| Library / Tipiṭaka / तिपिटक • Tipiṭaka / अपदान-अट्ठकथा • Apadāna-aṭṭhakathā |
८. धजदायकत्थेरअपदानवण्णना
8. Dhajadāyakattheraapadānavaṇṇanā
पदुमुत्तरबुद्धस्सातिआदिकं आयस्मतो धजदायकत्थेरस्स अपदानं। अयम्पि पुरिमबुद्धेसु कताधिकारो तत्थ तत्थ भवे विवट्टूपनिस्सयानि पुञ्ञानि उपचिनन्तो पदुमुत्तरस्स भगवतो काले एकस्मिं कुलगेहे निब्बत्तो वुद्धिमन्वाय सत्थरि पसीदित्वा सुन्दरेहि अनेकेहि वत्थेहि धजं कारापेत्वा धजपूजं अकासि। सो तेन पुञ्ञकम्मेन उप्पन्नुप्पन्नभवे उच्चकुले निब्बत्तो पूजनियो अहोसि। अपरभागे इमस्मिं बुद्धुप्पादे एकस्मिं कुलगेहे निब्बत्तो वुद्धिमन्वाय पुत्तदारेहि वड्ढित्वा महाभोगो यसवा सद्धाजातो सत्थरि पसन्नो घरावासं पहाय पब्बजित्वा नचिरस्सेव अरहा अहोसि।
Padumuttarabuddhassātiādikaṃ āyasmato dhajadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto vuddhimanvāya satthari pasīditvā sundarehi anekehi vatthehi dhajaṃ kārāpetvā dhajapūjaṃ akāsi. So tena puññakammena uppannuppannabhave uccakule nibbatto pūjaniyo ahosi. Aparabhāge imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā mahābhogo yasavā saddhājāto satthari pasanno gharāvāsaṃ pahāya pabbajitvā nacirasseva arahā ahosi.
५७. सो पत्तअरहत्तफलो पुब्बकम्मं सरित्वा सोमनस्सजातो अत्तनो पुब्बचरितापदानं पकासेन्तो पदुमुत्तरबुद्धस्सातिआदिमाह। तस्सत्थो पुब्बे वुत्तोयेव। हट्ठो हट्ठेन चित्तेनाति सोमनस्ससहगतचित्तयुत्तत्ता हट्ठो परिपुण्णरूपकायो सद्धासम्पयुत्तचित्तताय हट्ठेन चित्तेन सन्तुट्ठेन चित्तेनाति अत्थो। धजमारोपयिं अहन्ति धुनाति कम्पति चलतीति धजं, तं धजं आरोपयिं वेळग्गे लग्गेत्वा पूजेसिन्ति अत्थो।
57. So pattaarahattaphalo pubbakammaṃ saritvā somanassajāto attano pubbacaritāpadānaṃ pakāsento padumuttarabuddhassātiādimāha. Tassattho pubbe vuttoyeva. Haṭṭho haṭṭhena cittenāti somanassasahagatacittayuttattā haṭṭho paripuṇṇarūpakāyo saddhāsampayuttacittatāya haṭṭhena cittena santuṭṭhena cittenāti attho. Dhajamāropayiṃ ahanti dhunāti kampati calatīti dhajaṃ, taṃ dhajaṃ āropayiṃ veḷagge laggetvā pūjesinti attho.
५८-९. पतितपत्तानि गण्हित्वाति पतितानि बोधिपत्तानि गहेत्वा अहं बहि छड्डेसिन्ति अत्थो। अन्तोसुद्धं बहिसुद्धन्ति अन्तो चित्तसन्ताननामकायतो च बहि चक्खुसोतादिरूपकायतो च सुद्धिं अधि विसेसेन मुत्तं किलेसतो विमुत्तं अनासवं सम्बुद्धं विय सम्मुखा उत्तमं बोधिं अवन्दिं पणाममकासिन्ति अत्थो। सेसं सब्बत्थ उत्तानत्थमेवाति।
58-9.Patitapattāni gaṇhitvāti patitāni bodhipattāni gahetvā ahaṃ bahi chaḍḍesinti attho. Antosuddhaṃ bahisuddhanti anto cittasantānanāmakāyato ca bahi cakkhusotādirūpakāyato ca suddhiṃ adhi visesena muttaṃ kilesato vimuttaṃ anāsavaṃ sambuddhaṃ viya sammukhā uttamaṃ bodhiṃ avandiṃ paṇāmamakāsinti attho. Sesaṃ sabbattha uttānatthamevāti.
धजदायकत्थेरअपदानवण्णना समत्ता।
Dhajadāyakattheraapadānavaṇṇanā samattā.
Related texts:
तिपिटक (मूल) • Tipiṭaka (Mūla) / सुत्तपिटक • Suttapiṭaka / खुद्दकनिकाय • Khuddakanikāya / अपदानपाळि • Apadānapāḷi / ८. धजदायकत्थेरअपदानं • 8. Dhajadāyakattheraapadānaṃ
