| Library / Tipiṭaka / തിപിടക • Tipiṭaka / അപദാന-അട്ഠകഥാ • Apadāna-aṭṭhakathā |
൮. ധജദായകത്ഥേരഅപദാനവണ്ണനാ
8. Dhajadāyakattheraapadānavaṇṇanā
പദുമുത്തരബുദ്ധസ്സാതിആദികം ആയസ്മതോ ധജദായകത്ഥേരസ്സ അപദാനം. അയമ്പി പുരിമബുദ്ധേസു കതാധികാരോ തത്ഥ തത്ഥ ഭവേ വിവട്ടൂപനിസ്സയാനി പുഞ്ഞാനി ഉപചിനന്തോ പദുമുത്തരസ്സ ഭഗവതോ കാലേ ഏകസ്മിം കുലഗേഹേ നിബ്ബത്തോ വുദ്ധിമന്വായ സത്ഥരി പസീദിത്വാ സുന്ദരേഹി അനേകേഹി വത്ഥേഹി ധജം കാരാപേത്വാ ധജപൂജം അകാസി. സോ തേന പുഞ്ഞകമ്മേന ഉപ്പന്നുപ്പന്നഭവേ ഉച്ചകുലേ നിബ്ബത്തോ പൂജനിയോ അഹോസി. അപരഭാഗേ ഇമസ്മിം ബുദ്ധുപ്പാദേ ഏകസ്മിം കുലഗേഹേ നിബ്ബത്തോ വുദ്ധിമന്വായ പുത്തദാരേഹി വഡ്ഢിത്വാ മഹാഭോഗോ യസവാ സദ്ധാജാതോ സത്ഥരി പസന്നോ ഘരാവാസം പഹായ പബ്ബജിത്വാ നചിരസ്സേവ അരഹാ അഹോസി.
Padumuttarabuddhassātiādikaṃ āyasmato dhajadāyakattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto padumuttarassa bhagavato kāle ekasmiṃ kulagehe nibbatto vuddhimanvāya satthari pasīditvā sundarehi anekehi vatthehi dhajaṃ kārāpetvā dhajapūjaṃ akāsi. So tena puññakammena uppannuppannabhave uccakule nibbatto pūjaniyo ahosi. Aparabhāge imasmiṃ buddhuppāde ekasmiṃ kulagehe nibbatto vuddhimanvāya puttadārehi vaḍḍhitvā mahābhogo yasavā saddhājāto satthari pasanno gharāvāsaṃ pahāya pabbajitvā nacirasseva arahā ahosi.
൫൭. സോ പത്തഅരഹത്തഫലോ പുബ്ബകമ്മം സരിത്വാ സോമനസ്സജാതോ അത്തനോ പുബ്ബചരിതാപദാനം പകാസേന്തോ പദുമുത്തരബുദ്ധസ്സാതിആദിമാഹ. തസ്സത്ഥോ പുബ്ബേ വുത്തോയേവ. ഹട്ഠോ ഹട്ഠേന ചിത്തേനാതി സോമനസ്സസഹഗതചിത്തയുത്തത്താ ഹട്ഠോ പരിപുണ്ണരൂപകായോ സദ്ധാസമ്പയുത്തചിത്തതായ ഹട്ഠേന ചിത്തേന സന്തുട്ഠേന ചിത്തേനാതി അത്ഥോ. ധജമാരോപയിം അഹന്തി ധുനാതി കമ്പതി ചലതീതി ധജം, തം ധജം ആരോപയിം വേളഗ്ഗേ ലഗ്ഗേത്വാ പൂജേസിന്തി അത്ഥോ.
57. So pattaarahattaphalo pubbakammaṃ saritvā somanassajāto attano pubbacaritāpadānaṃ pakāsento padumuttarabuddhassātiādimāha. Tassattho pubbe vuttoyeva. Haṭṭho haṭṭhena cittenāti somanassasahagatacittayuttattā haṭṭho paripuṇṇarūpakāyo saddhāsampayuttacittatāya haṭṭhena cittena santuṭṭhena cittenāti attho. Dhajamāropayiṃ ahanti dhunāti kampati calatīti dhajaṃ, taṃ dhajaṃ āropayiṃ veḷagge laggetvā pūjesinti attho.
൫൮-൯. പതിതപത്താനി ഗണ്ഹിത്വാതി പതിതാനി ബോധിപത്താനി ഗഹേത്വാ അഹം ബഹി ഛഡ്ഡേസിന്തി അത്ഥോ. അന്തോസുദ്ധം ബഹിസുദ്ധന്തി അന്തോ ചിത്തസന്താനനാമകായതോ ച ബഹി ചക്ഖുസോതാദിരൂപകായതോ ച സുദ്ധിം അധി വിസേസേന മുത്തം കിലേസതോ വിമുത്തം അനാസവം സമ്ബുദ്ധം വിയ സമ്മുഖാ ഉത്തമം ബോധിം അവന്ദിം പണാമമകാസിന്തി അത്ഥോ. സേസം സബ്ബത്ഥ ഉത്താനത്ഥമേവാതി.
58-9.Patitapattāni gaṇhitvāti patitāni bodhipattāni gahetvā ahaṃ bahi chaḍḍesinti attho. Antosuddhaṃ bahisuddhanti anto cittasantānanāmakāyato ca bahi cakkhusotādirūpakāyato ca suddhiṃ adhi visesena muttaṃ kilesato vimuttaṃ anāsavaṃ sambuddhaṃ viya sammukhā uttamaṃ bodhiṃ avandiṃ paṇāmamakāsinti attho. Sesaṃ sabbattha uttānatthamevāti.
ധജദായകത്ഥേരഅപദാനവണ്ണനാ സമത്താ.
Dhajadāyakattheraapadānavaṇṇanā samattā.
Related texts:
തിപിടക (മൂല) • Tipiṭaka (Mūla) / സുത്തപിടക • Suttapiṭaka / ഖുദ്ദകനികായ • Khuddakanikāya / അപദാനപാളി • Apadānapāḷi / ൮. ധജദായകത്ഥേരഅപദാനം • 8. Dhajadāyakattheraapadānaṃ
