| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
3. த⁴ம்மதி³ன்னஸுத்தங்
3. Dhammadinnasuttaṃ
1049. ஏகங் ஸமயங் ப⁴க³வா பா³ராணஸியங் விஹரதி இஸிபதனே மிக³தா³யே. அத² கோ² த⁴ம்மதி³ன்னோ உபாஸகோ பஞ்சஹி உபாஸகஸதேஹி ஸத்³தி⁴ங் யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² த⁴ம்மதி³ன்னோ உபாஸகோ ப⁴க³வந்தங் ஏதத³வோச – ‘‘ஓவத³து நோ, ப⁴ந்தே, ப⁴க³வா; அனுஸாஸது நோ, ப⁴ந்தே, ப⁴க³வா யங் அம்ஹாகங் அஸ்ஸ தீ³க⁴ரத்தங் ஹிதாய ஸுகா²யா’’தி.
1049. Ekaṃ samayaṃ bhagavā bārāṇasiyaṃ viharati isipatane migadāye. Atha kho dhammadinno upāsako pañcahi upāsakasatehi saddhiṃ yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho dhammadinno upāsako bhagavantaṃ etadavoca – ‘‘ovadatu no, bhante, bhagavā; anusāsatu no, bhante, bhagavā yaṃ amhākaṃ assa dīgharattaṃ hitāya sukhāyā’’ti.
‘‘தஸ்மாதிஹ வோ, த⁴ம்மதி³ன்னங், ஏவங் ஸிக்கி²தப்³ப³ங் – ‘யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதபடிஸங்யுத்தா தே காலேன காலங் உபஸம்பஜ்ஜ விஹரிஸ்ஸாமா’தி. ஏவஞ்ஹி வோ, த⁴ம்மதி³ன்ன, ஸிக்கி²தப்³ப³’’ந்தி. ‘‘ந கோ² நேதங், ப⁴ந்தே, ஸுகரங் அம்ஹேஹி புத்தஸம்பா³த⁴ஸயனங் அஜ்ஜா²வஸந்தேஹி காஸிகசந்த³னங் பச்சனுபொ⁴ந்தேஹி மாலாக³ந்த⁴விலேபனங் தா⁴ரயந்தேஹி ஜாதரூபரஜதங் ஸாதி³யந்தேஹி – யே தே ஸுத்தந்தா ததா²க³தபா⁴ஸிதா க³ம்பீ⁴ரா க³ம்பீ⁴ரத்தா² லோகுத்தரா ஸுஞ்ஞதபடிஸங்யுத்தா தே காலேன காலங் உபஸம்பஜ்ஜ விஹரிதுங். தேஸங் நோ, ப⁴ந்தே, ப⁴க³வா அம்ஹாகங் பஞ்சஸு ஸிக்கா²பதே³ஸு டி²தானங் உத்தரித⁴ம்மங் தே³ஸேதூ’’தி.
‘‘Tasmātiha vo, dhammadinnaṃ, evaṃ sikkhitabbaṃ – ‘ye te suttantā tathāgatabhāsitā gambhīrā gambhīratthā lokuttarā suññatapaṭisaṃyuttā te kālena kālaṃ upasampajja viharissāmā’ti. Evañhi vo, dhammadinna, sikkhitabba’’nti. ‘‘Na kho netaṃ, bhante, sukaraṃ amhehi puttasambādhasayanaṃ ajjhāvasantehi kāsikacandanaṃ paccanubhontehi mālāgandhavilepanaṃ dhārayantehi jātarūparajataṃ sādiyantehi – ye te suttantā tathāgatabhāsitā gambhīrā gambhīratthā lokuttarā suññatapaṭisaṃyuttā te kālena kālaṃ upasampajja viharituṃ. Tesaṃ no, bhante, bhagavā amhākaṃ pañcasu sikkhāpadesu ṭhitānaṃ uttaridhammaṃ desetū’’ti.
‘‘தஸ்மாதிஹ வோ, த⁴ம்மதி³ன்ன, ஏவங் ஸிக்கி²தப்³ப³ங் – ‘பு³த்³தே⁴ அவேச்சப்பஸாதே³ன ஸமன்னாக³தா ப⁴விஸ்ஸாம – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தா ப⁴விஸ்ஸாம அக²ண்டே³ஹி…பே॰… ஸமாதி⁴ஸங்வத்தனிகேஹீ’தி. ஏவஞ்ஹி வோ, த⁴ம்மதி³ன்ன, ஸிக்கி²தப்³ப³’’ந்தி.
‘‘Tasmātiha vo, dhammadinna, evaṃ sikkhitabbaṃ – ‘buddhe aveccappasādena samannāgatā bhavissāma – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgatā bhavissāma akhaṇḍehi…pe… samādhisaṃvattanikehī’ti. Evañhi vo, dhammadinna, sikkhitabba’’nti.
‘‘யானிமானி, ப⁴ந்தே, ப⁴க³வதா சத்தாரி ஸோதாபத்தியங்கா³னி தே³ஸிதானி, ஸங்விஜ்ஜந்தே தே த⁴ம்மா அம்ஹேஸு, மயஞ்ச தேஸு த⁴ம்மேஸு ஸந்தி³ஸ்ஸாம. மயஞ்ஹி ப⁴ந்தே, பு³த்³தே⁴ அவேச்சப்பஸாதே³ன ஸமன்னாக³தா – இதிபி ஸோ ப⁴க³வா…பே॰… ஸத்தா² தே³வமனுஸ்ஸானங் பு³த்³தோ⁴ ப⁴க³வாதி. த⁴ம்மே…பே॰… ஸங்கே⁴…பே॰… அரியகந்தேஹி ஸீலேஹி ஸமன்னாக³தா அக²ண்டே³ஹி…பே॰… ஸமாதி⁴ஸங்வத்தனிகேஹீ’’தி. ‘‘லாபா⁴ வோ , த⁴ம்மதி³ன்ன, ஸுலத்³த⁴ங் வோ, த⁴ம்மதி³ன்ன! ஸோதாபத்திப²லங் தும்ஹேஹி ப்³யாகத’’ந்தி. ததியங்.
‘‘Yānimāni, bhante, bhagavatā cattāri sotāpattiyaṅgāni desitāni, saṃvijjante te dhammā amhesu, mayañca tesu dhammesu sandissāma. Mayañhi bhante, buddhe aveccappasādena samannāgatā – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgatā akhaṇḍehi…pe… samādhisaṃvattanikehī’’ti. ‘‘Lābhā vo , dhammadinna, suladdhaṃ vo, dhammadinna! Sotāpattiphalaṃ tumhehi byākata’’nti. Tatiyaṃ.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 3. த⁴ம்மதி³ன்னஸுத்தவண்ணனா • 3. Dhammadinnasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. த⁴ம்மதி³ன்னஸுத்தவண்ணனா • 3. Dhammadinnasuttavaṇṇanā
