| Library / Tipiṭaka / တိပိဋက • Tipiṭaka / ကထာဝတ္ထုပာဠိ • Kathāvatthupāḷi |
၁၈. အဋ္ဌာရသမဝဂ္ဂော
18. Aṭṭhārasamavaggo
(၁၇၈) ၂. ဓမ္မဒေသနာကထာ
(178) 2. Dhammadesanākathā
၈၀၄. န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ ကေန ဒေသိတောတိ? အဘိနိမ္မိတေန ဒေသိတောတိ။ အဘိနိမ္မိတော ဇိနော သတ္ထာ သမ္မာသမ္ဗုဒ္ဓော သဗ္ဗညူ သဗ္ဗဒသ္သာဝီ ဓမ္မသ္သာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ။ပေ.။။
804. Na vattabbaṃ – ‘‘buddhena bhagavatā dhammo desito’’ti? Āmantā. Kena desitoti? Abhinimmitena desitoti. Abhinimmito jino satthā sammāsambuddho sabbaññū sabbadassāvī dhammassāmī dhammappaṭisaraṇoti? Na hevaṃ vattabbe…pe….
န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ ကေန ဒေသိတောတိ? အာယသ္မတာ အာနန္ဒေန ဒေသိတောတိ။ အာယသ္မာ အာနန္ဒော ဇိနော သတ္ထာ သမ္မာသမ္ဗုဒ္ဓော သဗ္ဗညူ သဗ္ဗဒသ္သာဝီ ဓမ္မသ္သာမီ ဓမ္မပ္ပဋိသရဏောတိ? န ဟေဝံ ဝတ္တဗ္ဗေ။ပေ.။။
Na vattabbaṃ – ‘‘buddhena bhagavatā dhammo desito’’ti? Āmantā. Kena desitoti? Āyasmatā ānandena desitoti. Āyasmā ānando jino satthā sammāsambuddho sabbaññū sabbadassāvī dhammassāmī dhammappaṭisaraṇoti? Na hevaṃ vattabbe…pe….
၈၀၅. န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ နနု ဝုတ္တံ ဘဂဝတာ – ‘‘သံခိတ္တေနပိ ခော အဟံ, သာရိပုတ္တ, ဓမ္မံ ဒေသေယ္ယံ; ဝိတ္ထာရေနပိ ခော အဟံ, သာရိပုတ္တ, ဓမ္မံ ဒေသေယ္ယံ; သံခိတ္တဝိတ္ထာရေနပိ ခော အဟံ, သာရိပုတ္တ, ဓမ္မံ ဒေသေယ္ယံ; အညာတာရော စ ဒုလ္လဘာ’’တိ 1! အတ္ထေဝ သုတ္တန္တောတိ? အာမန္တာ။ တေန ဟိ ဗုဒ္ဓေန ဘဂဝတာ ဓမ္မော ဒေသိတောတိ။
805. Na vattabbaṃ – ‘‘buddhena bhagavatā dhammo desito’’ti? Āmantā. Nanu vuttaṃ bhagavatā – ‘‘saṃkhittenapi kho ahaṃ, sāriputta, dhammaṃ deseyyaṃ; vitthārenapi kho ahaṃ, sāriputta, dhammaṃ deseyyaṃ; saṃkhittavitthārenapi kho ahaṃ, sāriputta, dhammaṃ deseyyaṃ; aññātāro ca dullabhā’’ti 2! Attheva suttantoti? Āmantā. Tena hi buddhena bhagavatā dhammo desitoti.
၈၀၆. န ဝတ္တဗ္ဗံ – ‘‘ဗုဒ္ဓေန ဘဂဝတာ ဓမ္မော ဒေသိတော’’တိ? အာမန္တာ။ နနု ဝုတ္တံ ဘဂဝတာ – ‘‘‘အဘိညာယာဟံ, ဘိက္ခဝေ, ဓမ္မံ ဒေသေမိ, နော အနဘိညာယ; သနိဒာနာဟံ, ဘိက္ခဝေ, ဓမ္မံ ဒေသေမိ, နော အနိဒာနံ ; သပ္ပာဋိဟာရိယာဟံ, ဘိက္ခဝေ, ဓမ္မံ ဒေသေမိ, နော အပ္ပာဋိဟာရိယံ; တသ္သ 3 မယ္ဟံ, ဘိက္ခဝေ, အဘိညာယ ဓမ္မံ ဒေသယတော နော အနဘိညာယ, သနိဒာနံ ဓမ္မံ ဒေသယတော နော အနိဒာနံ, သပ္ပာဋိဟာရိယံ ဓမ္မံ ဒေသယတော နော အပ္ပာဋိဟာရိယံ ကရဏီယော ဩဝာဒော ကရဏီယာ အနုသာသနီ; အလဉ္စ ပန ဝော, ဘိက္ခဝေ, တုဋ္ဌိယာ အလံ အတ္တမနတာယ အလံ သောမနသ္သာယ – သမ္မာသမ္ဗုဒ္ဓော ဘဂဝာ, သ္ဝာက္ခာတော ဓမ္မော, သုပ္ပဋိပန္နော သင္ဃော’တိ။ ဣမသ္မိဉ္စ ပန ဝေယ္ယာကရဏသ္မိံ ဘညမာနေ ဒသသဟသ္သိလောကဓာတု အကမ္ပိတ္ထာ’’တိ 4! အတ္ထေဝ သုတ္တန္တောတိ? အာမန္တာ။ တေန ဟိ ဗုဒ္ဓေန ဘဂဝတာ ဓမ္မော ဒေသိတောတိ။
806. Na vattabbaṃ – ‘‘buddhena bhagavatā dhammo desito’’ti? Āmantā. Nanu vuttaṃ bhagavatā – ‘‘‘abhiññāyāhaṃ, bhikkhave, dhammaṃ desemi, no anabhiññāya; sanidānāhaṃ, bhikkhave, dhammaṃ desemi, no anidānaṃ ; sappāṭihāriyāhaṃ, bhikkhave, dhammaṃ desemi, no appāṭihāriyaṃ; tassa 5 mayhaṃ, bhikkhave, abhiññāya dhammaṃ desayato no anabhiññāya, sanidānaṃ dhammaṃ desayato no anidānaṃ, sappāṭihāriyaṃ dhammaṃ desayato no appāṭihāriyaṃ karaṇīyo ovādo karaṇīyā anusāsanī; alañca pana vo, bhikkhave, tuṭṭhiyā alaṃ attamanatāya alaṃ somanassāya – sammāsambuddho bhagavā, svākkhāto dhammo, suppaṭipanno saṅgho’ti. Imasmiñca pana veyyākaraṇasmiṃ bhaññamāne dasasahassilokadhātu akampitthā’’ti 6! Attheva suttantoti? Āmantā. Tena hi buddhena bhagavatā dhammo desitoti.
ဓမ္မဒေသနာကထာ နိဋ္ဌိတာ။
Dhammadesanākathā niṭṭhitā.
Footnotes:
Related texts:
အဋ္ဌကထာ • Aṭṭhakathā / အဘိဓမ္မပိဋက (အဋ္ဌကထာ) • Abhidhammapiṭaka (aṭṭhakathā) / ပဉ္စပကရဏ-အဋ္ဌကထာ • Pañcapakaraṇa-aṭṭhakathā / ၂. ဓမ္မဒေသနာကထာဝဏ္ဏနာ • 2. Dhammadesanākathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-မူလဋီကာ • Pañcapakaraṇa-mūlaṭīkā / ၂. ဓမ္မဒေသနာကထာဝဏ္ဏနာ • 2. Dhammadesanākathāvaṇṇanā
ဋီကာ • Tīkā / အဘိဓမ္မပိဋက (ဋီကာ) • Abhidhammapiṭaka (ṭīkā) / ပဉ္စပကရဏ-အနုဋီကာ • Pañcapakaraṇa-anuṭīkā / ၂. ဓမ္မဒေသနာကထာဝဏ္ဏနာ • 2. Dhammadesanākathāvaṇṇanā
