| Library / Tipiṭaka / තිපිටක • Tipiṭaka / කථාවත්‌ථුපාළි • Kathāvatthupāḷi |
18. අට්‌ඨාරසමවග්‌ගො
18. Aṭṭhārasamavaggo
(178) 2. ධම්‌මදෙසනාකථා
(178) 2. Dhammadesanākathā
804. න වත්‌තබ්‌බං – ‘‘බුද්‌ධෙන භගවතා ධම්‌මො දෙසිතො’’ති? ආමන්‌තා. කෙන දෙසිතොති? අභිනිම්‌මිතෙන දෙසිතොති. අභිනිම්‌මිතො ජිනො සත්‌ථා සම්‌මාසම්‌බුද්‌ධො සබ්‌බඤ්‌ඤූ සබ්‌බදස්‌සාවී ධම්‌මස්‌සාමී ධම්‌මප්‌පටිසරණොති? න හෙවං වත්‌තබ්‌බෙ…පෙ.….
804. Na vattabbaṃ – ‘‘buddhena bhagavatā dhammo desito’’ti? Āmantā. Kena desitoti? Abhinimmitena desitoti. Abhinimmito jino satthā sammāsambuddho sabbaññū sabbadassāvī dhammassāmī dhammappaṭisaraṇoti? Na hevaṃ vattabbe…pe….
න වත්‌තබ්‌බං – ‘‘බුද්‌ධෙන භගවතා ධම්‌මො දෙසිතො’’ති? ආමන්‌තා. කෙන දෙසිතොති? ආයස්‌මතා ආනන්‌දෙන දෙසිතොති. ආයස්‌මා ආනන්‌දො ජිනො සත්‌ථා සම්‌මාසම්‌බුද්‌ධො සබ්‌බඤ්‌ඤූ සබ්‌බදස්‌සාවී ධම්‌මස්‌සාමී ධම්‌මප්‌පටිසරණොති? න හෙවං වත්‌තබ්‌බෙ…පෙ.….
Na vattabbaṃ – ‘‘buddhena bhagavatā dhammo desito’’ti? Āmantā. Kena desitoti? Āyasmatā ānandena desitoti. Āyasmā ānando jino satthā sammāsambuddho sabbaññū sabbadassāvī dhammassāmī dhammappaṭisaraṇoti? Na hevaṃ vattabbe…pe….
805. න වත්‌තබ්‌බං – ‘‘බුද්‌ධෙන භගවතා ධම්‌මො දෙසිතො’’ති? ආමන්‌තා. නනු වුත්‌තං භගවතා – ‘‘සංඛිත්‌තෙනපි ඛො අහං, සාරිපුත්‌ත, ධම්‌මං දෙසෙය්‍යං; විත්‌ථාරෙනපි ඛො අහං, සාරිපුත්‌ත, ධම්‌මං දෙසෙය්‍යං; සංඛිත්‌තවිත්‌ථාරෙනපි ඛො අහං, සාරිපුත්‌ත, ධම්‌මං දෙසෙය්‍යං; අඤ්‌ඤාතාරො ච දුල්‌ලභා’’ති 1! අත්‌ථෙව සුත්‌තන්‌තොති? ආමන්‌තා. තෙන හි බුද්‌ධෙන භගවතා ධම්‌මො දෙසිතොති.
805. Na vattabbaṃ – ‘‘buddhena bhagavatā dhammo desito’’ti? Āmantā. Nanu vuttaṃ bhagavatā – ‘‘saṃkhittenapi kho ahaṃ, sāriputta, dhammaṃ deseyyaṃ; vitthārenapi kho ahaṃ, sāriputta, dhammaṃ deseyyaṃ; saṃkhittavitthārenapi kho ahaṃ, sāriputta, dhammaṃ deseyyaṃ; aññātāro ca dullabhā’’ti 2! Attheva suttantoti? Āmantā. Tena hi buddhena bhagavatā dhammo desitoti.
806. න වත්‌තබ්‌බං – ‘‘බුද්‌ධෙන භගවතා ධම්‌මො දෙසිතො’’ති? ආමන්‌තා. නනු වුත්‌තං භගවතා – ‘‘‘අභිඤ්‌ඤායාහං, භික්‌ඛවෙ, ධම්‌මං දෙසෙමි, නො අනභිඤ්‌ඤාය; සනිදානාහං, භික්‌ඛවෙ, ධම්‌මං දෙසෙමි, නො අනිදානං ; සප්‌පාටිහාරියාහං, භික්‌ඛවෙ, ධම්‌මං දෙසෙමි, නො අප්‌පාටිහාරියං; තස්‌ස 3 මය්‌හං, භික්‌ඛවෙ, අභිඤ්‌ඤාය ධම්‌මං දෙසයතො නො අනභිඤ්‌ඤාය, සනිදානං ධම්‌මං දෙසයතො නො අනිදානං, සප්‌පාටිහාරියං ධම්‌මං දෙසයතො නො අප්‌පාටිහාරියං කරණීයො ඔවාදො කරණීයා අනුසාසනී; අලඤ්‌ච පන වො, භික්‌ඛවෙ, තුට්‌ඨියා අලං අත්‌තමනතාය අලං සොමනස්‌සාය – සම්‌මාසම්‌බුද්‌ධො භගවා, ස්‌වාක්‌ඛාතො ධම්‌මො, සුප්‌පටිපන්‌නො සඞ්‌ඝො’ති. ඉමස්‌මිඤ්‌ච පන වෙය්‍යාකරණස්‌මිං භඤ්‌ඤමානෙ දසසහස්‌සිලොකධාතු අකම්‌පිත්‌ථා’’ති 4! අත්‌ථෙව සුත්‌තන්‌තොති? ආමන්‌තා. තෙන හි බුද්‌ධෙන භගවතා ධම්‌මො දෙසිතොති.
806. Na vattabbaṃ – ‘‘buddhena bhagavatā dhammo desito’’ti? Āmantā. Nanu vuttaṃ bhagavatā – ‘‘‘abhiññāyāhaṃ, bhikkhave, dhammaṃ desemi, no anabhiññāya; sanidānāhaṃ, bhikkhave, dhammaṃ desemi, no anidānaṃ ; sappāṭihāriyāhaṃ, bhikkhave, dhammaṃ desemi, no appāṭihāriyaṃ; tassa 5 mayhaṃ, bhikkhave, abhiññāya dhammaṃ desayato no anabhiññāya, sanidānaṃ dhammaṃ desayato no anidānaṃ, sappāṭihāriyaṃ dhammaṃ desayato no appāṭihāriyaṃ karaṇīyo ovādo karaṇīyā anusāsanī; alañca pana vo, bhikkhave, tuṭṭhiyā alaṃ attamanatāya alaṃ somanassāya – sammāsambuddho bhagavā, svākkhāto dhammo, suppaṭipanno saṅgho’ti. Imasmiñca pana veyyākaraṇasmiṃ bhaññamāne dasasahassilokadhātu akampitthā’’ti 6! Attheva suttantoti? Āmantā. Tena hi buddhena bhagavatā dhammo desitoti.
ධම්‌මදෙසනාකථා නිට්‌ඨිතා.
Dhammadesanākathā niṭṭhitā.
Footnotes:
Related texts:
අට්‌ඨකථා • Aṭṭhakathā / අභිධම්‌මපිටක (අට්‌ඨකථා) • Abhidhammapiṭaka (aṭṭhakathā) / පඤ්‌චපකරණ-අට්‌ඨකථා • Pañcapakaraṇa-aṭṭhakathā / 2. ධම්‌මදෙසනාකථාවණ්‌ණනා • 2. Dhammadesanākathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-මූලටීකා • Pañcapakaraṇa-mūlaṭīkā / 2. ධම්‌මදෙසනාකථාවණ්‌ණනා • 2. Dhammadesanākathāvaṇṇanā
ටීකා • Tīkā / අභිධම්‌මපිටක (ටීකා) • Abhidhammapiṭaka (ṭīkā) / පඤ්‌චපකරණ-අනුටීකා • Pañcapakaraṇa-anuṭīkā / 2. ධම්‌මදෙසනාකථාවණ්‌ණනා • 2. Dhammadesanākathāvaṇṇanā
