| Library / Tipiṭaka / ತಿಪಿಟಕ • Tipiṭaka / ಅಪದಾನ-ಅಟ್ಠಕಥಾ • Apadāna-aṭṭhakathā |
೮. ಧಜದಾಯಕತ್ಥೇರಅಪದಾನವಣ್ಣನಾ
8. Dhajadāyakattheraapadānavaṇṇanā
ಪದುಮುತ್ತರಬುದ್ಧಸ್ಸಾತಿಆದಿಕಂ ಆಯಸ್ಮತೋ ಧಜದಾಯಕತ್ಥೇರಸ್ಸ ಅಪದಾನಂ। ಅಯಮ್ಪಿ ಪುರಿಮಬುದ್ಧೇಸು ಕತಾಧಿಕಾರೋ ತತ್ಥ ತತ್ಥ ಭವೇ ವಿವಟ್ಟೂಪನಿಸ್ಸಯಾನಿ ಪುಞ್ಞಾನಿ ಉಪಚಿನನ್ತೋ ಪದುಮುತ್ತರಸ್ಸ ಭಗವತೋ ಕಾಲೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಸತ್ಥರಿ ಪಸೀದಿತ್ವಾ ಸುನ್ದರೇಹಿ ಅನೇಕೇಹಿ ವತ್ಥೇಹಿ ಧಜಂ ಕಾರಾಪೇತ್ವಾ ಧಜಪೂಜಂ ಅಕಾಸಿ। ಸೋ ತೇನ ಪುಞ್ಞಕಮ್ಮೇನ ಉಪ್ಪನ್ನುಪ್ಪನ್ನಭವೇ ಉಚ್ಚಕುಲೇ ನಿಬ್ಬತ್ತೋ ಪೂಜನಿಯೋ ಅಹೋಸಿ। ಅಪರಭಾಗೇ ಇಮಸ್ಮಿಂ ಬುದ್ಧುಪ್ಪಾದೇ ಏಕಸ್ಮಿಂ ಕುಲಗೇಹೇ ನಿಬ್ಬತ್ತೋ ವುದ್ಧಿಮನ್ವಾಯ ಪುತ್ತದಾರೇಹಿ ವಡ್ಢಿತ್ವಾ ಮಹಾಭೋಗೋ ಯಸವಾ ಸದ್ಧಾಜಾತೋ ಸತ್ಥರಿ ಪಸನ್ನೋ ಘರಾವಾಸಂ ಪಹಾಯ ಪಬ್ಬಜಿತ್ವಾ ನಚಿರಸ್ಸೇವ ಅರಹಾ ಅಹೋಸಿ।
Padumuttarabuddhassātiādikaṃ āyasmato dhajadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto vuddhimanvāya satthari pasīditvā sundarehi anekehi vatthehi dhajaṃ kārāpetvā dhajapūjaṃ akāsi. So tena puññakammena uppannuppannabhave uccakule nibbatto pūjaniyo ahosi. Aparabhāge imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā mahābhogo yasavā saddhājāto satthari pasanno gharāvāsaṃ pahāya pabbajitvā nacirasseva arahā ahosi.
೫೭. ಸೋ ಪತ್ತಅರಹತ್ತಫಲೋ ಪುಬ್ಬಕಮ್ಮಂ ಸರಿತ್ವಾ ಸೋಮನಸ್ಸಜಾತೋ ಅತ್ತನೋ ಪುಬ್ಬಚರಿತಾಪದಾನಂ ಪಕಾಸೇನ್ತೋ ಪದುಮುತ್ತರಬುದ್ಧಸ್ಸಾತಿಆದಿಮಾಹ। ತಸ್ಸತ್ಥೋ ಪುಬ್ಬೇ ವುತ್ತೋಯೇವ। ಹಟ್ಠೋ ಹಟ್ಠೇನ ಚಿತ್ತೇನಾತಿ ಸೋಮನಸ್ಸಸಹಗತಚಿತ್ತಯುತ್ತತ್ತಾ ಹಟ್ಠೋ ಪರಿಪುಣ್ಣರೂಪಕಾಯೋ ಸದ್ಧಾಸಮ್ಪಯುತ್ತಚಿತ್ತತಾಯ ಹಟ್ಠೇನ ಚಿತ್ತೇನ ಸನ್ತುಟ್ಠೇನ ಚಿತ್ತೇನಾತಿ ಅತ್ಥೋ। ಧಜಮಾರೋಪಯಿಂ ಅಹನ್ತಿ ಧುನಾತಿ ಕಮ್ಪತಿ ಚಲತೀತಿ ಧಜಂ, ತಂ ಧಜಂ ಆರೋಪಯಿಂ ವೇಳಗ್ಗೇ ಲಗ್ಗೇತ್ವಾ ಪೂಜೇಸಿನ್ತಿ ಅತ್ಥೋ।
57. So pattaarahattaphalo pubbakammaṃ saritvā somanassajāto attano pubbacaritāpadānaṃ pakāsento padumuttarabuddhassātiādimāha. Tassattho pubbe vuttoyeva. Haṭṭho haṭṭhena cittenāti somanassasahagatacittayuttattā haṭṭho paripuṇṇarūpakāyo saddhāsampayuttacittatāya haṭṭhena cittena santuṭṭhena cittenāti attho. Dhajamāropayiṃ ahanti dhunāti kampati calatīti dhajaṃ, taṃ dhajaṃ āropayiṃ veḷagge laggetvā pūjesinti attho.
೫೮-೯. ಪತಿತಪತ್ತಾನಿ ಗಣ್ಹಿತ್ವಾತಿ ಪತಿತಾನಿ ಬೋಧಿಪತ್ತಾನಿ ಗಹೇತ್ವಾ ಅಹಂ ಬಹಿ ಛಡ್ಡೇಸಿನ್ತಿ ಅತ್ಥೋ। ಅನ್ತೋಸುದ್ಧಂ ಬಹಿಸುದ್ಧನ್ತಿ ಅನ್ತೋ ಚಿತ್ತಸನ್ತಾನನಾಮಕಾಯತೋ ಚ ಬಹಿ ಚಕ್ಖುಸೋತಾದಿರೂಪಕಾಯತೋ ಚ ಸುದ್ಧಿಂ ಅಧಿ ವಿಸೇಸೇನ ಮುತ್ತಂ ಕಿಲೇಸತೋ ವಿಮುತ್ತಂ ಅನಾಸವಂ ಸಮ್ಬುದ್ಧಂ ವಿಯ ಸಮ್ಮುಖಾ ಉತ್ತಮಂ ಬೋಧಿಂ ಅವನ್ದಿಂ ಪಣಾಮಮಕಾಸಿನ್ತಿ ಅತ್ಥೋ। ಸೇಸಂ ಸಬ್ಬತ್ಥ ಉತ್ತಾನತ್ಥಮೇವಾತಿ।
58-9.Patitapattāni gaṇhitvāti patitāni bodhipattāni gahetvā ahaṃ bahi chaḍḍesinti attho. Antosuddhaṃ bahisuddhanti anto cittasantānanāmakāyato ca bahi cakkhusotādirūpakāyato ca suddhiṃ adhi visesena muttaṃ kilesato vimuttaṃ anāsavaṃ sambuddhaṃ viya sammukhā uttamaṃ bodhiṃ avandiṃ paṇāmamakāsinti attho. Sesaṃ sabbattha uttānatthamevāti.
ಧಜದಾಯಕತ್ಥೇರಅಪದಾನವಣ್ಣನಾ ಸಮತ್ತಾ।
Dhajadāyakattheraapadānavaṇṇanā samattā.
Related texts:
ತಿಪಿಟಕ (ಮೂಲ) • Tipiṭaka (Mūla) / ಸುತ್ತಪಿಟಕ • Suttapiṭaka / ಖುದ್ದಕನಿಕಾಯ • Khuddakanikāya / ಅಪದಾನಪಾಳಿ • Apadānapāḷi / ೮. ಧಜದಾಯಕತ್ಥೇರಅಪದಾನಂ • 8. Dhajadāyakattheraapadānaṃ
