| Library / Tipiṭaka / တိပိဋက • Tipiṭaka / သံယုတ္တနိကာယ (ဋီကာ) • Saṃyuttanikāya (ṭīkā) |
၃. ဓဇဂ္ဂသုတ္တဝဏ္ဏနာ
3. Dhajaggasuttavaṇṇanā
၂၄၉. သမုပဗ္ယူဠ္ဟောတိ ဥဘိန္နံ သဟ ဧဝ သမာဂမော, ဘုသံ ဝာ ဗ္ယူဠ္ဟောတိ အတ္ထော။ ဘုသာ ပနသ္သ ဗ္ယူဠ္ဟတာ ဒ္ဝိန္နံ သေနာနံ သမာဂန္တ္ဝာ သမ္ပိဏ္ဍိတဘာဝေနာတိ အာဟ ‘‘သမ္ပိဏ္ဍိတော ရာသိဘူတော’’တိ။ ပစ္ဆိမန္တောတိ ရထပဉ္ဇရသ္သ ပရန္တော ပစ္ဆိမန္တော ပစ္ဆိမကောဋ္ဌာသော။ ရထသန္ဓိတောတိ ရထပဉ္ဇရသ္သ ကုဗ္ဗရေန သဒ္ဓိံ သမ္ဗန္ဓနဋ္ဌာနတော။ တဒေဝ ပမာဏန္တိ တဒေဝ ‘‘ဒိယဍ္ဎယောဇနသတာယာမော’’တိ ဝုတ္တပ္ပမာဏမေဝ။ ဒိဂုဏံ ကတ္ဝာတိ ‘‘ပစ္ဆိမန္တော သတယောဇနော’’တိအာဒိနာ ဒိဂုဏံ ကတ္ဝာ။ စန္ဒမဏ္ဍလသူရိယမဏ္ဍလကိင္ကိဏိကဇာလာဒိဘေဒသ္သ သေသာလင္ကာရသ္သ။ ပသ္သန္တာနံ ဒေဝာနံ။ ရာဇာ နောတိ အမ္ဟာကံ ရာဇာ ဒေဝသေဋ္ဌော။ ဒုတိယံ အာသနံ လဘတီတိ သက္ကေ နိသိန္နေ တသ္သ အနန္တရံ ဒုတိယံ အာသနံ လဘတိ။ တသ္မာ ဒေဝသေဋ္ဌတာယ သက္ကော ဝိယ ဂာရဝဋ္ဌာနိယော, ယတော သက္ကော ‘‘တသ္သ ဓဇဂ္ဂံ ဥလ္လောကေယ္ယာထာ’’တိ အာဟ။ ဧသ နယော သေသေသုပိ။ အသုရေဟိ ပရာဇိတောတိ အသုရေဟိ ပရာဇယံ အာပာဒိတော။ ရဇဓဇံ ဒိသ္ဝာတိ ပရသေနာယ ဥပဂစ္ဆန္တိယာ ဥဋ္ဌိတရဇမတ္တမ္ပိ ဒိသ္ဝာ ဌိတောပိ တံ ရဇဓဇံ ဒိသ္ဝာ ဘီရုဘာဝေန ပလာယနဓမ္မော။
249.Samupabyūḷhoti ubhinnaṃ saha eva samāgamo, bhusaṃ vā byūḷhoti attho. Bhusā panassa byūḷhatā dvinnaṃ senānaṃ samāgantvā sampiṇḍitabhāvenāti āha ‘‘sampiṇḍito rāsibhūto’’ti. Pacchimantoti rathapañjarassa paranto pacchimanto pacchimakoṭṭhāso. Rathasandhitoti rathapañjarassa kubbarena saddhiṃ sambandhanaṭṭhānato. Tadeva pamāṇanti tadeva ‘‘diyaḍḍhayojanasatāyāmo’’ti vuttappamāṇameva. Diguṇaṃ katvāti ‘‘pacchimanto satayojano’’tiādinā diguṇaṃ katvā. Candamaṇḍalasūriyamaṇḍalakiṅkiṇikajālādibhedassa sesālaṅkārassa. Passantānaṃ devānaṃ. Rājā noti amhākaṃ rājā devaseṭṭho. Dutiyaṃ āsanaṃ labhatīti sakke nisinne tassa anantaraṃ dutiyaṃ āsanaṃ labhati. Tasmā devaseṭṭhatāya sakko viya gāravaṭṭhāniyo, yato sakko ‘‘tassa dhajaggaṃ ullokeyyāthā’’ti āha. Esa nayo sesesupi. Asurehi parājitoti asurehi parājayaṃ āpādito. Rajadhajaṃ disvāti parasenāya upagacchantiyā uṭṭhitarajamattampi disvā ṭhitopi taṃ rajadhajaṃ disvā bhīrubhāvena palāyanadhammo.
ယသ္သ ဓဇဂ္ဂပရိတ္တသ္သ။ အာနုဘာဝော ဝတ္တတိ အသမ္မုခီဘူတာဟိပိ ဒေဝတာဟိ သိရသာ သမ္ပဋိစ္ဆိတဗ္ဗတော။ စောရဘယာဒီဟီတိ အာဒိ-သဒ္ဒေန ရောဂဘယာဒီနဉ္စေဝ ဝဋ္ဋဒုက္ခသ္သ စ သင္ဂဟော ဒဋ္ဌဗ္ဗော ဝိဓိနာ ဘာဝိတေ ပရိတ္တသ္သ အတ္ထေ ဥပစာရဇ္ဈာနာဒီနမ္ပိ ဣဇ္ဈနတော။
Yassa dhajaggaparittassa. Ānubhāvo vattati asammukhībhūtāhipi devatāhi sirasā sampaṭicchitabbato. Corabhayādīhīti ādi-saddena rogabhayādīnañceva vaṭṭadukkhassa ca saṅgaho daṭṭhabbo vidhinā bhāvite parittassa atthe upacārajjhānādīnampi ijjhanato.
ဒီဃဝာပီနာမကေ ဂာမေ စေတိယံ ဒီဃဝာပိစေတိယံ။ မုဒ္ဓဝေဒိကာ နာမ ဟမ္မိယံ ပရိက္ခိပိတ္ဝာ ကတဝေဒိကာ။ ဗုဒ္ဓဂတံ သတိံ ဥပဋ္ဌပေတ္ဝာ ပရိတ္တရက္ခဂုတ္တိံ အာဟ။ ပရိတ္တသ္သ အာနုဘာဝေန ဒ္ဝေ ဣဋ္ဌကာ။ပေ.။ အဋ္ဌံသု။ တထာ ဟိ တသ္မိံ နိသ္သေဏိယံ ဌိတေ။ပေ.။ အဋ္ဌံသူတိ။
Dīghavāpīnāmake gāme cetiyaṃ dīghavāpicetiyaṃ. Muddhavedikā nāma hammiyaṃ parikkhipitvā katavedikā. Buddhagataṃ satiṃ upaṭṭhapetvā parittarakkhaguttiṃ āha. Parittassa ānubhāvena dve iṭṭhakā…pe… aṭṭhaṃsu. Tathā hi tasmiṃ nisseṇiyaṃ ṭhite…pe… aṭṭhaṃsūti.
ဓဇဂ္ဂသုတ္တဝဏ္ဏနာ နိဋ္ဌိတာ။
Dhajaggasuttavaṇṇanā niṭṭhitā.
Related texts:
တိပိဋက (မူလ) • Tipiṭaka (Mūla) / သုတ္တပိဋက • Suttapiṭaka / သံယုတ္တနိကာယ • Saṃyuttanikāya / ၃. ဓဇဂ္ဂသုတ္တံ • 3. Dhajaggasuttaṃ
အဋ္ဌကထာ • Aṭṭhakathā / သုတ္တပိဋက (အဋ္ဌကထာ) • Suttapiṭaka (aṭṭhakathā) / သံယုတ္တနိကာယ (အဋ္ဌကထာ) • Saṃyuttanikāya (aṭṭhakathā) / ၃. ဓဇဂ္ဂသုတ္တဝဏ္ဏနာ • 3. Dhajaggasuttavaṇṇanā
