| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. த⁴ஜக்³க³ஸுத்தவண்ணனா
3. Dhajaggasuttavaṇṇanā
249. ததியே ஸமுபப்³யூள்ஹோதி ஸம்பிண்டி³தோ ராஸிபூ⁴தோ. த⁴ஜக்³க³ங் உல்லோகெய்யதா²தி ஸக்கஸ்ஸ கிர தி³யட்³ட⁴யோஜனஸதாயாமோ ரதோ² . தஸ்ஸ ஹி பச்சி²மந்தோ பண்ணாஸயோஜனோ, மஜ்ஜே² ரத²பஞ்ஜரோ பண்ணாஸயோஜனோ, ரத²ஸந்தி⁴தோ யாவ ரத²ஸீஸா பண்ணாஸயோஜனானி. ததே³வ பமாணங் தி³கு³ணங் கத்வா தியோஜனஸதாயாமோதிபி வத³ந்தியேவ. தஸ்மிங் யோஜனிகபல்லங்கோ அத்த²தோ, தியோஜனிகங் ஸேதச்ச²த்தங் மத்த²கே ட²பிதங், ஏகஸ்மிங்யேவ யுகே³ ஸஹஸ்ஸஆஜஞ்ஞா யுத்தா, ஸேஸாலங்காரஸ்ஸ பமாணங் நத்தி². த⁴ஜோ பனஸ்ஸ அட்³ட⁴தியானி யோஜனஸதானி உக்³க³தோ, யஸ்ஸ வாதாஹதஸ்ஸ பஞ்சங்கி³கதூரியஸ்ஸேவ ஸத்³தோ³ நிச்ச²ரதி, தங் உல்லோகெய்யாதா²தி வத³தி. கஸ்மா? தங் பஸ்ஸந்தானஞ்ஹி ராஜா நோ ஆக³ந்த்வா பரிஸபரியந்தே நிகா²தத²ம்போ⁴ விய டி²தோ, கஸ்ஸ மயங் பா⁴யாமாதி ப⁴யங் ந ஹோதி. பஜாபதிஸ்ஸாதி ஸோ கிர ஸக்கேன ஸமானவண்ணோ ஸமானாயுகோ து³தியங் ஆஸனங் லப⁴தி. ததா² வருணோ ஈஸானோ ச. வருணோ பன ததியங் ஆஸனங் லப⁴தி, ஈஸானோ சதுத்த²ங். பலாயீதி அஸுரேஹி பராஜிதோ தஸ்மிங் ரதே² டி²தோ அப்பமத்தகம்பி ரஜத⁴ஜங் தி³ஸ்வா பலாயனத⁴ம்மோ.
249. Tatiye samupabyūḷhoti sampiṇḍito rāsibhūto. Dhajaggaṃullokeyyathāti sakkassa kira diyaḍḍhayojanasatāyāmo ratho . Tassa hi pacchimanto paṇṇāsayojano, majjhe rathapañjaro paṇṇāsayojano, rathasandhito yāva rathasīsā paṇṇāsayojanāni. Tadeva pamāṇaṃ diguṇaṃ katvā tiyojanasatāyāmotipi vadantiyeva. Tasmiṃ yojanikapallaṅko atthato, tiyojanikaṃ setacchattaṃ matthake ṭhapitaṃ, ekasmiṃyeva yuge sahassaājaññā yuttā, sesālaṅkārassa pamāṇaṃ natthi. Dhajo panassa aḍḍhatiyāni yojanasatāni uggato, yassa vātāhatassa pañcaṅgikatūriyasseva saddo niccharati, taṃ ullokeyyāthāti vadati. Kasmā? Taṃ passantānañhi rājā no āgantvā parisapariyante nikhātathambho viya ṭhito, kassa mayaṃ bhāyāmāti bhayaṃ na hoti. Pajāpatissāti so kira sakkena samānavaṇṇo samānāyuko dutiyaṃ āsanaṃ labhati. Tathā varuṇo īsāno ca. Varuṇo pana tatiyaṃ āsanaṃ labhati, īsāno catutthaṃ. Palāyīti asurehi parājito tasmiṃ rathe ṭhito appamattakampi rajadhajaṃ disvā palāyanadhammo.
இதிபி ஸோ ப⁴க³வாதிஆதீ³னி விஸுத்³தி⁴மக்³கே³ வித்தா²ரிதானேவ. இத³மவோசாதி இத³ங் த⁴ஜக்³க³பரித்தங் நாம ப⁴க³வா அவோச, யஸ்ஸ ஆணாகெ²த்தே கோடிஸதஸஹஸ்ஸசக்கவாளே ஆனுபா⁴வோ வத்ததி. இத³ங் ஆவஜ்ஜெத்வா ஹி யக்க²ப⁴யசோரப⁴யாதீ³ஹி து³க்கே²ஹி முத்தானங் அந்தோ நத்தி². திட்ட²து அஞ்ஞது³க்க²வூபஸமோ, இத³ங் ஆவஜ்ஜமானோ ஹி பஸன்னசித்தோ ஆகாஸேபி பதிட்ட²ங் லப⁴தி.
Itipi so bhagavātiādīni visuddhimagge vitthāritāneva. Idamavocāti idaṃ dhajaggaparittaṃ nāma bhagavā avoca, yassa āṇākhette koṭisatasahassacakkavāḷe ānubhāvo vattati. Idaṃ āvajjetvā hi yakkhabhayacorabhayādīhi dukkhehi muttānaṃ anto natthi. Tiṭṭhatu aññadukkhavūpasamo, idaṃ āvajjamāno hi pasannacitto ākāsepi patiṭṭhaṃ labhati.
தத்ரித³ங் வத்து² – தீ³க⁴வாபிசேதியம்ஹி கிர ஸுதா⁴கம்மே கயிரமானே ஏகோ த³ஹரோ முத்³த⁴வேதி³காபாத³தோ பதித்வா சேதியகுச்சி²யா ப⁴ஸ்ஸதி. ஹெட்டா² டி²தோ பி⁴க்கு²ஸங்கோ⁴ ‘‘த⁴ஜக்³க³பரித்தங், ஆவுஸோ, ஆவஜ்ஜாஹீ’’தி ஆஹ. ஸோ மரணப⁴யேன தஜ்ஜிதோ ‘‘த⁴ஜக்³க³பரித்தங் மங் ரக்க²தூ’’தி ஆஹ. தாவதே³வஸ்ஸ சேதியகுச்சி²தோ த்³வே இட்ட²கா நிக்க²மித்வா ஸோபானங் ஹுத்வா அட்ட²ங்ஸு, உபரிட்டி²தோ வல்லினிஸ்ஸேணிங் ஓதாரேஸுங். தஸ்மிங் நிஸ்ஸேணியங் டி²தே இட்ட²கா யதா²ட்டா²னேயேவ அட்ட²ங்ஸு. ததியங்.
Tatridaṃ vatthu – dīghavāpicetiyamhi kira sudhākamme kayiramāne eko daharo muddhavedikāpādato patitvā cetiyakucchiyā bhassati. Heṭṭhā ṭhito bhikkhusaṅgho ‘‘dhajaggaparittaṃ, āvuso, āvajjāhī’’ti āha. So maraṇabhayena tajjito ‘‘dhajaggaparittaṃ maṃ rakkhatū’’ti āha. Tāvadevassa cetiyakucchito dve iṭṭhakā nikkhamitvā sopānaṃ hutvā aṭṭhaṃsu, upariṭṭhito vallinisseṇiṃ otāresuṃ. Tasmiṃ nisseṇiyaṃ ṭhite iṭṭhakā yathāṭṭhāneyeva aṭṭhaṃsu. Tatiyaṃ.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. த⁴ஜக்³க³ஸுத்தங் • 3. Dhajaggasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. த⁴ஜக்³க³ஸுத்தவண்ணனா • 3. Dhajaggasuttavaṇṇanā
