| Library / Tipiṭaka / திபிடக • Tipiṭaka / அபதா³ன-அட்ட²கதா² • Apadāna-aṭṭhakathā |
9. த⁴ம்மசக்கிகத்தே²ரஅபதா³னவண்ணனா
9. Dhammacakkikattheraapadānavaṇṇanā
ஸித்³த⁴த்த²ஸ்ஸ ப⁴க³வதோதிஆதி³கங் ஆயஸ்மதோ த⁴ம்மசக்கிகத்தே²ரஸ்ஸ அபதா³னங். அயம்பி புரிமபு³த்³தே⁴ஸு கதாதி⁴காரோ தத்த² தத்த² ப⁴வே விவட்டூபனிஸ்ஸயானி புஞ்ஞானி உபசினந்தோ ஸித்³த⁴த்த²ஸ்ஸ ப⁴க³வதோ காலே ஏகஸ்மிங் குலகே³ஹே நிப்³ப³த்தோ வுத்³தி⁴ப்பத்தோ புத்ததா³ரேஹி வட்³டி⁴தோ விப⁴வஸம்பன்னோ மஹாபோ⁴கோ³, ஸோ ரதனத்தயே பஸன்னோ ஸத்³தா⁴ஜாதோ த⁴ம்மஸபா⁴யங் த⁴ம்மாஸனஸ்ஸ பிட்டி²தோ ரதனமயங் த⁴ம்மசக்கங் காரெத்வா பூஜேஸி. ஸோ தேன புஞ்ஞகம்மேன தே³வமனுஸ்ஸேஸு நிப்³ப³த்தட்டா²னேஸு ஸக்கஸம்பத்திங் சக்கவத்திஸம்பத்திஞ்ச அனுப⁴வித்வா கமேன இமஸ்மிங் பு³த்³து⁴ப்பாதே³ ஏகஸ்மிங் குலகே³ஹே உப்பன்னோ விப⁴வஸம்பன்னோ ஸஞ்ஜாதஸத்³தோ⁴ பப்³ப³ஜித்வா விபஸ்ஸனங் வட்³டெ⁴த்வா நசிரஸ்ஸேவ அரஹத்தங் பத்வா புப்³பே³ கதகுஸலனாமஸதி³ஸனாமேன த⁴ம்மசக்கிகத்தே²ரோதி பாகடோ ஜாதோ அஹோஸி.
Siddhatthassa bhagavatotiādikaṃ āyasmato dhammacakkikattherassa apadānaṃ. Ayampi purimabuddhesu katādhikāro tattha tattha bhave vivaṭṭūpanissayāni puññāni upacinanto siddhatthassa bhagavato kāle ekasmiṃ kulagehe nibbatto vuddhippatto puttadārehi vaḍḍhito vibhavasampanno mahābhogo, so ratanattaye pasanno saddhājāto dhammasabhāyaṃ dhammāsanassa piṭṭhito ratanamayaṃ dhammacakkaṃ kāretvā pūjesi. So tena puññakammena devamanussesu nibbattaṭṭhānesu sakkasampattiṃ cakkavattisampattiñca anubhavitvā kamena imasmiṃ buddhuppāde ekasmiṃ kulagehe uppanno vibhavasampanno sañjātasaddho pabbajitvā vipassanaṃ vaḍḍhetvā nacirasseva arahattaṃ patvā pubbe katakusalanāmasadisanāmena dhammacakkikattheroti pākaṭo jāto ahosi.
102. ஸோ புஞ்ஞஸம்பா⁴ரானுரூபேன பத்தஅரஹத்தப²லோ அத்தனோ புப்³ப³கம்மங் ஸரித்வா ஜாதஸோமனஸ்ஸோ புப்³ப³சரிதாபதா³னங் பகாஸெந்தோ ஸித்³த⁴த்த²ஸ்ஸ ப⁴க³வதோதிஆதி³மாஹ. ஸீஹாஸனஸ்ஸ ஸம்முகா²தி ஸீஹஸ்ஸ ப⁴க³வதோ நிஸின்னஸ்ஸ ஸம்முகா² பு³த்³தா⁴ஸனஸ்ஸ அபி⁴முக²ட்டா²னேதி அத்தோ², த⁴ம்மசக்கங் மே ட²பிதந்தி மயா த⁴ம்மசக்காகாரேன உப⁴தோ ஸீஹரூபங் த³ஸ்ஸெத்வா மஜ்ஜே² ஆதா³ஸஸதி³ஸங் காரெத்வா கதங் த⁴ம்மசக்கங் ட²பிதங் பூஜிதங். கிங் பூ⁴தங்? விஞ்ஞூஹி மேதா⁴வீஹி ‘‘அதீவ ஸுந்த³ர’’ந்தி வண்ணிதங் தோ²மிதங் ஸுகதங் த⁴ம்மசக்கந்தி ஸம்ப³ந்தோ⁴.
102. So puññasambhārānurūpena pattaarahattaphalo attano pubbakammaṃ saritvā jātasomanasso pubbacaritāpadānaṃ pakāsento siddhatthassa bhagavatotiādimāha. Sīhāsanassa sammukhāti sīhassa bhagavato nisinnassa sammukhā buddhāsanassa abhimukhaṭṭhāneti attho, dhammacakkaṃ me ṭhapitanti mayā dhammacakkākārena ubhato sīharūpaṃ dassetvā majjhe ādāsasadisaṃ kāretvā kataṃ dhammacakkaṃ ṭhapitaṃ pūjitaṃ. Kiṃ bhūtaṃ? Viññūhi medhāvīhi ‘‘atīva sundara’’nti vaṇṇitaṃ thomitaṃ sukataṃ dhammacakkanti sambandho.
103. சாருவண்ணோவ ஸோபா⁴மீதி ஸுவண்ணவண்ணோ இவ ஸோபா⁴மி விரோசாமீதி அத்தோ². ‘‘சதுவண்ணேஹி ஸோபா⁴மீ’’திபி பாடோ², தஸ்ஸ க²த்தியப்³ராஹ்மணவெஸ்ஸஸுத்³த³ஜாதிஸங்கா²தேஹி சதூஹி வண்ணேஹி ஸோபா⁴மி விரோசாமீதி அத்தோ². ஸயொக்³க³ப³லவாஹனோதி ஸுவண்ணஸிவிகாதீ³ஹி யொக்³கே³ஹி ச ஸேனாபதிமஹாமத்தாதீ³ஹி ஸேவகேஹி ப³லேஹி ச ஹத்தி²அஸ்ஸரத²ஸங்கா²தேஹி வாஹனேஹி ச ஸஹிதோதி அத்தோ². ப³ஹுஜ்ஜனா ப³ஹவோ மனுஸ்ஸா அனுயந்தா மமானுவத்தந்தா நிச்சங் நிச்சகாலங் பரிவாரெந்தீதி ஸம்ப³ந்தோ⁴. ஸேஸங் ஸுவிஞ்ஞெய்யமேவாதி.
103.Cāruvaṇṇovasobhāmīti suvaṇṇavaṇṇo iva sobhāmi virocāmīti attho. ‘‘Catuvaṇṇehi sobhāmī’’tipi pāṭho, tassa khattiyabrāhmaṇavessasuddajātisaṅkhātehi catūhi vaṇṇehi sobhāmi virocāmīti attho. Sayoggabalavāhanoti suvaṇṇasivikādīhi yoggehi ca senāpatimahāmattādīhi sevakehi balehi ca hatthiassarathasaṅkhātehi vāhanehi ca sahitoti attho. Bahujjanā bahavo manussā anuyantā mamānuvattantā niccaṃ niccakālaṃ parivārentīti sambandho. Sesaṃ suviññeyyamevāti.
த⁴ம்மசக்கிகத்தே²ரஅபதா³னவண்ணனா ஸமத்தா.
Dhammacakkikattheraapadānavaṇṇanā samattā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / கு²த்³த³கனிகாய • Khuddakanikāya / அபதா³னபாளி • Apadānapāḷi / 9. த⁴ம்மசக்கிகத்தே²ரஅபதா³னங் • 9. Dhammacakkikattheraapadānaṃ
