| Library / Tipiṭaka / तिपिटक • Tipiṭaka / चरियापिटकपाळि • Cariyāpiṭakapāḷi |
८. धम्मदेवपुत्तचरिया
8. Dhammadevaputtacariyā
६६.
66.
‘‘पुनापरं यदा होमि, महापक्खो महिद्धिको।
‘‘Punāparaṃ yadā homi, mahāpakkho mahiddhiko;
धम्मो नाम महायक्खो, सब्बलोकानुकम्पको॥
Dhammo nāma mahāyakkho, sabbalokānukampako.
६७.
67.
‘‘दसकुसलकम्मपथे , समादपेन्तो महाजनं।
‘‘Dasakusalakammapathe , samādapento mahājanaṃ;
चरामि गामनिगमं, समित्तो सपरिज्जनो॥
Carāmi gāmanigamaṃ, samitto saparijjano.
६८.
68.
‘‘पापो कदरियो यक्खो, दीपेन्तो दस पापके।
‘‘Pāpo kadariyo yakkho, dīpento dasa pāpake;
सोपेत्थ महिया चरति, समित्तो सपरिज्जनो॥
Sopettha mahiyā carati, samitto saparijjano.
६९.
69.
‘‘धम्मवादी अधम्मो च, उभो पच्चनिका मयं।
‘‘Dhammavādī adhammo ca, ubho paccanikā mayaṃ;
धुरे धुरं घट्टयन्ता, समिम्हा पटिपथे उभो॥
Dhure dhuraṃ ghaṭṭayantā, samimhā paṭipathe ubho.
७०.
70.
‘‘कलहो वत्तती भेस्मा, कल्याणपापकस्स च।
‘‘Kalaho vattatī bhesmā, kalyāṇapāpakassa ca;
मग्गा ओक्कमनत्थाय, महायुद्धो उपट्ठितो॥
Maggā okkamanatthāya, mahāyuddho upaṭṭhito.
७१.
71.
‘‘यदिहं तस्स कुप्पेय्यं, यदि भिन्दे तपोगुणं।
‘‘Yadihaṃ tassa kuppeyyaṃ, yadi bhinde tapoguṇaṃ;
सहपरिजनं तस्स, रजभूतं करेय्यहं॥
Sahaparijanaṃ tassa, rajabhūtaṃ kareyyahaṃ.
७२.
72.
‘‘अपिचाहं सीलरक्खाय, निब्बापेत्वान मानसं।
‘‘Apicāhaṃ sīlarakkhāya, nibbāpetvāna mānasaṃ;
सह जनेनोक्कमित्वा, पथं पापस्स दासहं॥
Saha janenokkamitvā, pathaṃ pāpassa dāsahaṃ.
७३.
73.
‘‘सह पथतो ओक्कन्ते, कत्वा चित्तस्स निब्बुतिं।
‘‘Saha pathato okkante, katvā cittassa nibbutiṃ;
विवरं अदासि पथवी, पापयक्खस्स तावदे’’ति॥
Vivaraṃ adāsi pathavī, pāpayakkhassa tāvade’’ti.
धम्मदेवपुत्तचरियं अट्ठमं।
Dhammadevaputtacariyaṃ aṭṭhamaṃ.
Related texts:
अट्ठकथा • Aṭṭhakathā / सुत्तपिटक (अट्ठकथा) • Suttapiṭaka (aṭṭhakathā) / खुद्दकनिकाय (अट्ठकथा) • Khuddakanikāya (aṭṭhakathā) / चरियापिटक-अट्ठकथा • Cariyāpiṭaka-aṭṭhakathā / ८. धम्मदेवपुत्तचरियावण्णना • 8. Dhammadevaputtacariyāvaṇṇanā
