| Library / Tipiṭaka / ཏིཔིཊཀ • Tipiṭaka / ཀཐཱཝཏྠུཔཱལི༹ • Kathāvatthupāḷi |
༡༨. ཨཊྛཱརསམཝགྒོ
18. Aṭṭhārasamavaggo
(༡༧༨) ༢. དྷམྨདེསནཱཀཐཱ
(178) 2. Dhammadesanākathā
༨༠༤. ན ཝཏྟབྦཾ – ‘‘བུདྡྷེན བྷགཝཏཱ དྷམྨོ དེསིཏོ’’ཏི? ཨཱམནྟཱ། ཀེན དེསིཏོཏི? ཨབྷིནིམྨིཏེན དེསིཏོཏི། ཨབྷིནིམྨིཏོ ཛིནོ སཏྠཱ སམྨཱསམྦུདྡྷོ སབྦཉྙཱུ སབྦདསྶཱཝཱི དྷམྨསྶཱམཱི དྷམྨཔྤཊིསརཎོཏི? ན ཧེཝཾ ཝཏྟབྦེ…པེ॰…།
804. Na vattabbaṃ – ‘‘buddhena bhagavatā dhammo desito’’ti? Āmantā. Kena desitoti? Abhinimmitena desitoti. Abhinimmito jino satthā sammāsambuddho sabbaññū sabbadassāvī dhammassāmī dhammappaṭisaraṇoti? Na hevaṃ vattabbe…pe….
ན ཝཏྟབྦཾ – ‘‘བུདྡྷེན བྷགཝཏཱ དྷམྨོ དེསིཏོ’’ཏི? ཨཱམནྟཱ། ཀེན དེསིཏོཏི? ཨཱཡསྨཏཱ ཨཱནནྡེན དེསིཏོཏི། ཨཱཡསྨཱ ཨཱནནྡོ ཛིནོ སཏྠཱ སམྨཱསམྦུདྡྷོ སབྦཉྙཱུ སབྦདསྶཱཝཱི དྷམྨསྶཱམཱི དྷམྨཔྤཊིསརཎོཏི? ན ཧེཝཾ ཝཏྟབྦེ…པེ॰…།
Na vattabbaṃ – ‘‘buddhena bhagavatā dhammo desito’’ti? Āmantā. Kena desitoti? Āyasmatā ānandena desitoti. Āyasmā ānando jino satthā sammāsambuddho sabbaññū sabbadassāvī dhammassāmī dhammappaṭisaraṇoti? Na hevaṃ vattabbe…pe….
༨༠༥. ན ཝཏྟབྦཾ – ‘‘བུདྡྷེན བྷགཝཏཱ དྷམྨོ དེསིཏོ’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘སཾཁིཏྟེནཔི ཁོ ཨཧཾ, སཱརིཔུཏྟ, དྷམྨཾ དེསེཡྻཾ; ཝིཏྠཱརེནཔི ཁོ ཨཧཾ, སཱརིཔུཏྟ, དྷམྨཾ དེསེཡྻཾ; སཾཁིཏྟཝིཏྠཱརེནཔི ཁོ ཨཧཾ, སཱརིཔུཏྟ, དྷམྨཾ དེསེཡྻཾ; ཨཉྙཱཏཱརོ ཙ དུལླབྷཱ’’ཏི 1! ཨཏྠེཝ སུཏྟནྟོཏི? ཨཱམནྟཱ། ཏེན ཧི བུདྡྷེན བྷགཝཏཱ དྷམྨོ དེསིཏོཏི།
805. Na vattabbaṃ – ‘‘buddhena bhagavatā dhammo desito’’ti? Āmantā. Nanu vuttaṃ bhagavatā – ‘‘saṃkhittenapi kho ahaṃ, sāriputta, dhammaṃ deseyyaṃ; vitthārenapi kho ahaṃ, sāriputta, dhammaṃ deseyyaṃ; saṃkhittavitthārenapi kho ahaṃ, sāriputta, dhammaṃ deseyyaṃ; aññātāro ca dullabhā’’ti 2! Attheva suttantoti? Āmantā. Tena hi buddhena bhagavatā dhammo desitoti.
༨༠༦. ན ཝཏྟབྦཾ – ‘‘བུདྡྷེན བྷགཝཏཱ དྷམྨོ དེསིཏོ’’ཏི? ཨཱམནྟཱ། ནནུ ཝུཏྟཾ བྷགཝཏཱ – ‘‘‘ཨབྷིཉྙཱཡཱཧཾ, བྷིཀྑཝེ, དྷམྨཾ དེསེམི, ནོ ཨནབྷིཉྙཱཡ; སནིདཱནཱཧཾ, བྷིཀྑཝེ, དྷམྨཾ དེསེམི, ནོ ཨནིདཱནཾ ; སཔྤཱཊིཧཱརིཡཱཧཾ, བྷིཀྑཝེ, དྷམྨཾ དེསེམི, ནོ ཨཔྤཱཊིཧཱརིཡཾ; ཏསྶ 3 མཡ྄ཧཾ, བྷིཀྑཝེ, ཨབྷིཉྙཱཡ དྷམྨཾ དེསཡཏོ ནོ ཨནབྷིཉྙཱཡ, སནིདཱནཾ དྷམྨཾ དེསཡཏོ ནོ ཨནིདཱནཾ, སཔྤཱཊིཧཱརིཡཾ དྷམྨཾ དེསཡཏོ ནོ ཨཔྤཱཊིཧཱརིཡཾ ཀརཎཱིཡོ ཨོཝཱདོ ཀརཎཱིཡཱ ཨནུསཱསནཱི; ཨལཉྩ པན ཝོ, བྷིཀྑཝེ, ཏུཊྛིཡཱ ཨལཾ ཨཏྟམནཏཱཡ ཨལཾ སོམནསྶཱཡ – སམྨཱསམྦུདྡྷོ བྷགཝཱ, སྭཱཀྑཱཏོ དྷམྨོ, སུཔྤཊིཔནྣོ སངྒྷོ’ཏི། ཨིམསྨིཉྩ པན ཝེཡྻཱཀརཎསྨིཾ བྷཉྙམཱནེ དསསཧསྶིལོཀདྷཱཏུ ཨཀམྤིཏྠཱ’’ཏི 4! ཨཏྠེཝ སུཏྟནྟོཏི? ཨཱམནྟཱ། ཏེན ཧི བུདྡྷེན བྷགཝཏཱ དྷམྨོ དེསིཏོཏི།
806. Na vattabbaṃ – ‘‘buddhena bhagavatā dhammo desito’’ti? Āmantā. Nanu vuttaṃ bhagavatā – ‘‘‘abhiññāyāhaṃ, bhikkhave, dhammaṃ desemi, no anabhiññāya; sanidānāhaṃ, bhikkhave, dhammaṃ desemi, no anidānaṃ ; sappāṭihāriyāhaṃ, bhikkhave, dhammaṃ desemi, no appāṭihāriyaṃ; tassa 5 mayhaṃ, bhikkhave, abhiññāya dhammaṃ desayato no anabhiññāya, sanidānaṃ dhammaṃ desayato no anidānaṃ, sappāṭihāriyaṃ dhammaṃ desayato no appāṭihāriyaṃ karaṇīyo ovādo karaṇīyā anusāsanī; alañca pana vo, bhikkhave, tuṭṭhiyā alaṃ attamanatāya alaṃ somanassāya – sammāsambuddho bhagavā, svākkhāto dhammo, suppaṭipanno saṅgho’ti. Imasmiñca pana veyyākaraṇasmiṃ bhaññamāne dasasahassilokadhātu akampitthā’’ti 6! Attheva suttantoti? Āmantā. Tena hi buddhena bhagavatā dhammo desitoti.
དྷམྨདེསནཱཀཐཱ ནིཊྛིཏཱ།
Dhammadesanākathā niṭṭhitā.
Footnotes:
Related texts:
ཨཊྛཀཐཱ • Aṭṭhakathā / ཨབྷིདྷམྨཔིཊཀ (ཨཊྛཀཐཱ) • Abhidhammapiṭaka (aṭṭhakathā) / པཉྩཔཀརཎ-ཨཊྛཀཐཱ • Pañcapakaraṇa-aṭṭhakathā / ༢. དྷམྨདེསནཱཀཐཱཝཎྞནཱ • 2. Dhammadesanākathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-མཱུལཊཱིཀཱ • Pañcapakaraṇa-mūlaṭīkā / ༢. དྷམྨདེསནཱཀཐཱཝཎྞནཱ • 2. Dhammadesanākathāvaṇṇanā
ཊཱིཀཱ • Tīkā / ཨབྷིདྷམྨཔིཊཀ (ཊཱིཀཱ) • Abhidhammapiṭaka (ṭīkā) / པཉྩཔཀརཎ-ཨནུཊཱིཀཱ • Pañcapakaraṇa-anuṭīkā / ༢. དྷམྨདེསནཱཀཐཱཝཎྞནཱ • 2. Dhammadesanākathāvaṇṇanā
