| Library / Tipiṭaka / তিপিটক • Tipiṭaka / সংযুত্তনিকায • Saṃyuttanikāya |
৩. ধম্মদিন্নসুত্তং
3. Dhammadinnasuttaṃ
১০৪৯. একং সমযং ভগৰা বারাণসিযং ৰিহরতি ইসিপতনে মিগদাযে। অথ খো ধম্মদিন্নো উপাসকো পঞ্চহি উপাসকসতেহি সদ্ধিং যেন ভগৰা তেনুপসঙ্কমি; উপসঙ্কমিত্ৰা ভগৰন্তং অভিৰাদেত্ৰা একমন্তং নিসীদি। একমন্তং নিসিন্নো খো ধম্মদিন্নো উপাসকো ভগৰন্তং এতদৰোচ – ‘‘ওৰদতু নো, ভন্তে, ভগৰা; অনুসাসতু নো, ভন্তে, ভগৰা যং অম্হাকং অস্স দীঘরত্তং হিতায সুখাযা’’তি।
1049. Ekaṃ samayaṃ bhagavā bārāṇasiyaṃ viharati isipatane migadāye. Atha kho dhammadinno upāsako pañcahi upāsakasatehi saddhiṃ yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho dhammadinno upāsako bhagavantaṃ etadavoca – ‘‘ovadatu no, bhante, bhagavā; anusāsatu no, bhante, bhagavā yaṃ amhākaṃ assa dīgharattaṃ hitāya sukhāyā’’ti.
‘‘তস্মাতিহ ৰো, ধম্মদিন্নং, এৰং সিক্খিতব্বং – ‘যে তে সুত্তন্তা তথাগতভাসিতা গম্ভীরা গম্ভীরত্থা লোকুত্তরা সুঞ্ঞতপটিসংযুত্তা তে কালেন কালং উপসম্পজ্জ ৰিহরিস্সামা’তি। এৰঞ্হি ৰো, ধম্মদিন্ন, সিক্খিতব্ব’’ন্তি। ‘‘ন খো নেতং, ভন্তে, সুকরং অম্হেহি পুত্তসম্বাধসযনং অজ্ঝাৰসন্তেহি কাসিকচন্দনং পচ্চনুভোন্তেহি মালাগন্ধৰিলেপনং ধারযন্তেহি জাতরূপরজতং সাদিযন্তেহি – যে তে সুত্তন্তা তথাগতভাসিতা গম্ভীরা গম্ভীরত্থা লোকুত্তরা সুঞ্ঞতপটিসংযুত্তা তে কালেন কালং উপসম্পজ্জ ৰিহরিতুং। তেসং নো, ভন্তে, ভগৰা অম্হাকং পঞ্চসু সিক্খাপদেসু ঠিতানং উত্তরিধম্মং দেসেতূ’’তি।
‘‘Tasmātiha vo, dhammadinnaṃ, evaṃ sikkhitabbaṃ – ‘ye te suttantā tathāgatabhāsitā gambhīrā gambhīratthā lokuttarā suññatapaṭisaṃyuttā te kālena kālaṃ upasampajja viharissāmā’ti. Evañhi vo, dhammadinna, sikkhitabba’’nti. ‘‘Na kho netaṃ, bhante, sukaraṃ amhehi puttasambādhasayanaṃ ajjhāvasantehi kāsikacandanaṃ paccanubhontehi mālāgandhavilepanaṃ dhārayantehi jātarūparajataṃ sādiyantehi – ye te suttantā tathāgatabhāsitā gambhīrā gambhīratthā lokuttarā suññatapaṭisaṃyuttā te kālena kālaṃ upasampajja viharituṃ. Tesaṃ no, bhante, bhagavā amhākaṃ pañcasu sikkhāpadesu ṭhitānaṃ uttaridhammaṃ desetū’’ti.
‘‘তস্মাতিহ ৰো, ধম্মদিন্ন, এৰং সিক্খিতব্বং – ‘বুদ্ধে অৰেচ্চপ্পসাদেন সমন্নাগতা ভৰিস্সাম – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতা ভৰিস্সাম অখণ্ডেহি…পে॰… সমাধিসংৰত্তনিকেহী’তি। এৰঞ্হি ৰো, ধম্মদিন্ন, সিক্খিতব্ব’’ন্তি।
‘‘Tasmātiha vo, dhammadinna, evaṃ sikkhitabbaṃ – ‘buddhe aveccappasādena samannāgatā bhavissāma – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgatā bhavissāma akhaṇḍehi…pe… samādhisaṃvattanikehī’ti. Evañhi vo, dhammadinna, sikkhitabba’’nti.
‘‘যানিমানি, ভন্তে, ভগৰতা চত্তারি সোতাপত্তিযঙ্গানি দেসিতানি, সংৰিজ্জন্তে তে ধম্মা অম্হেসু, মযঞ্চ তেসু ধম্মেসু সন্দিস্সাম। মযঞ্হি ভন্তে, বুদ্ধে অৰেচ্চপ্পসাদেন সমন্নাগতা – ইতিপি সো ভগৰা…পে॰… সত্থা দেৰমনুস্সানং বুদ্ধো ভগৰাতি। ধম্মে…পে॰… সঙ্ঘে…পে॰… অরিযকন্তেহি সীলেহি সমন্নাগতা অখণ্ডেহি…পে॰… সমাধিসংৰত্তনিকেহী’’তি। ‘‘লাভা ৰো , ধম্মদিন্ন, সুলদ্ধং ৰো, ধম্মদিন্ন! সোতাপত্তিফলং তুম্হেহি ব্যাকত’’ন্তি। ততিযং।
‘‘Yānimāni, bhante, bhagavatā cattāri sotāpattiyaṅgāni desitāni, saṃvijjante te dhammā amhesu, mayañca tesu dhammesu sandissāma. Mayañhi bhante, buddhe aveccappasādena samannāgatā – itipi so bhagavā…pe… satthā devamanussānaṃ buddho bhagavāti. Dhamme…pe… saṅghe…pe… ariyakantehi sīlehi samannāgatā akhaṇḍehi…pe… samādhisaṃvattanikehī’’ti. ‘‘Lābhā vo , dhammadinna, suladdhaṃ vo, dhammadinna! Sotāpattiphalaṃ tumhehi byākata’’nti. Tatiyaṃ.
Related texts:
অট্ঠকথা • Aṭṭhakathā / সুত্তপিটক (অট্ঠকথা) • Suttapiṭaka (aṭṭhakathā) / সংযুত্তনিকায (অট্ঠকথা) • Saṃyuttanikāya (aṭṭhakathā) / ৩. ধম্মদিন্নসুত্তৰণ্ণনা • 3. Dhammadinnasuttavaṇṇanā
টীকা • Tīkā / সুত্তপিটক (টীকা) • Suttapiṭaka (ṭīkā) / সংযুত্তনিকায (টীকা) • Saṃyuttanikāya (ṭīkā) / ৩. ধম্মদিন্নসুত্তৰণ্ণনা • 3. Dhammadinnasuttavaṇṇanā
