| Library / Tipiṭaka / ཏིཔིཊཀ • Tipiṭaka / མཛྫྷིམནིཀཱཡ (ཊཱིཀཱ) • Majjhimanikāya (ṭīkā) |
༩. དྷམྨཙེཏིཡསུཏྟཝཎྞནཱ
9. Dhammacetiyasuttavaṇṇanā
༣༦༤. མེདཝཎྞཱ ཨུལུ༹པཝཎྞཱ ཙ ཏཏྠ ཏཏྠ པཱསཱཎཱ ཨུསྶནྣཱ ཨཧེསུནྟི མེདཱལུ༹པནྟི གཱམསྶ སམཉྙཱ ཛཱཏཱ། ཨུལུ༹པཝཎྞཱཏི ཙནྡསམཱནཝཎྞཏཱཡ མེདཔཱསཱཎཱ ཝུཏྟཱཏི ཀེཙི། ཨཊྛཀཐཱཡཾ པན ‘‘མེདཝཎྞཱ པཱསཱཎཱ ཀིརེཏྠ ཨུསྶནྣཱ ཨཧེསུ’’ནྟི ཨིདཾ ཝུཏྟཾ། ཨསྶཱཏི སེནཱཔཏིསྶ། ཀཐཱསམུཊྛཱཔནཏྠནྟི མལླིཀཱཡ སོཀཝིནོདནདྷམྨཀཐཱསམུཊྛཱཔནཏྠཾ།
364. Medavaṇṇā uḷupavaṇṇā ca tattha tattha pāsāṇā ussannā ahesunti medāḷupanti gāmassa samaññā jātā. Uḷupavaṇṇāti candasamānavaṇṇatāya medapāsāṇā vuttāti keci. Aṭṭhakathāyaṃ pana ‘‘medavaṇṇā pāsāṇā kirettha ussannā ahesu’’nti idaṃ vuttaṃ. Assāti senāpatissa. Kathāsamuṭṭhāpanatthanti mallikāya sokavinodanadhammakathāsamuṭṭhāpanatthaṃ.
རཉྙཱཏི པསེནདཱིཀོསལརཉྙཱ། མཧཙྩཱཏི མཧཏིཡཱ། པདཝིཔལླཱསེན ཙེཏཾ ཝུཏྟཾ། པསཱདམརཧནྟཱིཏི པཱསཱདིཀཱནི། ཏེནཱཧ ‘‘སཧ རཉྫནཀཱནཱི’’ཏི། ཡཱནི པན པཱསཱདིཀཱནི, ཏཱནི པསྶིཏུཾ ཡུཏྟཱནི། པཱསཱདིཀཱནཱིཏི ཝཱ སདྡཧནསཧིཏཱནི། ཏེནཱཧ ‘‘པསཱདཛནཀཱནཱི’’ཏི། ‘‘ཨཔྤཱབཱདྷ’’ནྟི ཨཱདཱིསུ ཝིཡ ཨཔྤསདྡོ ཨབྷཱཝཏྠོཏི ཨཱཧ ‘‘ནིསྶདྡཱནཱི’’ཏི། ཨནིཡམཏྠཝཱཙཱི ཡ-སདྡོ ཨནིཡམཱཀཱརཝཱཙཀོཔི ཧོཏཱིཏི ‘‘ཡཏྠཱ’’ཏི པདསྶ ‘‘ཡཱདིསེསཱུ’’ཏིཨཱདིམཱཧ། ཏཐཱ ཧི ཨངྒུལིམཱལསུཏྟེ (མ॰ ནི॰ ཨཊྛ॰ ༢.༣༤༧ ཨཱདཡོ) ‘‘ཡསྶ ཁོ’’ཏི པདསྶ ‘‘ཡཱདིསསྶ ཁོ’’ཏི ཨཏྠོ ཝུཏྟོ།
Raññāti pasenadīkosalaraññā. Mahaccāti mahatiyā. Padavipallāsena cetaṃ vuttaṃ. Pasādamarahantīti pāsādikāni. Tenāha ‘‘saha rañjanakānī’’ti. Yāni pana pāsādikāni, tāni passituṃ yuttāni. Pāsādikānīti vā saddahanasahitāni. Tenāha ‘‘pasādajanakānī’’ti. ‘‘Appābādha’’nti ādīsu viya appasaddo abhāvatthoti āha ‘‘nissaddānī’’ti. Aniyamatthavācī ya-saddo aniyamākāravācakopi hotīti ‘‘yatthā’’ti padassa ‘‘yādisesū’’tiādimāha. Tathā hi aṅgulimālasutte (ma. ni. aṭṭha. 2.347 ādayo) ‘‘yassa kho’’ti padassa ‘‘yādisassa kho’’ti attho vutto.
༣༦༦. པཊིཙྪདནྟི པཊིཙྪཱདཀཾ། རཱཛཀཀུདྷབྷཎྜཱནཱིཏི རཱཛབྷཎྜབྷཱུཏཱནི། རཧཱཡཏཱིཏི རཧོ ཀརོཏི, མཾ ཨཛ྄ཛྷེསཏཱིཏི ཨཏྠོ།
366.Paṭicchadanti paṭicchādakaṃ. Rājakakudhabhaṇḍānīti rājabhaṇḍabhūtāni. Rahāyatīti raho karoti, maṃ ajjhesatīti attho.
༣༦༧. ཡཐཱསབྷཱཝཏོ ཉེཡྻཾ དྷཱརེཏི ཨཝདྷཱརེཏཱིཏི དྷམྨོ, ཉཱཎནྟི ཨཱཧ ‘‘པཙྩཀྑཉཱཎསངྑཱཏསྶ དྷམྨསྶཱ’’ཏི། ཨནུནཡོཏི ཨནུགཙྪནཀོ། དིཊྛེན ཧི ཨདིཊྛསྶ ཨནུམཱནཾ། ཏེནཱཧ ‘‘ཨནུམཱནཾ ཨནུབུདྡྷཱི’’ཏི། ཨཱཔཱཎཀོཊིཀནྟི ཡཱཝ པཱཎཀོཊི, ཏཱཝ ཛཱིཝིཏཔརིཡོསཱནཾ། ཨེཏནྟི དྷམྨནྭཡསངྑཱཏཾ ཨནུམཱནཾ། ཨེཝནྟི ‘‘ཨིདྷ པནཱཧ’’ནྟི ཝུཏྟཔྤཀཱརེན།
367. Yathāsabhāvato ñeyyaṃ dhāreti avadhāretīti dhammo, ñāṇanti āha ‘‘paccakkhañāṇasaṅkhātassa dhammassā’’ti. Anunayoti anugacchanako. Diṭṭhena hi adiṭṭhassa anumānaṃ. Tenāha ‘‘anumānaṃ anubuddhī’’ti. Āpāṇakoṭikanti yāva pāṇakoṭi, tāva jīvitapariyosānaṃ. Etanti dhammanvayasaṅkhātaṃ anumānaṃ. Evanti ‘‘idha panāha’’nti vuttappakārena.
༣༦༩. ཙཀྑུཾ ཨབནྡྷནྟེ ཝིཡཱཏི ཨཔཱསཱདིཀཏཱཡ པསྶནྟཱནཾ ཙཀྑུཾ ཨཏྟནི ཨབནྡྷནྟེ ཝིཡ། ཀུལསནྟཱནཱནུབནྡྷོ རོགོ ཀུལརོགོ། ཨུལཱ༹རནྟི སཱནུབྷཱཝཾ། ཡོ ཧི ཨཱནུབྷཱཝསམྤནྣོ, ཏཾ ‘‘མཧེསཀྑ’’ནྟི ཝདནྟི། ཨརཧཏྟཾ གཎྷནྟོཏི ཨུཀྐཊྛནིདྡེསོཡཾ, ཧེཊྛིམཕལཱནི གཎྷནྟོཔི།
369.Cakkhuṃ abandhante viyāti apāsādikatāya passantānaṃ cakkhuṃ attani abandhante viya. Kulasantānānubandho rogo kularogo. Uḷāranti sānubhāvaṃ. Yo hi ānubhāvasampanno, taṃ ‘‘mahesakkha’’nti vadanti. Arahattaṃ gaṇhantoti ukkaṭṭhaniddesoyaṃ, heṭṭhimaphalāni gaṇhantopi.
༣༧༣. ཛཱིཝིཀཱ ཛཱིཝིཏཝུཏྟི།
373. Jīvikā jīvitavutti.
༣༧༤. དྷམྨཾ ཙེཏེཏི སཾཝེདེཏི ཨེཏེཧཱིཏི དྷམྨཙེཏིཡཱནི, དྷམྨསྶ པཱུཛཱཝཙནཱནི། ནནུ ཙེཏཱནི བུདྡྷསངྒྷགུཎདཱིཔནཱནིཔི སནྟི? ཀཐཾ ‘‘དྷམྨཙེཏིཡཱནཱིཏི དྷམྨསྶ ཙིཏྟཱིཀཱརཝཙནཱནཱི’’ཏི ཝུཏྟནྟི ཨཱཧ ‘‘ཏཱིསུ ཧཱི’’ཏིཨཱདི། ཏཏྠ ཡསྨཱ བུདྡྷརཏནམཱུལཀཱནི སེསརཏནཱནི ཏསྶ ཝསེན ལདྡྷབྦཏོ། ཀོསལརཉྙཱ ཙེཏྠ བུདྡྷགཱརཝེན དྷམྨསངྒྷགཱརཝཾ པཝེདིཏཾ, ཏསྨཱ ‘‘བྷགཝཏི ཙིཏྟཱིཀཱརེ ཀཏེ དྷམྨོཔི ཀཏོཝ ཧོཏཱི’’ཏི ཝུཏྟཾ། ཡསྨཱ ཙ རཏནཏྟཡཔསཱདཔུབྦིཀཱ སཱསནེ སམྨཱཔཊིཔཏྟི, ཏསྨཱ ཝུཏྟཾ – ‘‘ཨཱདིབྲཧྨཙརིཡཀཱནཱིཏི མགྒབྲཧྨཙརིཡསྶ ཨཱདིབྷཱུཏཱནཱི’’ཏི། སེསཾ སུཝིཉྙེཡྻམེཝ།
374. Dhammaṃ ceteti saṃvedeti etehīti dhammacetiyāni, dhammassa pūjāvacanāni. Nanu cetāni buddhasaṅghaguṇadīpanānipi santi? Kathaṃ ‘‘dhammacetiyānīti dhammassa cittīkāravacanānī’’ti vuttanti āha ‘‘tīsu hī’’tiādi. Tattha yasmā buddharatanamūlakāni sesaratanāni tassa vasena laddhabbato. Kosalaraññā cettha buddhagāravena dhammasaṅghagāravaṃ paveditaṃ, tasmā ‘‘bhagavati cittīkāre kate dhammopi katova hotī’’ti vuttaṃ. Yasmā ca ratanattayapasādapubbikā sāsane sammāpaṭipatti, tasmā vuttaṃ – ‘‘ādibrahmacariyakānīti maggabrahmacariyassa ādibhūtānī’’ti. Sesaṃ suviññeyyameva.
དྷམྨཙེཏིཡསུཏྟཝཎྞནཱཡ ལཱིནཏྠཔྤཀཱསནཱ སམཏྟཱ།
Dhammacetiyasuttavaṇṇanāya līnatthappakāsanā samattā.
Related texts:
ཏིཔིཊཀ (མཱུལ) • Tipiṭaka (Mūla) / སུཏྟཔིཊཀ • Suttapiṭaka / མཛྫྷིམནིཀཱཡ • Majjhimanikāya / ༩. དྷམྨཙེཏིཡསུཏྟཾ • 9. Dhammacetiyasuttaṃ
ཨཊྛཀཐཱ • Aṭṭhakathā / སུཏྟཔིཊཀ (ཨཊྛཀཐཱ) • Suttapiṭaka (aṭṭhakathā) / མཛྫྷིམནིཀཱཡ (ཨཊྛཀཐཱ) • Majjhimanikāya (aṭṭhakathā) / ༩. དྷམྨཙེཏིཡསུཏྟཝཎྞནཱ • 9. Dhammacetiyasuttavaṇṇanā
