவா ஸத்³தா⁴ஜாதோ ஸத்த²ரி பஸன்னோ க⁴ராவாஸங் பஹாய பப்³ப³ஜித்வா நசிரஸ்ஸேவ அரஹா அஹோஸி.
Padumuttarabuddhassātiādikaṃ āyasmato dhajadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto vuddhimanvāya satthari pasīditvā sundarehi anekehi vatthehi dhajaṃ kārāpetvā dhajapūjaṃ akāsi. So tena puññakammena uppannuppannabhave uccakule nibbatto pūjaniyo ahosi. Aparabhāge imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā mahābhogo yasavā saddhājāto satthari pasanno gharāvāsaṃ pahāya pabbajitvā nacirasseva arahā ahosi.
57. ஸோ பத்தஅரஹத்தப²லோ புப்³ப³கம்மங் ஸரித்வா ஸோமனஸ்ஸஜாதோ அத்தனோ புப்³ப³சரிதாபதா³னங் பகாஸெந்தோ பது³முத்தரபு³த்³த⁴ஸ்ஸாதிஆதி³மாஹ. தஸ்ஸத்தோ² புப்³பே³ வுத்தோயேவ. ஹட்டோ² ஹட்டே²ன சித்தேனாதி ஸோமனஸ்ஸஸஹக³தசித்தயுத்தத்தா ஹட்டோ² பரிபுண்ணரூபகாயோ ஸத்³தா⁴ஸம்பயுத்தசித்ததாய ஹட்டே²ன சித்தேன ஸந்துட்டே²ன சித்தேனாதி அத்தோ². த⁴ஜமாரோபயிங் அஹந்தி து⁴னாதி கம்பதி சலதீதி த⁴ஜங், தங் த⁴ஜங் ஆரோபயிங் வேளக்³கே³ லக்³கெ³த்வா பூஜேஸிந்தி அத்தோ².
57. So pattaarahattaphalo pubbakammaṃ saritvā somanassajāto attano pubbacaritāpadānaṃ pakāsento padumuttarabuddhassātiādimāha. Tassattho pubbe vuttoyeva. Haṭṭho haṭṭhena cittenāti somanassasahagatacittayuttattā haṭṭho paripuṇṇarūpakāyo saddhāsampayuttacittatāya haṭṭhena cittena santuṭṭhena cittenāti attho. Dhajamāropayiṃ ahanti dhunāti kampati calatīti dhajaṃ, taṃ dhajaṃ āropayiṃ veḷagge laggetvā pūjesinti attho.
58-9. பதிதபத்தானி க³ண்ஹித்வாதி பதிதானி போ³தி⁴பத்தானி க³ஹெத்வா அஹங் ப³ஹி ச²ட்³டே³ஸிந்தி அத்தோ². அந்தோஸுத்³த⁴ங் ப³ஹிஸுத்³த⁴ந்தி அந்தோ சித்தஸந்தானநாமகாயதோ ச ப³ஹி சக்கு²ஸோதாதி³ரூபகாயதோ ச ஸுத்³தி⁴ங் அதி⁴ விஸேஸேன முத்தங் கிலேஸதோ விமுத்தங் அனாஸவங் ஸம்பு³த்³த⁴ங் விய ஸம்முகா² உத்தமங் போ³தி⁴ங் அவந்தி³ங் பணாமமகாஸிந்தி அத்தோ². ஸேஸங் ஸப்³ப³த்த² உத்தானத்த²மேவாதி.
58-9.Patitapattāni gaṇhitvāti patitāni bodhipattāni gahetvā ahaṃ bahi chaḍḍesinti attho. Antosuddhaṃ bahisuddhanti anto cittasantānanāmakāyato ca bahi cakkhusotādirūpakāyato ca suddhiṃ adhi visesena muttaṃ kilesato vimuttaṃ anāsavaṃ sambuddhaṃ viya sammukhā uttamaṃ bodhiṃ avandiṃ paṇāmamakāsinti attho. Sesaṃ sabbattha uttānatthamevāti.
த⁴ஜதா³யகத்தே²ரஅபதா³னவண்ணனா ஸமத்தா.
Dhajadāyakattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 8. த⁴ஜதா³யகத்தே²ரஅபதா³னங் • 8. Dhajadāyakattheraapadānaṃ
