| Library / Tipiṭaka / திபிடக • Tipiṭaka / ஸாரத்த²தீ³பனீ-டீகா • Sāratthadīpanī-ṭīkā |
7. த⁴ம்மதே³ஸனாஸிக்கா²பத³வண்ணனா
7. Dhammadesanāsikkhāpadavaṇṇanā
60-64. ஸத்தமே க⁴ரங் நயதீதி க⁴ரணீ, க⁴ரனாயிகா. தேனாஹ ‘‘க⁴ரஸாமினீ’’தி. ஸுண்ஹாதி ஸுணிஸா. ந யக்கே²னாதிஆதீ³னங் ‘‘அஞ்ஞத்ரா’’தி இமினா ஸம்ப³ந்தோ⁴. புரிஸவிக்³க³ஹங் க³ஹெத்வா டி²தேன யக்கே²ன வா பேதேன வா திரச்சா²னேன வா ஸத்³தி⁴ங் டி²தாயபி தே³ஸேதுங் ந வட்டதி. அக்க²ராய தே³ஸேதீதி எத்த² ‘‘ச²ப்பஞ்சவாசதோ உத்தரி ‘இமங் பத³ங் பா⁴ஸிஸ்ஸாமீ’தி ஏகம்பி அக்க²ரங் வத்வா திட்ட²தி, ஆபத்தியேவா’’தி வத³ந்தி.
60-64. Sattame gharaṃ nayatīti gharaṇī, gharanāyikā. Tenāha ‘‘gharasāminī’’ti. Suṇhāti suṇisā. Na yakkhenātiādīnaṃ ‘‘aññatrā’’ti iminā sambandho. Purisaviggahaṃ gahetvā ṭhitena yakkhena vā petena vā tiracchānena vā saddhiṃ ṭhitāyapi desetuṃ na vaṭṭati. Akkharāya desetīti ettha ‘‘chappañcavācato uttari ‘imaṃ padaṃ bhāsissāmī’ti ekampi akkharaṃ vatvā tiṭṭhati, āpattiyevā’’ti vadanti.
66. ‘‘ஏகோ கா³தா²பாதோ³தி இத³ங் கா³தா²ப³ந்த⁴மேவ ஸந்தா⁴ய வுத்தங், அஞ்ஞத்த² பன விப⁴த்திஅந்தபத³மேவ க³ஹேதப்³ப³’’ந்தி வத³ந்தி. ‘‘அட்ட²கத²ங் த⁴ம்மபத³ங் ஜாதகாதி³வத்து²ங் வாதி இமினாபி போராணங் ஸங்கீ³திஆருள்ஹமேவ அட்ட²கதா²தி³ வுத்த’’ந்தி வத³ந்தி. அட்ட²கதா²தி³பாட²ங் ட²பெத்வா த³மிளாதி³பா⁴ஸந்தரேன யதா²ருசி கதே²துங் வட்டதி. பத³ஸோத⁴ம்மே வுத்தப்பபே⁴தோ³தி இமினா அஞ்ஞத்த² அனாபத்தீதி தீ³பேதி. உட்ட²ஹித்வா புன நிஸீதி³த்வாதி இரியாபத²பரிவத்தனநயேன நானாஇரியாபதே²னபி அனாபத்தீதி தீ³பேதி. ஸப்³ப³ங் சேபி தீ³க⁴னிகாயங் கதே²தீதி யாவ ந நிட்டா²தி, தாவ புனதி³வஸேபி கதே²தி.
66.‘‘Eko gāthāpādoti idaṃ gāthābandhameva sandhāya vuttaṃ, aññattha pana vibhattiantapadameva gahetabba’’nti vadanti. ‘‘Aṭṭhakathaṃ dhammapadaṃ jātakādivatthuṃ vāti imināpi porāṇaṃ saṅgītiāruḷhameva aṭṭhakathādi vutta’’nti vadanti. Aṭṭhakathādipāṭhaṃ ṭhapetvā damiḷādibhāsantarena yathāruci kathetuṃ vaṭṭati. Padasodhamme vuttappabhedoti iminā aññattha anāpattīti dīpeti. Uṭṭhahitvā puna nisīditvāti iriyāpathaparivattananayena nānāiriyāpathenapi anāpattīti dīpeti. Sabbaṃ cepi dīghanikāyaṃ kathetīti yāva na niṭṭhāti, tāva punadivasepi katheti.
து³தியஸ்ஸ விஞ்ஞூபுரிஸஸ்ஸ அக்³க³ஹணங் அகிரியா. மாதுகா³மேன ஸத்³தி⁴ங் டி²தஸ்ஸ ச விஞ்ஞூபுரிஸஸ்ஸ ச உபசாரோ அனியதேஸு வுத்தனயேனேவ க³ஹேதப்³போ³. ஸேஸங் உத்தானமேவ. வுத்தலக்க²ணஸ்ஸ த⁴ம்மஸ்ஸ ச²ன்னங் வாசானங் உபரி தே³ஸனா, வுத்தலக்க²ணோ மாதுகா³மோ, இரியாபத²பஅவத்தனாபா⁴வோ, விஞ்ஞூபுரிஸாபா⁴வோ, அபஞ்ஹவிஸ்ஸஜ்ஜனாதி இமானி பனெத்த² பஞ்ச அங்கா³னி.
Dutiyassa viññūpurisassa aggahaṇaṃ akiriyā. Mātugāmena saddhiṃ ṭhitassa ca viññūpurisassa ca upacāro aniyatesu vuttanayeneva gahetabbo. Sesaṃ uttānameva. Vuttalakkhaṇassa dhammassa channaṃ vācānaṃ upari desanā, vuttalakkhaṇo mātugāmo, iriyāpathapaavattanābhāvo, viññūpurisābhāvo, apañhavissajjanāti imāni panettha pañca aṅgāni.
த⁴ம்மதே³ஸனாஸிக்கா²பத³வண்ணனா நிட்டி²தா.
Dhammadesanāsikkhāpadavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / வினயபிடக • Vinayapiṭaka / மஹாவிப⁴ங்க³ • Mahāvibhaṅga / 1. முஸாவாத³வக்³கோ³ • 1. Musāvādavaggo
அட்ட²கதா² • Aṭṭhakathā / வினயபிடக (அட்ட²கதா²) • Vinayapiṭaka (aṭṭhakathā) / மஹாவிப⁴ங்க³-அட்ட²கதா² • Mahāvibhaṅga-aṭṭhakathā / 7. த⁴ம்மதே³ஸனாஸிக்கா²பத³வண்ணனா • 7. Dhammadesanāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / வஜிரபு³த்³தி⁴-டீகா • Vajirabuddhi-ṭīkā / 7. த⁴ம்மதே³ஸனாஸிக்கா²பத³வண்ணனா • 7. Dhammadesanāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / விமதிவினோத³னீ-டீகா • Vimativinodanī-ṭīkā / 7. த⁴ம்மதே³ஸனாஸிக்கா²பத³வண்ணனா • 7. Dhammadesanāsikkhāpadavaṇṇanā
டீகா • Tīkā / வினயபிடக (டீகா) • Vinayapiṭaka (ṭīkā) / பாசித்யாதி³யோஜனாபாளி • Pācityādiyojanāpāḷi / 7. த⁴ம்மதே³ஸனாஸிக்கா²பத³ங் • 7. Dhammadesanāsikkhāpadaṃ
