| Library / Tipiṭaka / ติปิฎก • Tipiṭaka / จริยาปิฎกปาฬิ • Cariyāpiṭakapāḷi |
๘. ธมฺมเทวปุตฺตจริยา
8. Dhammadevaputtacariyā
๖๖.
66.
‘‘ปุนาปรํ ยทา โหมิ, มหาปโกฺข มหิทฺธิโก;
‘‘Punāparaṃ yadā homi, mahāpakkho mahiddhiko;
ธโมฺม นาม มหายโกฺข, สพฺพโลกานุกมฺปโกฯ
Dhammo nāma mahāyakkho, sabbalokānukampako.
๖๗.
67.
‘‘ทสกุสลกมฺมปเถ , สมาทเปโนฺต มหาชนํ;
‘‘Dasakusalakammapathe , samādapento mahājanaṃ;
จรามิ คามนิคมํ, สมิโตฺต สปริชฺชโนฯ
Carāmi gāmanigamaṃ, samitto saparijjano.
๖๘.
68.
‘‘ปาโป กทริโย ยโกฺข, ทีเปโนฺต ทส ปาปเก;
‘‘Pāpo kadariyo yakkho, dīpento dasa pāpake;
โสเปตฺถ มหิยา จรติ, สมิโตฺต สปริชฺชโนฯ
Sopettha mahiyā carati, samitto saparijjano.
๖๙.
69.
‘‘ธมฺมวาที อธโมฺม จ, อุโภ ปจฺจนิกา มยํ;
‘‘Dhammavādī adhammo ca, ubho paccanikā mayaṃ;
ธุเร ธุรํ ฆฎฺฎยนฺตา, สมิมฺหา ปฎิปเถ อุโภฯ
Dhure dhuraṃ ghaṭṭayantā, samimhā paṭipathe ubho.
๗๐.
70.
‘‘กลโห วตฺตตี เภสฺมา, กลฺยาณปาปกสฺส จ;
‘‘Kalaho vattatī bhesmā, kalyāṇapāpakassa ca;
มคฺคา โอกฺกมนตฺถาย, มหายุโทฺธ อุปฎฺฐิโตฯ
Maggā okkamanatthāya, mahāyuddho upaṭṭhito.
๗๑.
71.
‘‘ยทิหํ ตสฺส กุเปฺปยฺยํ, ยทิ ภิเนฺท ตโปคุณํ;
‘‘Yadihaṃ tassa kuppeyyaṃ, yadi bhinde tapoguṇaṃ;
สหปริชนํ ตสฺส, รชภูตํ กเรยฺยหํฯ
Sahaparijanaṃ tassa, rajabhūtaṃ kareyyahaṃ.
๗๒.
72.
‘‘อปิจาหํ สีลรกฺขาย, นิพฺพาเปตฺวาน มานสํ;
‘‘Apicāhaṃ sīlarakkhāya, nibbāpetvāna mānasaṃ;
สห ชเนโนกฺกมิตฺวา, ปถํ ปาปสฺส ทาสหํฯ
Saha janenokkamitvā, pathaṃ pāpassa dāsahaṃ.
๗๓.
73.
‘‘สห ปถโต โอกฺกเนฺต, กตฺวา จิตฺตสฺส นิพฺพุติํ;
‘‘Saha pathato okkante, katvā cittassa nibbutiṃ;
วิวรํ อทาสิ ปถวี, ปาปยกฺขสฺส ตาวเท’’ติฯ
Vivaraṃ adāsi pathavī, pāpayakkhassa tāvade’’ti.
ธมฺมเทวปุตฺตจริยํ อฎฺฐมํฯ
Dhammadevaputtacariyaṃ aṭṭhamaṃ.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / ขุทฺทกนิกาย (อฎฺฐกถา) • Khuddakanikāya (aṭṭhakathā) / จริยาปิฎก-อฎฺฐกถา • Cariyāpiṭaka-aṭṭhakathā / ๘. ธมฺมเทวปุตฺตจริยาวณฺณนา • 8. Dhammadevaputtacariyāvaṇṇanā
