| Library / Tipiṭaka / තිපිටක • Tipiṭaka / චරියාපිටකපාළි • Cariyāpiṭakapāḷi |
8. ධම්‌මදෙවපුත්‌තචරියා
8. Dhammadevaputtacariyā
66.
66.
‘‘පුනාපරං යදා හොමි, මහාපක්‌ඛො මහිද්‌ධිකො;
‘‘Punāparaṃ yadā homi, mahāpakkho mahiddhiko;
ධම්‌මො නාම මහායක්‌ඛො, සබ්‌බලොකානුකම්‌පකො.
Dhammo nāma mahāyakkho, sabbalokānukampako.
67.
67.
‘‘දසකුසලකම්‌මපථෙ , සමාදපෙන්‌තො මහාජනං;
‘‘Dasakusalakammapathe , samādapento mahājanaṃ;
චරාමි ගාමනිගමං, සමිත්‌තො සපරිජ්‌ජනො.
Carāmi gāmanigamaṃ, samitto saparijjano.
68.
68.
‘‘පාපො කදරියො යක්‌ඛො, දීපෙන්‌තො දස පාපකෙ;
‘‘Pāpo kadariyo yakkho, dīpento dasa pāpake;
සොපෙත්‌ථ මහියා චරති, සමිත්‌තො සපරිජ්‌ජනො.
Sopettha mahiyā carati, samitto saparijjano.
69.
69.
‘‘ධම්‌මවාදී අධම්‌මො ච, උභො පච්‌චනිකා මයං;
‘‘Dhammavādī adhammo ca, ubho paccanikā mayaṃ;
ධුරෙ ධුරං ඝට්‌ටයන්‌තා, සමිම්‌හා පටිපථෙ උභො.
Dhure dhuraṃ ghaṭṭayantā, samimhā paṭipathe ubho.
70.
70.
‘‘කලහො වත්‌තතී භෙස්‌මා, කල්‍යාණපාපකස්‌ස ච;
‘‘Kalaho vattatī bhesmā, kalyāṇapāpakassa ca;
මග්‌ගා ඔක්‌කමනත්‌ථාය, මහායුද්‌ධො උපට්‌ඨිතො.
Maggā okkamanatthāya, mahāyuddho upaṭṭhito.
71.
71.
‘‘යදිහං තස්‌ස කුප්‌පෙය්‍යං, යදි භින්‌දෙ තපොගුණං;
‘‘Yadihaṃ tassa kuppeyyaṃ, yadi bhinde tapoguṇaṃ;
සහපරිජනං තස්‌ස, රජභූතං කරෙය්‍යහං.
Sahaparijanaṃ tassa, rajabhūtaṃ kareyyahaṃ.
72.
72.
‘‘අපිචාහං සීලරක්‌ඛාය, නිබ්‌බාපෙත්‌වාන මානසං;
‘‘Apicāhaṃ sīlarakkhāya, nibbāpetvāna mānasaṃ;
සහ ජනෙනොක්‌කමිත්‌වා, පථං පාපස්‌ස දාසහං.
Saha janenokkamitvā, pathaṃ pāpassa dāsahaṃ.
73.
73.
‘‘සහ පථතො ඔක්‌කන්‌තෙ, කත්‌වා චිත්‌තස්‌ස නිබ්‌බුතිං;
‘‘Saha pathato okkante, katvā cittassa nibbutiṃ;
විවරං අදාසි පථවී, පාපයක්‌ඛස්‌ස තාවදෙ’’ති.
Vivaraṃ adāsi pathavī, pāpayakkhassa tāvade’’ti.
ධම්‌මදෙවපුත්‌තචරියං අට්‌ඨමං.
Dhammadevaputtacariyaṃ aṭṭhamaṃ.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / ඛුද්‌දකනිකාය (අට්‌ඨකථා) • Khuddakanikāya (aṭṭhakathā) / චරියාපිටක-අට්‌ඨකථා • Cariyāpiṭaka-aṭṭhakathā / 8. ධම්‌මදෙවපුත්‌තචරියාවණ්‌ණනා • 8. Dhammadevaputtacariyāvaṇṇanā
