| Library / Tipiṭaka / திபிடக • Tipiṭaka / மிலிந்த³பஞ்ஹபாளி • Milindapañhapāḷi |
10. த⁴ம்மதே³ஸனாய அப்பொஸ்ஸுக்கபஞ்ஹோ
10. Dhammadesanāya appossukkapañho
10. ‘‘ப⁴ந்தே நாக³ஸேன, தும்ஹே ப⁴ணத² ‘ததா²க³தேன சதூஹி ச அஸங்க்²யெய்யேஹி கப்பானங் ஸதஸஹஸ்ஸேன ச எத்த²ந்தரே ஸப்³ப³ஞ்ஞுதஞாணங் பரிபாசிதங் மஹதோ ஜனகாயஸ்ஸ ஸமுத்³த⁴ரணாயா’தி. புன ச ‘ஸப்³ப³ஞ்ஞுதங் பத்தஸ்ஸ அப்பொஸ்ஸுக்கதாய சித்தங் நமி, நோ த⁴ம்மதே³ஸனாயா’தி.
10. ‘‘Bhante nāgasena, tumhe bhaṇatha ‘tathāgatena catūhi ca asaṅkhyeyyehi kappānaṃ satasahassena ca etthantare sabbaññutañāṇaṃ paripācitaṃ mahato janakāyassa samuddharaṇāyā’ti. Puna ca ‘sabbaññutaṃ pattassa appossukkatāya cittaṃ nami, no dhammadesanāyā’ti.
‘‘யதா² நாம, ப⁴ந்தே நாக³ஸேன, இஸ்ஸாஸோ வா இஸ்ஸாஸந்தேவாஸீ வா ப³ஹுகே தி³வஸே ஸங்கா³மத்தா²ய உபாஸனங் ஸிக்கி²த்வா ஸம்பத்தே மஹாயுத்³தே⁴ ஓஸக்கெய்ய, ஏவமேவ கோ², ப⁴ந்தே நாக³ஸேன, ததா²க³தேன சதூஹி ச அஸங்க்²யெய்யேஹி கப்பானங் ஸதஸஹஸ்ஸேன ச எத்த²ந்தரே ஸப்³ப³ஞ்ஞுதஞாணங் பரிபாசெத்வா மஹதோ ஜனகாயஸ்ஸ ஸமுத்³த⁴ரணாய ஸப்³ப³ஞ்ஞுதங் பத்தேன த⁴ம்மதே³ஸனாய ஓஸக்கிதங்.
‘‘Yathā nāma, bhante nāgasena, issāso vā issāsantevāsī vā bahuke divase saṅgāmatthāya upāsanaṃ sikkhitvā sampatte mahāyuddhe osakkeyya, evameva kho, bhante nāgasena, tathāgatena catūhi ca asaṅkhyeyyehi kappānaṃ satasahassena ca etthantare sabbaññutañāṇaṃ paripācetvā mahato janakāyassa samuddharaṇāya sabbaññutaṃ pattena dhammadesanāya osakkitaṃ.
‘‘யதா² வா பன, ப⁴ந்தே நாக³ஸேன, மல்லோ வா மல்லந்தேவாஸீ வா ப³ஹுகே தி³வஸே நிப்³பு³த்³த⁴ங் ஸிக்கி²த்வா ஸம்பத்தே மல்லயுத்³தே⁴ ஓஸக்கெய்ய, ஏவமேவ கோ², ப⁴ந்தே நாக³ஸேன, ததா²க³தேன சதூஹி ச அஸங்க்²யெய்யேஹி கப்பானங் ஸதஸஹஸ்ஸேன ச எத்த²ந்தரே ஸப்³ப³ஞ்ஞுதஞாணங் பரிபாசெத்வா மஹதோ ஜனகாயஸ்ஸ ஸமுத்³த⁴ரணாய ஸப்³ப³ஞ்ஞுதங் பத்தேன த⁴ம்மதே³ஸனாய ஓஸக்கிதங்.
‘‘Yathā vā pana, bhante nāgasena, mallo vā mallantevāsī vā bahuke divase nibbuddhaṃ sikkhitvā sampatte mallayuddhe osakkeyya, evameva kho, bhante nāgasena, tathāgatena catūhi ca asaṅkhyeyyehi kappānaṃ satasahassena ca etthantare sabbaññutañāṇaṃ paripācetvā mahato janakāyassa samuddharaṇāya sabbaññutaṃ pattena dhammadesanāya osakkitaṃ.
‘‘கிங் நு கோ², ப⁴ந்தே நாக³ஸேன, ததா²க³தேன ப⁴யா ஓஸக்கிதங், உதா³ஹு அபாகடதாய ஓஸக்கிதங், உதா³ஹு து³ப்³ப³லதாய ஓஸக்கிதங், உதா³ஹு அஸப்³ப³ஞ்ஞுதாய ஓஸக்கிதங், கிங் தத்த² காரணங், இங்க⁴ மே த்வங் காரணங் ப்³ரூஹி கங்கா²விதரணாய. யதி³, ப⁴ந்தே நாக³ஸேன, ததா²க³தேன சதூஹி ச அஸங்க்²யெய்யேஹி கப்பானங் ஸதஸஹஸ்ஸேன ச எத்த²ந்தரே ஸப்³ப³ஞ்ஞுதஞாணங் பரிபாசிதங் மஹதோ ஜனகாயஸ்ஸ ஸமுத்³த⁴ரணாய, தேன ஹி ‘ஸப்³ப³ஞ்ஞுதங் பத்தஸ்ஸ அப்பொஸ்ஸுக்கதாய சித்தங் நமி, நோ த⁴ம்மதே³ஸனாயா’தி யங் வசனங், தங் மிச்சா². யதி³ ஸப்³ப³ஞ்ஞுதங் பத்தஸ்ஸ அப்பொஸ்ஸுக்கதாய சித்தங் நமி நோ த⁴ம்மதே³ஸனாய, தேன ஹி ‘ததா²க³தேன சதூஹி ச அஸங்க்²யெய்யேதி கப்பானங் ஸதஸஹஸ்ஸேன ச எத்த²ந்தரே ஸப்³ப³ஞ்ஞுதஞாணங் பரிபாசிதங் மஹதோ ஜனகாயஸ்ஸ ஸமுத்³த⁴ரணாயா’தி தம்பி வசனங் மிச்சா². அயம்பி உப⁴தோ கோடிகோ பஞ்ஹோ க³ம்பீ⁴ரோ து³ன்னிப்³பே³டோ² தவானுப்பத்தோ, ஸோ தயா நிப்³பா³ஹிதப்³போ³’’தி.
‘‘Kiṃ nu kho, bhante nāgasena, tathāgatena bhayā osakkitaṃ, udāhu apākaṭatāya osakkitaṃ, udāhu dubbalatāya osakkitaṃ, udāhu asabbaññutāya osakkitaṃ, kiṃ tattha kāraṇaṃ, iṅgha me tvaṃ kāraṇaṃ brūhi kaṅkhāvitaraṇāya. Yadi, bhante nāgasena, tathāgatena catūhi ca asaṅkhyeyyehi kappānaṃ satasahassena ca etthantare sabbaññutañāṇaṃ paripācitaṃ mahato janakāyassa samuddharaṇāya, tena hi ‘sabbaññutaṃ pattassa appossukkatāya cittaṃ nami, no dhammadesanāyā’ti yaṃ vacanaṃ, taṃ micchā. Yadi sabbaññutaṃ pattassa appossukkatāya cittaṃ nami no dhammadesanāya, tena hi ‘tathāgatena catūhi ca asaṅkhyeyyeti kappānaṃ satasahassena ca etthantare sabbaññutañāṇaṃ paripācitaṃ mahato janakāyassa samuddharaṇāyā’ti tampi vacanaṃ micchā. Ayampi ubhato koṭiko pañho gambhīro dunnibbeṭho tavānuppatto, so tayā nibbāhitabbo’’ti.
‘‘பரிபாசிதஞ்ச, மஹாராஜ, ததா²க³தேன சதூஹி ச அஸங்க்²யெய்யேஹி கப்பானங் ஸதஸஹஸ்ஸேன ச எத்த²ந்தரே ஸப்³ப³ஞ்ஞுதஞாணங் மஹதோ ஜனகாயஸ்ஸ ஸமுத்³த⁴ரணாய, பத்தஸப்³ப³ஞ்ஞுதஸ்ஸ ச அப்பொஸ்ஸுக்கதாய சித்தங் நமி, நோ த⁴ம்மதே³ஸனாய. தஞ்ச பன த⁴ம்மஸ்ஸ க³ம்பீ⁴ரனிபுணது³த்³த³ஸது³ரனுபோ³த⁴ஸுகு²மது³ப்படிவேத⁴தங் ஸத்தானஞ்ச ஆலயாராமதங் ஸக்காயதி³ட்டி²யா த³ள்ஹஸுக்³க³ஹிததஞ்ச தி³ஸ்வா ‘கிங் நு கோ², கத²ங் நு கோ²’தி அப்பொஸ்ஸுக்கதாய சித்தங் நமி, நோ த⁴ம்மதே³ஸனாய, ஸத்தானங் படிவேத⁴சிந்தனமானஸங் யேவேதங்.
‘‘Paripācitañca, mahārāja, tathāgatena catūhi ca asaṅkhyeyyehi kappānaṃ satasahassena ca etthantare sabbaññutañāṇaṃ mahato janakāyassa samuddharaṇāya, pattasabbaññutassa ca appossukkatāya cittaṃ nami, no dhammadesanāya. Tañca pana dhammassa gambhīranipuṇaduddasaduranubodhasukhumaduppaṭivedhataṃ sattānañca ālayārāmataṃ sakkāyadiṭṭhiyā daḷhasuggahitatañca disvā ‘kiṃ nu kho, kathaṃ nu kho’ti appossukkatāya cittaṃ nami, no dhammadesanāya, sattānaṃ paṭivedhacintanamānasaṃ yevetaṃ.
‘‘யதா², மஹாராஜ, பி⁴ஸக்கோ ஸல்லகத்தோ அனேகப்³யாதி⁴பரிபீளிதங் நரங் உபஸங்கமித்வா ஏவங் சிந்தயதி ‘கேன நு கோ² உபக்கமேன கதமேன வா பே⁴ஸஜ்ஜேன இமஸ்ஸ ப்³யாதி⁴ வூபஸமெய்யா’தி, ஏவமேவ கோ², மஹாராஜ, ததா²க³தஸ்ஸ ஸப்³ப³கிலேஸப்³யாதி⁴பரிபீளிதங் ஜனங் த⁴ம்மஸ்ஸ ச க³ம்பீ⁴ரனிபுணது³த்³த³ஸது³ரனுபோ³த⁴ஸுகு²மது³ப்படிவேத⁴தங் தி³ஸ்வா ‘கிங் நு கோ², கத²ங் நு கோ²’தி அப்பொஸ்ஸுக்கதாய சித்தங் நமி, நோ த⁴ம்மதே³ஸனாய, ஸத்தானங் படிவேத⁴சிந்தனமானஸங் யேவேதங்.
‘‘Yathā, mahārāja, bhisakko sallakatto anekabyādhiparipīḷitaṃ naraṃ upasaṅkamitvā evaṃ cintayati ‘kena nu kho upakkamena katamena vā bhesajjena imassa byādhi vūpasameyyā’ti, evameva kho, mahārāja, tathāgatassa sabbakilesabyādhiparipīḷitaṃ janaṃ dhammassa ca gambhīranipuṇaduddasaduranubodhasukhumaduppaṭivedhataṃ disvā ‘kiṃ nu kho, kathaṃ nu kho’ti appossukkatāya cittaṃ nami, no dhammadesanāya, sattānaṃ paṭivedhacintanamānasaṃ yevetaṃ.
‘‘யதா², மஹாராஜ, ரஞ்ஞோ க²த்தியஸ்ஸ முத்³தா⁴வஸித்தஸ்ஸ தோ³வாரிகஅனீகட்ட²பாரிஸஜ்ஜனேக³மப⁴டப³ல 1 அமச்சராஜஞ்ஞராஜூபஜீவினே ஜனே தி³ஸ்வா ஏவங் சித்தமுப்பஜ்ஜெய்ய ‘கிங் நு கோ², கத²ங் நு கோ² இமே ஸங்க³ண்ஹிஸ்ஸாமீ’தி, ஏவமேவ கோ², மஹாராஜ, ததா²க³தஸ்ஸ த⁴ம்மஸ்ஸ க³ம்பீ⁴ரனிபுணது³த்³த³ஸது³ரனுபோ³த⁴ஸுகு²மது³ப்படிவேத⁴தங் ஸத்தானஞ்ச ஆலயாராமதங் ஸக்காயதி³ட்டி²யா த³ள்ஹஸுக்³க³ஹிததஞ்ச தி³ஸ்வா ‘கிங் நு கோ², கத²ங் நு கோ²’தி அப்பொஸ்ஸுக்கதாய சித்தங் நமி, நோ த⁴ம்மதே³ஸனாய, ஸத்தானங் படிவேத⁴சிந்தனமானஸங் யேவேதங்.
‘‘Yathā, mahārāja, rañño khattiyassa muddhāvasittassa dovārikaanīkaṭṭhapārisajjanegamabhaṭabala 2 amaccarājaññarājūpajīvine jane disvā evaṃ cittamuppajjeyya ‘kiṃ nu kho, kathaṃ nu kho ime saṅgaṇhissāmī’ti, evameva kho, mahārāja, tathāgatassa dhammassa gambhīranipuṇaduddasaduranubodhasukhumaduppaṭivedhataṃ sattānañca ālayārāmataṃ sakkāyadiṭṭhiyā daḷhasuggahitatañca disvā ‘kiṃ nu kho, kathaṃ nu kho’ti appossukkatāya cittaṃ nami, no dhammadesanāya, sattānaṃ paṭivedhacintanamānasaṃ yevetaṃ.
‘‘அபி ச, மஹாராஜ, ஸப்³பே³ஸங் ததா²க³தானங் த⁴ம்மதா ஏஸா, யங் ப்³ரஹ்முனா ஆயாசிதா த⁴ம்மங் தே³ஸெந்தி. தத்த² பன கிங் காரணங்? யே தேன ஸமயேன மனுஸ்ஸா தாபஸபரிப்³பா³ஜகா ஸமணப்³ராஹ்மணா, ஸப்³பே³தே ப்³ரஹ்மதே³வதா ஹொந்தி ப்³ரஹ்மக³ருகா ப்³ரஹ்மபராயணா, தஸ்மா தஸ்ஸ ப³லவதோ யஸவதோ ஞாதஸ்ஸ பஞ்ஞாதஸ்ஸ உத்தரஸ்ஸ அச்சுக்³க³தஸ்ஸ ஓனமனேன ஸதே³வகோ லோகோ ஓனமிஸ்ஸதி ஓகப்பெஸ்ஸதி அதி⁴முச்சிஸ்ஸதீதி இமினா ச, மஹாராஜ, காரணேன ததா²க³தா ப்³ரஹ்முனா ஆயாசிதா த⁴ம்மங் தே³ஸெந்தி.
‘‘Api ca, mahārāja, sabbesaṃ tathāgatānaṃ dhammatā esā, yaṃ brahmunā āyācitā dhammaṃ desenti. Tattha pana kiṃ kāraṇaṃ? Ye tena samayena manussā tāpasaparibbājakā samaṇabrāhmaṇā, sabbete brahmadevatā honti brahmagarukā brahmaparāyaṇā, tasmā tassa balavato yasavato ñātassa paññātassa uttarassa accuggatassa onamanena sadevako loko onamissati okappessati adhimuccissatīti iminā ca, mahārāja, kāraṇena tathāgatā brahmunā āyācitā dhammaṃ desenti.
‘‘யதா², மஹாராஜ, கோசி ராஜா வா ராஜமஹாமத்தோ வா யஸ்ஸ ஓனமதி அபசிதிங் கரோதி, ப³லவதரஸ்ஸ தஸ்ஸ ஓனமனேன அவஸேஸா ஜனதா ஓனமதி அபசிதிங் கரோதி, ஏவமேவ கோ², மஹாராஜ, ப்³ரஹ்மே ஓனமிதே ததா²க³தானங் ஸதே³வகோ லோகோ ஓனமிஸ்ஸதி, பூஜிதபூஜகோ மஹாராஜ, லோகோ, தஸ்மா ஸோ ப்³ரஹ்மா ஸப்³பே³ஸங் ததா²க³தானங் ஆயாசதி த⁴ம்மதே³ஸனாய, தேன ச காரணேன ததா²க³தா ப்³ரஹ்முனா ஆயாசிதா த⁴ம்மங் தே³ஸெந்தீ’’தி. ‘‘ஸாது⁴, ப⁴ந்தே நாக³ஸேன, ஸுனிப்³பே³டி²தோ பஞ்ஹோ, அதிப⁴த்³ரகங் வெய்யாகரணங், ஏவமேதங் ததா² ஸம்படிச்சா²மீ’’தி.
‘‘Yathā, mahārāja, koci rājā vā rājamahāmatto vā yassa onamati apacitiṃ karoti, balavatarassa tassa onamanena avasesā janatā onamati apacitiṃ karoti, evameva kho, mahārāja, brahme onamite tathāgatānaṃ sadevako loko onamissati, pūjitapūjako mahārāja, loko, tasmā so brahmā sabbesaṃ tathāgatānaṃ āyācati dhammadesanāya, tena ca kāraṇena tathāgatā brahmunā āyācitā dhammaṃ desentī’’ti. ‘‘Sādhu, bhante nāgasena, sunibbeṭhito pañho, atibhadrakaṃ veyyākaraṇaṃ, evametaṃ tathā sampaṭicchāmī’’ti.
த⁴ம்மதே³ஸனாய அப்பொஸ்ஸுக்கபஞ்ஹோ த³ஸமோ.
Dhammadesanāya appossukkapañho dasamo.
Footnotes:
