| Library / Tipiṭaka / திபிடக • Tipiṭaka / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) |
3. த⁴ம்மதி³ன்னஸுத்தவண்ணனா
3. Dhammadinnasuttavaṇṇanā
1049. ததியே த⁴ம்மதி³ன்னோதி ஸத்தஸு ஜனேஸு ஏகோ. பு³த்³த⁴காலஸ்மிஞ்ஹி த⁴ம்மதி³ன்னோ உபாஸகோ, விஸாகோ² உபாஸகோ, உக்³கோ³ க³ஹபதி, சித்தோ க³ஹபதி, ஹத்த²கோ ஆளவகோ, சூளஅனாத²பிண்டி³கோ, மஹாஅனாத²பிண்டி³கோதி இமே ஸத்த ஜனா பஞ்சஸதஉபாஸகபரிவாரா அஹேஸுங். ஏதேஸு ஏஸ அஞ்ஞதரோ.
1049. Tatiye dhammadinnoti sattasu janesu eko. Buddhakālasmiñhi dhammadinno upāsako, visākho upāsako, uggo gahapati, citto gahapati, hatthako āḷavako, cūḷaanāthapiṇḍiko, mahāanāthapiṇḍikoti ime satta janā pañcasataupāsakaparivārā ahesuṃ. Etesu esa aññataro.
க³ம்பீ⁴ராதி த⁴ம்மக³ம்பீ⁴ரா ஸல்லஸுத்தாத³யோ. க³ம்பீ⁴ரத்தா²தி அத்த²க³ம்பீ⁴ரா சேதனாஸுத்தந்தாத³யோ. லோகுத்தராதி லோகுத்தரத்த²தீ³பகா அஸங்க²தஸங்யுத்தாத³யோ. ஸுஞ்ஞதப்படிஸங்யுத்தாதி ஸத்தஸுஞ்ஞதாதீ³பகா க²ஜ்ஜனிகஸுத்தந்தாத³யோ. உபஸம்பஜ்ஜ விஹரிஸ்ஸாமாதி படிலபி⁴த்வா விஹரிஸ்ஸாம. ஏவஞ்ஹி வோ, த⁴ம்மதி³ன்ன, ஸிக்கி²தப்³ப³ந்தி ஏவங் தும்ஹேஹி சந்தோ³பமபடிபத³ங் ரத²வினீதபடிபத³ங் மோனெய்யபடிபத³ங் மஹாஅரியவங்ஸபடிபத³ங் பூரெந்தேஹி ஸிக்கி²தப்³ப³ங். இதி ஸத்தா² இமேஸங் உபாஸகானங் அஸய்ஹபா⁴ரங் ஆரோபேஸி. கஸ்மா ? ஏதே கிர ந அத்தனோ பூ⁴மியங் ட²த்வா ஓவாத³ங் யாசிங்ஸு, அவிஸேஸேன பன ஸப்³ப³பா⁴ரங் உக்கி²பிதுங் ஸமத்தா² விய ‘‘ஓவத³து நோ, ப⁴ந்தே, ப⁴க³வா’’தி யாசிங்ஸு. தேன தேஸங் ஸத்தா² அஸய்ஹபா⁴ரங் ஆரோபெந்தோ ஏவமாஹ. ந கோ² நேதந்தி ந கோ² ஏதங். நகாரோ பனெத்த² ப்³யஞ்ஜனஸந்தி⁴மத்தமேவாதி வேதி³தப்³போ³. தஸ்மாதி யஸ்மா இதா³னி அத்தனோ பூ⁴மியங் ட²த்வா ஓவாத³ங் யாசத², தஸ்மா.
Gambhīrāti dhammagambhīrā sallasuttādayo. Gambhīratthāti atthagambhīrā cetanāsuttantādayo. Lokuttarāti lokuttaratthadīpakā asaṅkhatasaṃyuttādayo. Suññatappaṭisaṃyuttāti sattasuññatādīpakā khajjanikasuttantādayo. Upasampajja viharissāmāti paṭilabhitvā viharissāma. Evañhi vo, dhammadinna, sikkhitabbanti evaṃ tumhehi candopamapaṭipadaṃ rathavinītapaṭipadaṃ moneyyapaṭipadaṃ mahāariyavaṃsapaṭipadaṃ pūrentehi sikkhitabbaṃ. Iti satthā imesaṃ upāsakānaṃ asayhabhāraṃ āropesi. Kasmā ? Ete kira na attano bhūmiyaṃ ṭhatvā ovādaṃ yāciṃsu, avisesena pana sabbabhāraṃ ukkhipituṃ samatthā viya ‘‘ovadatu no, bhante, bhagavā’’ti yāciṃsu. Tena tesaṃ satthā asayhabhāraṃ āropento evamāha. Na kho netanti na kho etaṃ. Nakāro panettha byañjanasandhimattamevāti veditabbo. Tasmāti yasmā idāni attano bhūmiyaṃ ṭhatvā ovādaṃ yācatha, tasmā.
Related texts:
திபிடக (மூல) • Tipiṭaka (Mūla) / ஸுத்தபிடக • Suttapiṭaka / ஸங்யுத்தனிகாய • Saṃyuttanikāya / 3. த⁴ம்மதி³ன்னஸுத்தங் • 3. Dhammadinnasuttaṃ
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 3. த⁴ம்மதி³ன்னஸுத்தவண்ணனா • 3. Dhammadinnasuttavaṇṇanā
