| Library / Tipiṭaka / д̇ибидага • Tipiṭaka / милинд̣̇абан̃хабаал̣и • Milindapañhapāḷi |
8. д̇хаммаабхисамаяабан̃хо
8. Dhammābhisamayapañho
8. ‘‘бханд̇з нааг̇асзна, яз д̇з саммаа бадибаж̇ж̇анд̇и, д̇зсам̣ саб̣б̣зсам̣ язва д̇хаммаабхисамаяо ход̇и, уд̣̇ааху гассажи на ход̇ий’’д̇и? ‘‘гассажи, махаарааж̇а, ход̇и, гассажи на ход̇ий’’д̇и. ‘‘гасса бханд̇з ход̇и, гасса на ход̇ий’’д̇и? ‘‘д̇иражчаанаг̇ад̇асса, махаарааж̇а, суббадибаннассааби д̇хаммаабхисамаяо на ход̇и, бзд̇д̇ивисаяуубабаннасса…бз… мижчаад̣̇идтигасса…бз… гухагасса…бз… маад̇угхаад̇агасса…бз… бид̇угхаад̇агасса…бз… араханд̇агхаад̇агасса…бз… сан̇гхабхзд̣̇агасса…бз… лохид̇уббаад̣̇агасса…бз… т̇зяяасам̣ваасагасса…бз… д̇ид̇т̇ияабагганд̇асса…бз… бхигкунид̣̇уусагасса…бз… д̇зрасаннам̣ г̇аругаабад̇д̇ийнам̣ ан̃н̃ад̇арам̣ аабаж̇ж̇ид̇ваа авудтид̇асса…бз… бан̣д̣агасса…бз… убхад̇об̣яан̃ж̇анагасса суббадибаннассааби д̇хаммаабхисамаяо на ход̇и…бз… яоби мануссад̣̇ахараго уунагасад̇д̇авассиго, д̇асса суббадибаннассааби д̇хаммаабхисамаяо на ход̇и. имзсам̣ ко, махаарааж̇а, сол̣асаннам̣ буг̇г̇алаанам̣ суббадибаннаанамби д̇хаммаабхисамаяо на ход̇ий’’д̇и.
8. ‘‘Bhante nāgasena, ye te sammā paṭipajjanti, tesaṃ sabbesaṃ yeva dhammābhisamayo hoti, udāhu kassaci na hotī’’ti? ‘‘Kassaci, mahārāja, hoti, kassaci na hotī’’ti. ‘‘Kassa bhante hoti, kassa na hotī’’ti? ‘‘Tiracchānagatassa, mahārāja, suppaṭipannassāpi dhammābhisamayo na hoti, pettivisayūpapannassa…pe… micchādiṭṭhikassa…pe… kuhakassa…pe… mātughātakassa…pe… pitughātakassa…pe… arahantaghātakassa…pe… saṅghabhedakassa…pe… lohituppādakassa…pe… theyyasaṃvāsakassa…pe… titthiyapakkantassa…pe… bhikkhunidūsakassa…pe… terasannaṃ garukāpattīnaṃ aññataraṃ āpajjitvā avuṭṭhitassa…pe… paṇḍakassa…pe… ubhatobyañjanakassa suppaṭipannassāpi dhammābhisamayo na hoti…pe… yopi manussadaharako ūnakasattavassiko, tassa suppaṭipannassāpi dhammābhisamayo na hoti. Imesaṃ kho, mahārāja, soḷasannaṃ puggalānaṃ suppaṭipannānampi dhammābhisamayo na hotī’’ti.
‘‘бханд̇з нааг̇асзна, яз д̇з баннараса буг̇г̇алаа вируд̣̇д̇хаа язва, д̇зсам̣ д̇хаммаабхисамаяо ход̇у ваа маа ваа ход̇у, ат̇а гзна гааран̣зна мануссад̣̇ахарагасса уунагасад̇д̇авассигасса суббадибаннассааби д̇хаммаабхисамаяо на ход̇и? зд̇т̇а д̇аава бан̃хо бхавад̇и ‘нану наама д̣̇ахарагасса на рааг̇о ход̇и, на д̣̇осо ход̇и, на мохо ход̇и, на маано ход̇и, на мижчаад̣̇идти ход̇и, на арад̇и ход̇и, на гаамавид̇агго ход̇и, амиссид̇о гилзсзхи, со наама д̣̇ахараго яуд̇д̇о жа бад̇д̇о жа арахад̇и жа жад̇д̇аари сажжаани згабадивзд̇хзна бадивиж̇жхид̇у’’’нд̇и.
‘‘Bhante nāgasena, ye te pannarasa puggalā viruddhā yeva, tesaṃ dhammābhisamayo hotu vā mā vā hotu, atha kena kāraṇena manussadaharakassa ūnakasattavassikassa suppaṭipannassāpi dhammābhisamayo na hoti? Ettha tāva pañho bhavati ‘nanu nāma daharakassa na rāgo hoti, na doso hoti, na moho hoti, na māno hoti, na micchādiṭṭhi hoti, na arati hoti, na kāmavitakko hoti, amissito kilesehi, so nāma daharako yutto ca patto ca arahati ca cattāri saccāni ekapaṭivedhena paṭivijjhitu’’’nti.
‘‘д̇ан̃н̃звзд̇т̇а , махаарааж̇а, гааран̣ам̣, язнаахам̣ гааран̣зна бхан̣аами ‘уунагасад̇д̇авассигасса суббадибаннассааби д̇хаммаабхисамаяо на ход̇ий’д̇и. яад̣̇и, махаарааж̇а, уунагасад̇д̇авассиго раж̇анийяз раж̇ж̇зяяа, д̣̇уссанийяз д̣̇уссзяяа, моханийяз муяхзяяа, мад̣̇анийяз маж̇ж̇зяяа, д̣̇идтим̣ виж̇аанзяяа, рад̇ин̃жа арад̇ин̃жа виж̇аанзяяа, гусалаагусалам̣ вид̇аггзяяа, бхавзяяа д̇асса д̇хаммаабхисамаяо, аби жа, махаарааж̇а, уунагасад̇д̇авассигасса жид̇д̇ам̣ аб̣алам̣ д̣̇уб̣б̣алам̣ барид̇д̇ам̣ аббам̣ т̇огам̣ манд̣̇ам̣ авибхууд̇ам̣, асан̇кад̇аа ниб̣б̣аанад̇хаад̇у г̇аругаа бхааригаа вибулаа махад̇ий. уунагасад̇д̇авассиго, махаарааж̇а, д̇зна д̣̇уб̣б̣алзна жид̇д̇зна барид̇д̇агзна манд̣̇зна авибхууд̇зна на саггод̇и г̇аругам̣ бхааригам̣ вибулам̣ махад̇им̣ асан̇кад̇ам̣ ниб̣б̣аанад̇хаад̇ум̣ бадивиж̇жхид̇ум̣.
‘‘Taññevettha , mahārāja, kāraṇaṃ, yenāhaṃ kāraṇena bhaṇāmi ‘ūnakasattavassikassa suppaṭipannassāpi dhammābhisamayo na hotī’ti. Yadi, mahārāja, ūnakasattavassiko rajanīye rajjeyya, dussanīye dusseyya, mohanīye muyheyya, madanīye majjeyya, diṭṭhiṃ vijāneyya, ratiñca aratiñca vijāneyya, kusalākusalaṃ vitakkeyya, bhaveyya tassa dhammābhisamayo, api ca, mahārāja, ūnakasattavassikassa cittaṃ abalaṃ dubbalaṃ parittaṃ appaṃ thokaṃ mandaṃ avibhūtaṃ, asaṅkhatā nibbānadhātu garukā bhārikā vipulā mahatī. Ūnakasattavassiko, mahārāja, tena dubbalena cittena parittakena mandena avibhūtena na sakkoti garukaṃ bhārikaṃ vipulaṃ mahatiṃ asaṅkhataṃ nibbānadhātuṃ paṭivijjhituṃ.
‘‘яат̇аа, махаарааж̇а, синзрубаб̣б̣ад̇арааж̇аа г̇аруго бхаариго вибуло маханд̇о, аби ну ко д̇ам̣, махаарааж̇а, бурисо ад̇д̇ано баагад̇игзна т̇аамаб̣алавийриязна саггун̣зяяа синзрубаб̣б̣ад̇арааж̇аанам̣ уд̣̇д̇харид̇у’’нд̇и? ‘‘на хи, бханд̇з’’д̇и. ‘‘гзна гааран̣зна махаарааж̇аа’’д̇и? ‘‘д̣̇уб̣б̣алад̇д̇аа, бханд̇з, бурисасса, маханд̇ад̇д̇аа синзрубаб̣б̣ад̇арааж̇ассаа’’д̇и. ‘‘звамзва ко, махаарааж̇а, уунагасад̇д̇авассигасса жид̇д̇ам̣ аб̣алам̣ д̣̇уб̣б̣алам̣ барид̇д̇ам̣ аббам̣ т̇огам̣ манд̣̇ам̣ авибхууд̇ам̣, асан̇кад̇аа ниб̣б̣аанад̇хаад̇у г̇аругаа бхааригаа вибулаа махад̇ий. уунагасад̇д̇авассиго д̇зна д̣̇уб̣б̣алзна жид̇д̇зна барид̇д̇зна манд̣̇зна авибхууд̇зна на саггод̇и г̇аругам̣ бхааригам̣ вибулам̣ махад̇им̣ асан̇кад̇ам̣ ниб̣б̣аанад̇хаад̇ум̣ бадивиж̇жхид̇ум̣, д̇зна гааран̣зна уунагасад̇д̇авассигасса суббадибаннассааби д̇хаммаабхисамаяо на ход̇и.
‘‘Yathā, mahārāja, sinerupabbatarājā garuko bhāriko vipulo mahanto, api nu kho taṃ, mahārāja, puriso attano pākatikena thāmabalavīriyena sakkuṇeyya sinerupabbatarājānaṃ uddharitu’’nti? ‘‘Na hi, bhante’’ti. ‘‘Kena kāraṇena mahārājā’’ti? ‘‘Dubbalattā, bhante, purisassa, mahantattā sinerupabbatarājassā’’ti. ‘‘Evameva kho, mahārāja, ūnakasattavassikassa cittaṃ abalaṃ dubbalaṃ parittaṃ appaṃ thokaṃ mandaṃ avibhūtaṃ, asaṅkhatā nibbānadhātu garukā bhārikā vipulā mahatī. Ūnakasattavassiko tena dubbalena cittena parittena mandena avibhūtena na sakkoti garukaṃ bhārikaṃ vipulaṃ mahatiṃ asaṅkhataṃ nibbānadhātuṃ paṭivijjhituṃ, tena kāraṇena ūnakasattavassikassa suppaṭipannassāpi dhammābhisamayo na hoti.
‘‘яат̇аа ваа бана, махаарааж̇а, аяам̣ махаабат̇авий д̣̇ийгхаа ааяад̇аа бут̇улаа вид̇т̇ад̇аа висаалаа вид̇т̇ин̣н̣аа вибулаа маханд̇аа, аби ну ко д̇ам̣, махаарааж̇а, махаабат̇авим̣ саггаа барид̇д̇агзна уд̣̇агаб̣инд̣̇угзна д̇змзд̇ваа уд̣̇агажигкаллам̣ гаад̇у’’нд̇и? ‘‘на хи, бханд̇з’’д̇и. ‘‘гзна гааран̣зна, махаарааж̇аа’’д̇и? ‘‘барид̇д̇ад̇д̇аа, бханд̇з, уд̣̇агаб̣инд̣̇усса, маханд̇ад̇д̇аа махаабат̇авияаа’’д̇и. ‘‘звамзва ко, махаарааж̇а, уунагасад̇д̇авассигасса жид̇д̇ам̣ аб̣алам̣ д̣̇уб̣б̣алам̣ барид̇д̇ам̣ аббам̣ т̇огам̣ манд̣̇ам̣ авибхууд̇ам̣, асан̇кад̇аа ниб̣б̣аанад̇хаад̇у д̣̇ийгхаа ааяад̇аа бут̇улаа вид̇т̇ад̇аа висаалаа вид̇т̇ин̣н̣аа вибулаа маханд̇аа. уунагасад̇д̇авассиго д̇зна д̣̇уб̣б̣алзна жид̇д̇зна барид̇д̇агзна манд̣̇зна авибхууд̇зна на саггод̇и махад̇им̣ асан̇кад̇ам̣ ниб̣б̣аанад̇хаад̇ум̣ бадивиж̇жхид̇ум̣, д̇зна гааран̣зна уунагасад̇д̇авассигасса суббадибаннассааби д̇хаммаабхисамаяо на ход̇и.
‘‘Yathā vā pana, mahārāja, ayaṃ mahāpathavī dīghā āyatā puthulā vitthatā visālā vitthiṇṇā vipulā mahantā, api nu kho taṃ, mahārāja, mahāpathaviṃ sakkā parittakena udakabindukena temetvā udakacikkhallaṃ kātu’’nti? ‘‘Na hi, bhante’’ti. ‘‘Kena kāraṇena, mahārājā’’ti? ‘‘Parittattā, bhante, udakabindussa, mahantattā mahāpathaviyā’’ti. ‘‘Evameva kho, mahārāja, ūnakasattavassikassa cittaṃ abalaṃ dubbalaṃ parittaṃ appaṃ thokaṃ mandaṃ avibhūtaṃ, asaṅkhatā nibbānadhātu dīghā āyatā puthulā vitthatā visālā vitthiṇṇā vipulā mahantā. Ūnakasattavassiko tena dubbalena cittena parittakena mandena avibhūtena na sakkoti mahatiṃ asaṅkhataṃ nibbānadhātuṃ paṭivijjhituṃ, tena kāraṇena ūnakasattavassikassa suppaṭipannassāpi dhammābhisamayo na hoti.
‘‘яат̇аа ваа бана, махаарааж̇а, аб̣алад̣̇уб̣б̣алабарид̇д̇ааббат̇огаманд̣̇аг̇г̇и бхавзяяа, аби ну ко, махаарааж̇а, д̇аавад̇агзна манд̣̇зна аг̇г̇инаа саггаа сад̣̇звагз логз анд̇хагаарам̣ вид̇хамид̇ваа аалогам̣ д̣̇ассзд̇у’’нд̇и? ‘‘на хи, бханд̇з’’д̇и. ‘‘гзна гааран̣зна махаарааж̇аа’’д̇и? ‘‘манд̣̇ад̇д̇аа, бханд̇з, аг̇г̇исса, логасса маханд̇ад̇д̇аа’’д̇и. ‘‘звамзва ко, махаарааж̇а, уунагасад̇д̇авассигасса жид̇д̇ам̣ аб̣алам̣ д̣̇уб̣б̣алам̣ барид̇д̇ам̣ аббам̣ т̇огам̣ манд̣̇ам̣ авибхууд̇ам̣, махад̇аа жа авиж̇ж̇анд̇хагаарзна бихид̇ам̣. д̇асмаа д̣̇уггарам̣ н̃аан̣аалогам̣ д̣̇ассаяид̇ум̣, д̇зна гааран̣зна уунагасад̇д̇авассигасса суббадибаннассааби д̇хаммаабхисамаяо на ход̇и.
‘‘Yathā vā pana, mahārāja, abaladubbalaparittaappathokamandaggi bhaveyya, api nu kho, mahārāja, tāvatakena mandena agginā sakkā sadevake loke andhakāraṃ vidhamitvā ālokaṃ dassetu’’nti? ‘‘Na hi, bhante’’ti. ‘‘Kena kāraṇena mahārājā’’ti? ‘‘Mandattā, bhante, aggissa, lokassa mahantattā’’ti. ‘‘Evameva kho, mahārāja, ūnakasattavassikassa cittaṃ abalaṃ dubbalaṃ parittaṃ appaṃ thokaṃ mandaṃ avibhūtaṃ, mahatā ca avijjandhakārena pihitaṃ. Tasmā dukkaraṃ ñāṇālokaṃ dassayituṃ, tena kāraṇena ūnakasattavassikassa suppaṭipannassāpi dhammābhisamayo na hoti.
‘‘яат̇аа ваа бана, махаарааж̇а, аад̇уро гисо ан̣убаримид̇агааяо саалагагими хад̇т̇инааг̇ам̣ д̇ид̇хаа бабхиннам̣ навааяад̇ам̣ д̇ивид̇т̇ад̇ам̣ д̣̇асабарин̣аахам̣ адтарад̇анигам̣ сагадтаанамубаг̇ад̇ам̣ д̣̇исваа г̇илид̇ум̣ баригад̣дхзяяа, аби ну ко со, махаарааж̇а, саалагагими саггун̣зяяа д̇ам̣ хад̇т̇инааг̇ам̣ г̇илид̇у’’нд̇и? ‘‘на хи, бханд̇з’’д̇и. ‘‘гзна гааран̣зна, махаарааж̇аа’’д̇и? ‘‘барид̇д̇ад̇д̇аа, бханд̇з, саалагагимисса, маханд̇ад̇д̇аа хад̇т̇инааг̇ассаа’’д̇и. ‘‘звамзва ко, махаарааж̇а, уунагасад̇д̇авассигасса жид̇д̇ам̣ аб̣алам̣ д̣̇уб̣б̣алам̣ барид̇д̇ам̣ аббам̣ т̇огам̣ манд̣̇ам̣ авибхууд̇ам̣, махад̇ий асан̇кад̇аа ниб̣б̣аанад̇хаад̇у. со д̇зна д̣̇уб̣б̣алзна жид̇д̇зна барид̇д̇агзна манд̣̇зна авибхууд̇зна на саггод̇и махад̇им̣ асан̇кад̇ам̣ ниб̣б̣аанад̇хаад̇ум̣ бадивиж̇жхид̇ум̣, д̇зна гааран̣зна уунагасад̇д̇авассигасса суббадибаннассааби д̇хаммаабхисамаяо на ход̇ий’’д̇и. ‘‘саад̇ху, бханд̇з нааг̇асзна, звамзд̇ам̣ д̇ат̇аа самбадижчаамий’’д̇и.
‘‘Yathā vā pana, mahārāja, āturo kiso aṇuparimitakāyo sālakakimi hatthināgaṃ tidhā pabhinnaṃ navāyataṃ tivitthataṃ dasapariṇāhaṃ aṭṭharatanikaṃ sakaṭṭhānamupagataṃ disvā gilituṃ parikaḍḍheyya, api nu kho so, mahārāja, sālakakimi sakkuṇeyya taṃ hatthināgaṃ gilitu’’nti? ‘‘Na hi, bhante’’ti. ‘‘Kena kāraṇena, mahārājā’’ti? ‘‘Parittattā, bhante, sālakakimissa, mahantattā hatthināgassā’’ti. ‘‘Evameva kho, mahārāja, ūnakasattavassikassa cittaṃ abalaṃ dubbalaṃ parittaṃ appaṃ thokaṃ mandaṃ avibhūtaṃ, mahatī asaṅkhatā nibbānadhātu. So tena dubbalena cittena parittakena mandena avibhūtena na sakkoti mahatiṃ asaṅkhataṃ nibbānadhātuṃ paṭivijjhituṃ, tena kāraṇena ūnakasattavassikassa suppaṭipannassāpi dhammābhisamayo na hotī’’ti. ‘‘Sādhu, bhante nāgasena, evametaṃ tathā sampaṭicchāmī’’ti.
д̇хаммаабхисамаяабан̃хо адтамо.
Dhammābhisamayapañho aṭṭhamo.
