| Library / Tipiṭaka / তিপিটক • Tipiṭaka / ৰিভঙ্গপাল়ি • Vibhaṅgapāḷi |
১৮. ধম্মহদযৰিভঙ্গো
18. Dhammahadayavibhaṅgo
১. সব্বসঙ্গাহিকৰারো
1. Sabbasaṅgāhikavāro
৯৭৮. কতি খন্ধা, কতি আযতনানি, কতি ধাতুযো, কতি সচ্চানি, কতি ইন্দ্রিযানি, কতি হেতূ, কতি আহারা, কতি ফস্সা, কতি ৰেদনা, কতি সঞ্ঞা, কতি চেতনা, কতি চিত্তানি?
978. Kati khandhā, kati āyatanāni, kati dhātuyo, kati saccāni, kati indriyāni, kati hetū, kati āhārā, kati phassā, kati vedanā, kati saññā, kati cetanā, kati cittāni?
পঞ্চক্খন্ধা, দ্ৰাদসাযতনানি, অট্ঠারস ধাতুযো, চত্তারি সচ্চানি, বাৰীসতিন্দ্রিযানি, নৰ হেতূ, চত্তারো আহারা, সত্ত ফস্সা, সত্ত ৰেদনা, সত্ত সঞ্ঞা, সত্ত চেতনা, সত্ত চিত্তানি।
Pañcakkhandhā, dvādasāyatanāni, aṭṭhārasa dhātuyo, cattāri saccāni, bāvīsatindriyāni, nava hetū, cattāro āhārā, satta phassā, satta vedanā, satta saññā, satta cetanā, satta cittāni.
৯৭৯. তত্থ কতমে পঞ্চক্খন্ধা? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘পঞ্চক্খন্ধা’’।
979. Tattha katame pañcakkhandhā? Rūpakkhandho, vedanākkhandho, saññākkhandho, saṅkhārakkhandho, viññāṇakkhandho – ime vuccanti ‘‘pañcakkhandhā’’.
৯৮০. তত্থ কতমানি দ্ৰাদসাযতনানি? চক্খাযতনং, রূপাযতনং, সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং – ইমানি ৰুচ্চন্তি ‘‘দ্ৰাদসাযতনানি’’।
980. Tattha katamāni dvādasāyatanāni? Cakkhāyatanaṃ, rūpāyatanaṃ, sotāyatanaṃ, saddāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ, kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ – imāni vuccanti ‘‘dvādasāyatanāni’’.
৯৮১. তত্থ কতমা অট্ঠারস ধাতুযো? চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, ঘানধাতু , গন্ধধাতু, ঘানৰিঞ্ঞাণধাতু, জিৰ্হাধাতু, রসধাতু, জিৰ্হাৰিঞ্ঞাণধাতু, কাযধাতু, ফোট্ঠব্বধাতু, কাযৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতু – ইমা ৰুচ্চন্তি ‘‘অট্ঠারস ধাতুযো’’।
981. Tattha katamā aṭṭhārasa dhātuyo? Cakkhudhātu, rūpadhātu, cakkhuviññāṇadhātu, sotadhātu, saddadhātu, sotaviññāṇadhātu, ghānadhātu , gandhadhātu, ghānaviññāṇadhātu, jivhādhātu, rasadhātu, jivhāviññāṇadhātu, kāyadhātu, phoṭṭhabbadhātu, kāyaviññāṇadhātu, manodhātu, dhammadhātu, manoviññāṇadhātu – imā vuccanti ‘‘aṭṭhārasa dhātuyo’’.
৯৮২. তত্থ কতমানি চত্তারি সচ্চানি? দুক্খসচ্চং, সমুদযসচ্চং, নিরোধসচ্চং, মগ্গসচ্চং – ইমানি ৰুচ্চন্তি ‘‘চত্তারি সচ্চানি’’।
982. Tattha katamāni cattāri saccāni? Dukkhasaccaṃ, samudayasaccaṃ, nirodhasaccaṃ, maggasaccaṃ – imāni vuccanti ‘‘cattāri saccāni’’.
৯৮৩. তত্থ কতমানি বাৰীসতিন্দ্রিযানি? চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং, পুরিসিন্দ্রিযং, জীৰিতিন্দ্রিযং, সুখিন্দ্রিযং, দুক্খিন্দ্রিযং, সোমনস্সিন্দ্রিযং, দোমনস্সিন্দ্রিযং, উপেক্খিন্দ্রিযং , সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘বাৰীসতিন্দ্রিযানি’’।
983. Tattha katamāni bāvīsatindriyāni? Cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ, itthindriyaṃ, purisindriyaṃ, jīvitindriyaṃ, sukhindriyaṃ, dukkhindriyaṃ, somanassindriyaṃ, domanassindriyaṃ, upekkhindriyaṃ , saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ, anaññātaññassāmītindriyaṃ, aññindriyaṃ, aññātāvindriyaṃ – imāni vuccanti ‘‘bāvīsatindriyāni’’.
৯৮৪. তত্থ কতমে নৰ হেতূ? তযো কুসলহেতূ, তযো অকুসলহেতূ, তযো অব্যাকতহেতূ।
984. Tattha katame nava hetū? Tayo kusalahetū, tayo akusalahetū, tayo abyākatahetū.
তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ।
Tattha katame tayo kusalahetū? Alobho kusalahetu, adoso kusalahetu, amoho kusalahetu – ime tayo kusalahetū.
তত্থ কতমে তযো অকুসলহেতূ? লোভো অকুসলহেতু, দোসো অকুসলহেতু, মোহো অকুসলহেতু – ইমে তযো অকুসলহেতূ।
Tattha katame tayo akusalahetū? Lobho akusalahetu, doso akusalahetu, moho akusalahetu – ime tayo akusalahetū.
তত্থ কতমে তযো অব্যাকতহেতূ? কুসলানং ৰা ধম্মানং ৰিপাকতো কিরিযাব্যাকতেসু ৰা ধম্মেসু অলোভো, অদোসো, অমোহো – ইমে তযো অব্যাকতহেতূ। ইমে ৰুচ্চন্তি ‘‘নৰ হেতূ’’।
Tattha katame tayo abyākatahetū? Kusalānaṃ vā dhammānaṃ vipākato kiriyābyākatesu vā dhammesu alobho, adoso, amoho – ime tayo abyākatahetū. Ime vuccanti ‘‘nava hetū’’.
৯৮৫. তত্থ কতমে চত্তারো আহারা? কবল়ীকারাহারো 1, ফস্সাহারো, মনোসঞ্চেতনাহারো , ৰিঞ্ঞাণাহারো – ইমে ৰুচ্চন্তি ‘‘চত্তারো আহারা’’।
985. Tattha katame cattāro āhārā? Kabaḷīkārāhāro 2, phassāhāro, manosañcetanāhāro , viññāṇāhāro – ime vuccanti ‘‘cattāro āhārā’’.
৯৮৬. তত্থ কতমে সত্ত ফস্সা? চক্খুসম্ফস্সো, সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোধাতুসম্ফস্সো, মনোৰিঞ্ঞাণধাতুসম্ফস্সো – ইমে ৰুচ্চন্তি ‘‘সত্ত ফস্সা’’।
986. Tattha katame satta phassā? Cakkhusamphasso, sotasamphasso, ghānasamphasso, jivhāsamphasso, kāyasamphasso, manodhātusamphasso, manoviññāṇadhātusamphasso – ime vuccanti ‘‘satta phassā’’.
৯৮৭. তত্থ কতমা সত্ত ৰেদনা? চক্খুসম্ফস্সজা ৰেদনা, সোতসম্ফস্সজা ৰেদনা, ঘানসম্ফস্সজা ৰেদনা, জিৰ্হাসম্ফস্সজা ৰেদনা, কাযসম্ফস্সজা ৰেদনা, মনোধাতুসম্ফস্সজা ৰেদনা, মনোৰিঞ্ঞাণধাতুসম্ফস্সজা ৰেদনা – ইমা ৰুচ্চন্তি ‘‘সত্ত ৰেদনা’’।
987. Tattha katamā satta vedanā? Cakkhusamphassajā vedanā, sotasamphassajā vedanā, ghānasamphassajā vedanā, jivhāsamphassajā vedanā, kāyasamphassajā vedanā, manodhātusamphassajā vedanā, manoviññāṇadhātusamphassajā vedanā – imā vuccanti ‘‘satta vedanā’’.
৯৮৮. তত্থ কতমা সত্ত সঞ্ঞা? চক্খুসম্ফস্সজা সঞ্ঞা, সোতসম্ফস্সজা সঞ্ঞা, ঘানসম্ফস্সজা সঞ্ঞা, জিৰ্হাসম্ফস্সজা সঞ্ঞা, কাযসম্ফস্সজা সঞ্ঞা, মনোধাতুসম্ফস্সজা সঞ্ঞা, মনোৰিঞ্ঞাণধাতুসম্ফস্সজা সঞ্ঞা – ইমা ৰুচ্চন্তি ‘‘সত্ত সঞ্ঞা’’।
988. Tattha katamā satta saññā? Cakkhusamphassajā saññā, sotasamphassajā saññā, ghānasamphassajā saññā, jivhāsamphassajā saññā, kāyasamphassajā saññā, manodhātusamphassajā saññā, manoviññāṇadhātusamphassajā saññā – imā vuccanti ‘‘satta saññā’’.
৯৮৯. তত্থ কতমা সত্ত চেতনা? চক্খুসম্ফস্সজা চেতনা, সোতসম্ফস্সজা চেতনা, ঘানসম্ফস্সজা চেতনা, জিৰ্হাসম্ফস্সজা চেতনা, কাযসম্ফস্সজা চেতনা, মনোধাতুসম্ফস্সজা চেতনা, মনোৰিঞ্ঞাণধাতুসম্ফস্সজা চেতনা – ইমা ৰুচ্চন্তি ‘‘সত্ত চেতনা’’।
989. Tattha katamā satta cetanā? Cakkhusamphassajā cetanā, sotasamphassajā cetanā, ghānasamphassajā cetanā, jivhāsamphassajā cetanā, kāyasamphassajā cetanā, manodhātusamphassajā cetanā, manoviññāṇadhātusamphassajā cetanā – imā vuccanti ‘‘satta cetanā’’.
৯৯০. তত্থ কতমানি সত্ত চিত্তানি? চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং , কাযৰিঞ্ঞাণং, মনোধাতু, মনোৰিঞ্ঞাণধাতু – ইমানি ৰুচ্চন্তি ‘‘সত্ত চিত্তানি’’।
990. Tattha katamāni satta cittāni? Cakkhuviññāṇaṃ, sotaviññāṇaṃ, ghānaviññāṇaṃ, jivhāviññāṇaṃ , kāyaviññāṇaṃ, manodhātu, manoviññāṇadhātu – imāni vuccanti ‘‘satta cittāni’’.
২. উপ্পত্তানুপ্পত্তিৰারো
2. Uppattānuppattivāro
১. কামধাতু
1. Kāmadhātu
৯৯১. কামধাতুযা কতি খন্ধা, কতি আযতনানি, কতি ধাতুযো, কতি সচ্চানি, কতি ইন্দ্রিযানি, কতি হেতূ, কতি আহারা, কতি ফস্সা, কতি ৰেদনা, কতি সঞ্ঞা, কতি চেতনা, কতি চিত্তানি?
991. Kāmadhātuyā kati khandhā, kati āyatanāni, kati dhātuyo, kati saccāni, kati indriyāni, kati hetū, kati āhārā, kati phassā, kati vedanā, kati saññā, kati cetanā, kati cittāni?
কামধাতুযা পঞ্চক্খন্ধা, দ্ৰাদসাযতনানি, অট্ঠারস ধাতুযো, তীণি সচ্চানি, বাৰীসতিন্দ্রিযানি, নৰ হেতূ, চত্তারো আহারা, সত্ত ফস্সা, সত্ত ৰেদনা, সত্ত সঞ্ঞা, সত্ত চেতনা, সত্ত চিত্তানি।
Kāmadhātuyā pañcakkhandhā, dvādasāyatanāni, aṭṭhārasa dhātuyo, tīṇi saccāni, bāvīsatindriyāni, nava hetū, cattāro āhārā, satta phassā, satta vedanā, satta saññā, satta cetanā, satta cittāni.
৯৯২. তত্থ কতমে কামধাতুযা পঞ্চক্খন্ধা? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘কামধাতুযা পঞ্চক্খন্ধা’’।
992. Tattha katame kāmadhātuyā pañcakkhandhā? Rūpakkhandho, vedanākkhandho, saññākkhandho, saṅkhārakkhandho, viññāṇakkhandho – ime vuccanti ‘‘kāmadhātuyā pañcakkhandhā’’.
তত্থ কতমানি কামধাতুযা দ্ৰাদসাযতনানি? চক্খাযতনং, রূপাযতনং , সোতাযতনং, সদ্দাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং – ইমানি ৰুচ্চন্তি ‘‘কামধাতুযা দ্ৰাদসাযতনানি’’।
Tattha katamāni kāmadhātuyā dvādasāyatanāni? Cakkhāyatanaṃ, rūpāyatanaṃ , sotāyatanaṃ, saddāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ, kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ – imāni vuccanti ‘‘kāmadhātuyā dvādasāyatanāni’’.
তত্থ কতমা কামধাতুযা অট্ঠারস ধাতুযো? চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, ঘানধাতু, গন্ধধাতু, ঘানৰিঞ্ঞাণধাতু, জিৰ্হাধাতু, রসধাতু, জিৰ্হাৰিঞ্ঞাণধাতু, কাযধাতু, ফোট্ঠব্বধাতু, কাযৰিঞ্ঞাণধাতু, মনোধাতু, ধম্মধাতু , মনোৰিঞ্ঞাণধাতু – ইমা ৰুচ্চন্তি ‘‘কামধাতুযা অট্ঠারস ধাতুযো’’।
Tattha katamā kāmadhātuyā aṭṭhārasa dhātuyo? Cakkhudhātu, rūpadhātu, cakkhuviññāṇadhātu, sotadhātu, saddadhātu, sotaviññāṇadhātu, ghānadhātu, gandhadhātu, ghānaviññāṇadhātu, jivhādhātu, rasadhātu, jivhāviññāṇadhātu, kāyadhātu, phoṭṭhabbadhātu, kāyaviññāṇadhātu, manodhātu, dhammadhātu , manoviññāṇadhātu – imā vuccanti ‘‘kāmadhātuyā aṭṭhārasa dhātuyo’’.
তত্থ কতমানি কামধাতুযা তীণি সচ্চানি? দুক্খসচ্চং, সমুদযসচ্চং, মগ্গসচ্চং – ইমানি ৰুচ্চন্তি ‘‘কামধাতুযা তীণি সচ্চানি’’।
Tattha katamāni kāmadhātuyā tīṇi saccāni? Dukkhasaccaṃ, samudayasaccaṃ, maggasaccaṃ – imāni vuccanti ‘‘kāmadhātuyā tīṇi saccāni’’.
তত্থ কতমানি কামধাতুযা বাৰীসতিন্দ্রিযানি? চক্খুন্দ্রিযং, সোতিন্দ্রিযং…পে॰… অঞ্ঞাতাৰিন্দ্রিযং – ইমানি ৰুচ্চন্তি ‘‘কামধাতুযা বাৰীসতিন্দ্রিযানি’’।
Tattha katamāni kāmadhātuyā bāvīsatindriyāni? Cakkhundriyaṃ, sotindriyaṃ…pe… aññātāvindriyaṃ – imāni vuccanti ‘‘kāmadhātuyā bāvīsatindriyāni’’.
তত্থ কতমে কামধাতুযা নৰ হেতূ? তযো কুসলহেতূ, তযো অকুসলহেতূ, তযো অব্যাকতহেতূ…পে॰… ইমে ৰুচ্চন্তি ‘‘কামধাতুযা নৰ হেতূ’’।
Tattha katame kāmadhātuyā nava hetū? Tayo kusalahetū, tayo akusalahetū, tayo abyākatahetū…pe… ime vuccanti ‘‘kāmadhātuyā nava hetū’’.
তত্থ কতমে কামধাতুযা চত্তারো আহারা? কবল়ীকারাহারো, ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘কামধাতুযা চত্তারো আহারা’’।
Tattha katame kāmadhātuyā cattāro āhārā? Kabaḷīkārāhāro, phassāhāro, manosañcetanāhāro, viññāṇāhāro – ime vuccanti ‘‘kāmadhātuyā cattāro āhārā’’.
তত্থ কতমে কামধাতুযা সত্ত ফস্সা? চক্খুসম্ফস্সো সোতসম্ফস্সো, ঘানসম্ফস্সো, জিৰ্হাসম্ফস্সো, কাযসম্ফস্সো, মনোধাতুসম্ফস্সো, মনোৰিঞ্ঞাণধাতুসম্ফস্সো – ইমে ৰুচ্চন্তি ‘‘কামধাতুযা সত্ত ফস্সা’’।
Tattha katame kāmadhātuyā satta phassā? Cakkhusamphasso sotasamphasso, ghānasamphasso, jivhāsamphasso, kāyasamphasso, manodhātusamphasso, manoviññāṇadhātusamphasso – ime vuccanti ‘‘kāmadhātuyā satta phassā’’.
তত্থ কতমা কামধাতুযা সত্ত ৰেদনা? চক্খুসম্ফস্সজা ৰেদনা, সোতসম্ফস্সজা ৰেদনা, ঘানসম্ফস্সজা ৰেদনা, জিৰ্হাসম্ফস্সজা ৰেদনা, কাযসম্ফস্সজা ৰেদনা, মনোধাতুসম্ফস্সজা ৰেদনা, মনোৰিঞ্ঞাণধাতুসম্ফস্সজা ৰেদনা – ইমা ৰুচ্চত্তি ‘‘কামধাতুযা সত্ত ৰেদনা’’।
Tattha katamā kāmadhātuyā satta vedanā? Cakkhusamphassajā vedanā, sotasamphassajā vedanā, ghānasamphassajā vedanā, jivhāsamphassajā vedanā, kāyasamphassajā vedanā, manodhātusamphassajā vedanā, manoviññāṇadhātusamphassajā vedanā – imā vuccatti ‘‘kāmadhātuyā satta vedanā’’.
তত্থ কতমা কামধাতুযা সত্ত সঞ্ঞা? চক্খুসম্ফস্সজা সঞ্ঞা, সোতসম্ফস্সজা সঞ্ঞা, ঘানসম্ফস্সজা সঞ্ঞা, জিৰ্হাসম্ফস্সজা সঞ্ঞা, কাযসম্ফস্সজা সঞ্ঞা, মনোধাতুসম্ফস্সজা সঞ্ঞা, মনোৰিঞ্ঞাণধাতুসম্ফস্সজা সঞ্ঞা – ইমা ৰুচ্চন্তি ‘‘কামধাতুযা সত্ত সঞ্ঞা’’।
Tattha katamā kāmadhātuyā satta saññā? Cakkhusamphassajā saññā, sotasamphassajā saññā, ghānasamphassajā saññā, jivhāsamphassajā saññā, kāyasamphassajā saññā, manodhātusamphassajā saññā, manoviññāṇadhātusamphassajā saññā – imā vuccanti ‘‘kāmadhātuyā satta saññā’’.
তত্থ কতমা কামধাতুযা সত্ত চেতনা? চক্খুসম্ফস্সজা চেতনা, সোতসম্ফস্সজা চেতনা, ঘানসম্ফস্সজা চেতনা, জিৰ্হাসম্ফস্সজা চেতনা, কাযসম্ফস্সজা চেতনা, মনোধাতুসম্ফস্সজা চেতনা, মনোৰিঞ্ঞাণধাতুসম্ফস্সজা চেতনা – ইমা ৰুচ্চন্তি ‘‘কামধাতুযা সত্ত চেতনা’’।
Tattha katamā kāmadhātuyā satta cetanā? Cakkhusamphassajā cetanā, sotasamphassajā cetanā, ghānasamphassajā cetanā, jivhāsamphassajā cetanā, kāyasamphassajā cetanā, manodhātusamphassajā cetanā, manoviññāṇadhātusamphassajā cetanā – imā vuccanti ‘‘kāmadhātuyā satta cetanā’’.
তত্থ কতমানি কামধাতুযা সত্ত চিত্তানি? চক্খুৰিঞ্ঞাণং, সোতৰিঞ্ঞাণং, ঘানৰিঞ্ঞাণং, জিৰ্হাৰিঞ্ঞাণং, কাযৰিঞ্ঞাণং, মনোধাতু, মনোৰিঞ্ঞাণধাতু – ইমানি ৰুচ্চন্তি ‘‘কামধাতুযা সত্ত চিত্তানি’’।
Tattha katamāni kāmadhātuyā satta cittāni? Cakkhuviññāṇaṃ, sotaviññāṇaṃ, ghānaviññāṇaṃ, jivhāviññāṇaṃ, kāyaviññāṇaṃ, manodhātu, manoviññāṇadhātu – imāni vuccanti ‘‘kāmadhātuyā satta cittāni’’.
২. রূপধাতু
2. Rūpadhātu
৯৯৩. রূপধাতুযা কতি খন্ধা, কতি আযতনা, কতি ধাতুযো, কতি সচ্চানি, কতি ইন্দ্রিযানি…পে॰… কতি চিত্তানি?
993. Rūpadhātuyā kati khandhā, kati āyatanā, kati dhātuyo, kati saccāni, kati indriyāni…pe… kati cittāni?
রূপধাতুযা পঞ্চক্খন্ধা, ছ আযতনানি, নৰ ধাতুযো, তীণি সচ্চানি , চুদ্দসিন্দ্রিযানি, অট্ঠ হেতূ, তযো আহারা, চত্তারো ফস্সা, চতস্সো ৰেদনা, চতস্সো সঞ্ঞা, চতস্সো চেতনা, চত্তারি চিত্তানি।
Rūpadhātuyā pañcakkhandhā, cha āyatanāni, nava dhātuyo, tīṇi saccāni , cuddasindriyāni, aṭṭha hetū, tayo āhārā, cattāro phassā, catasso vedanā, catasso saññā, catasso cetanā, cattāri cittāni.
৯৯৪. তত্থ কতমে রূপধাতুযা পঞ্চক্খন্ধা? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘রূপধাতুযা পঞ্চক্খন্ধা’’।
994. Tattha katame rūpadhātuyā pañcakkhandhā? Rūpakkhandho, vedanākkhandho, saññākkhandho, saṅkhārakkhandho, viññāṇakkhandho – ime vuccanti ‘‘rūpadhātuyā pañcakkhandhā’’.
তত্থ কতমানি রূপধাতুযা ছ আযতনানি? চক্খাযতনং, রূপাযতনং, সোতাযতনং, সদ্দাযতনং, মনাযতনং, ধম্মাযতনং – ইমানি ৰুচ্চন্তি ‘‘রূপধাতুযা ছ আযতনানি’’।
Tattha katamāni rūpadhātuyā cha āyatanāni? Cakkhāyatanaṃ, rūpāyatanaṃ, sotāyatanaṃ, saddāyatanaṃ, manāyatanaṃ, dhammāyatanaṃ – imāni vuccanti ‘‘rūpadhātuyā cha āyatanāni’’.
তত্থ কতমা রূপধাতুযা নৰ ধাতুযো? চক্খুধাতু, রূপধাতু, চক্খুৰিঞ্ঞাণধাতু, সোতধাতু, সদ্দধাতু, সোতৰিঞ্ঞাণধাতু, মনোধাতু, ধম্মধাতু, মনোৰিঞ্ঞাণধাতু – ইমা ৰুচ্চন্তি ‘‘রূপধাতুযা নৰ ধাতুযো’’।
Tattha katamā rūpadhātuyā nava dhātuyo? Cakkhudhātu, rūpadhātu, cakkhuviññāṇadhātu, sotadhātu, saddadhātu, sotaviññāṇadhātu, manodhātu, dhammadhātu, manoviññāṇadhātu – imā vuccanti ‘‘rūpadhātuyā nava dhātuyo’’.
তত্থ কতমানি রূপধাতুযা তীণি সচ্চানি? দুক্খসচ্চং, সমুদযসচ্চং, মগ্গসচ্চং – ইমানি ৰুচ্চন্তি ‘‘রূপধাতুযা তীণি সচ্চানি’’।
Tattha katamāni rūpadhātuyā tīṇi saccāni? Dukkhasaccaṃ, samudayasaccaṃ, maggasaccaṃ – imāni vuccanti ‘‘rūpadhātuyā tīṇi saccāni’’.
তত্থ কতমানি রূপধাতুযা চুদ্দসিন্দ্রিযানি? চক্খুন্দ্রিযং, সোতিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং , উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘রূপধাতুযা চুদ্দসিন্দ্রিযানি’’।
Tattha katamāni rūpadhātuyā cuddasindriyāni? Cakkhundriyaṃ, sotindriyaṃ, manindriyaṃ, jīvitindriyaṃ, somanassindriyaṃ , upekkhindriyaṃ, saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ, anaññātaññassāmītindriyaṃ, aññindriyaṃ, aññātāvindriyaṃ – imāni vuccanti ‘‘rūpadhātuyā cuddasindriyāni’’.
তত্থ কতমে রূপধাতুযা অট্ঠ হেতূ? তযো কুসলহেতূ, দ্ৰে অকুসলহেতূ, তযো অব্যাকতহেতূ।
Tattha katame rūpadhātuyā aṭṭha hetū? Tayo kusalahetū, dve akusalahetū, tayo abyākatahetū.
তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ।
Tattha katame tayo kusalahetū? Alobho kusalahetu, adoso kusalahetu, amoho kusalahetu – ime tayo kusalahetū.
তত্থ কতমে দ্ৰে অকুসলহেতূ? লোভো অকুসলহেতু, মোহো অকুসলহেতু – ইমে দ্ৰে অকুসলহেতূ।
Tattha katame dve akusalahetū? Lobho akusalahetu, moho akusalahetu – ime dve akusalahetū.
তত্থ কতমে তযো অব্যাকতহেতূ? কুসলানং ৰা ধম্মানং ৰিপাকতো কিরিযাব্যাকতেসু ৰা ধম্মেসু অলোভো, অদোসো, অমোহো – ইমে তযো অব্যাকতহেতূ। ইমে ৰুচ্চন্তি রূপধাতুযা অট্ঠ হেতূ।
Tattha katame tayo abyākatahetū? Kusalānaṃ vā dhammānaṃ vipākato kiriyābyākatesu vā dhammesu alobho, adoso, amoho – ime tayo abyākatahetū. Ime vuccanti rūpadhātuyā aṭṭha hetū.
তত্থ কতমে রূপধাতুযা তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘রূপধাতুযা তযো আহারা’’।
Tattha katame rūpadhātuyā tayo āhārā? Phassāhāro, manosañcetanāhāro, viññāṇāhāro – ime vuccanti ‘‘rūpadhātuyā tayo āhārā’’.
তত্থ কতমে রূপধাতুযা চত্তারো ফস্সা? চক্খুসম্ফস্সো, সোতসম্ফস্সো, মনোধাতুসম্ফস্সো, মনোৰিঞ্ঞাণধাতুসম্ফস্সো – ইমে ৰুচ্চন্তি ‘‘রূপধাতুযা চত্তারো ফস্সা’’।
Tattha katame rūpadhātuyā cattāro phassā? Cakkhusamphasso, sotasamphasso, manodhātusamphasso, manoviññāṇadhātusamphasso – ime vuccanti ‘‘rūpadhātuyā cattāro phassā’’.
তত্থ কতমা রূপধাতুযা চতস্সো ৰেদনা…পে॰… চতস্সো সঞ্ঞা…পে॰… চতস্সো চেতনা…পে॰… চত্তারি চিত্তানি? চক্খুৰিঞ্ঞাণং, সোতৰিঞ্ঞাণং, মনোধাতু, মনোৰিঞ্ঞাণধাতু – ইমানি ৰুচ্চন্তি ‘‘রূপধাতুযা চত্তারি চিত্তানি’’।
Tattha katamā rūpadhātuyā catasso vedanā…pe… catasso saññā…pe… catasso cetanā…pe… cattāri cittāni? Cakkhuviññāṇaṃ, sotaviññāṇaṃ, manodhātu, manoviññāṇadhātu – imāni vuccanti ‘‘rūpadhātuyā cattāri cittāni’’.
৩. অরূপধাতু
3. Arūpadhātu
৯৯৫. অরূপধাতুযা কতি খন্ধা…পে॰… কতি চিত্তানি?
995. Arūpadhātuyā kati khandhā…pe… kati cittāni?
অরূপধাতুযা চত্তারো খন্ধা, দ্ৰে আযতনানি, দ্ৰে ধাতুযো, তীণি সচ্চানি, একাদসিন্দ্রিযানি , অট্ঠ হেতূ, তযো আহারা, একো ফস্সো, একা ৰেদনা, একা সঞ্ঞা, একা চেতনা, একং চিত্তং।
Arūpadhātuyā cattāro khandhā, dve āyatanāni, dve dhātuyo, tīṇi saccāni, ekādasindriyāni , aṭṭha hetū, tayo āhārā, eko phasso, ekā vedanā, ekā saññā, ekā cetanā, ekaṃ cittaṃ.
৯৯৬. তত্থ কতমে অরূপধাতুযা চত্তারো খন্ধা? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘অরূপধাতুযা চত্তারো খন্ধা’’।
996. Tattha katame arūpadhātuyā cattāro khandhā? Vedanākkhandho, saññākkhandho, saṅkhārakkhandho, viññāṇakkhandho – ime vuccanti ‘‘arūpadhātuyā cattāro khandhā’’.
তত্থ কতমানি অরূপধাতুযা দ্ৰে আযতনানি? মনাযতনং, ধম্মাযতনং – ইমানি ৰুচ্চন্তি ‘‘অরূপধাতুযা দ্ৰে আযতনানি’’।
Tattha katamāni arūpadhātuyā dve āyatanāni? Manāyatanaṃ, dhammāyatanaṃ – imāni vuccanti ‘‘arūpadhātuyā dve āyatanāni’’.
তত্থ কতমা অরূপধাতুযা দ্ৰে ধাতুযো? মনোৰিঞ্ঞাণধাতু , ধম্মধাতু – ইমা ৰুচ্চন্তি ‘‘অরূপধাতুযা দ্ৰে ধাতুযো’’।
Tattha katamā arūpadhātuyā dve dhātuyo? Manoviññāṇadhātu , dhammadhātu – imā vuccanti ‘‘arūpadhātuyā dve dhātuyo’’.
তত্থ কতমানি অরূপধাতুযা তীণি সচ্চানি? দুক্খসচ্চং, সমুদযসচ্চং, মগ্গসচ্চং – ইমানি ৰুচ্চন্তি ‘‘অরূপধাতুযা তীণি সচ্চানি’’।
Tattha katamāni arūpadhātuyā tīṇi saccāni? Dukkhasaccaṃ, samudayasaccaṃ, maggasaccaṃ – imāni vuccanti ‘‘arūpadhātuyā tīṇi saccāni’’.
তত্থ কতমানি অরূপধাতুযা একাদসিন্দ্রিযানি? মনিন্দ্রিযং, জীৰিতিন্দ্রিযং, সোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘অরূপধাতুযা একাদসিন্দ্রিযানি’’।
Tattha katamāni arūpadhātuyā ekādasindriyāni? Manindriyaṃ, jīvitindriyaṃ, somanassindriyaṃ, upekkhindriyaṃ, saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ, aññindriyaṃ, aññātāvindriyaṃ – imāni vuccanti ‘‘arūpadhātuyā ekādasindriyāni’’.
তত্থ কতমে অরূপধাতুযা অট্ঠ হেতূ? তযো কুসলহেতূ, দ্ৰে অকুসলহেতূ, তযো অব্যাকতহেতূ…পে॰… ইমে ৰুচ্চন্তি ‘‘অরূপধাতুযা অট্ঠ হেতূ’’।
Tattha katame arūpadhātuyā aṭṭha hetū? Tayo kusalahetū, dve akusalahetū, tayo abyākatahetū…pe… ime vuccanti ‘‘arūpadhātuyā aṭṭha hetū’’.
তত্থ কতমে অরূপধাতুযা তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘অরূপধাতুযা তযো আহারা’’।
Tattha katame arūpadhātuyā tayo āhārā? Phassāhāro, manosañcetanāhāro, viññāṇāhāro – ime vuccanti ‘‘arūpadhātuyā tayo āhārā’’.
তত্থ কতমো অরূপধাতুযা একো ফস্সো? মনোৰিঞ্ঞাণধাতুসম্ফস্সো – অযং ৰুচ্চতি ‘‘অরূপধাতুযা একো ফস্সো’’।
Tattha katamo arūpadhātuyā eko phasso? Manoviññāṇadhātusamphasso – ayaṃ vuccati ‘‘arūpadhātuyā eko phasso’’.
তত্থ কতমা অরূপধাতুযা একা ৰেদনা…পে॰… একা সঞ্ঞা…পে॰… একা চেতনা…পে॰… একং চিত্তং? মনোৰিঞ্ঞাণধাতু – ইদং ৰুচ্চতি ‘‘অরূপধাতুযা একং চিত্তং’’।
Tattha katamā arūpadhātuyā ekā vedanā…pe… ekā saññā…pe… ekā cetanā…pe… ekaṃ cittaṃ? Manoviññāṇadhātu – idaṃ vuccati ‘‘arūpadhātuyā ekaṃ cittaṃ’’.
৪. অপরিযাপন্নং
4. Apariyāpannaṃ
৯৯৭. অপরিযাপন্নে কতি খন্ধা…পে॰… কতি চিত্তানি?
997. Apariyāpanne kati khandhā…pe… kati cittāni?
অপরিযাপন্নে চত্তারো খন্ধা, দ্ৰে আযতনানি, দ্ৰে ধাতুযো, দ্ৰে সচ্চানি, দ্ৰাদসিন্দ্রিযানি, ছ হেতূ, তযো আহারা, একো ফস্সো, একা ৰেদনা, একা সঞ্ঞা, একা চেতনা, একং চিত্তং।
Apariyāpanne cattāro khandhā, dve āyatanāni, dve dhātuyo, dve saccāni, dvādasindriyāni, cha hetū, tayo āhārā, eko phasso, ekā vedanā, ekā saññā, ekā cetanā, ekaṃ cittaṃ.
৯৯৮. তত্থ কতমে অপরিযাপন্নে চত্তারো খন্ধা? ৰেদনাক্খন্ধো, সঞ্ঞাক্খন্ধো , সঙ্খারক্খন্ধো, ৰিঞ্ঞাণক্খন্ধো – ইমে ৰুচ্চন্তি ‘‘অপরিযাপন্নে চত্তারো খন্ধা’’।
998. Tattha katame apariyāpanne cattāro khandhā? Vedanākkhandho, saññākkhandho , saṅkhārakkhandho, viññāṇakkhandho – ime vuccanti ‘‘apariyāpanne cattāro khandhā’’.
তত্থ কতমানি অপরিযাপন্নে দ্ৰে আযতনানি? মনাযতনং, ধম্মাযতনং – ইমানি ৰুচ্চন্তি ‘‘অপরিযাপন্নে দ্ৰে আযতনানি’’।
Tattha katamāni apariyāpanne dve āyatanāni? Manāyatanaṃ, dhammāyatanaṃ – imāni vuccanti ‘‘apariyāpanne dve āyatanāni’’.
তত্থ কতমা অপরিযাপন্নে দ্ৰে ধাতুযো? মনোৰিঞ্ঞাণধাতু, ধম্মধাতু – ইমা ৰুচ্চন্তি ‘‘অপরিযাপন্নে দ্ৰে ধাতুযো’’।
Tattha katamā apariyāpanne dve dhātuyo? Manoviññāṇadhātu, dhammadhātu – imā vuccanti ‘‘apariyāpanne dve dhātuyo’’.
তত্থ কতমানি অপরিযাপন্নে দ্ৰে সচ্চানি? মগ্গসচ্চং, নিরোধসচ্চং – ইমানি ৰুচ্চন্তি ‘‘অপরিযাপন্নে দ্ৰে সচ্চানি’’।
Tattha katamāni apariyāpanne dve saccāni? Maggasaccaṃ, nirodhasaccaṃ – imāni vuccanti ‘‘apariyāpanne dve saccāni’’.
তত্থ কতমানি অপরিযাপন্নে দ্ৰাদসিন্দ্রিযানি? মনিন্দ্রিযং, জীৰিতিন্দ্রিযং, সোমনস্সিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং, অনঞ্ঞাতঞ্ঞস্সামীতিন্দ্রিযং, অঞ্ঞিন্দ্রিযং, অঞ্ঞাতাৰিন্দ্রিযং – ইমানি ৰুচ্চন্তি ‘‘অপরিযাপন্নে দ্ৰাদসিন্দ্রিযানি’’।
Tattha katamāni apariyāpanne dvādasindriyāni? Manindriyaṃ, jīvitindriyaṃ, somanassindriyaṃ, upekkhindriyaṃ, saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ, anaññātaññassāmītindriyaṃ, aññindriyaṃ, aññātāvindriyaṃ – imāni vuccanti ‘‘apariyāpanne dvādasindriyāni’’.
তত্থ কতমে অপরিযাপন্নে ছ হেতূ? তযো কুসলহেতূ, তযো অব্যাকতহেতূ।
Tattha katame apariyāpanne cha hetū? Tayo kusalahetū, tayo abyākatahetū.
তত্থ কতমে তযো কুসলহেতূ? অলোভো কুসলহেতু, অদোসো কুসলহেতু, অমোহো কুসলহেতু – ইমে তযো কুসলহেতূ।
Tattha katame tayo kusalahetū? Alobho kusalahetu, adoso kusalahetu, amoho kusalahetu – ime tayo kusalahetū.
তত্থ কতমে তযো অব্যাকতহেতূ? কুসলানং ধম্মানং ৰিপাকতো অলোভো, অদোসো, অমোহো – ইমে তযো অব্যাকতহেতূ। ইমে ৰুচ্চন্তি ‘‘অপরিযাপন্নে ছ হেতূ’’।
Tattha katame tayo abyākatahetū? Kusalānaṃ dhammānaṃ vipākato alobho, adoso, amoho – ime tayo abyākatahetū. Ime vuccanti ‘‘apariyāpanne cha hetū’’.
তত্থ কতমে অপরিযাপন্নে তযো আহারা? ফস্সাহারো, মনোসঞ্চেতনাহারো, ৰিঞ্ঞাণাহারো – ইমে ৰুচ্চন্তি ‘‘অপরিযাপন্নে তযো আহারা’’।
Tattha katame apariyāpanne tayo āhārā? Phassāhāro, manosañcetanāhāro, viññāṇāhāro – ime vuccanti ‘‘apariyāpanne tayo āhārā’’.
তত্থ কতমো অপরিযাপন্নে একো ফস্সো? মনোৰিঞ্ঞাণধাতুসম্ফস্সো – অযং ৰুচ্চতি ‘‘অপরিযাপন্নে একো ফস্সো’’।
Tattha katamo apariyāpanne eko phasso? Manoviññāṇadhātusamphasso – ayaṃ vuccati ‘‘apariyāpanne eko phasso’’.
তত্থ কতমা অপরিযাপন্নে একা ৰেদনা…পে॰… একা সঞ্ঞা…পে॰… একা চেতনা…পে॰… একং চিত্তং? মনোৰিঞ্ঞাণধাতু – ইদং ৰুচ্চতি ‘‘অপরিযাপন্নে একং চিত্তং’’।
Tattha katamā apariyāpanne ekā vedanā…pe… ekā saññā…pe… ekā cetanā…pe… ekaṃ cittaṃ? Manoviññāṇadhātu – idaṃ vuccati ‘‘apariyāpanne ekaṃ cittaṃ’’.
৩. পরিযাপন্নাপরিযাপন্নৰারো
3. Pariyāpannāpariyāpannavāro
১. কামধাতু
1. Kāmadhātu
৯৯৯. পঞ্চন্নং খন্ধানং কতি কামধাতুপরিযাপন্না, কতি ন কামধাতুপরিযাপন্না…পে॰… সত্তন্নং চিত্তানং কতি কামধাতুপরিযাপন্না, কতি ন কামধাতুপরিযাপন্না?
999. Pañcannaṃ khandhānaṃ kati kāmadhātupariyāpannā, kati na kāmadhātupariyāpannā…pe… sattannaṃ cittānaṃ kati kāmadhātupariyāpannā, kati na kāmadhātupariyāpannā?
১০০০. রূপক্খন্ধো কামধাতুপরিযাপন্নো; চত্তারো খন্ধা সিযা কামধাতুপরিযাপন্না, সিযা ন কামধাতুপরিযাপন্না।
1000. Rūpakkhandho kāmadhātupariyāpanno; cattāro khandhā siyā kāmadhātupariyāpannā, siyā na kāmadhātupariyāpannā.
দসাযতনা কামধাতুপরিযাপন্না; দ্ৰে আযতনা সিযা কামধাতুপরিযাপন্না, সিযা ন কামধাতুপরিযাপন্না।
Dasāyatanā kāmadhātupariyāpannā; dve āyatanā siyā kāmadhātupariyāpannā, siyā na kāmadhātupariyāpannā.
সোল়স ধাতুযো কামধাতুপরিযাপন্না; দ্ৰে ধাতুযো সিযা কামধাতুপরিযাপন্না, সিযা ন কামধাতুপরিযাপন্না।
Soḷasa dhātuyo kāmadhātupariyāpannā; dve dhātuyo siyā kāmadhātupariyāpannā, siyā na kāmadhātupariyāpannā.
সমুদযসচ্চং কামধাতুপরিযাপন্নং; দ্ৰে সচ্চা ন কামধাতুপরিযাপন্না; দুক্খসচ্চং সিযা কামধাতুপরিযাপন্নং, সিযা ন কামধাতুপরিযাপন্নং।
Samudayasaccaṃ kāmadhātupariyāpannaṃ; dve saccā na kāmadhātupariyāpannā; dukkhasaccaṃ siyā kāmadhātupariyāpannaṃ, siyā na kāmadhātupariyāpannaṃ.
দসিন্দ্রিযা কামধাতুপরিযাপন্না; তীণিন্দ্রিযা ন কামধাতুপরিযাপন্না; নৰিন্দ্রিযা সিযা কামধাতুপরিযাপন্না, সিযা ন কামধাতুপরিযাপন্না।
Dasindriyā kāmadhātupariyāpannā; tīṇindriyā na kāmadhātupariyāpannā; navindriyā siyā kāmadhātupariyāpannā, siyā na kāmadhātupariyāpannā.
তযো অকুসলহেতূ কামধাতুপরিযাপন্না; ছ হেতূ সিযা কামধাতুপরিযাপন্না, সিযা ন কামধাতুপরিযাপন্না।
Tayo akusalahetū kāmadhātupariyāpannā; cha hetū siyā kāmadhātupariyāpannā, siyā na kāmadhātupariyāpannā.
কবল়ীকারো আহারো কামধাতুপরিযাপন্নো; তযো আহারা সিযা কামধাতুপরিযাপন্না, সিযা ন কামধাতুপরিযাপন্না।
Kabaḷīkāro āhāro kāmadhātupariyāpanno; tayo āhārā siyā kāmadhātupariyāpannā, siyā na kāmadhātupariyāpannā.
ছ ফস্সা কামধাতুপরিযাপন্না; মনোৰিঞ্ঞাণধাতুসম্ফস্সো সিযা কামধাতু পরিযাপন্নো, সিযা ন কামধাতুপরিযাপন্নো।
Cha phassā kāmadhātupariyāpannā; manoviññāṇadhātusamphasso siyā kāmadhātu pariyāpanno, siyā na kāmadhātupariyāpanno.
ছ ৰেদনা…পে॰… ছ সঞ্ঞা… ছ চেতনা… ছ চিত্তা কামধাতুপরিযাপন্না; মনোৰিঞ্ঞাণধাতু সিযা কামধাতুপরিযাপন্না, সিযা ন কামধাতুপরিযাপন্না।
Cha vedanā…pe… cha saññā… cha cetanā… cha cittā kāmadhātupariyāpannā; manoviññāṇadhātu siyā kāmadhātupariyāpannā, siyā na kāmadhātupariyāpannā.
২. রূপধাতু
2. Rūpadhātu
১০০১. পঞ্চন্নং খন্ধানং কতি রূপধাতুপরিযাপন্না, কতি ন রূপধাতুপরিযাপন্না …পে॰… সত্তন্নং চিত্তানং কতি রূপধাতুপরিযাপন্না, কতি ন রূপধাতুপরিযাপন্না?
1001. Pañcannaṃ khandhānaṃ kati rūpadhātupariyāpannā, kati na rūpadhātupariyāpannā …pe… sattannaṃ cittānaṃ kati rūpadhātupariyāpannā, kati na rūpadhātupariyāpannā?
১০০২. রূপক্খন্ধো ন রূপধাতুপরিযাপন্নো; চত্তারো খন্ধা সিযা রূপধাতুপরিযাপন্না, সিযা ন রূপধাতুপরিযাপন্না।
1002. Rūpakkhandho na rūpadhātupariyāpanno; cattāro khandhā siyā rūpadhātupariyāpannā, siyā na rūpadhātupariyāpannā.
দসাযতনা ন রূপধাতুপরিযাপন্না; দ্ৰে আযতনা সিযা রূপধাতুপরিযাপন্না, সিযা ন রূপধাতুপরিযাপন্না।
Dasāyatanā na rūpadhātupariyāpannā; dve āyatanā siyā rūpadhātupariyāpannā, siyā na rūpadhātupariyāpannā.
সোল়স ধাতুযো ন রূপধাতুপরিযাপন্না; দ্ৰে ধাতুযো সিযা রূপধাতুপরিযাপন্না, সিযা ন রূপধাতুপরিযাপন্না।
Soḷasa dhātuyo na rūpadhātupariyāpannā; dve dhātuyo siyā rūpadhātupariyāpannā, siyā na rūpadhātupariyāpannā.
তীণি সচ্চানি ন রূপধাতুপরিযাপন্না; দুক্খসচ্চং সিযা রূপধাতুপরিযাপন্নং, সিযা ন রূপধাতুপরিযাপন্নং।
Tīṇi saccāni na rūpadhātupariyāpannā; dukkhasaccaṃ siyā rūpadhātupariyāpannaṃ, siyā na rūpadhātupariyāpannaṃ.
তেরসিন্দ্রিযা ন রূপধাতুপরিযাপন্না; নৰিন্দ্রিযা সিযা রূপধাতুপরিযাপন্না, সিযা ন রূপধাতুপরিযাপন্না।
Terasindriyā na rūpadhātupariyāpannā; navindriyā siyā rūpadhātupariyāpannā, siyā na rūpadhātupariyāpannā.
তযো অকুসলহেতূ ন রূপধাতুপরিযাপন্না; ছ হেতূ সিযা রূপধাতুপরিযাপন্না, সিযা ন রূপধাতুপরিযাপন্না।
Tayo akusalahetū na rūpadhātupariyāpannā; cha hetū siyā rūpadhātupariyāpannā, siyā na rūpadhātupariyāpannā.
কবল়ীকারো আহারো ন রূপধাতুপরিযাপন্নো; তযো আহারা সিযা রূপধাতুপরিযাপন্না, সিযা ন রূপধাতুপরিযাপন্না।
Kabaḷīkāro āhāro na rūpadhātupariyāpanno; tayo āhārā siyā rūpadhātupariyāpannā, siyā na rūpadhātupariyāpannā.
ছ ফস্সা ন রূপধাতুপরিযাপন্না; মনোৰিঞ্ঞাণধাতুসম্ফস্সো সিযা রূপধাতুপরিযাপন্নো, সিযা ন রূপধাতুপরিযাপন্নো।
Cha phassā na rūpadhātupariyāpannā; manoviññāṇadhātusamphasso siyā rūpadhātupariyāpanno, siyā na rūpadhātupariyāpanno.
ছ ৰেদনা…পে॰… ছ সঞ্ঞা… ছ চেতনা… ছ চিত্তা ন রূপধাতুপরিযাপন্না; মনোৰিঞ্ঞাণধাতু সিযা রূপধাতুপরিযাপন্না, সিযা ন রূপধাতুপরিযাপন্না।
Cha vedanā…pe… cha saññā… cha cetanā… cha cittā na rūpadhātupariyāpannā; manoviññāṇadhātu siyā rūpadhātupariyāpannā, siyā na rūpadhātupariyāpannā.
৩. অরূপধাতু
3. Arūpadhātu
১০০৩. পঞ্চন্নং খন্ধানং কতি অরূপধাতুপরিযাপন্না, কতি ন অরূপধাতুপরিযাপন্না…পে॰… সত্তন্নং চিত্তানং কতি অরূপধাতুপরিযাপন্না, কতি ন অরূপধাতুপরিযাপন্না?
1003. Pañcannaṃ khandhānaṃ kati arūpadhātupariyāpannā, kati na arūpadhātupariyāpannā…pe… sattannaṃ cittānaṃ kati arūpadhātupariyāpannā, kati na arūpadhātupariyāpannā?
১০০৪. রূপক্খন্ধো ন অরূপধাতুপরিযাপন্নো; চত্তারো খন্ধা সিযা অরূপধাতুপরিযাপন্না, সিযা ন অরূপধাতুপরিযাপন্না।
1004. Rūpakkhandho na arūpadhātupariyāpanno; cattāro khandhā siyā arūpadhātupariyāpannā, siyā na arūpadhātupariyāpannā.
দসাযতনা ন অরূপধাতুপরিযাপন্না; দ্ৰে আযতনা সিযা অরূপধাতুপরিযাপন্না, সিযা ন অরূপধাতুপরিযাপন্না।
Dasāyatanā na arūpadhātupariyāpannā; dve āyatanā siyā arūpadhātupariyāpannā, siyā na arūpadhātupariyāpannā.
সোল়স ধাতুযো ন অরূপধাতুপরিযাপন্না; দ্ৰে ধাতুযো সিযা অরূপধাতুপরিযাপন্না, সিযা ন অরূপধাতুপরিযাপন্না।
Soḷasa dhātuyo na arūpadhātupariyāpannā; dve dhātuyo siyā arūpadhātupariyāpannā, siyā na arūpadhātupariyāpannā.
তীণি সচ্চানি ন অরূপধাতুপরিযাপন্নানি।
Tīṇi saccāni na arūpadhātupariyāpannāni.
দুক্খসচ্চং সিযা অরূপধাতুপরিযাপন্নং, সিযা ন অরূপধাতুপরিযাপন্নং।
Dukkhasaccaṃ siyā arūpadhātupariyāpannaṃ, siyā na arūpadhātupariyāpannaṃ.
চুদ্দসিন্দ্রিযা ন অরূপধাতুপরিযাপন্না; অট্ঠিন্দ্রিযা সিযা অরূপধাতুপরিযাপন্না, সিযা ন অরূপধাতুপরিযাপন্না।
Cuddasindriyā na arūpadhātupariyāpannā; aṭṭhindriyā siyā arūpadhātupariyāpannā, siyā na arūpadhātupariyāpannā.
তযো অকুসলহেতূ ন অরূপধাতুপরিযাপন্না; ছ হেতূ সিযা অরূপধাতুপরিযাপন্না, সিযা ন অরূপধাতুপরিযাপন্না।
Tayo akusalahetū na arūpadhātupariyāpannā; cha hetū siyā arūpadhātupariyāpannā, siyā na arūpadhātupariyāpannā.
কবল়ীকারো আহারো ন অরূপধাতুপরিযাপন্নো; তযো আহারা সিযা অরূপধাতুপরিযাপন্না, সিযা ন অরূপধাতুপরিযাপন্না।
Kabaḷīkāro āhāro na arūpadhātupariyāpanno; tayo āhārā siyā arūpadhātupariyāpannā, siyā na arūpadhātupariyāpannā.
ছ ফস্সা ন অরূপধাতুপরিযাপন্না; মনোৰিঞ্ঞাণধাতুসম্ফস্সো সিযা অরূপধাতুপরিযাপন্নো, সিযা ন অরূপধাতুপরিযাপন্নো।
Cha phassā na arūpadhātupariyāpannā; manoviññāṇadhātusamphasso siyā arūpadhātupariyāpanno, siyā na arūpadhātupariyāpanno.
ছ ৰেদনা…পে॰… ছ সঞ্ঞা … ছ চেতনা… ছ চিত্তা ন অরূপধাতুপরিযাপন্না; মনোৰিঞ্ঞাণধাতু সিযা অরূপধাতুপরিযাপন্না, সিযা ন অরূপধাতুপরিযাপন্না।
Cha vedanā…pe… cha saññā … cha cetanā… cha cittā na arūpadhātupariyāpannā; manoviññāṇadhātu siyā arūpadhātupariyāpannā, siyā na arūpadhātupariyāpannā.
৪. পরিযাপন্নাপরিযাপন্নং
4. Pariyāpannāpariyāpannaṃ
১০০৫. পঞ্চন্নং খন্ধানং কতি পরিযাপন্না, কতি অপরিযাপন্না…পে॰… সত্তন্নং চিত্তানং কতি পরিযাপন্না, কতি অপরিযাপন্না?
1005. Pañcannaṃ khandhānaṃ kati pariyāpannā, kati apariyāpannā…pe… sattannaṃ cittānaṃ kati pariyāpannā, kati apariyāpannā?
১০০৬. রূপক্খন্ধো পরিযাপন্নো; চত্তারো খন্ধা সিযা পরিযাপন্না, সিযা অপরিযাপন্না।
1006. Rūpakkhandho pariyāpanno; cattāro khandhā siyā pariyāpannā, siyā apariyāpannā.
দসাযতনা পরিযাপন্না; দ্ৰে আযতনা সিযা পরিযাপন্না, সিযা অপরিযাপন্না।
Dasāyatanā pariyāpannā; dve āyatanā siyā pariyāpannā, siyā apariyāpannā.
সোল়স ধাতুযো পরিযাপন্না; দ্ৰে ধাতুযো সিযা পরিযাপন্না, সিযা অপরিযাপন্না।
Soḷasa dhātuyo pariyāpannā; dve dhātuyo siyā pariyāpannā, siyā apariyāpannā.
দ্ৰে সচ্চা পরিযাপন্না; দ্ৰে সচ্চা অপরিযাপন্না।
Dve saccā pariyāpannā; dve saccā apariyāpannā.
দসিন্দ্রিযা পরিযাপন্না, তীণিন্দ্রিযা অপরিযাপন্না; নৰিন্দ্রিযা সিযা পরিযাপন্না, সিযা অপরিযাপন্না।
Dasindriyā pariyāpannā, tīṇindriyā apariyāpannā; navindriyā siyā pariyāpannā, siyā apariyāpannā.
তযো অকুসলহেতূ পরিযাপন্না; ছ হেতূ সিযা পরিযাপন্না, সিযা অপরিযাপন্না।
Tayo akusalahetū pariyāpannā; cha hetū siyā pariyāpannā, siyā apariyāpannā.
কবল়ীকারো আহারো পরিযাপন্নো; তযো আহারা সিযা পরিযাপন্না, সিযা অপরিযাপন্না।
Kabaḷīkāro āhāro pariyāpanno; tayo āhārā siyā pariyāpannā, siyā apariyāpannā.
ছ ফস্সা পরিযাপন্না; মনোৰিঞ্ঞাণধাতুসম্ফস্সো সিযা পরিযাপন্নো, সিযা অপরিযাপন্নো।
Cha phassā pariyāpannā; manoviññāṇadhātusamphasso siyā pariyāpanno, siyā apariyāpanno.
ছ ৰেদনা…পে॰… ছ সঞ্ঞা… ছ চেতনা… ছ চিত্তা পরিযাপন্না; মনোৰিঞ্ঞাণধাতু সিযা পরিযাপন্না, সিযা অপরিযাপন্না।
Cha vedanā…pe… cha saññā… cha cetanā… cha cittā pariyāpannā; manoviññāṇadhātu siyā pariyāpannā, siyā apariyāpannā.
৪. ধম্মদস্সনৰারো
4. Dhammadassanavāro
১. কামধাতু
1. Kāmadhātu
১০০৭. কামধাতুযা উপপত্তিক্খণে কতি খন্ধা পাতুভৰন্তি…পে॰… কতি চিত্তানি পাতুভৰন্তি?
1007. Kāmadhātuyā upapattikkhaṇe kati khandhā pātubhavanti…pe… kati cittāni pātubhavanti?
কামধাতুযা উপপত্তিক্খণে সব্বেসং পঞ্চক্খন্ধা পাতুভৰন্তি; কস্সচি একাদসাযতনানি পাতুভৰন্তি; কস্সচি দসাযতনানি পাতুভৰন্তি; কস্সচি অপরানি দসাযতনানি পাতুভৰন্তি; কস্সচি নৰাযতনানি পাতুভৰন্তি; কস্সচি সত্তাযতনানি পাতুভৰন্তি; কস্সচি একাদস ধাতুযো পাতুভৰন্তি; কস্সচি দস ধাতুযো পাতুভৰন্তি; কস্সচি অপরা দস ধাতুযো পাতুভৰন্তি; কস্সচি নৰ ধাতুযো পাতুভৰন্তি; কস্সচি সত্ত ধাতুযো পাতুভৰন্তি; সব্বেসং একং সচ্চং পাতুভৰতি; কস্সচি চুদ্দসিন্দ্রিযানি পাতুভৰন্তি; কস্সচি তেরসিন্দ্রিযানি পাতুভৰন্তি; কস্সচি অপরানি তেরসিন্দ্রিযানি পাতুভৰন্তি; কস্সচি দ্ৰাদসিন্দ্রিযানি পাতুভৰন্তি; কস্সচি দসিন্দ্রিযানি পাতুভৰন্তি; কস্সচি নৰিন্দ্রিযানি পাতুভৰন্তি; কস্সচি অপরানি নৰিন্দ্রিযানি পাতুভৰন্তি; কস্সচি অট্ঠিন্দ্রিযানি পাতুভৰন্তি; কস্সচি অপরানি অট্ঠিন্দ্রিযানি পাতুভৰন্তি; কস্সচি সত্তিন্দ্রিযানি পাতুভৰন্তি; কস্সচি পঞ্চিন্দ্রিযানি পাতুভৰন্তি; কস্সচি চত্তারিন্দ্রিযানি পাতুভৰন্তি; কস্সচি তযো হেতূ পাতুভৰন্তি; কস্সচি দ্ৰে হেতূ পাতুভৰন্তি; কস্সচি 3 অহেতুকা পাতুভৰন্তি ; সব্বেসং চত্তারো আহারা পাতুভৰন্তি; সব্বেসং একো ফস্সো পাতুভৰতি; সব্বেসং একা ৰেদনা… একা সঞ্ঞা… একা চেতনা… একং চিত্তং পাতুভৰতি।
Kāmadhātuyā upapattikkhaṇe sabbesaṃ pañcakkhandhā pātubhavanti; kassaci ekādasāyatanāni pātubhavanti; kassaci dasāyatanāni pātubhavanti; kassaci aparāni dasāyatanāni pātubhavanti; kassaci navāyatanāni pātubhavanti; kassaci sattāyatanāni pātubhavanti; kassaci ekādasa dhātuyo pātubhavanti; kassaci dasa dhātuyo pātubhavanti; kassaci aparā dasa dhātuyo pātubhavanti; kassaci nava dhātuyo pātubhavanti; kassaci satta dhātuyo pātubhavanti; sabbesaṃ ekaṃ saccaṃ pātubhavati; kassaci cuddasindriyāni pātubhavanti; kassaci terasindriyāni pātubhavanti; kassaci aparāni terasindriyāni pātubhavanti; kassaci dvādasindriyāni pātubhavanti; kassaci dasindriyāni pātubhavanti; kassaci navindriyāni pātubhavanti; kassaci aparāni navindriyāni pātubhavanti; kassaci aṭṭhindriyāni pātubhavanti; kassaci aparāni aṭṭhindriyāni pātubhavanti; kassaci sattindriyāni pātubhavanti; kassaci pañcindriyāni pātubhavanti; kassaci cattārindriyāni pātubhavanti; kassaci tayo hetū pātubhavanti; kassaci dve hetū pātubhavanti; kassaci 4 ahetukā pātubhavanti ; sabbesaṃ cattāro āhārā pātubhavanti; sabbesaṃ eko phasso pātubhavati; sabbesaṃ ekā vedanā… ekā saññā… ekā cetanā… ekaṃ cittaṃ pātubhavati.
১০০৮. কামধাতুযা উপপত্তিক্খণে সব্বেসং কতমে পঞ্চক্খন্ধা পাতুভৰন্তি? রূপক্খন্ধো…পে॰… ৰিঞ্ঞাণক্খন্ধো – কামধাতুযা উপপত্তিক্খণে সব্বেসং ইমে পঞ্চক্খন্ধা পাতুভৰন্তি।
1008. Kāmadhātuyā upapattikkhaṇe sabbesaṃ katame pañcakkhandhā pātubhavanti? Rūpakkhandho…pe… viññāṇakkhandho – kāmadhātuyā upapattikkhaṇe sabbesaṃ ime pañcakkhandhā pātubhavanti.
১০০৯. কামধাতুযা উপপত্তিক্খণে কস্স একাদসাযতনানি পাতুভৰন্তি? কামাৰচরানং দেৰানং, পঠমকপ্পিকানং মনুস্সানং, ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং, নেরযিকানং পরিপুণ্ণাযতনানং উপপত্তিক্খণে একাদসাযতনানি পাতুভৰন্তি – চক্খাযতনং, রূপাযতনং, সোতাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং। কামধাতুযা উপপত্তিক্খণে এতেসং ইমানি একাদসাযতনানি পাতুভৰন্তি।
1009. Kāmadhātuyā upapattikkhaṇe kassa ekādasāyatanāni pātubhavanti? Kāmāvacarānaṃ devānaṃ, paṭhamakappikānaṃ manussānaṃ, opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ, nerayikānaṃ paripuṇṇāyatanānaṃ upapattikkhaṇe ekādasāyatanāni pātubhavanti – cakkhāyatanaṃ, rūpāyatanaṃ, sotāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ, kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ. Kāmadhātuyā upapattikkhaṇe etesaṃ imāni ekādasāyatanāni pātubhavanti.
কামধাতুযা উপপত্তিক্খণে কস্স দসাযতনানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধানং উপপত্তিক্খণে দসাযতনানি পাতুভৰন্তি – রূপাযতনং, সোতাযতনং, ঘানাযতনং, গন্ধাযতনং, জিৰ্হাযতনং, রসাযতনং , কাযাযতনং, ফোট্ঠব্বাযতনং, মনাযতনং, ধম্মাযতনং। কামধাতুযা উপপত্তিক্খণে এতেসং ইমানি দসাযতনানি পাতুভৰন্তি।
Kāmadhātuyā upapattikkhaṇe kassa dasāyatanāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccandhānaṃ upapattikkhaṇe dasāyatanāni pātubhavanti – rūpāyatanaṃ, sotāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ , kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ. Kāmadhātuyā upapattikkhaṇe etesaṃ imāni dasāyatanāni pātubhavanti.
কামধাতুযা উপপত্তিক্খণে কস্স অপরানি দসাযতনানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চবধিরানং উপপত্তিক্খণে দসাযতনানি পাতুভৰন্তি – চক্খাযতনং, রূপাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং। কামধাতুযা উপপত্তিক্খণে এতেসং ইমানি দসাযতনানি পাতুভৰন্তি।
Kāmadhātuyā upapattikkhaṇe kassa aparāni dasāyatanāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccabadhirānaṃ upapattikkhaṇe dasāyatanāni pātubhavanti – cakkhāyatanaṃ, rūpāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ, kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ. Kāmadhātuyā upapattikkhaṇe etesaṃ imāni dasāyatanāni pātubhavanti.
কামধাতুযা উপপত্তিক্খণে কস্স নৰাযতনানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধবধিরানং উপপত্তিক্খণে নৰাযতনানি পাতুভৰন্তি – রূপাযতনং, ঘানাযতনং, গন্ধাযতনং, জিৰ্হাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং। কামধাতুযা উপপত্তিক্খণে এতেসং ইমানি নৰাযতনানি পাতুভৰন্তি।
Kāmadhātuyā upapattikkhaṇe kassa navāyatanāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccandhabadhirānaṃ upapattikkhaṇe navāyatanāni pātubhavanti – rūpāyatanaṃ, ghānāyatanaṃ, gandhāyatanaṃ, jivhāyatanaṃ, rasāyatanaṃ, kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ. Kāmadhātuyā upapattikkhaṇe etesaṃ imāni navāyatanāni pātubhavanti.
কামধাতুযা উপপত্তিক্খণে কস্স সত্তাযতনানি পাতুভৰন্তি? গব্ভসেয্যকানং সত্তানং উপপত্তিক্খণে সত্তাযতনানি পাতুভৰন্তি – রূপাযতনং, গন্ধাযতনং, রসাযতনং, কাযাযতনং, ফোট্ঠব্বাযতনং, মনাযতনং, ধম্মাযতনং। কামধাতুযা উপপত্তিক্খণে এতেসং ইমানি সত্তাযতনানি পাতুভৰন্তি।
Kāmadhātuyā upapattikkhaṇe kassa sattāyatanāni pātubhavanti? Gabbhaseyyakānaṃ sattānaṃ upapattikkhaṇe sattāyatanāni pātubhavanti – rūpāyatanaṃ, gandhāyatanaṃ, rasāyatanaṃ, kāyāyatanaṃ, phoṭṭhabbāyatanaṃ, manāyatanaṃ, dhammāyatanaṃ. Kāmadhātuyā upapattikkhaṇe etesaṃ imāni sattāyatanāni pātubhavanti.
১০১০. কামধাতুযা উপপত্তিক্খণে কস্স একাদস ধাতুযো পাতুভৰন্তি? কামাৰচরানং দেৰানং, পঠমকপ্পিকানং মনুস্সানং, ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং পরিপুণ্ণাযতনানং উপপত্তিক্খণে একাদস ধাতুযো পাতুভৰন্তি – চক্খুধাতু, রূপধাতু, সোতধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু। কামধাতুযা উপপত্তিক্খণে এতেসং ইমা একাদস ধাতুযো পাতুভৰন্তি।
1010. Kāmadhātuyā upapattikkhaṇe kassa ekādasa dhātuyo pātubhavanti? Kāmāvacarānaṃ devānaṃ, paṭhamakappikānaṃ manussānaṃ, opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ paripuṇṇāyatanānaṃ upapattikkhaṇe ekādasa dhātuyo pātubhavanti – cakkhudhātu, rūpadhātu, sotadhātu, ghānadhātu, gandhadhātu, jivhādhātu, rasadhātu, kāyadhātu, phoṭṭhabbadhātu, manoviññāṇadhātu, dhammadhātu. Kāmadhātuyā upapattikkhaṇe etesaṃ imā ekādasa dhātuyo pātubhavanti.
কামধাতুযা উপপত্তিক্খণে কস্স দস ধাতুযো পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং , জচ্চন্ধানং উপপত্তিক্খণে দস ধাতুযো পাতুভৰন্তি – রূপধাতু, সোতধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু। কামধাতুযা উপপত্তিক্খণে এতেসং ইমা দস ধাতুযো পাতুভৰন্তি।
Kāmadhātuyā upapattikkhaṇe kassa dasa dhātuyo pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ , jaccandhānaṃ upapattikkhaṇe dasa dhātuyo pātubhavanti – rūpadhātu, sotadhātu, ghānadhātu, gandhadhātu, jivhādhātu, rasadhātu, kāyadhātu, phoṭṭhabbadhātu, manoviññāṇadhātu, dhammadhātu. Kāmadhātuyā upapattikkhaṇe etesaṃ imā dasa dhātuyo pātubhavanti.
কামধাতুযা উপপত্তিক্খণে কস্স অপরা দস ধাতুযো পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চবধিরানং উপপত্তিক্খণে দস ধাতুযো পাতুভৰন্তি – চক্খুধাতু, রূপধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু। কামধাতুযা উপপত্তিক্খণে এতেসং ইমা দস ধাতুযো পাতুভৰন্তি।
Kāmadhātuyā upapattikkhaṇe kassa aparā dasa dhātuyo pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccabadhirānaṃ upapattikkhaṇe dasa dhātuyo pātubhavanti – cakkhudhātu, rūpadhātu, ghānadhātu, gandhadhātu, jivhādhātu, rasadhātu, kāyadhātu, phoṭṭhabbadhātu, manoviññāṇadhātu, dhammadhātu. Kāmadhātuyā upapattikkhaṇe etesaṃ imā dasa dhātuyo pātubhavanti.
কামধাতুযা উপপত্তিক্খণে কস্স নৰ ধাতুযো পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধবধিরানং উপপত্তিক্খণে নৰ ধাতুযো পাতুভৰন্তি – রূপধাতু, ঘানধাতু, গন্ধধাতু, জিৰ্হাধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু। কামধাতুযা উপপত্তিক্খণে এতেসং ইমা নৰ ধাতুযো পাতুভৰন্তি।
Kāmadhātuyā upapattikkhaṇe kassa nava dhātuyo pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccandhabadhirānaṃ upapattikkhaṇe nava dhātuyo pātubhavanti – rūpadhātu, ghānadhātu, gandhadhātu, jivhādhātu, rasadhātu, kāyadhātu, phoṭṭhabbadhātu, manoviññāṇadhātu, dhammadhātu. Kāmadhātuyā upapattikkhaṇe etesaṃ imā nava dhātuyo pātubhavanti.
কামধাতুযা উপপত্তিক্খণে কস্স সত্ত ধাতুযো পাতুভৰন্তি? গব্ভসেয্যকানং সত্তানং উপপত্তিক্খণে সত্ত ধাতুযো পাতুভৰন্তি – রূপধাতু, গন্ধধাতু, রসধাতু, কাযধাতু, ফোট্ঠব্বধাতু, মনোৰিঞ্ঞাণধাতু, ধম্মধাতু। কামধাতুযা উপপত্তিক্খণে এতেসং ইমা সত্ত ধাতুযো পাতুভৰন্তি।
Kāmadhātuyā upapattikkhaṇe kassa satta dhātuyo pātubhavanti? Gabbhaseyyakānaṃ sattānaṃ upapattikkhaṇe satta dhātuyo pātubhavanti – rūpadhātu, gandhadhātu, rasadhātu, kāyadhātu, phoṭṭhabbadhātu, manoviññāṇadhātu, dhammadhātu. Kāmadhātuyā upapattikkhaṇe etesaṃ imā satta dhātuyo pātubhavanti.
১০১১. কামধাতুযা উপপত্তিক্খণে সব্বেসং কতমং একং সচ্চং পাতুভৰতি? দুক্খসচ্চং – কামধাতুযা উপপত্তিক্খণে সব্বেসং ইদং একং সচ্চং পাতুভৰতি।
1011. Kāmadhātuyā upapattikkhaṇe sabbesaṃ katamaṃ ekaṃ saccaṃ pātubhavati? Dukkhasaccaṃ – kāmadhātuyā upapattikkhaṇe sabbesaṃ idaṃ ekaṃ saccaṃ pātubhavati.
১০১২. কামধাতুযা উপপত্তিক্খণে কস্স চুদ্দসিন্দ্রিযানি পাতুভৰন্তি? কামাৰচরানং দেৰানং, সহেতুকানং ঞাণসম্পযুত্তানং উপপত্তিক্খণে চুদ্দসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং , মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং। কামধাতুযা উপপত্তিক্খণে এতেসং ইমানি চুদ্দসিন্দ্রিযানি পাতুভৰন্তি।
1012. Kāmadhātuyā upapattikkhaṇe kassa cuddasindriyāni pātubhavanti? Kāmāvacarānaṃ devānaṃ, sahetukānaṃ ñāṇasampayuttānaṃ upapattikkhaṇe cuddasindriyāni pātubhavanti – cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ , manindriyaṃ, itthindriyaṃ vā purisindriyaṃ vā, jīvitindriyaṃ, somanassindriyaṃ vā upekkhindriyaṃ vā, saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. Kāmadhātuyā upapattikkhaṇe etesaṃ imāni cuddasindriyāni pātubhavanti.
কামধাতুযা উপপত্তিক্খণে কস্স তেরসিন্দ্রিযানি পাতুভৰন্তি? কামাৰচরানং দেৰানং সহেতুকানং ঞাণৰিপ্পযুত্তানং উপপত্তিক্খণে তেরসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং। কামধাতুযা উপপত্তিক্খণে এতেসং ইমানি তেরসিন্দ্রিযানি পাতুভৰন্তি।
Kāmadhātuyā upapattikkhaṇe kassa terasindriyāni pātubhavanti? Kāmāvacarānaṃ devānaṃ sahetukānaṃ ñāṇavippayuttānaṃ upapattikkhaṇe terasindriyāni pātubhavanti – cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ, somanassindriyaṃ vā upekkhindriyaṃ vā, saddhindriyaṃ, vīriyindriyaṃ, satindriyaṃ, samādhindriyaṃ. Kāmadhātuyā upapattikkhaṇe etesaṃ imāni terasindriyāni pātubhavanti.
কামধাতুযা উপপত্তিক্খণে কস্স অপরানি তেরসিন্দ্রিযানি পাতুভৰন্তি? পঠমকপ্পিকানং মনুস্সানং সহেতুকানং ঞাণসম্পযুত্তানং উপপত্তিক্খণে তেরসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং , ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং। কামধাতুযা উপপত্তিক্খণে এতেসং ইমানি তেরসিন্দ্রিযানি পাতুভৰন্তি।
Kāmadhātuyā upapattikkhaṇe kassa aparāni terasindriyāni pātubhavanti? Paṭhamakappikānaṃ manussānaṃ sahetukānaṃ ñāṇasampayuttānaṃ upapattikkhaṇe terasindriyāni pātubhavanti – cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ, jīvitindriyaṃ, somanassindriyaṃ vā upekkhindriyaṃ vā, saddhindriyaṃ , vīriyindriyaṃ, satindriyaṃ, samādhindriyaṃ, paññindriyaṃ. Kāmadhātuyā upapattikkhaṇe etesaṃ imāni terasindriyāni pātubhavanti.
কামধাতুযা উপপত্তিক্খণে কস্স দ্ৰাদসিন্দ্রিযানি পাতুভৰন্তি? পঠমকপ্পিকানং মনুস্সানং সহেতুকানং ঞাণৰিপ্পযুত্তানং উপপত্তিক্খণে দ্ৰাদসিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং। কামধাতুযা উপপত্তিক্খণে এতেসং ইমানি দ্ৰাদসিন্দ্রিযানি পাতুভৰন্তি।
Kāmadhātuyā upapattikkhaṇe kassa dvādasindriyāni pātubhavanti? Paṭhamakappikānaṃ manussānaṃ sahetukānaṃ ñāṇavippayuttānaṃ upapattikkhaṇe dvādasindriyāni pātubhavanti – cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ, jīvitindriyaṃ, somanassindriyaṃ vā upekkhindriyaṃ vā, saddhindriyaṃ, vīriyindriyaṃ, satindriyaṃ, samādhindriyaṃ. Kāmadhātuyā upapattikkhaṇe etesaṃ imāni dvādasindriyāni pātubhavanti.
কামধাতুযা উপপত্তিক্খণে কস্স দসিন্দ্রিযানি পাতুভৰন্তি? গব্ভসেয্যকানং সত্তানং সহেতুকানং ঞাণসম্পযুত্তানং উপপত্তিক্খণে দসিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং। কামধাতুযা উপপত্তিক্খণে এতেসং ইমানি দসিন্দ্রিযানি পাতুভৰন্তি।
Kāmadhātuyā upapattikkhaṇe kassa dasindriyāni pātubhavanti? Gabbhaseyyakānaṃ sattānaṃ sahetukānaṃ ñāṇasampayuttānaṃ upapattikkhaṇe dasindriyāni pātubhavanti – kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ, somanassindriyaṃ vā upekkhindriyaṃ vā, saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ. Kāmadhātuyā upapattikkhaṇe etesaṃ imāni dasindriyāni pātubhavanti.
কামধাতুযা উপপত্তিক্খণে কস্স নৰিন্দ্রিযানি পাতুভৰন্তি? গব্ভসেয্যকানং সত্তানং সহেতুকানং ঞাণৰিপ্পযুত্তানং উপপত্তিক্খণে নৰিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং। কামধাতুযা উপপত্তিক্খণে এতেসং ইমানি নৰিন্দ্রিযানি পাতুভৰন্তি।
Kāmadhātuyā upapattikkhaṇe kassa navindriyāni pātubhavanti? Gabbhaseyyakānaṃ sattānaṃ sahetukānaṃ ñāṇavippayuttānaṃ upapattikkhaṇe navindriyāni pātubhavanti – kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ, somanassindriyaṃ vā upekkhindriyaṃ vā, saddhindriyaṃ, vīriyindriyaṃ, satindriyaṃ, samādhindriyaṃ. Kāmadhātuyā upapattikkhaṇe etesaṃ imāni navindriyāni pātubhavanti.
কামধাতুযা উপপত্তিক্খণে কস্স অপরানি নৰিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং পরিপুণ্ণাযতনানং উপপত্তিক্খণে নৰিন্দ্রিযানি পাতুভৰন্তি – চক্খুন্দ্রিযং, সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং , উপেক্খিন্দ্রিযং। কামধাতুযা উপপত্তিক্খণে এতেসং ইমানি নৰিন্দ্রিযানি পাতুভৰন্তি।
Kāmadhātuyā upapattikkhaṇe kassa aparāni navindriyāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ paripuṇṇāyatanānaṃ upapattikkhaṇe navindriyāni pātubhavanti – cakkhundriyaṃ, sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ , upekkhindriyaṃ. Kāmadhātuyā upapattikkhaṇe etesaṃ imāni navindriyāni pātubhavanti.
কামধাতুযা উপপত্তিক্খণে কস্স অট্ঠিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধানং উপপত্তিক্খণে অট্ঠিন্দ্রিযানি পাতুভৰন্তি – সোতিন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং। কামধাতুযা উপপত্তিক্খণে এতেসং ইমানি অট্ঠিন্দ্রিযানি পাতুভৰন্তি।
Kāmadhātuyā upapattikkhaṇe kassa aṭṭhindriyāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccandhānaṃ upapattikkhaṇe aṭṭhindriyāni pātubhavanti – sotindriyaṃ, ghānindriyaṃ, jivhindriyaṃ, kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ, upekkhindriyaṃ. Kāmadhātuyā upapattikkhaṇe etesaṃ imāni aṭṭhindriyāni pātubhavanti.
কামধাতুযা উপপত্তিক্খণে কস্স অপরানি অট্ঠিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চবধিরানং উপপত্তিক্খণে অট্ঠিন্দ্রিযানি পাতুভৰন্তি – চক্খুন্দ্রিযং, ঘানিন্দ্রিযং, জিৰ্হিন্দ্রিযং, কাযিন্দ্রিযং মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং। কামধাতুযা উপপত্তিক্খণে এতেসং ইমানি অট্ঠিন্দ্রিযানি পাতুভৰন্তি।
Kāmadhātuyā upapattikkhaṇe kassa aparāni aṭṭhindriyāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccabadhirānaṃ upapattikkhaṇe aṭṭhindriyāni pātubhavanti – cakkhundriyaṃ, ghānindriyaṃ, jivhindriyaṃ, kāyindriyaṃ manindriyaṃ, itthindriyaṃ vā purisindriyaṃ vā, jīvitindriyaṃ, upekkhindriyaṃ. Kāmadhātuyā upapattikkhaṇe etesaṃ imāni aṭṭhindriyāni pātubhavanti.
কামধাতুযা উপপত্তিক্খণে কস্স সত্তিন্দ্রিযানি পাতুভৰন্তি? ওপপাতিকানং পেতানং, ওপপাতিকানং অসুরানং, ওপপাতিকানং তিরচ্ছানগতানং নেরযিকানং, জচ্চন্ধবধিরানং উপপত্তিক্খণে সত্তিন্দ্রিযানি পাতুভৰন্তি – ঘানিন্দ্রিযং , জিৰ্হিন্দ্রিযং, কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং। কামধাতুযা উপপত্তিক্খণে এতেসং ইমানি সত্তিন্দ্রিযানি পাতুভৰন্তি।
Kāmadhātuyā upapattikkhaṇe kassa sattindriyāni pātubhavanti? Opapātikānaṃ petānaṃ, opapātikānaṃ asurānaṃ, opapātikānaṃ tiracchānagatānaṃ nerayikānaṃ, jaccandhabadhirānaṃ upapattikkhaṇe sattindriyāni pātubhavanti – ghānindriyaṃ , jivhindriyaṃ, kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ, upekkhindriyaṃ. Kāmadhātuyā upapattikkhaṇe etesaṃ imāni sattindriyāni pātubhavanti.
কামধাতুযা উপপত্তিক্খণে কস্স পঞ্চিন্দ্রিযানি পাতুভৰন্তি? গব্ভসেয্যকানং সত্তানং অহেতুকানং, ঠপেত্ৰা নপুংসকানং, উপপত্তিক্খণে পঞ্চিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, ইত্থিন্দ্রিযং ৰা পুরিসিন্দ্রিযং ৰা, জীৰিতিন্দ্রিযং, উপেক্খিন্দ্রিযং। কামধাতুযা উপপত্তিক্খণে এতেসং ইমানি পঞ্চিন্দ্রিযানি পাতুভৰন্তি।
Kāmadhātuyā upapattikkhaṇe kassa pañcindriyāni pātubhavanti? Gabbhaseyyakānaṃ sattānaṃ ahetukānaṃ, ṭhapetvā napuṃsakānaṃ, upapattikkhaṇe pañcindriyāni pātubhavanti – kāyindriyaṃ, manindriyaṃ, itthindriyaṃ vā purisindriyaṃ vā, jīvitindriyaṃ, upekkhindriyaṃ. Kāmadhātuyā upapattikkhaṇe etesaṃ imāni pañcindriyāni pātubhavanti.
কামধাতুযা উপপত্তিক্খণে কস্স চত্তারিন্দ্রিযানি পাতুভৰন্তি? গব্ভসেয্যকানং সত্তানং অহেতুকানং, নপুংসকানং উপপত্তিক্খণে চত্তারিন্দ্রিযানি পাতুভৰন্তি – কাযিন্দ্রিযং, মনিন্দ্রিযং, জীৰিতিন্দ্রিযং , উপেক্খিন্দ্রিযং। কামধাতুযা উপপত্তিক্খণে এতেসং ইমানি চত্তারিন্দ্রিযানি পাতুভৰন্তি।
Kāmadhātuyā upapattikkhaṇe kassa cattārindriyāni pātubhavanti? Gabbhaseyyakānaṃ sattānaṃ ahetukānaṃ, napuṃsakānaṃ upapattikkhaṇe cattārindriyāni pātubhavanti – kāyindriyaṃ, manindriyaṃ, jīvitindriyaṃ , upekkhindriyaṃ. Kāmadhātuyā upapattikkhaṇe etesaṃ imāni cattārindriyāni pātubhavanti.
১০১৩. কামধাতুযা উপপত্তিক্খণে কস্স তযো হেতূ পাতুভৰন্তি? কামাৰচরানং দেৰানং, পঠমকপ্পিকানং মনুস্সানং, গব্ভসেয্যকানং সত্তানং সহেতুকানং ঞাণসম্পযুত্তানং উপপত্তিক্খণে তযো হেতূ পাতুভৰন্তি – অলোভো ৰিপাকহেতু, অদোসো ৰিপাকহেতু, অমোহো ৰিপাকহেতু। কামধাতুযা উপপত্তিক্খণে এতেসং ইমে তযো হেতূ পাতুভৰন্তি।
1013. Kāmadhātuyā upapattikkhaṇe kassa tayo hetū pātubhavanti? Kāmāvacarānaṃ devānaṃ, paṭhamakappikānaṃ manussānaṃ, gabbhaseyyakānaṃ sattānaṃ sahetukānaṃ ñāṇasampayuttānaṃ upapattikkhaṇe tayo hetū pātubhavanti – alobho vipākahetu, adoso vipākahetu, amoho vipākahetu. Kāmadhātuyā upapattikkhaṇe etesaṃ ime tayo hetū pātubhavanti.
কামধাতুযা উপপত্তিক্খণে কস্স দ্ৰে হেতূ পাতুভৰন্তি? কামাৰচরানং দেৰানং, পঠমকপ্পিকানং মনুস্সানং, গব্ভসেয্যকানং সত্তানং সহেতুকানং ঞাণৰিপ্পযুত্তানং উপপত্তিক্খণে দ্ৰে হেতূ পাতুভৰন্তি – অলোভো ৰিপাকহেতু, অদোসো ৰিপাকহেতু। কামধাতুযা উপপত্তিক্খণে এতেসং ইমে দ্ৰে হেতূ পাতুভৰন্তি। অৰসেসানং সত্তানং 5 অহেতুকা পাতুভৰন্তি।
Kāmadhātuyā upapattikkhaṇe kassa dve hetū pātubhavanti? Kāmāvacarānaṃ devānaṃ, paṭhamakappikānaṃ manussānaṃ, gabbhaseyyakānaṃ sattānaṃ sahetukānaṃ ñāṇavippayuttānaṃ upapattikkhaṇe dve hetū pātubhavanti – alobho vipākahetu, adoso vipākahetu. Kāmadhātuyā upapattikkhaṇe etesaṃ ime dve hetū pātubhavanti. Avasesānaṃ sattānaṃ 6 ahetukā pātubhavanti.
১০১৪. কামধাতুযা উপপত্তিক্খণে সব্বেসং কতমে চত্তারো আহারা পাতুভৰন্তি। কবল়ীকারো আহারো, ফস্সাহারো, মনোসঞ্চেতনাহারো, ৰিঞ্ঞাণাহারো – কামধাতুযা উপপত্তিক্খণে সব্বেসং ইমে চত্তারো আহারা পাতুভৰন্তি।
1014. Kāmadhātuyā upapattikkhaṇe sabbesaṃ katame cattāro āhārā pātubhavanti. Kabaḷīkāro āhāro, phassāhāro, manosañcetanāhāro, viññāṇāhāro – kāmadhātuyā upapattikkhaṇe sabbesaṃ ime cattāro āhārā pātubhavanti.
কামধাতুযা উপপত্তিক্খণে সব্বেসং কতমো একো ফস্সো পাতুভৰতি? মনোৰিঞ্ঞাণধাতুসম্ফস্সো – কামধাতুযা উপপত্তিক্খণে সব্বেসং অযং একো ফস্সো পাতুভৰতি।
Kāmadhātuyā upapattikkhaṇe sabbesaṃ katamo eko phasso pātubhavati? Manoviññāṇadhātusamphasso – kāmadhātuyā upapattikkhaṇe sabbesaṃ ayaṃ eko phasso pātubhavati.
কামধাতুযা উপপত্তিক্খণে সব্বেসং কতমা একা ৰেদনা … একা সঞ্ঞা… একা চেতনা… একং চিত্তং পাতুভৰতি? মনোৰিঞ্ঞাণধাতু – কামধাতুযা উপপত্তিক্খণে সব্বেসং ইদং একং চিত্তং পাতুভৰতি।
Kāmadhātuyā upapattikkhaṇe sabbesaṃ katamā ekā vedanā … ekā saññā… ekā cetanā… ekaṃ cittaṃ pātubhavati? Manoviññāṇadhātu – kāmadhātuyā upapattikkhaṇe sabbesaṃ idaṃ ekaṃ cittaṃ pātubhavati.
২. রূপধাতু
2. Rūpadhātu
১০১৫. রূপধাতুযা উপপত্তিক্খণে কতি খন্ধা পাতুভৰন্তি…পে॰… কতি চিত্তানি পাতুভৰন্তি?
1015. Rūpadhātuyā upapattikkhaṇe kati khandhā pātubhavanti…pe… kati cittāni pātubhavanti?
রূপধাতুযা উপপত্তিক্খণে, ঠপেত্ৰা অসঞ্ঞসত্তানং দেৰানং, পঞ্চক্খন্ধা পাতুভৰন্তি, পঞ্চাযতনানি পাতুভৰন্তি, পঞ্চ ধাতুযো পাতুভৰন্তি, একং সচ্চং পাতুভৰতি, দসিন্দ্রিযানি পাতুভৰন্তি, তযো হেতূ পাতুভৰন্তি, তযো আহারা পাতুভৰন্তি, একো ফস্সো পাতুভৰতি, একা ৰেদনা… একা সঞ্ঞা… একা চেতনা… একং চিত্তং পাতুভৰতি।
Rūpadhātuyā upapattikkhaṇe, ṭhapetvā asaññasattānaṃ devānaṃ, pañcakkhandhā pātubhavanti, pañcāyatanāni pātubhavanti, pañca dhātuyo pātubhavanti, ekaṃ saccaṃ pātubhavati, dasindriyāni pātubhavanti, tayo hetū pātubhavanti, tayo āhārā pātubhavanti, eko phasso pātubhavati, ekā vedanā… ekā saññā… ekā cetanā… ekaṃ cittaṃ pātubhavati.
১০১৬. রূপধাতুযা উপপত্তিক্খণে কতমে পঞ্চক্খন্ধা পাতুভৰন্তি ? রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – রূপধাতুযা উপপত্তিক্খণে ইমে পঞ্চক্খন্ধা পাতুভৰন্তি।
1016. Rūpadhātuyā upapattikkhaṇe katame pañcakkhandhā pātubhavanti ? Rūpakkhandho, vedanākkhandho, saññākkhandho, saṅkhārakkhandho, viññāṇakkhandho – rūpadhātuyā upapattikkhaṇe ime pañcakkhandhā pātubhavanti.
রূপধাতুযা উপপত্তিক্খণে কতমানি পঞ্চাযতনানি পাতুভৰন্তি? চক্খাযতনং, রূপাযতনং, সোতাযতনং, মনাযতনং, ধম্মাযতনং – রূপধাতুযা উপপত্তিক্খণে ইমানি পঞ্চাযতনানি পাতুভৰন্তি।
Rūpadhātuyā upapattikkhaṇe katamāni pañcāyatanāni pātubhavanti? Cakkhāyatanaṃ, rūpāyatanaṃ, sotāyatanaṃ, manāyatanaṃ, dhammāyatanaṃ – rūpadhātuyā upapattikkhaṇe imāni pañcāyatanāni pātubhavanti.
রূপধাতুযা উপপত্তিক্খণে কতমা পঞ্চ ধাতুযো পাতুভৰন্তি? চক্খুধাতু, রূপধাতু, সোতধাতু, মনোৰিঞ্ঞাণধাতু, ধম্মধাতু – রূপধাতুযা উপপত্তিক্খণে ইমা পঞ্চ ধাতুযো পাতুভৰন্তি।
Rūpadhātuyā upapattikkhaṇe katamā pañca dhātuyo pātubhavanti? Cakkhudhātu, rūpadhātu, sotadhātu, manoviññāṇadhātu, dhammadhātu – rūpadhātuyā upapattikkhaṇe imā pañca dhātuyo pātubhavanti.
রূপধাতুযা উপপত্তিক্খণে কতমং একং সচ্চং পাতুভৰতি? দুক্খসচ্চং – রূপধাতুযা উপপত্তিক্খণে ইদং একং সচ্চং পাতুভৰতি।
Rūpadhātuyā upapattikkhaṇe katamaṃ ekaṃ saccaṃ pātubhavati? Dukkhasaccaṃ – rūpadhātuyā upapattikkhaṇe idaṃ ekaṃ saccaṃ pātubhavati.
রূপধাতুযা উপপত্তিক্খণে কতমানি দসিন্দ্রিযানি পাতুভৰন্তি? চক্খুন্দ্রিযং, সোতিন্দ্রিযং, মনিন্দ্রিযং, জীৰিতিন্দ্রিযং, সোমনস্সিন্দ্রিযং ৰা উপেক্খিন্দ্রিযং ৰা, সদ্ধিন্দ্রিযং, ৰীরিযিন্দ্রিযং , সতিন্দ্রিযং, সমাধিন্দ্রিযং, পঞ্ঞিন্দ্রিযং – রূপধাতুযা উপপত্তিক্খণে ইমানি দসিন্দ্রিযানি পাতুভৰন্তি।
Rūpadhātuyā upapattikkhaṇe katamāni dasindriyāni pātubhavanti? Cakkhundriyaṃ, sotindriyaṃ, manindriyaṃ, jīvitindriyaṃ, somanassindriyaṃ vā upekkhindriyaṃ vā, saddhindriyaṃ, vīriyindriyaṃ , satindriyaṃ, samādhindriyaṃ, paññindriyaṃ – rūpadhātuyā upapattikkhaṇe imāni dasindriyāni pātubhavanti.
রূপধাতুযা উপপত্তিক্খণে কতমে তযো হেতূ পাতুভৰন্তি? অলোভো ৰিপাকহেতু, অদোসো ৰিপাকহেতু, অমোহো ৰিপাকহেতু – রূপধাতুযা উপপত্তিক্খণে ইমে তযো হেতূ পাতুভৰন্তি।
Rūpadhātuyā upapattikkhaṇe katame tayo hetū pātubhavanti? Alobho vipākahetu, adoso vipākahetu, amoho vipākahetu – rūpadhātuyā upapattikkhaṇe ime tayo hetū pātubhavanti.
রূপধাতুযা উপপত্তিক্খণে কতমে তযো আহারা পাতুভৰন্তি? ফস্সাহারো, মনোসঞ্চেতনাহারো, ৰিঞ্ঞাণাহারো – রূপধাতুযা উপপত্তিক্খণে ইমে তযো আহারা পাতুভৰন্তি।
Rūpadhātuyā upapattikkhaṇe katame tayo āhārā pātubhavanti? Phassāhāro, manosañcetanāhāro, viññāṇāhāro – rūpadhātuyā upapattikkhaṇe ime tayo āhārā pātubhavanti.
রূপধাতুযা উপপত্তিক্খণে কতমো একো ফস্সো পাতুভৰতি? মনোৰিঞ্ঞাণধাতুসম্ফস্সো – রূপধাতুযা উপপত্তিক্খণে অযং একো ফস্সো পাতুভৰতি।
Rūpadhātuyā upapattikkhaṇe katamo eko phasso pātubhavati? Manoviññāṇadhātusamphasso – rūpadhātuyā upapattikkhaṇe ayaṃ eko phasso pātubhavati.
রূপধাতুযা উপপত্তিক্খণে কতমা একা ৰেদনা… একা সঞ্ঞা… একা চেতনা… একং চিত্তং পাতুভৰতি? মনোৰিঞ্ঞাণধাতু – রূপধাতুযা উপপত্তিক্খণে ইদং একং চিত্তং পাতুভৰতি।
Rūpadhātuyā upapattikkhaṇe katamā ekā vedanā… ekā saññā… ekā cetanā… ekaṃ cittaṃ pātubhavati? Manoviññāṇadhātu – rūpadhātuyā upapattikkhaṇe idaṃ ekaṃ cittaṃ pātubhavati.
৩. অসঞ্ঞসত্তা
3. Asaññasattā
১০১৭. অসঞ্ঞসত্তানং দেৰানং উপপত্তিক্খণে কতি খন্ধা পাতুভৰন্তি…পে॰… কতি চিত্তানি পাতুভৰন্তি?
1017. Asaññasattānaṃ devānaṃ upapattikkhaṇe kati khandhā pātubhavanti…pe… kati cittāni pātubhavanti?
অসঞ্ঞসত্তানং দেৰানং উপপত্তিক্খণে একো খন্ধো পাতুভৰতি – রূপক্খন্ধো; দ্ৰে আযতনানি পাতুভৰন্তি – রূপাযতনং, ধম্মাযতনং; দ্ৰে ধাতুযো পাতুভৰন্তি – রূপধাতু, ধম্মধাতু; একং সচ্চং পাতুভৰতি – দুক্খসচ্চং; একিন্দ্রিযং পাতুভৰতি – রূপজীৰিতিন্দ্রিযং। অসঞ্ঞসত্তা দেৰা অহেতুকা অনাহারা অফস্সকা অৰেদনকা অসঞ্ঞকা অচেতনকা অচিত্তকা পাতুভৰন্তি।
Asaññasattānaṃ devānaṃ upapattikkhaṇe eko khandho pātubhavati – rūpakkhandho; dve āyatanāni pātubhavanti – rūpāyatanaṃ, dhammāyatanaṃ; dve dhātuyo pātubhavanti – rūpadhātu, dhammadhātu; ekaṃ saccaṃ pātubhavati – dukkhasaccaṃ; ekindriyaṃ pātubhavati – rūpajīvitindriyaṃ. Asaññasattā devā ahetukā anāhārā aphassakā avedanakā asaññakā acetanakā acittakā pātubhavanti.
৪. অরূপধাতু
4. Arūpadhātu
১০১৮. অরূপধাতুযা উপপত্তিক্খণে কতি খন্ধা পাতুভৰন্তি…পে॰… কতি চিত্তানি পাতুভৰন্তি?
1018. Arūpadhātuyā upapattikkhaṇe kati khandhā pātubhavanti…pe… kati cittāni pātubhavanti?
অরূপধাতুযা উপপত্তিক্খণে চত্তারো খন্ধা পাতুভৰন্তি, দ্ৰে আযতনানি পাতুভৰন্তি, দ্ৰে ধাতুযো পাতুভৰন্তি, একং সচ্চং পাতুভৰতি, অট্ঠিন্দ্রিযানি পাতুভৰন্তি, তযো হেতূ পাতুভৰন্তি, তযো আহারা পাতুভৰন্তি, একো ফস্সো পাতুভৰতি, একা ৰেদনা… একা সঞ্ঞা… একা চেতনা… একং চিত্তং পাতুভৰতি।
Arūpadhātuyā upapattikkhaṇe cattāro khandhā pātubhavanti, dve āyatanāni pātubhavanti, dve dhātuyo pātubhavanti, ekaṃ saccaṃ pātubhavati, aṭṭhindriyāni pātubhavanti, tayo hetū pātubhavanti, tayo āhārā pātubhavanti, eko phasso pātubhavati, ekā vedanā… ekā saññā… ekā cetanā… ekaṃ cittaṃ pātubhavati.
১০১৯. অরূপধাতুযা উপপত্তিক্খণে কতমে চত্তারো খন্ধা পাতুভৰন্তি? ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – অরূপধাতুযা উপপত্তিক্খণে ইমে চত্তারো খন্ধা পাতুভৰন্তি।
1019. Arūpadhātuyā upapattikkhaṇe katame cattāro khandhā pātubhavanti? Vedanākkhandho, saññākkhandho, saṅkhārakkhandho, viññāṇakkhandho – arūpadhātuyā upapattikkhaṇe ime cattāro khandhā pātubhavanti.
অরূপধাতুযা উপপত্তিক্খণে কতমানি দ্ৰে আযতনানি পাতুভৰন্তি? মনাযতনং, ধম্মাযতনং – অরূপধাতুযা উপপত্তিক্খণে ইমানি দ্ৰে আযতনানি পাতুভৰন্তি।
Arūpadhātuyā upapattikkhaṇe katamāni dve āyatanāni pātubhavanti? Manāyatanaṃ, dhammāyatanaṃ – arūpadhātuyā upapattikkhaṇe imāni dve āyatanāni pātubhavanti.
অরূপধাতুযা উপপত্তিক্খণে কতমা দ্ৰে ধাতুযো পাতুভৰন্তি? মনোৰিঞ্ঞাণধাতু, ধম্মধাতু – অরূপধাতুযা উপপত্তিক্খণে ইমা দ্ৰে ধাতুযো পাতুভৰন্তি।
Arūpadhātuyā upapattikkhaṇe katamā dve dhātuyo pātubhavanti? Manoviññāṇadhātu, dhammadhātu – arūpadhātuyā upapattikkhaṇe imā dve dhātuyo pātubhavanti.
অরূপধাতুযা উপপত্তিক্খণে কতমং একং সচ্চং পাতুভৰতি? দুক্খসচ্চং – অরূপধাতুযা উপপত্তিক্খণে ইদং একং সচ্চং পাতুভৰতি।
Arūpadhātuyā upapattikkhaṇe katamaṃ ekaṃ saccaṃ pātubhavati? Dukkhasaccaṃ – arūpadhātuyā upapattikkhaṇe idaṃ ekaṃ saccaṃ pātubhavati.
অরূপধাতুযা উপপত্তিক্খণে কতমানি অট্ঠিন্দ্রিযানি পাতুভৰন্তি? মনিন্দ্রিযং, জীৰিতিন্দ্রিযং, উপেক্খিন্দ্রিযং, সদ্ধিন্দ্রিযং, ৰীরিযিন্দ্রিযং, সতিন্দ্রিযং, সমাধিন্দ্রিযং, পঞ্ঞিন্দ্রিযং – অরূপধাতুযা উপপত্তিক্খণে ইমানি অট্ঠিন্দ্রিযানি পাতুভৰন্তি।
Arūpadhātuyā upapattikkhaṇe katamāni aṭṭhindriyāni pātubhavanti? Manindriyaṃ, jīvitindriyaṃ, upekkhindriyaṃ, saddhindriyaṃ, vīriyindriyaṃ, satindriyaṃ, samādhindriyaṃ, paññindriyaṃ – arūpadhātuyā upapattikkhaṇe imāni aṭṭhindriyāni pātubhavanti.
অরূপধাতুযা উপপত্তিক্খণে কতমে তযো হেতূ পাতুভৰন্তি? অলোভো ৰিপাকহেতু, অদোসো ৰিপাকহেতু, অমোহো ৰিপাকহেতু – অরূপধাতুযা উপপত্তিক্খণে ইমে তযো হেতূ পাতুভৰন্তি।
Arūpadhātuyā upapattikkhaṇe katame tayo hetū pātubhavanti? Alobho vipākahetu, adoso vipākahetu, amoho vipākahetu – arūpadhātuyā upapattikkhaṇe ime tayo hetū pātubhavanti.
অরূপধাতুযা উপপত্তিক্খণে কতমে তযো আহারা পাতুভৰন্তি? ফস্সাহারো, মনোসঞ্চেতনাহারো, ৰিঞ্ঞাণাহারো – অরূপধাতুযা উপপত্তিক্খণে ইমে তযো আহারা পাতুভৰন্তি।
Arūpadhātuyā upapattikkhaṇe katame tayo āhārā pātubhavanti? Phassāhāro, manosañcetanāhāro, viññāṇāhāro – arūpadhātuyā upapattikkhaṇe ime tayo āhārā pātubhavanti.
অরূপধাতুযা উপপত্তিক্খণে কতমো একো ফস্সো পাতুভৰতি? মনোৰিঞ্ঞাণধাতুসম্ফস্সো – অরূপধাতুযা উপপত্তিক্খণে অযং একো ফস্সো পাতুভৰতি।
Arūpadhātuyā upapattikkhaṇe katamo eko phasso pātubhavati? Manoviññāṇadhātusamphasso – arūpadhātuyā upapattikkhaṇe ayaṃ eko phasso pātubhavati.
অরূপধাতুযা উপপত্তিক্খণে কতমা একা ৰেদনা…পে॰… একা সঞ্ঞা… একা চেতনা… একং চিত্তং পাতুভৰতি? মনোৰিঞ্ঞাণধাতু – অরূপধাতুযা উপপত্তিক্খণে ইদং একং চিত্তং পাতুভৰতি।
Arūpadhātuyā upapattikkhaṇe katamā ekā vedanā…pe… ekā saññā… ekā cetanā… ekaṃ cittaṃ pātubhavati? Manoviññāṇadhātu – arūpadhātuyā upapattikkhaṇe idaṃ ekaṃ cittaṃ pātubhavati.
৫. ভূমন্তরদস্সনৰারো
5. Bhūmantaradassanavāro
১০২০. কামাৰচরা ধম্মা, ন কামাৰচরা ধম্মা, রূপাৰচরা ধম্মা, ন রূপাৰচরা ধম্মা, অরূপাৰচরা ধম্মা, ন অরূপাৰচরা ধম্মা, পরিযাপন্না ধম্মা, অপরিযাপন্না ধম্মা।
1020. Kāmāvacarā dhammā, na kāmāvacarā dhammā, rūpāvacarā dhammā, na rūpāvacarā dhammā, arūpāvacarā dhammā, na arūpāvacarā dhammā, pariyāpannā dhammā, apariyāpannā dhammā.
কতমে ধম্মা কামাৰচরা? হেট্ঠতো অৰীচিনিরযং পরিযন্তং করিত্ৰা, উপরিতো পরনিম্মিতৰসৰত্তী দেৰে অন্তোকরিত্ৰা, যং এতস্মিং অন্তরে এত্থাৰচরা এত্থ পরিযাপন্না খন্ধধাতুআযতনা; রূপং, ৰেদনা, সঞ্ঞা, সঙ্খারা, ৰিঞ্ঞাণং – ইমে ধম্মা কামাৰচরা।
Katame dhammā kāmāvacarā? Heṭṭhato avīcinirayaṃ pariyantaṃ karitvā, uparito paranimmitavasavattī deve antokaritvā, yaṃ etasmiṃ antare etthāvacarā ettha pariyāpannā khandhadhātuāyatanā; rūpaṃ, vedanā, saññā, saṅkhārā, viññāṇaṃ – ime dhammā kāmāvacarā.
কতমে ধম্মা ন কামাৰচরা? রূপাৰচরা, অরূপাৰচরা, অপরিযাপন্না – ইমে ধম্মা ন কামাৰচরা।
Katame dhammā na kāmāvacarā? Rūpāvacarā, arūpāvacarā, apariyāpannā – ime dhammā na kāmāvacarā.
কতমে ধম্মা রূপাৰচরা? হেট্ঠতো ব্রহ্মলোকং পরিযন্তং করিত্ৰা, উপরিতো অকনিট্ঠে দেৰে অন্তোকরিত্ৰা , যং এতস্মিং অন্তরে এত্থাৰচরা এত্থ পরিযাপন্না সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা চিত্তচেতসিকা ধম্মা – ইমে ধম্মা রূপাৰচরা।
Katame dhammā rūpāvacarā? Heṭṭhato brahmalokaṃ pariyantaṃ karitvā, uparito akaniṭṭhe deve antokaritvā , yaṃ etasmiṃ antare etthāvacarā ettha pariyāpannā samāpannassa vā upapannassa vā diṭṭhadhammasukhavihārissa vā cittacetasikā dhammā – ime dhammā rūpāvacarā.
কতমে ধম্মা ন রূপাৰচরা? কামাৰচরা, অরূপাৰচরা, অপরিযাপন্না – ইমে ধম্মা ন রূপাৰচরা।
Katame dhammā na rūpāvacarā? Kāmāvacarā, arūpāvacarā, apariyāpannā – ime dhammā na rūpāvacarā.
কতমে ধম্মা অরূপাৰচরা? হেট্ঠতো আকাসানঞ্চাযতনূপগে দেৰে পরিযন্তং করিত্ৰা, উপরিতো নেৰসঞ্ঞানাসঞ্ঞাযতনূপগে দেৰে অন্তোকরিত্ৰা, যং এতস্মিং অন্তরে এত্থাৰচরা এত্থ পরিযাপন্না সমাপন্নস্স ৰা উপপন্নস্স ৰা দিট্ঠধম্মসুখৰিহারিস্স ৰা চিত্তচেতসিকা ধম্মা – ইমে ধম্মা অরূপাৰচরা।
Katame dhammā arūpāvacarā? Heṭṭhato ākāsānañcāyatanūpage deve pariyantaṃ karitvā, uparito nevasaññānāsaññāyatanūpage deve antokaritvā, yaṃ etasmiṃ antare etthāvacarā ettha pariyāpannā samāpannassa vā upapannassa vā diṭṭhadhammasukhavihārissa vā cittacetasikā dhammā – ime dhammā arūpāvacarā.
কতমে ধম্মা ন অরূপাৰচরা? কামাৰচরা, রূপাৰচরা, অপরিযাপন্না – ইমে ধম্মা ন অরূপাৰচরা।
Katame dhammā na arūpāvacarā? Kāmāvacarā, rūpāvacarā, apariyāpannā – ime dhammā na arūpāvacarā.
কতমে ধম্মা পরিযাপন্না? সাসৰা কুসলাকুসলব্যাকতা ধম্মা কামাৰচরা, রূপাৰচরা, অরূপাৰচরা, রূপক্খন্ধো, ৰেদনাক্খন্ধো, সঞ্ঞাক্খন্ধো, সঙ্খারক্খন্ধো, ৰিঞ্ঞাণক্খন্ধো – ইমে ধম্মা পরিযাপন্না।
Katame dhammā pariyāpannā? Sāsavā kusalākusalabyākatā dhammā kāmāvacarā, rūpāvacarā, arūpāvacarā, rūpakkhandho, vedanākkhandho, saññākkhandho, saṅkhārakkhandho, viññāṇakkhandho – ime dhammā pariyāpannā.
কতমে ধম্মা অপরিযাপন্না? মগ্গা চ, মগ্গফলানি চ, অসঙ্খতা চ ধাতু – ইমে ধম্মা অপরিযাপন্না।
Katame dhammā apariyāpannā? Maggā ca, maggaphalāni ca, asaṅkhatā ca dhātu – ime dhammā apariyāpannā.
৬. উপ্পাদককম্মআযুপ্পমাণৰারো
6. Uppādakakammaāyuppamāṇavāro
১. উপ্পাদককম্মং
1. Uppādakakammaṃ
১০২১. দেৰাতি । তযো দেৰা – সম্মুতিদেৰা 7, উপপত্তিদেৰা, ৰিসুদ্ধিদেৰা।
1021. Devāti . Tayo devā – sammutidevā 8, upapattidevā, visuddhidevā.
সম্মুতিদেৰা নাম – রাজানো, দেৰিযো, কুমারা।
Sammutidevā nāma – rājāno, deviyo, kumārā.
উপপত্তিদেৰা নাম – চাতুমহারাজিকে 9 দেৰে উপাদায তদুপরি দেৰা।
Upapattidevā nāma – cātumahārājike 10 deve upādāya tadupari devā.
ৰিসুদ্ধিদেৰা নাম – অরহন্তো ৰুচ্চন্তি।
Visuddhidevā nāma – arahanto vuccanti.
দানং দত্ৰা, সীলং সমাদিযিত্ৰা, উপোসথকম্মং কত্ৰা কত্থ উপপজ্জন্তি? দানং দত্ৰা, সীলং সমাদিযিত্ৰা, উপোসথকম্মং কত্ৰা অপ্পেকচ্চে খত্তিযমহাসালানং সহব্যতং উপপজ্জন্তি, অপ্পেকচ্চে ব্রাহ্মণমহাসালানং সহব্যতং উপপজ্জন্তি, অপ্পেকচ্চে গহপতিমহাসালানং সহব্যতং উপপজ্জন্তি, অপ্পেকচ্চে চাতুমহারাজিকানং দেৰানং সহব্যতং উপপজ্জন্তি, অপ্পেকচ্চে তাৰতিংসানং দেৰানং সহব্যতং উপপজ্জন্তি, অপ্পেকচ্চে যামানং দেৰানং সহব্যতং উপপজ্জন্তি, অপ্পেকচ্চে তুসিতানং দেৰানং সহব্যতং উপপজ্জন্তি, অপ্পেকচ্চে নিম্মানরতীনং দেৰানং সহব্যতং উপপজ্জন্তি, অপ্পেকচ্চে পরনিম্মিতৰসৰত্তীনং দেৰানং সহব্যতং উপপজ্জন্তি।
Dānaṃ datvā, sīlaṃ samādiyitvā, uposathakammaṃ katvā kattha upapajjanti? Dānaṃ datvā, sīlaṃ samādiyitvā, uposathakammaṃ katvā appekacce khattiyamahāsālānaṃ sahabyataṃ upapajjanti, appekacce brāhmaṇamahāsālānaṃ sahabyataṃ upapajjanti, appekacce gahapatimahāsālānaṃ sahabyataṃ upapajjanti, appekacce cātumahārājikānaṃ devānaṃ sahabyataṃ upapajjanti, appekacce tāvatiṃsānaṃ devānaṃ sahabyataṃ upapajjanti, appekacce yāmānaṃ devānaṃ sahabyataṃ upapajjanti, appekacce tusitānaṃ devānaṃ sahabyataṃ upapajjanti, appekacce nimmānaratīnaṃ devānaṃ sahabyataṃ upapajjanti, appekacce paranimmitavasavattīnaṃ devānaṃ sahabyataṃ upapajjanti.
২. আযুপ্পমাণং
2. Āyuppamāṇaṃ
১০২২. মনুস্সানং কিত্তকং আযুপ্পমাণং? ৰস্সসতং, অপ্পং ৰা ভিয্যো 11।
1022. Manussānaṃ kittakaṃ āyuppamāṇaṃ? Vassasataṃ, appaṃ vā bhiyyo 12.
১০২৩. চাতুমহারাজিকানং দেৰানং কিত্তকং আযুপ্পমাণং? যানি মানুসকানি পঞ্ঞাস ৰস্সানি, চাতুম্মহারাজিকানং দেৰানং এসো একো রত্তিন্দিৰো 13। তায রত্তিযা তিংস রত্তিযো মাসো। তেন মাসেন দ্ৰাদসমাসিযো সংৰচ্ছরো। তেন সংৰচ্ছরেন দিব্বানি পঞ্চ ৰস্সসতানি চাতুম্মহারাজিকানং দেৰানং আযুপ্পমাণং। মনুস্সানং গণনায কিত্তকং হোতি? নৰুতি ৰস্সসতসহস্সানি।
1023. Cātumahārājikānaṃ devānaṃ kittakaṃ āyuppamāṇaṃ? Yāni mānusakāni paññāsa vassāni, cātummahārājikānaṃ devānaṃ eso eko rattindivo 14. Tāya rattiyā tiṃsa rattiyo māso. Tena māsena dvādasamāsiyo saṃvaccharo. Tena saṃvaccharena dibbāni pañca vassasatāni cātummahārājikānaṃ devānaṃ āyuppamāṇaṃ. Manussānaṃ gaṇanāya kittakaṃ hoti? Navuti vassasatasahassāni.
তাৰতিংসানং দেৰানং কিত্তকং আযুপ্পমাণং? যং মানুসকং ৰস্সসতং, তাৰতিংসানং দেৰানং এসো একো রত্তিন্দিৰো। তায রত্তিযা তিংস রত্তিযো মাসো। তেন মাসেন দ্ৰাদসমাসিযো সংৰচ্ছরো। তেন সংৰচ্ছরেন দিব্বং ৰস্সসহস্সং তাৰতিংসানং দেৰানং আযুপ্পমাণং। মনুস্সানং গণনায কিত্তকং হোতি? তিস্সো চ ৰস্সকোটিযো সট্ঠি চ ৰস্সসতসহস্সানি।
Tāvatiṃsānaṃ devānaṃ kittakaṃ āyuppamāṇaṃ? Yaṃ mānusakaṃ vassasataṃ, tāvatiṃsānaṃ devānaṃ eso eko rattindivo. Tāya rattiyā tiṃsa rattiyo māso. Tena māsena dvādasamāsiyo saṃvaccharo. Tena saṃvaccharena dibbaṃ vassasahassaṃ tāvatiṃsānaṃ devānaṃ āyuppamāṇaṃ. Manussānaṃ gaṇanāya kittakaṃ hoti? Tisso ca vassakoṭiyo saṭṭhi ca vassasatasahassāni.
যামানং দেৰানং কিত্তকং আযুপ্পমাণং? যানি মানুসকানি দ্ৰে ৰস্সসতানি, যামানং দেৰানং এসো একো রত্তিন্দিৰো। তায রত্তিযা তিংসরত্তিযো মাসো । তেন মাসেন দ্ৰাদসমাসিযো সংৰচ্ছরো। তেন সংৰচ্ছরেন দিব্বানি দ্ৰে ৰস্সসহস্সানি যামানং দেৰানং আযুপ্পমাণং। মনুস্সানং গণনায কিত্তকং হোতি? চুদ্দসঞ্চ ৰস্সকোটিযো চত্তারীসঞ্চ ৰস্সসতসহস্সানি।
Yāmānaṃ devānaṃ kittakaṃ āyuppamāṇaṃ? Yāni mānusakāni dve vassasatāni, yāmānaṃ devānaṃ eso eko rattindivo. Tāya rattiyā tiṃsarattiyo māso . Tena māsena dvādasamāsiyo saṃvaccharo. Tena saṃvaccharena dibbāni dve vassasahassāni yāmānaṃ devānaṃ āyuppamāṇaṃ. Manussānaṃ gaṇanāya kittakaṃ hoti? Cuddasañca vassakoṭiyo cattārīsañca vassasatasahassāni.
তুসিতানং দেৰানং কিত্তকং আযুপ্পমাণং? যানি মানুসকানি চত্তারি ৰস্সসতানি, তুসিতানং দেৰানং এসো একো রত্তিন্দিৰো। তায রত্তিযা তিংসরত্তিযো মাসো। তেন মাসেন দ্ৰাদসমাসিযো সংৰচ্ছরো। তেন সংৰচ্ছরেন দিব্বানি চত্তারি ৰস্সসহস্সানি তুসিতানং দেৰানং আযুপ্পমাণং। মনুস্সানং গণনায কিত্তকং হোতি? সত্তপঞ্ঞাস ৰস্সকোটিযো সট্ঠি চ ৰস্সসতসহস্সানি।
Tusitānaṃ devānaṃ kittakaṃ āyuppamāṇaṃ? Yāni mānusakāni cattāri vassasatāni, tusitānaṃ devānaṃ eso eko rattindivo. Tāya rattiyā tiṃsarattiyo māso. Tena māsena dvādasamāsiyo saṃvaccharo. Tena saṃvaccharena dibbāni cattāri vassasahassāni tusitānaṃ devānaṃ āyuppamāṇaṃ. Manussānaṃ gaṇanāya kittakaṃ hoti? Sattapaññāsa vassakoṭiyo saṭṭhi ca vassasatasahassāni.
নিম্মানরতীনং দেৰানং কিত্তকং আযুপ্পমাণং? যানি মানুসকানি অট্ঠ ৰস্সসতানি, নিম্মানরতীনং দেৰানং এসো একো রত্তিন্দিৰো। তায রত্তিযা তিংসরত্তিযো মাসো। তেন মাসেন দ্ৰাদসমাসিযো সংৰচ্ছরো। তেন সংৰচ্ছরেন দিব্বানি অট্ঠ ৰস্সসহস্সানি নিম্মানরতীনং দেৰানং আযুপ্পমাণং। মনুস্সানং গণনায কিত্তকং হোতি? দ্ৰে ৰস্সকোটিসতানি তিংসঞ্চ ৰস্সকোটিযো চত্তারীসঞ্চ ৰস্সসতসহস্সানি।
Nimmānaratīnaṃ devānaṃ kittakaṃ āyuppamāṇaṃ? Yāni mānusakāni aṭṭha vassasatāni, nimmānaratīnaṃ devānaṃ eso eko rattindivo. Tāya rattiyā tiṃsarattiyo māso. Tena māsena dvādasamāsiyo saṃvaccharo. Tena saṃvaccharena dibbāni aṭṭha vassasahassāni nimmānaratīnaṃ devānaṃ āyuppamāṇaṃ. Manussānaṃ gaṇanāya kittakaṃ hoti? Dve vassakoṭisatāni tiṃsañca vassakoṭiyo cattārīsañca vassasatasahassāni.
পরনিম্মিতৰসৰত্তীনং দেৰানং কিত্তকং আযুপ্পমাণং? যানি মানুসকানি সোল়স ৰস্সসতানি, পরনিম্মিতৰসৰত্তীনং দেৰানং এসো একো রত্তিন্দিৰো। তায রত্তিযা তিংসরত্তিযো মাসো। তেন মাসেন দ্ৰাদসমাসিযো সংৰচ্ছরো। তেন সংৰচ্ছরেন দিব্বানি সোল়স ৰস্সসহস্সানি পরনিম্মিতৰসৰত্তীনং দেৰানং আযুপ্পমাণং। মনুস্সানং গণনায কিত্তকং হোতি? নৰ চ ৰস্সকোটিসতানি একৰীসঞ্চ ৰস্সকোটিযো সট্ঠি চ ৰস্সসতসহস্সানীতি।
Paranimmitavasavattīnaṃ devānaṃ kittakaṃ āyuppamāṇaṃ? Yāni mānusakāni soḷasa vassasatāni, paranimmitavasavattīnaṃ devānaṃ eso eko rattindivo. Tāya rattiyā tiṃsarattiyo māso. Tena māsena dvādasamāsiyo saṃvaccharo. Tena saṃvaccharena dibbāni soḷasa vassasahassāni paranimmitavasavattīnaṃ devānaṃ āyuppamāṇaṃ. Manussānaṃ gaṇanāya kittakaṃ hoti? Nava ca vassakoṭisatāni ekavīsañca vassakoṭiyo saṭṭhi ca vassasatasahassānīti.
সব্বেসং একসঙ্খাতো, আযু ভৰতি কিত্তকো॥
Sabbesaṃ ekasaṅkhāto, āyu bhavati kittako.
দ্ৰাদস কোটিসতং তেসং, অট্ঠৰীসঞ্চ কোটিযো।
Dvādasa koṭisataṃ tesaṃ, aṭṭhavīsañca koṭiyo;
পঞ্ঞাস সতসহস্সানি, ৰস্সগ্গেন পকাসিতাতি॥
Paññāsa satasahassāni, vassaggena pakāsitāti.
১০২৪. পঠমং ঝানং পরিত্তং ভাৰেত্ৰা কত্থ উপপজ্জন্তি? পঠমং ঝানং পরিত্তং ভাৰেত্ৰা ব্রহ্মপারিসজ্জানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? কপ্পস্স ততিযো ভাগো।
1024. Paṭhamaṃ jhānaṃ parittaṃ bhāvetvā kattha upapajjanti? Paṭhamaṃ jhānaṃ parittaṃ bhāvetvā brahmapārisajjānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Kappassa tatiyo bhāgo.
পঠমং ঝানং মজ্ঝিমং ভাৰেত্ৰা কত্থ উপপজ্জন্তি? পঠমং ঝানং মজ্ঝিমং ভাৰেত্ৰা ব্রহ্মপুরোহিতানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? উপড্ঢকপ্পো।
Paṭhamaṃ jhānaṃ majjhimaṃ bhāvetvā kattha upapajjanti? Paṭhamaṃ jhānaṃ majjhimaṃ bhāvetvā brahmapurohitānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Upaḍḍhakappo.
পঠমং ঝানং পণীতং ভাৰেত্ৰা কত্থ উপপজ্জন্তি? পঠমং ঝানং পণীতং ভাৰেত্ৰা মহাব্রহ্মানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? কপ্পো 17।
Paṭhamaṃ jhānaṃ paṇītaṃ bhāvetvā kattha upapajjanti? Paṭhamaṃ jhānaṃ paṇītaṃ bhāvetvā mahābrahmānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Kappo 18.
১০২৫. দুতিযং ঝানং পরিত্তং ভাৰেত্ৰা কত্থ উপপজ্জন্তি? দুতিযং ঝানং পরিত্তং ভাৰেত্ৰা পরিত্তাভানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? দ্ৰে কপ্পা।
1025. Dutiyaṃ jhānaṃ parittaṃ bhāvetvā kattha upapajjanti? Dutiyaṃ jhānaṃ parittaṃ bhāvetvā parittābhānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Dve kappā.
দুতিযং ঝানং মজ্ঝিমং ভাৰেত্ৰা কত্থ উপপজ্জন্তি? দুতিযং ঝানং মজ্ঝিমং ভাৰেত্ৰা অপ্পমাণাভানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? চত্তারো কপ্পা।
Dutiyaṃ jhānaṃ majjhimaṃ bhāvetvā kattha upapajjanti? Dutiyaṃ jhānaṃ majjhimaṃ bhāvetvā appamāṇābhānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Cattāro kappā.
দুতিযং ঝানং পণীতং ভাৰেত্ৰা কত্থ উপপজ্জন্তি? দুতিযং ঝানং পণীতং ভাৰেত্ৰা আভস্সরানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? অট্ঠ কপ্পা।
Dutiyaṃ jhānaṃ paṇītaṃ bhāvetvā kattha upapajjanti? Dutiyaṃ jhānaṃ paṇītaṃ bhāvetvā ābhassarānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Aṭṭha kappā.
১০২৬. ততিযং ঝানং পরিত্তং ভাৰেত্ৰা কত্থ উপপজ্জন্তি? ততিযং ঝানং পরিত্তং ভাৰেত্ৰা পরিত্তসুভানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? সোল়স কপ্পা।
1026. Tatiyaṃ jhānaṃ parittaṃ bhāvetvā kattha upapajjanti? Tatiyaṃ jhānaṃ parittaṃ bhāvetvā parittasubhānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Soḷasa kappā.
ততিযং ঝানং মজ্ঝিমং ভাৰেত্ৰা কত্থ উপপজ্জন্তি? ততিযং ঝানং মজ্ঝিমং ভাৰেত্ৰা অপ্পমাণসুভানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? বাত্তিংস কপ্পা।
Tatiyaṃ jhānaṃ majjhimaṃ bhāvetvā kattha upapajjanti? Tatiyaṃ jhānaṃ majjhimaṃ bhāvetvā appamāṇasubhānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Bāttiṃsa kappā.
ততিযং ঝানং পণীতং ভাৰেত্ৰা কত্থ উপপজ্জন্তি? ততিযং ঝানং পণীতং ভাৰেত্ৰা সুভকিণ্হানং দেৰানং সহব্যতং উপপজ্জন্তি। তেসং কিত্তকং আযুপ্পমাণং? চতুসট্ঠি কপ্পা।
Tatiyaṃ jhānaṃ paṇītaṃ bhāvetvā kattha upapajjanti? Tatiyaṃ jhānaṃ paṇītaṃ bhāvetvā subhakiṇhānaṃ devānaṃ sahabyataṃ upapajjanti. Tesaṃ kittakaṃ āyuppamāṇaṃ? Catusaṭṭhi kappā.
১০২৭. চতুত্থং ঝানং ভাৰেত্ৰা আরম্মণনানত্ততা মনসিকারনানত্ততা ছন্দনানত্ততা পণিধিনানত্ততা অধিমোক্খনানত্ততা অভিনীহারনানত্ততা পঞ্ঞানানত্ততা অপ্পেকচ্চে অসঞ্ঞসত্তানং দেৰানং সহব্যতং উপপজ্জন্তি, অপ্পেকচ্চে ৰেহপ্ফলানং দেৰানং সহব্যতং উপপজ্জন্তি, অপ্পেকচ্চে অৰিহানং দেৰানং সহব্যতং উপপজ্জন্তি, অপ্পেকচ্চে অতপ্পানং দেৰানং সহব্যতং উপপজ্জন্তি, অপ্পেকচ্চে সুদস্সানং দেৰানং সহব্যতং উপপজ্জন্তি, অপ্পেকচ্চে সুদস্সীনং দেৰানং সহব্যতং উপপজ্জন্তি, অপ্পেকচ্চে অকনিট্ঠানং দেৰানং সহব্যতং উপপজ্জন্তি, অপ্পেকচ্চে আকাসানঞ্চাযতনূপগানং দেৰানং সহব্যতং উপপজ্জন্তি, অপ্পেকচ্চে ৰিঞ্ঞাণঞ্চাযতনূপগানং দেৰানং সহব্যতং উপপজ্জন্তি, অপ্পেকচ্চে আকিঞ্চঞ্ঞাযতনূপগানং দেৰানং সহব্যতং উপপজ্জন্তি, অপ্পেকচ্চে নেৰসঞ্ঞানাসঞ্ঞাযতনূপগানং দেৰানং সহব্যতং উপপজ্জন্তি।
1027. Catutthaṃ jhānaṃ bhāvetvā ārammaṇanānattatā manasikāranānattatā chandanānattatā paṇidhinānattatā adhimokkhanānattatā abhinīhāranānattatā paññānānattatā appekacce asaññasattānaṃ devānaṃ sahabyataṃ upapajjanti, appekacce vehapphalānaṃ devānaṃ sahabyataṃ upapajjanti, appekacce avihānaṃ devānaṃ sahabyataṃ upapajjanti, appekacce atappānaṃ devānaṃ sahabyataṃ upapajjanti, appekacce sudassānaṃ devānaṃ sahabyataṃ upapajjanti, appekacce sudassīnaṃ devānaṃ sahabyataṃ upapajjanti, appekacce akaniṭṭhānaṃ devānaṃ sahabyataṃ upapajjanti, appekacce ākāsānañcāyatanūpagānaṃ devānaṃ sahabyataṃ upapajjanti, appekacce viññāṇañcāyatanūpagānaṃ devānaṃ sahabyataṃ upapajjanti, appekacce ākiñcaññāyatanūpagānaṃ devānaṃ sahabyataṃ upapajjanti, appekacce nevasaññānāsaññāyatanūpagānaṃ devānaṃ sahabyataṃ upapajjanti.
অসঞ্ঞসত্তানঞ্চ ৰেহপ্ফলানঞ্চ দেৰানং কিত্তকং আযুপ্পমাণং? পঞ্চকপ্পসতানি।
Asaññasattānañca vehapphalānañca devānaṃ kittakaṃ āyuppamāṇaṃ? Pañcakappasatāni.
অৰিহানং দেৰানং কিত্তকং আযুপ্পমাণং? কপ্পসহস্সং।
Avihānaṃ devānaṃ kittakaṃ āyuppamāṇaṃ? Kappasahassaṃ.
অতপ্পানং দেৰানং কিত্তকং আযুপ্পমাণং? দ্ৰে কপ্পসহস্সানি।
Atappānaṃ devānaṃ kittakaṃ āyuppamāṇaṃ? Dve kappasahassāni.
সুদস্সানং দেৰানং কিত্তকং আযুপ্পমাণং? চত্তারি কপ্পসহস্সানি।
Sudassānaṃ devānaṃ kittakaṃ āyuppamāṇaṃ? Cattāri kappasahassāni.
সুদস্সীনং দেৰানং কিত্তকং আযুপ্পমাণং? অট্ঠ কপ্পসহস্সানি।
Sudassīnaṃ devānaṃ kittakaṃ āyuppamāṇaṃ? Aṭṭha kappasahassāni.
অকনিট্ঠানং দেৰানং কিত্তকং আযুপ্পমাণং? সোল়স কপ্পসহস্সানি।
Akaniṭṭhānaṃ devānaṃ kittakaṃ āyuppamāṇaṃ? Soḷasa kappasahassāni.
১০২৮. আকাসানঞ্চাযতনূপগানং দেৰানং কিত্তকং আযুপ্পমাণং? ৰীসতি কপ্পসহস্সানি।
1028. Ākāsānañcāyatanūpagānaṃ devānaṃ kittakaṃ āyuppamāṇaṃ? Vīsati kappasahassāni.
ৰিঞ্ঞাণঞ্চাযতনূপগানং দেৰানং কিত্তকং আযুপ্পমাণং? চত্তারীস কপ্পসহস্সানি।
Viññāṇañcāyatanūpagānaṃ devānaṃ kittakaṃ āyuppamāṇaṃ? Cattārīsa kappasahassāni.
আকিঞ্চঞ্ঞাযতনূপগানং দেৰানং কিত্তকং আযুপ্পমাণং? সট্ঠি কপ্পসহস্সানি।
Ākiñcaññāyatanūpagānaṃ devānaṃ kittakaṃ āyuppamāṇaṃ? Saṭṭhi kappasahassāni.
নেৰসঞ্ঞানাসঞ্ঞাযতনূপগানং দেৰানং কিত্তকং আযুপ্পমাণং? চতুরাসীতি কপ্পসহস্সানীতি।
Nevasaññānāsaññāyatanūpagānaṃ devānaṃ kittakaṃ āyuppamāṇaṃ? Caturāsīti kappasahassānīti.
১০২৯. উক্খিত্তা পুঞ্ঞতেজেন, কামরূপগতিং গতা।
1029. Ukkhittā puññatejena, kāmarūpagatiṃ gatā.
তাৰ দীঘাযুকা সত্তা, চৰন্তি আযুসঙ্খযা।
Tāva dīghāyukā sattā, cavanti āyusaṅkhayā;
নত্থি কোচি ভৰো নিচ্চো, ইতি ৰুত্তং মহেসিনা॥
Natthi koci bhavo nicco, iti vuttaṃ mahesinā.
তস্মা হি ধীরা নিপকা, নিপুণা অত্থচিন্তকা।
Tasmā hi dhīrā nipakā, nipuṇā atthacintakā;
জরামরণমোক্খায, ভাৰেন্তি মগ্গমুত্তমং॥
Jarāmaraṇamokkhāya, bhāventi maggamuttamaṃ.
ভাৰযিত্ৰা সুচিং মগ্গং, নিব্বানোগধগামিনং।
Bhāvayitvā suciṃ maggaṃ, nibbānogadhagāminaṃ;
সব্বাসৰে পরিঞ্ঞায, পরিনিব্বন্তি অনাসৰাতি॥
Sabbāsave pariññāya, parinibbanti anāsavāti.
৭. অভিঞ্ঞেয্যাদিৰারো
7. Abhiññeyyādivāro
১০৩০. পঞ্চন্নং খন্ধানং কতি অভিঞ্ঞেয্যা, কতি পরিঞ্ঞেয্যা, কতি পহাতব্বা, কতি ভাৰেতব্বা, কতি সচ্ছিকাতব্বা, কতি ন পহাতব্বা, ন ভাৰেতব্বা, ন সচ্ছিকাতব্বা…পে॰… সত্তন্নং চিত্তানং কতি অভিঞ্ঞেয্যা, কতি পরিঞ্ঞেয্যা, কতি পহাতব্বা, কতি ভাৰেতব্বা, কতি সচ্ছিকাতব্বা, কতি ন পহাতব্বা ন ভাৰেতব্বা ন সচ্ছিকাতব্বা?
1030. Pañcannaṃ khandhānaṃ kati abhiññeyyā, kati pariññeyyā, kati pahātabbā, kati bhāvetabbā, kati sacchikātabbā, kati na pahātabbā, na bhāvetabbā, na sacchikātabbā…pe… sattannaṃ cittānaṃ kati abhiññeyyā, kati pariññeyyā, kati pahātabbā, kati bhāvetabbā, kati sacchikātabbā, kati na pahātabbā na bhāvetabbā na sacchikātabbā?
১০৩১. রূপক্খন্ধো অভিঞ্ঞেয্যো পরিঞ্ঞেয্যো ন পহাতব্বো ন ভাৰেতব্বো ন সচ্ছিকাতব্বো। চত্তারো খন্ধা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা।
1031. Rūpakkhandho abhiññeyyo pariññeyyo na pahātabbo na bhāvetabbo na sacchikātabbo. Cattāro khandhā abhiññeyyā pariññeyyā, siyā pahātabbā, siyā bhāvetabbā, siyā sacchikātabbā, siyā na pahātabbā na bhāvetabbā na sacchikātabbā.
দসাযতনা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা। দ্ৰে আযতনা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা।
Dasāyatanā abhiññeyyā pariññeyyā na pahātabbā na bhāvetabbā na sacchikātabbā. Dve āyatanā abhiññeyyā pariññeyyā, siyā pahātabbā, siyā bhāvetabbā, siyā sacchikātabbā, siyā na pahātabbā na bhāvetabbā na sacchikātabbā.
সোল়স ধাতুযো অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা। দ্ৰে ধাতুযো অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা।
Soḷasa dhātuyo abhiññeyyā pariññeyyā na pahātabbā na bhāvetabbā na sacchikātabbā. Dve dhātuyo abhiññeyyā pariññeyyā, siyā pahātabbā, siyā bhāvetabbā, siyā sacchikātabbā, siyā na pahātabbā na bhāvetabbā na sacchikātabbā.
সমুদযসচ্চং অভিঞ্ঞেয্যং পরিঞ্ঞেয্যং পহাতব্বং ন ভাৰেতব্বং ন সচ্ছিকাতব্বং। মগ্গসচ্চং অভিঞ্ঞেয্যং পরিঞ্ঞেয্যং ন পহাতব্বং ভাৰেতব্বং ন সচ্ছিকাতব্বং । নিরোধসচ্চং অভিঞ্ঞেয্যং পরিঞ্ঞেয্যং ন পহাতব্বং ন ভাৰেতব্বং সচ্ছিকাতব্বং। দুক্খসচ্চং অভিঞ্ঞেয্যং পরিঞ্ঞেয্যং, সিযা পহাতব্বং, ন ভাৰেতব্বং, ন সচ্ছিকাতব্বং, সিযা ন পহাতব্বং।
Samudayasaccaṃ abhiññeyyaṃ pariññeyyaṃ pahātabbaṃ na bhāvetabbaṃ na sacchikātabbaṃ. Maggasaccaṃ abhiññeyyaṃ pariññeyyaṃ na pahātabbaṃ bhāvetabbaṃ na sacchikātabbaṃ . Nirodhasaccaṃ abhiññeyyaṃ pariññeyyaṃ na pahātabbaṃ na bhāvetabbaṃ sacchikātabbaṃ. Dukkhasaccaṃ abhiññeyyaṃ pariññeyyaṃ, siyā pahātabbaṃ, na bhāvetabbaṃ, na sacchikātabbaṃ, siyā na pahātabbaṃ.
নৰিন্দ্রিযা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা। দোমনস্সিন্দ্রিযং অভিঞ্ঞেয্যং পরিঞ্ঞেয্যং পহাতব্বং ন ভাৰেতব্বং ন সচ্ছিকাতব্বং। অনঞ্ঞাতঞ্ঞস্সামীতিন্দ্রিযং অভিঞ্ঞেয্যং পরিঞ্ঞেয্যং ন পহাতব্বং ভাৰেতব্বং ন সচ্ছিকাতব্বং। অঞ্ঞিন্দ্রিযং অভিঞ্ঞেয্যং পরিঞ্ঞেয্যং ন পহাতব্বং, সিযা ভাৰেতব্বং, সিযা সচ্ছিকাতব্বং। অঞ্ঞাতাৰিন্দ্রিযং অভিঞ্ঞেয্যং পরিঞ্ঞেয্যং ন পহাতব্বং ন ভাৰেতব্বং সচ্ছিকাতব্বং। তীণিন্দ্রিযা অভিঞ্ঞেয্যা পরিঞ্ঞেয্যা ন পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন ভাৰেতব্বা, সচ্ছিকাতব্বা। ছ ইন্দ্রিযা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা।
Navindriyā abhiññeyyā pariññeyyā na pahātabbā na bhāvetabbā na sacchikātabbā. Domanassindriyaṃ abhiññeyyaṃ pariññeyyaṃ pahātabbaṃ na bhāvetabbaṃ na sacchikātabbaṃ. Anaññātaññassāmītindriyaṃ abhiññeyyaṃ pariññeyyaṃ na pahātabbaṃ bhāvetabbaṃ na sacchikātabbaṃ. Aññindriyaṃ abhiññeyyaṃ pariññeyyaṃ na pahātabbaṃ, siyā bhāvetabbaṃ, siyā sacchikātabbaṃ. Aññātāvindriyaṃ abhiññeyyaṃ pariññeyyaṃ na pahātabbaṃ na bhāvetabbaṃ sacchikātabbaṃ. Tīṇindriyā abhiññeyyā pariññeyyā na pahātabbā, siyā bhāvetabbā, siyā sacchikātabbā, siyā na bhāvetabbā, sacchikātabbā. Cha indriyā abhiññeyyā pariññeyyā, siyā pahātabbā, siyā bhāvetabbā, siyā sacchikātabbā, siyā na pahātabbā na bhāvetabbā na sacchikātabbā.
তযো অকুসলহেতূ অভিঞ্ঞেয্যা পরিঞ্ঞেয্যা পহাতব্বা ন ভাৰেতব্বা ন সচ্ছিকাতব্বা। তযো কুসলহেতূ অভিঞ্ঞেয্যা পরিঞ্ঞেয্যা ন পহাতব্বা, সিযা ভাৰেতব্বা, ন সচ্ছিকাতব্বা, সিযা ন ভাৰেতব্বা। তযো অব্যাকতহেতূ অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা, সিযা সচ্ছিকাতব্বা , সিযা ন সচ্ছিকাতব্বা।
Tayo akusalahetū abhiññeyyā pariññeyyā pahātabbā na bhāvetabbā na sacchikātabbā. Tayo kusalahetū abhiññeyyā pariññeyyā na pahātabbā, siyā bhāvetabbā, na sacchikātabbā, siyā na bhāvetabbā. Tayo abyākatahetū abhiññeyyā pariññeyyā na pahātabbā na bhāvetabbā, siyā sacchikātabbā , siyā na sacchikātabbā.
কবল়ীকারো আহারো অভিঞ্ঞেয্যো পরিঞ্ঞেয্যো ন পহাতব্বো ন ভাৰেতব্বো ন সচ্ছিকাতব্বো। তযো আহারা অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা, সিযা ন পহাতব্বা ন ভাৰেতব্বা ন সচ্ছিকাতব্বা।
Kabaḷīkāro āhāro abhiññeyyo pariññeyyo na pahātabbo na bhāvetabbo na sacchikātabbo. Tayo āhārā abhiññeyyā pariññeyyā, siyā pahātabbā, siyā bhāvetabbā, siyā sacchikātabbā, siyā na pahātabbā na bhāvetabbā na sacchikātabbā.
ছ ফস্সা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা। মনোৰিঞ্ঞাণধাতুসম্ফস্সো অভিঞ্ঞেয্যো পরিঞ্ঞেয্যো, সিযা পহাতব্বো, সিযা ভাৰেতব্বো, সিযা সচ্ছিকাতব্বো, সিযা ন পহাতব্বো ন ভাৰেতব্বো ন সচ্ছিকাতব্বো।
Cha phassā abhiññeyyā pariññeyyā na pahātabbā na bhāvetabbā na sacchikātabbā. Manoviññāṇadhātusamphasso abhiññeyyo pariññeyyo, siyā pahātabbo, siyā bhāvetabbo, siyā sacchikātabbo, siyā na pahātabbo na bhāvetabbo na sacchikātabbo.
ছ ৰেদনা…পে॰… ছ সঞ্ঞা… ছ চেতনা… ছ চিত্তা অভিঞ্ঞেয্যা পরিঞ্ঞেয্যা ন পহাতব্বা ন ভাৰেতব্বা ন সচ্ছিকাতব্বা। মনোৰিঞ্ঞাণধাতু অভিঞ্ঞেয্যা পরিঞ্ঞেয্যা, সিযা পহাতব্বা, সিযা ভাৰেতব্বা, সিযা সচ্ছিকাতব্বা , সিযা ন পহাতব্বা ন ভাৰেতব্বা ন সচ্ছিকাতব্বা।
Cha vedanā…pe… cha saññā… cha cetanā… cha cittā abhiññeyyā pariññeyyā na pahātabbā na bhāvetabbā na sacchikātabbā. Manoviññāṇadhātu abhiññeyyā pariññeyyā, siyā pahātabbā, siyā bhāvetabbā, siyā sacchikātabbā , siyā na pahātabbā na bhāvetabbā na sacchikātabbā.
৮. সারম্মণানারম্মণৰারো
8. Sārammaṇānārammaṇavāro
১০৩২. পঞ্চন্নং খন্ধানং কতি সারম্মণা, কতি অনারম্মণা…পে॰… সত্তন্নং চিত্তানং কতি সারম্মণা, কতি অনারম্মণা?
1032. Pañcannaṃ khandhānaṃ kati sārammaṇā, kati anārammaṇā…pe… sattannaṃ cittānaṃ kati sārammaṇā, kati anārammaṇā?
১০৩৩. রূপক্খন্ধো অনারম্মণো। চত্তারো খন্ধা সারম্মণা।
1033. Rūpakkhandho anārammaṇo. Cattāro khandhā sārammaṇā.
দসাযতনা অনারম্মণা। মনাযতনং সারম্মণং। ধম্মাযতনং সিযা সারম্মণং, সিযা অনারম্মণং।
Dasāyatanā anārammaṇā. Manāyatanaṃ sārammaṇaṃ. Dhammāyatanaṃ siyā sārammaṇaṃ, siyā anārammaṇaṃ.
দস ধাতুযো অনারম্মণা। সত্ত ধাতুযো সারম্মণা। ধম্মধাতু সিযা সারম্মণা, সিযা অনারম্মণা।
Dasa dhātuyo anārammaṇā. Satta dhātuyo sārammaṇā. Dhammadhātu siyā sārammaṇā, siyā anārammaṇā.
দ্ৰে সচ্চা সারম্মণা। নিরোধসচ্চং অনারম্মণং। দুক্খসচ্চং সিযা সারম্মণং, সিযা অনারম্মণং।
Dve saccā sārammaṇā. Nirodhasaccaṃ anārammaṇaṃ. Dukkhasaccaṃ siyā sārammaṇaṃ, siyā anārammaṇaṃ.
সত্তিন্দ্রিযা অনারম্মণা। চুদ্দসিন্দ্রিযা সারম্মণা। জীৰিতিন্দ্রিযং সিযা সারম্মণং, সিযা অনারম্মণং। নৰ হেতূ সারম্মণা। কবল়ীকারো আহারো অনারম্মণো। তযো আহারা সারম্মণা। সত্ত ফস্সা… সত্ত ৰেদনা… সত্ত সঞ্ঞা… সত্ত চেতনা… সত্ত চিত্তা সারম্মণা।
Sattindriyā anārammaṇā. Cuddasindriyā sārammaṇā. Jīvitindriyaṃ siyā sārammaṇaṃ, siyā anārammaṇaṃ. Nava hetū sārammaṇā. Kabaḷīkāro āhāro anārammaṇo. Tayo āhārā sārammaṇā. Satta phassā… satta vedanā… satta saññā… satta cetanā… satta cittā sārammaṇā.
১০৩৪. পঞ্চন্নং খন্ধানং কতি সারম্মণারম্মণা, কতি অনারম্মণারম্মণা…পে॰… সত্তন্নং চিত্তানং কতি সারম্মণারম্মণা, কতি অনারম্মণারম্মণা?
1034. Pañcannaṃ khandhānaṃ kati sārammaṇārammaṇā, kati anārammaṇārammaṇā…pe… sattannaṃ cittānaṃ kati sārammaṇārammaṇā, kati anārammaṇārammaṇā?
১০৩৫. রূপক্খন্ধো অনারম্মণো। চত্তারো খন্ধা সিযা সারম্মণারম্মণা, সিযা অনারম্মণারম্মণা।
1035. Rūpakkhandho anārammaṇo. Cattāro khandhā siyā sārammaṇārammaṇā, siyā anārammaṇārammaṇā.
দসাযতনা অনারম্মণা। মনাযতনং সিযা সারম্মণারম্মণং, সিযা অনারম্মণারম্মণং। ধম্মাযতনং সিযা সারম্মণারম্মণং, সিযা অনারম্মণারম্মণং, সিযা অনারম্মণং।
Dasāyatanā anārammaṇā. Manāyatanaṃ siyā sārammaṇārammaṇaṃ, siyā anārammaṇārammaṇaṃ. Dhammāyatanaṃ siyā sārammaṇārammaṇaṃ, siyā anārammaṇārammaṇaṃ, siyā anārammaṇaṃ.
দস ধাতুযো অনারম্মণা। ছ ধাতুযো অনারম্মণারম্মণা। মনোৰিঞ্ঞাণধাতু সিযা সারম্মণারম্মণা, সিযা অনারম্মণারম্মণা। ধম্মধাতু সিযা সারম্মণারম্মণা, সিযা অনারম্মণারম্মণা, সিযা অনারম্মণা।
Dasa dhātuyo anārammaṇā. Cha dhātuyo anārammaṇārammaṇā. Manoviññāṇadhātu siyā sārammaṇārammaṇā, siyā anārammaṇārammaṇā. Dhammadhātu siyā sārammaṇārammaṇā, siyā anārammaṇārammaṇā, siyā anārammaṇā.
নিরোধসচ্চং অনারম্মণং। মগ্গসচ্চং অনারম্মণারম্মণং। সমুদযসচ্চং সিযা সারম্মণারম্মণং, সিযা অনারম্মণারম্মণং। দুক্খসচ্চং সিযা সারম্মণারম্মণং, সিযা অনারম্মণারম্মণং, সিযা অনারম্মণং।
Nirodhasaccaṃ anārammaṇaṃ. Maggasaccaṃ anārammaṇārammaṇaṃ. Samudayasaccaṃ siyā sārammaṇārammaṇaṃ, siyā anārammaṇārammaṇaṃ. Dukkhasaccaṃ siyā sārammaṇārammaṇaṃ, siyā anārammaṇārammaṇaṃ, siyā anārammaṇaṃ.
সত্তিন্দ্রিযা অনারম্মণা। পঞ্চিন্দ্রিযা অনারম্মণারম্মণা। নৰিন্দ্রিযা সিযা সারম্মণারম্মণা, সিযা অনারম্মণারম্মণা। জীৰিতিন্দ্রিযং সিযা সারম্মণারম্মণং, সিযা অনারম্মণারম্মণং, সিযা অনারম্মণং।
Sattindriyā anārammaṇā. Pañcindriyā anārammaṇārammaṇā. Navindriyā siyā sārammaṇārammaṇā, siyā anārammaṇārammaṇā. Jīvitindriyaṃ siyā sārammaṇārammaṇaṃ, siyā anārammaṇārammaṇaṃ, siyā anārammaṇaṃ.
নৰ হেতূ সিযা সারম্মণারম্মণা, সিযা অনারম্মণারম্মণা। কবল়ীকারো আহারো অনারম্মণো। তযো আহারা সিযা সারম্মণারম্মণা, সিযা অনারম্মণারম্মণা। ছ ফস্সা অনারম্মণারম্মণা । মনোৰিঞ্ঞাণধাতুসম্ফস্সো সিযা সারম্মণারম্মণো সিযা অনারম্মণারম্মণো। ছ ৰেদনা… ছ সঞ্ঞা… ছ চেতনা… ছ চিত্তা অনারম্মণারম্মণা। মনোৰিঞ্ঞাণধাতু সিযা সারম্মণারম্মণা, সিযা অনারম্মণারম্মণা।
Nava hetū siyā sārammaṇārammaṇā, siyā anārammaṇārammaṇā. Kabaḷīkāro āhāro anārammaṇo. Tayo āhārā siyā sārammaṇārammaṇā, siyā anārammaṇārammaṇā. Cha phassā anārammaṇārammaṇā . Manoviññāṇadhātusamphasso siyā sārammaṇārammaṇo siyā anārammaṇārammaṇo. Cha vedanā… cha saññā… cha cetanā… cha cittā anārammaṇārammaṇā. Manoviññāṇadhātu siyā sārammaṇārammaṇā, siyā anārammaṇārammaṇā.
৯. দিট্ঠসুতাদিদস্সনৰারো
9. Diṭṭhasutādidassanavāro
১০৩৬. পঞ্চন্নং খন্ধানং কতি দিট্ঠা, কতি সুতা, কতি মুতা, কতি ৰিঞ্ঞাতা, কতি ন দিট্ঠা ন সুতা ন মুতা ন ৰিঞ্ঞাতা…পে॰… সত্তন্নং চিত্তানং কতি দিট্ঠা, কতি সুতা, কতি মুতা, কতি ৰিঞ্ঞাতা, কতি ন দিট্ঠা ন সুতা ন মুতা ন ৰিঞ্ঞাতা?
1036. Pañcannaṃ khandhānaṃ kati diṭṭhā, kati sutā, kati mutā, kati viññātā, kati na diṭṭhā na sutā na mutā na viññātā…pe… sattannaṃ cittānaṃ kati diṭṭhā, kati sutā, kati mutā, kati viññātā, kati na diṭṭhā na sutā na mutā na viññātā?
১০৩৭. রূপক্খন্ধো সিযা দিট্ঠো, সিযা সুতো, সিযা মুতো, সিযা ৰিঞ্ঞাতো, সিযা ন দিট্ঠো ন সুতো ন মুতো, ৰিঞ্ঞাতো। চত্তারো খন্ধা ন দিট্ঠা ন সুতা ন মুতা, ৰিঞ্ঞাতা।
1037. Rūpakkhandho siyā diṭṭho, siyā suto, siyā muto, siyā viññāto, siyā na diṭṭho na suto na muto, viññāto. Cattāro khandhā na diṭṭhā na sutā na mutā, viññātā.
রূপাযতনং দিট্ঠং, ন সুতং ন মুতং, ৰিঞ্ঞাতং। সদ্দাযতনং ন দিট্ঠং, সুতং, ন মুতং, ৰিঞ্ঞাতং। গন্ধাযতনং… রসাযতনং… ফোট্ঠব্বাযতনং ন দিট্ঠং ন সুতং, মুতং, ৰিঞ্ঞাতং। সত্তাযতনা ন দিট্ঠা ন সুতা ন মুতা, ৰিঞ্ঞাতা।
Rūpāyatanaṃ diṭṭhaṃ, na sutaṃ na mutaṃ, viññātaṃ. Saddāyatanaṃ na diṭṭhaṃ, sutaṃ, na mutaṃ, viññātaṃ. Gandhāyatanaṃ… rasāyatanaṃ… phoṭṭhabbāyatanaṃ na diṭṭhaṃ na sutaṃ, mutaṃ, viññātaṃ. Sattāyatanā na diṭṭhā na sutā na mutā, viññātā.
রূপধাতু দিট্ঠা, ন সুতা ন মুতা, ৰিঞ্ঞাতা। সদ্দধাতু ন দিট্ঠা, সুতা, ন মুতা, ৰিঞ্ঞাতা। গন্ধধাতু… রসধাতু… ফোট্ঠব্বধাতু ন দিট্ঠা ন সুতা, মুতা, ৰিঞ্ঞাতা। তেরস ধাতুযো ন দিট্ঠা ন সুতা ন মুতা, ৰিঞ্ঞাতা।
Rūpadhātu diṭṭhā, na sutā na mutā, viññātā. Saddadhātu na diṭṭhā, sutā, na mutā, viññātā. Gandhadhātu… rasadhātu… phoṭṭhabbadhātu na diṭṭhā na sutā, mutā, viññātā. Terasa dhātuyo na diṭṭhā na sutā na mutā, viññātā.
তীণি সচ্চানি ন দিট্ঠা ন সুতা ন মুতা, ৰিঞ্ঞাতা। দুক্খসচ্চং সিযা দিট্ঠং, সিযা সুতং, সিযা মুতং, সিযা ৰিঞ্ঞাতং, সিযা ন দিট্ঠং ন সুতং ন মুতং, ৰিঞ্ঞাতং।
Tīṇi saccāni na diṭṭhā na sutā na mutā, viññātā. Dukkhasaccaṃ siyā diṭṭhaṃ, siyā sutaṃ, siyā mutaṃ, siyā viññātaṃ, siyā na diṭṭhaṃ na sutaṃ na mutaṃ, viññātaṃ.
বাৰীসতিন্দ্রিযা ন দিট্ঠা ন সুতা ন মুতা, ৰিঞ্ঞাতা। নৰ হেতূ ন দিট্ঠা ন সুতা ন মুতা, ৰিঞ্ঞাতা। চত্তারো আহারা ন দিট্ঠা ন সুতা ন মুতা, ৰিঞ্ঞাতা। সত্ত ফস্সা ন দিট্ঠা ন সুতা ন মুতা, ৰিঞ্ঞাতা। সত্ত ৰেদনা… সত্ত সঞ্ঞা… সত্ত চেতনা… সত্ত চিত্তা ন দিট্ঠা ন সুতা ন মুতা, ৰিঞ্ঞাতা।
Bāvīsatindriyā na diṭṭhā na sutā na mutā, viññātā. Nava hetū na diṭṭhā na sutā na mutā, viññātā. Cattāro āhārā na diṭṭhā na sutā na mutā, viññātā. Satta phassā na diṭṭhā na sutā na mutā, viññātā. Satta vedanā… satta saññā… satta cetanā… satta cittā na diṭṭhā na sutā na mutā, viññātā.
১০. তিকাদিদস্সনৰারো
10. Tikādidassanavāro
১. কুসলত্তিকং
1. Kusalattikaṃ
১০৩৮. পঞ্চন্নং খন্ধানং কতি কুসলা, কতি অকুসলা, কতি অব্যাকতা…পে॰… সত্তন্নং চিত্তানং কতি কুসলা, কতি অকুসলা, কতি অব্যাকতা?
1038. Pañcannaṃ khandhānaṃ kati kusalā, kati akusalā, kati abyākatā…pe… sattannaṃ cittānaṃ kati kusalā, kati akusalā, kati abyākatā?
রূপক্খন্ধো অব্যাকতো। চত্তারো খন্ধা সিযা কুসলা, সিযা অকুসলা, সিযা অব্যাকতা। দসাযতনা অব্যাকতা। দ্ৰাযতনা সিযা কুসলা, সিযা অকুসলা, সিযা অব্যাকতা। সোল়স ধাতুযো অব্যাকতা। দ্ৰে ধাতুযো সিযা কুসলা, সিযা অকুসলা, সিযা অব্যাকতা। সমুদযসচ্চং অকুসলং। মগ্গসচ্চং কুসলং। নিরোধসচ্চং অব্যাকতং। দুক্খসচ্চং সিযা কুসলং, সিযা অকুসলং, সিযা অব্যাকতং।
Rūpakkhandho abyākato. Cattāro khandhā siyā kusalā, siyā akusalā, siyā abyākatā. Dasāyatanā abyākatā. Dvāyatanā siyā kusalā, siyā akusalā, siyā abyākatā. Soḷasa dhātuyo abyākatā. Dve dhātuyo siyā kusalā, siyā akusalā, siyā abyākatā. Samudayasaccaṃ akusalaṃ. Maggasaccaṃ kusalaṃ. Nirodhasaccaṃ abyākataṃ. Dukkhasaccaṃ siyā kusalaṃ, siyā akusalaṃ, siyā abyākataṃ.
দসিন্দ্রিযা অব্যাকতা। দোমনস্সিন্দ্রিযং অকুসলং। অনঞ্ঞাতঞ্ঞস্সামীতিন্দ্রিযং কুসলং। চত্তারিন্দ্রিযা সিযা কুসলা, সিযা অব্যাকতা। ছ ইন্দ্রিযা সিযা কুসলা, সিযা অকুসলা, সিযা অব্যাকতা।
Dasindriyā abyākatā. Domanassindriyaṃ akusalaṃ. Anaññātaññassāmītindriyaṃ kusalaṃ. Cattārindriyā siyā kusalā, siyā abyākatā. Cha indriyā siyā kusalā, siyā akusalā, siyā abyākatā.
তযো কুসলহেতূ কুসলা। তযো অকুসলহেতূ অকুসলা। তযো অব্যাকতহেতূ অব্যাকতা। কবল়ীকারো আহারো অব্যাকতো। তযো আহারা সিযা কুসলা, সিযা অকুসলা, সিযা অব্যাকতা। ছ ফস্সা অব্যাকতা। মনোৰিঞ্ঞাণধাতুসম্ফস্সো সিযা কুসলো, সিযা অকুসলো, সিযা অব্যাকতো। ছ ৰেদনা… ছ সঞ্ঞা… ছ চেতনা… ছ চিত্তা অব্যাকতা। মনোৰিঞ্ঞাণধাতু সিযা কুসলা, সিযা অকুসলা, সিযা অব্যাকতা।
Tayo kusalahetū kusalā. Tayo akusalahetū akusalā. Tayo abyākatahetū abyākatā. Kabaḷīkāro āhāro abyākato. Tayo āhārā siyā kusalā, siyā akusalā, siyā abyākatā. Cha phassā abyākatā. Manoviññāṇadhātusamphasso siyā kusalo, siyā akusalo, siyā abyākato. Cha vedanā… cha saññā… cha cetanā… cha cittā abyākatā. Manoviññāṇadhātu siyā kusalā, siyā akusalā, siyā abyākatā.
২. ৰেদনাতিকং
2. Vedanātikaṃ
১০৩৯. পঞ্চন্নং খন্ধানং কতি সুখায ৰেদনায সম্পযুত্তা, কতি দুক্খায ৰেদনায সম্পযুত্তা, কতি অদুক্খমসুখায ৰেদনায সম্পযুত্তা…পে॰… সত্তন্নং চিত্তানং কতি সুখায ৰেদনায সম্পযুত্তা, কতি দুক্খায ৰেদনায সম্পযুত্তা, কতি অদুক্খমসুখায ৰেদনায সম্পযুত্তা?
1039. Pañcannaṃ khandhānaṃ kati sukhāya vedanāya sampayuttā, kati dukkhāya vedanāya sampayuttā, kati adukkhamasukhāya vedanāya sampayuttā…pe… sattannaṃ cittānaṃ kati sukhāya vedanāya sampayuttā, kati dukkhāya vedanāya sampayuttā, kati adukkhamasukhāya vedanāya sampayuttā?
দ্ৰে খন্ধা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি। তযো খন্ধা সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা।
Dve khandhā na vattabbā sukhāya vedanāya sampayuttātipi, dukkhāya vedanāya sampayuttātipi, adukkhamasukhāya vedanāya sampayuttātipi. Tayo khandhā siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā.
দসাযতনা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি। মনাযতনং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং। ধম্মাযতনং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং, সিযা ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি।
Dasāyatanā na vattabbā sukhāya vedanāya sampayuttātipi, dukkhāya vedanāya sampayuttātipi, adukkhamasukhāya vedanāya sampayuttātipi. Manāyatanaṃ siyā sukhāya vedanāya sampayuttaṃ, siyā dukkhāya vedanāya sampayuttaṃ, siyā adukkhamasukhāya vedanāya sampayuttaṃ. Dhammāyatanaṃ siyā sukhāya vedanāya sampayuttaṃ, siyā dukkhāya vedanāya sampayuttaṃ, siyā adukkhamasukhāya vedanāya sampayuttaṃ, siyā na vattabbaṃ sukhāya vedanāya sampayuttantipi, dukkhāya vedanāya sampayuttantipi, adukkhamasukhāya vedanāya sampayuttantipi.
দস ধাতুযো ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি। পঞ্চ ধাতুযো অদুক্খমসুখায ৰেদনায সম্পযুত্তা, কাযৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা। মনোৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা। ধম্মধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা, সিযা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি।
Dasa dhātuyo na vattabbā sukhāya vedanāya sampayuttātipi, dukkhāya vedanāya sampayuttātipi, adukkhamasukhāya vedanāya sampayuttātipi. Pañca dhātuyo adukkhamasukhāya vedanāya sampayuttā, kāyaviññāṇadhātu siyā sukhāya vedanāya sampayuttā, siyā dukkhāya vedanāya sampayuttā. Manoviññāṇadhātu siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā. Dhammadhātu siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā, siyā na vattabbā sukhāya vedanāya sampayuttātipi, dukkhāya vedanāya sampayuttātipi, adukkhamasukhāya vedanāya sampayuttātipi.
দ্ৰে সচ্চা সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা। নিরোধসচ্চং ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি। দুক্খসচ্চং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং, সিযা ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি।
Dve saccā siyā sukhāya vedanāya sampayuttā, siyā adukkhamasukhāya vedanāya sampayuttā. Nirodhasaccaṃ na vattabbaṃ sukhāya vedanāya sampayuttantipi, dukkhāya vedanāya sampayuttantipi, adukkhamasukhāya vedanāya sampayuttantipi. Dukkhasaccaṃ siyā sukhāya vedanāya sampayuttaṃ, siyā dukkhāya vedanāya sampayuttaṃ, siyā adukkhamasukhāya vedanāya sampayuttaṃ, siyā na vattabbaṃ sukhāya vedanāya sampayuttantipi, dukkhāya vedanāya sampayuttantipi, adukkhamasukhāya vedanāya sampayuttantipi.
দ্ৰাদসিন্দ্রিযা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি। ছ ইন্দ্রিযা সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা। তীণিন্দ্রিযা সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা , সিযা অদুক্খমসুখায ৰেদনায সম্পযুত্তা। জীৰিতিন্দ্রিযং সিযা সুখায ৰেদনায সম্পযুত্তং, সিযা দুক্খায ৰেদনায সম্পযুত্তং, সিযা অদুক্খমসুখায ৰেদনায সম্পযুত্তং, সিযা ন ৰত্তব্বং সুখায ৰেদনায সম্পযুত্তন্তিপি, দুক্খায ৰেদনায সম্পযুত্তন্তিপি, অদুক্খমসুখায ৰেদনায সম্পযুত্তন্তিপি।
Dvādasindriyā na vattabbā sukhāya vedanāya sampayuttātipi, dukkhāya vedanāya sampayuttātipi, adukkhamasukhāya vedanāya sampayuttātipi. Cha indriyā siyā sukhāya vedanāya sampayuttā, siyā adukkhamasukhāya vedanāya sampayuttā. Tīṇindriyā siyā sukhāya vedanāya sampayuttā, siyā dukkhāya vedanāya sampayuttā , siyā adukkhamasukhāya vedanāya sampayuttā. Jīvitindriyaṃ siyā sukhāya vedanāya sampayuttaṃ, siyā dukkhāya vedanāya sampayuttaṃ, siyā adukkhamasukhāya vedanāya sampayuttaṃ, siyā na vattabbaṃ sukhāya vedanāya sampayuttantipi, dukkhāya vedanāya sampayuttantipi, adukkhamasukhāya vedanāya sampayuttantipi.
দোসো অকুসলহেতু দুক্খায ৰেদনায সম্পযুত্তো। সত্ত হেতূ সিযা সুখায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা। মোহো অকুসলহেতু সিযা সুখায ৰেদনায সম্পযুত্তো, সিযা দুক্খায ৰেদনায সম্পযুত্তো, সিযা দুক্খমসুখায ৰেদনায সম্পযুত্তো।
Doso akusalahetu dukkhāya vedanāya sampayutto. Satta hetū siyā sukhāya vedanāya sampayuttā, siyā adukkhamasukhāya vedanāya sampayuttā. Moho akusalahetu siyā sukhāya vedanāya sampayutto, siyā dukkhāya vedanāya sampayutto, siyā dukkhamasukhāya vedanāya sampayutto.
কবল়ীকারো আহারো ন ৰত্তব্বো সুখায ৰেদনায সম্পযুত্তোতি পি, দুক্খায ৰেদনায সম্পযুত্তোতিপি, অদুক্খমসুখায ৰেদনায সম্পযুত্তোতিপি। তযো আহারা সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা।
Kabaḷīkāro āhāro na vattabbo sukhāya vedanāya sampayuttoti pi, dukkhāya vedanāya sampayuttotipi, adukkhamasukhāya vedanāya sampayuttotipi. Tayo āhārā siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā.
পঞ্চ ফস্সা অদুক্খমসুখায ৰেদনায সম্পযুত্তা। কাযৰিঞ্ঞাণধাতুসম্ফস্সো সিযা সুখায ৰেদনায সম্পযুত্তো, সিযা দুক্খায ৰেদনায সম্পযুত্তো। মনোৰিঞ্ঞাণধাতুসম্ফস্সো সিযা সুখায ৰেদনায সম্পযুত্তো, সিযা দুক্খায ৰেদনায সম্পযুত্তো, সিযা অদুক্খমসুখায ৰেদনায সম্পযুত্তো।
Pañca phassā adukkhamasukhāya vedanāya sampayuttā. Kāyaviññāṇadhātusamphasso siyā sukhāya vedanāya sampayutto, siyā dukkhāya vedanāya sampayutto. Manoviññāṇadhātusamphasso siyā sukhāya vedanāya sampayutto, siyā dukkhāya vedanāya sampayutto, siyā adukkhamasukhāya vedanāya sampayutto.
সত্ত ৰেদনা ন ৰত্তব্বা সুখায ৰেদনায সম্পযুত্তাতিপি, দুক্খায ৰেদনায সম্পযুত্তাতিপি, অদুক্খমসুখায ৰেদনায সম্পযুত্তাতিপি। পঞ্চ সঞ্ঞা… পঞ্চ চেতনা… পঞ্চ চিত্তা অদুক্খমসুখায ৰেদনায সম্পযুত্তা, কাযৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা। মনোৰিঞ্ঞাণধাতু সিযা সুখায ৰেদনায সম্পযুত্তা, সিযা দুক্খায ৰেদনায সম্পযুত্তা, সিযা অদুক্খমসুখায ৰেদনায সম্পযুত্তা।
Satta vedanā na vattabbā sukhāya vedanāya sampayuttātipi, dukkhāya vedanāya sampayuttātipi, adukkhamasukhāya vedanāya sampayuttātipi. Pañca saññā… pañca cetanā… pañca cittā adukkhamasukhāya vedanāya sampayuttā, kāyaviññāṇadhātu siyā sukhāya vedanāya sampayuttā, siyā dukkhāya vedanāya sampayuttā. Manoviññāṇadhātu siyā sukhāya vedanāya sampayuttā, siyā dukkhāya vedanāya sampayuttā, siyā adukkhamasukhāya vedanāya sampayuttā.
৩. ৰিপাকত্তিকং
3. Vipākattikaṃ
১০৪০. পঞ্চন্নং খন্ধানং কতি ৰিপাকা, কতি ৰিপাকধম্মধম্মা, কতি নেৰৰিপাকনৰিপাকধম্মধম্মা…পে॰… সত্তন্নং চিত্তানং কতি ৰিপাকা, কতি ৰিপাকধম্মধম্মা, কতি নেৰৰিপাকনৰিপাকধম্মধম্মা?
1040. Pañcannaṃ khandhānaṃ kati vipākā, kati vipākadhammadhammā, kati nevavipākanavipākadhammadhammā…pe… sattannaṃ cittānaṃ kati vipākā, kati vipākadhammadhammā, kati nevavipākanavipākadhammadhammā?
রূপক্খন্ধো নেৰৰিপাকনৰিপাকধম্মধম্মো। চত্তারো খন্ধা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা।
Rūpakkhandho nevavipākanavipākadhammadhammo. Cattāro khandhā siyā vipākā, siyā vipākadhammadhammā, siyā nevavipākanavipākadhammadhammā.
দসাযতনা নেৰৰিপাকনৰিপাকধম্মধম্মা। দ্ৰাযতনা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা।
Dasāyatanā nevavipākanavipākadhammadhammā. Dvāyatanā siyā vipākā, siyā vipākadhammadhammā, siyā nevavipākanavipākadhammadhammā.
দস ধাতুযো নেৰৰিপাকনৰিপাকধম্মধম্মা। পঞ্চ ধাতুযো ৰিপাকা। মনোধাতু সিযা ৰিপাকা, সিযা নেৰৰিপাকনৰিপাকধম্মধম্মা। দ্ৰে ধাতুযো সিযা ৰিপাকা সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা।
Dasa dhātuyo nevavipākanavipākadhammadhammā. Pañca dhātuyo vipākā. Manodhātu siyā vipākā, siyā nevavipākanavipākadhammadhammā. Dve dhātuyo siyā vipākā siyā vipākadhammadhammā, siyā nevavipākanavipākadhammadhammā.
দ্ৰে সচ্চা ৰিপাকধম্মধম্মা। নিরোধসচ্চং নেৰৰিপাকনৰিপাকধম্মধম্মং। দুক্খসচ্চং সিযা ৰিপাকং, সিযা ৰিপাকধম্মধম্মং, সিযা নেৰৰিপাকনৰিপাকধম্মধম্মং।
Dve saccā vipākadhammadhammā. Nirodhasaccaṃ nevavipākanavipākadhammadhammaṃ. Dukkhasaccaṃ siyā vipākaṃ, siyā vipākadhammadhammaṃ, siyā nevavipākanavipākadhammadhammaṃ.
সত্তিন্দ্রিযা নেৰৰিপাকনৰিপাকধম্মধম্মা। তীণিন্দ্রিযা ৰিপাকা। দ্ৰিন্দ্রিযা ৰিপাকধম্মধম্মা। অঞ্ঞিন্দ্রিযং সিযা ৰিপাকং, সিযা ৰিপাকধম্মধম্মং। নৰিন্দ্রিযা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা।
Sattindriyā nevavipākanavipākadhammadhammā. Tīṇindriyā vipākā. Dvindriyā vipākadhammadhammā. Aññindriyaṃ siyā vipākaṃ, siyā vipākadhammadhammaṃ. Navindriyā siyā vipākā, siyā vipākadhammadhammā, siyā nevavipākanavipākadhammadhammā.
ছ হেতূ ৰিপাকধম্মধম্মা। তযো অব্যাকতহেতূ সিযা ৰিপাকা, সিযা নেৰৰিপাকনৰিপাকধম্মধম্মা।
Cha hetū vipākadhammadhammā. Tayo abyākatahetū siyā vipākā, siyā nevavipākanavipākadhammadhammā.
কবল়ীকারো আহারো নেৰৰিপাকনৰিপাকধম্মধম্মো। তযো আহারা সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা। পঞ্চ ফস্সা ৰিপাকা। মনোধাতুসম্ফস্সো সিযা ৰিপাকো, সিযা নেৰৰিপাকনৰিপাকধম্মধম্মো। মনোৰিঞ্ঞাণধাতুসম্ফস্সো সিযা ৰিপাকো, সিযা ৰিপাকধম্মধম্মো, সিযা নেৰৰিপাকনৰিপাকধম্মধম্মো। পঞ্চ ৰেদনা… পঞ্চ সঞ্ঞা… পঞ্চ চেতনা… পঞ্চ চিত্তা ৰিপাকা। মনোধাতু সিযা ৰিপাকা, সিযা নেৰৰিপাকনৰিপাকধম্মধম্মা। মনোৰিঞ্ঞাণধাতু সিযা ৰিপাকা, সিযা ৰিপাকধম্মধম্মা, সিযা নেৰৰিপাকনৰিপাকধম্মধম্মা।
Kabaḷīkāro āhāro nevavipākanavipākadhammadhammo. Tayo āhārā siyā vipākā, siyā vipākadhammadhammā, siyā nevavipākanavipākadhammadhammā. Pañca phassā vipākā. Manodhātusamphasso siyā vipāko, siyā nevavipākanavipākadhammadhammo. Manoviññāṇadhātusamphasso siyā vipāko, siyā vipākadhammadhammo, siyā nevavipākanavipākadhammadhammo. Pañca vedanā… pañca saññā… pañca cetanā… pañca cittā vipākā. Manodhātu siyā vipākā, siyā nevavipākanavipākadhammadhammā. Manoviññāṇadhātu siyā vipākā, siyā vipākadhammadhammā, siyā nevavipākanavipākadhammadhammā.
৪. উপাদিন্নত্তিকং
4. Upādinnattikaṃ
১০৪১. পঞ্চন্নং খন্ধানং কতি উপাদিন্নুপাদানিযা, কতি অনুপাদিন্নুপাদানিযা, কতি অনুপাদিন্নঅনুপাদানিযা…পে॰… সত্তন্নং চিত্তানং কতি উপাদিন্নুপাদানিযা, কতি অনুপাদিন্নুপাদানিযা, কতি অনুপাদিন্নঅনুপাদানিযা?
1041. Pañcannaṃ khandhānaṃ kati upādinnupādāniyā, kati anupādinnupādāniyā, kati anupādinnaanupādāniyā…pe… sattannaṃ cittānaṃ kati upādinnupādāniyā, kati anupādinnupādāniyā, kati anupādinnaanupādāniyā?
রূপক্খন্ধো সিযা উপাদিন্নুপাদানিযো, সিযা অনুপাদিন্নুপাদানিযো ৪। চত্তারো খন্ধা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা।
Rūpakkhandho siyā upādinnupādāniyo, siyā anupādinnupādāniyo 4. Cattāro khandhā siyā upādinnupādāniyā, siyā anupādinnupādāniyā, siyā anupādinnaanupādāniyā.
পঞ্চাযতনা উপাদিন্নুপাদানিযা। সদ্দাযতনং অনুপাদিন্নুপাদানিযং। চত্তারো আযতনা সিযা উপাদিন্নুপাদানিযা, সিযা অনুপাদিন্নুপাদানিযা। দ্ৰাযতনা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা।
Pañcāyatanā upādinnupādāniyā. Saddāyatanaṃ anupādinnupādāniyaṃ. Cattāro āyatanā siyā upādinnupādāniyā, siyā anupādinnupādāniyā. Dvāyatanā siyā upādinnupādāniyā, siyā anupādinnupādāniyā, siyā anupādinnaanupādāniyā.
দস ধাতুযো উপাদিন্নুপাদানিযা। সদ্দধাতু অনুপাদিন্নুপাদানিযা। পঞ্চ ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা। দ্ৰে ধাতুযো সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা।
Dasa dhātuyo upādinnupādāniyā. Saddadhātu anupādinnupādāniyā. Pañca dhātuyo siyā upādinnupādāniyā, siyā anupādinnupādāniyā. Dve dhātuyo siyā upādinnupādāniyā, siyā anupādinnupādāniyā, siyā anupādinnaanupādāniyā.
সমুদযসচ্চং অনুপাদিন্নুপাদানিযং। দ্ৰে সচ্চা অনুপাদিন্নঅনুপাদানিযা। দুক্খসচ্চং সিযা উপাদিন্নুপাদানিযং, সিযা অনুপাদিন্নুপাদানিযং।
Samudayasaccaṃ anupādinnupādāniyaṃ. Dve saccā anupādinnaanupādāniyā. Dukkhasaccaṃ siyā upādinnupādāniyaṃ, siyā anupādinnupādāniyaṃ.
নৰিন্দ্রিযা উপাদিন্নুপাদানিযা। দোমনস্সিন্দ্রিযং অনুপাদিন্নুপাদানিযং। তীণিন্দ্রিযা অনুপাদিন্নঅনুপাদানিযা। নৰিন্দ্রিযা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা। তযো অকুসলহেতূ অনুপাদিন্নুপাদানিযা। তযো কুসলহেতূ সিযা অনুপাদিন্নুপাদানিযা, সিযা অনুপাদিন্নঅনুপাদানিযা। তযো অব্যাকতহেতূ সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা।
Navindriyā upādinnupādāniyā. Domanassindriyaṃ anupādinnupādāniyaṃ. Tīṇindriyā anupādinnaanupādāniyā. Navindriyā siyā upādinnupādāniyā, siyā anupādinnupādāniyā, siyā anupādinnaanupādāniyā. Tayo akusalahetū anupādinnupādāniyā. Tayo kusalahetū siyā anupādinnupādāniyā, siyā anupādinnaanupādāniyā. Tayo abyākatahetū siyā upādinnupādāniyā, siyā anupādinnupādāniyā, siyā anupādinnaanupādāniyā.
কবল়ীকারো আহারো সিযা উপাদিন্নুপাদানিযো, সিযা অনুপাদিন্নুপাদানিযো। তযো আহারা সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা ।
Kabaḷīkāro āhāro siyā upādinnupādāniyo, siyā anupādinnupādāniyo. Tayo āhārā siyā upādinnupādāniyā, siyā anupādinnupādāniyā, siyā anupādinnaanupādāniyā .
পঞ্চ ফস্সা উপাদিন্নুপাদানিযা। মনোধাতুসম্ফস্সো সিযা উপাদিন্নুপাদানিযো, সিযা অনুপাদিন্নুপাদানিযো। মনোৰিঞ্ঞাণধাতুসম্ফস্সো সিযা উপাদিন্নুপাদানিযো, সিযা অনুপাদিন্নুপাদানিযো, সিযা অনুপাদিন্নঅনুপাদানিযো। পঞ্চ ৰেদনা… পঞ্চ সঞ্ঞা… পঞ্চ চেতনা… পঞ্চ চিত্তা উপাদিন্নুপাদানিযা। মনোধাতু সিযা উপাদিন্নুপাদানিযা, সিযা অনুপাদিন্নুপাদানিযা। মনোৰিঞ্ঞাণধাতু সিযা উপাদিন্নুপাদানিযা, সিযা অনুপাদিন্নুপাদানিযা, সিযা অনুপাদিন্নঅনুপাদানিযা।
Pañca phassā upādinnupādāniyā. Manodhātusamphasso siyā upādinnupādāniyo, siyā anupādinnupādāniyo. Manoviññāṇadhātusamphasso siyā upādinnupādāniyo, siyā anupādinnupādāniyo, siyā anupādinnaanupādāniyo. Pañca vedanā… pañca saññā… pañca cetanā… pañca cittā upādinnupādāniyā. Manodhātu siyā upādinnupādāniyā, siyā anupādinnupādāniyā. Manoviññāṇadhātu siyā upādinnupādāniyā, siyā anupādinnupādāniyā, siyā anupādinnaanupādāniyā.
৫. ৰিতক্কত্তিকং
5. Vitakkattikaṃ
১০৪২. পঞ্চন্নং খন্ধানং কতি সৰিতক্কসৰিচারা, কতি অৰিতক্কৰিচারমত্তা, কতি অৰিতক্কঅৰিচারা…পে॰… সত্তন্নং চিত্তানং কতি সৰিতক্কসৰিচারা, কতি অৰিতক্কৰিচারমত্তা, কতি অৰিতক্কঅৰিচারা?
1042. Pañcannaṃ khandhānaṃ kati savitakkasavicārā, kati avitakkavicāramattā, kati avitakkaavicārā…pe… sattannaṃ cittānaṃ kati savitakkasavicārā, kati avitakkavicāramattā, kati avitakkaavicārā?
রূপক্খন্ধো অৰিতক্কঅৰিচারো। তযো খন্ধা সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা। সঙ্খারক্খন্ধো সিযা সৰিতক্কসৰিচারো, সিযা অৰিতক্কৰিচারমত্তো, সিযা অৰিতক্কঅৰিচারো সিযা ন ৰত্তব্বো সৰিতক্কসৰিচারোতিপি , অৰিতক্কৰিচারমত্তোতিপি, অৰিতক্কঅৰিচারোতিপি।
Rūpakkhandho avitakkaavicāro. Tayo khandhā siyā savitakkasavicārā, siyā avitakkavicāramattā, siyā avitakkaavicārā. Saṅkhārakkhandho siyā savitakkasavicāro, siyā avitakkavicāramatto, siyā avitakkaavicāro siyā na vattabbo savitakkasavicārotipi , avitakkavicāramattotipi, avitakkaavicārotipi.
দসাযতনা অৰিতক্কঅৰিচারা। মনাযতনং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং। ধম্মাযতনং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং, সিযা ন ৰত্তব্বং সৰিতক্কসৰিচারন্তিপি, অৰিতক্কৰিচারমত্তন্তিপি, অৰিতক্কঅৰিচারন্তিপি।
Dasāyatanā avitakkaavicārā. Manāyatanaṃ siyā savitakkasavicāraṃ, siyā avitakkavicāramattaṃ, siyā avitakkaavicāraṃ. Dhammāyatanaṃ siyā savitakkasavicāraṃ, siyā avitakkavicāramattaṃ, siyā avitakkaavicāraṃ, siyā na vattabbaṃ savitakkasavicārantipi, avitakkavicāramattantipi, avitakkaavicārantipi.
পন্নরস ধাতুযো অৰিতক্কঅৰিচারা। মনোধাতু সৰিতক্কসৰিচারা। মনোৰিঞ্ঞাণধাতু সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা। ধম্মধাতু সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা, সিযা ন ৰত্তব্বা সৰিতক্কসৰিচারাতিপি, অৰিতক্কৰিচারমত্তাতিপি, অৰিতক্কঅৰিচারাতিপি।
Pannarasa dhātuyo avitakkaavicārā. Manodhātu savitakkasavicārā. Manoviññāṇadhātu siyā savitakkasavicārā, siyā avitakkavicāramattā, siyā avitakkaavicārā. Dhammadhātu siyā savitakkasavicārā, siyā avitakkavicāramattā, siyā avitakkaavicārā, siyā na vattabbā savitakkasavicārātipi, avitakkavicāramattātipi, avitakkaavicārātipi.
সমুদযসচ্চং সৰিতক্কসৰিচারং। নিরোধসচ্চং অৰিতক্কঅৰিচারং। মগ্গসচ্চং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং। দুক্খসচ্চং সিযা সৰিতক্কসৰিচারং, সিযা অৰিতক্কৰিচারমত্তং, সিযা অৰিতক্কঅৰিচারং, সিযা ন ৰত্তব্বং সৰিতক্কসৰিচারন্তিপি, অৰিতক্কৰিচারমত্তন্তিপি, অৰিতক্কঅৰিচারন্তিপি।
Samudayasaccaṃ savitakkasavicāraṃ. Nirodhasaccaṃ avitakkaavicāraṃ. Maggasaccaṃ siyā savitakkasavicāraṃ, siyā avitakkavicāramattaṃ, siyā avitakkaavicāraṃ. Dukkhasaccaṃ siyā savitakkasavicāraṃ, siyā avitakkavicāramattaṃ, siyā avitakkaavicāraṃ, siyā na vattabbaṃ savitakkasavicārantipi, avitakkavicāramattantipi, avitakkaavicārantipi.
নৰিন্দ্রিযা অৰিতক্কঅৰিচারা। দোমনস্সিন্দ্রিযং সৰিতক্কসৰিচারং। উপেক্খিন্দ্রিযং সিযা সৰিতক্কসৰিচারং, সিযা অৰিতক্কঅৰিচারং। একাদসিন্দ্রিযা সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা।
Navindriyā avitakkaavicārā. Domanassindriyaṃ savitakkasavicāraṃ. Upekkhindriyaṃ siyā savitakkasavicāraṃ, siyā avitakkaavicāraṃ. Ekādasindriyā siyā savitakkasavicārā, siyā avitakkavicāramattā, siyā avitakkaavicārā.
তযো অকুসলহেতূ সৰিতক্কসৰিচারা। ছ হেতূ সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা। কবল়ীকারো আহারো অৰিতক্কঅৰিচারো। তযো আহারা সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা। পঞ্চ ফস্সা অৰিতক্কঅৰিচারা। মনোধাতুসম্ফস্সো সৰিতক্কসৰিচারো। মনোৰিঞ্ঞাণধাতুসম্ফস্সো সিযা সৰিতক্কসৰিচারো, সিযা অৰিতক্কৰিচারমত্তো, সিযা অৰিতক্কঅৰিচারো। পঞ্চ ৰেদনা… পঞ্চ সঞ্ঞা… পঞ্চ চেতনা… পঞ্চ চিত্তা অৰিতক্কঅৰিচারা মনোধাতু সৰিতক্কসৰিচারা , মনোৰিঞ্ঞাণধাতু সিযা সৰিতক্কসৰিচারা, সিযা অৰিতক্কৰিচারমত্তা, সিযা অৰিতক্কঅৰিচারা।
Tayo akusalahetū savitakkasavicārā. Cha hetū siyā savitakkasavicārā, siyā avitakkavicāramattā, siyā avitakkaavicārā. Kabaḷīkāro āhāro avitakkaavicāro. Tayo āhārā siyā savitakkasavicārā, siyā avitakkavicāramattā, siyā avitakkaavicārā. Pañca phassā avitakkaavicārā. Manodhātusamphasso savitakkasavicāro. Manoviññāṇadhātusamphasso siyā savitakkasavicāro, siyā avitakkavicāramatto, siyā avitakkaavicāro. Pañca vedanā… pañca saññā… pañca cetanā… pañca cittā avitakkaavicārā manodhātu savitakkasavicārā , manoviññāṇadhātu siyā savitakkasavicārā, siyā avitakkavicāramattā, siyā avitakkaavicārā.
(১) রূপদুকং
(1) Rūpadukaṃ
১০৪৩. পঞ্চন্নং খন্ধানং কতি রূপা, কতি অরূপা…পে॰… সত্তন্নং চিত্তানং কতি রূপা, কতি অরূপা?
1043. Pañcannaṃ khandhānaṃ kati rūpā, kati arūpā…pe… sattannaṃ cittānaṃ kati rūpā, kati arūpā?
রূপক্খন্ধো রূপং। চত্তারো খন্ধা অরূপা। দসাযতনা রূপা। মনাযতনং অরূপং। ধম্মাযতনং সিযা রূপং, সিযা অরূপং। দস ধাতুযো রূপা। সত্ত ধাতুযো অরূপা। ধম্মধাতু সিযা রূপা, সিযা অরূপা। তীণি সচ্চানি অরূপা। দুক্খসচ্চং সিযা রূপং, সিযা অরূপং। সত্তিন্দ্রিযা রূপা। চুদ্দসিন্দ্রিযা অরূপা। জীৰিতিন্দ্রিযং সিযা রূপং, সিযা অরূপং। নৰ হেতূ অরূপা। কবল়ীকারো আহারো রূপং। তযো আহারা অরূপা। সত্ত ফস্সা অরূপা। সত্ত ৰেদনা… সত্ত সঞ্ঞা… সত্ত চেতনা সত্ত চিত্তা অরূপা।
Rūpakkhandho rūpaṃ. Cattāro khandhā arūpā. Dasāyatanā rūpā. Manāyatanaṃ arūpaṃ. Dhammāyatanaṃ siyā rūpaṃ, siyā arūpaṃ. Dasa dhātuyo rūpā. Satta dhātuyo arūpā. Dhammadhātu siyā rūpā, siyā arūpā. Tīṇi saccāni arūpā. Dukkhasaccaṃ siyā rūpaṃ, siyā arūpaṃ. Sattindriyā rūpā. Cuddasindriyā arūpā. Jīvitindriyaṃ siyā rūpaṃ, siyā arūpaṃ. Nava hetū arūpā. Kabaḷīkāro āhāro rūpaṃ. Tayo āhārā arūpā. Satta phassā arūpā. Satta vedanā… satta saññā… satta cetanā satta cittā arūpā.
(২) লোকিযদুকং
(2) Lokiyadukaṃ
১০৪৪. পঞ্চন্নং খন্ধানং কতি লোকিযা, কতি লোকুত্তরা? দ্ৰাদসন্নং আযতনানং কতি লোকিযা, কতি লোকুত্তরা? অট্ঠারসন্নং ধাতূনং কতি লোকিযা, কতি লোকুত্তরা? চতুন্নং সচ্চানং কতি লোকিযা, কতি লোকুত্তরা…পে॰… সত্তন্নং চিত্তানং কতি লোকিযা, কতি লোকুত্তরা?
1044. Pañcannaṃ khandhānaṃ kati lokiyā, kati lokuttarā? Dvādasannaṃ āyatanānaṃ kati lokiyā, kati lokuttarā? Aṭṭhārasannaṃ dhātūnaṃ kati lokiyā, kati lokuttarā? Catunnaṃ saccānaṃ kati lokiyā, kati lokuttarā…pe… sattannaṃ cittānaṃ kati lokiyā, kati lokuttarā?
রূপক্খন্ধো লোকিযো। চত্তারো খন্ধা সিযা লোকিযা, সিযা লোকুত্তরা। দসাযতনা লোকিযা । দ্ৰে আযতনা সিযা লোকিযা , সিযা লোকুত্তরা। সোল়স ধাতুযো লোকিযা। দ্ৰে ধাতুযো সিযা লোকিযা, সিযা লোকুত্তরা। দ্ৰে সচ্চা লোকিযা। দ্ৰে সচ্চা লোকুত্তরা।
Rūpakkhandho lokiyo. Cattāro khandhā siyā lokiyā, siyā lokuttarā. Dasāyatanā lokiyā . Dve āyatanā siyā lokiyā , siyā lokuttarā. Soḷasa dhātuyo lokiyā. Dve dhātuyo siyā lokiyā, siyā lokuttarā. Dve saccā lokiyā. Dve saccā lokuttarā.
দসিন্দ্রিযা লোকিযা। তীণিন্দ্রিযা লোকুত্তরা। নৰিন্দ্রিযা সিযা লোকিযা, সিযা লোকুত্তরা। তযো অকুসলহেতূ লোকিযা। ছ হেতূ সিযা লোকিযা, সিযা লোকুত্তরা। কবল়ীকারো আহারো লোকিযো। তযো আহারা সিযা লোকিযা, সিযা লোকুত্তরা । ছ ফস্সা লোকিযা। মনোৰিঞ্ঞাণধাতুসম্ফস্সো সিযা লোকিযো, সিযা লোকুত্তরো। ছ ৰেদনা লোকিযা। মনোৰিঞ্ঞাণধাতুসম্ফস্সজা ৰেদনা সিযা লোকিযা, সিযা লোকুত্তরা। ছ সঞ্ঞা লোকিযা। মনোৰিঞ্ঞাণধাতুসম্ফস্সজা সঞ্ঞা সিযা লোকিযা, সিযা লোকুত্তরা। ছ চেতনা লোকিযা। মনোৰিঞ্ঞাণধাতুসম্ফস্সজা চেতনা সিযা লোকিযা, সিযা লোকুত্তরা। ছ চিত্তা লোকিযা। মনোৰিঞ্ঞাণধাতু সিযা লোকিযা, সিযা লোকুত্তরাতি।
Dasindriyā lokiyā. Tīṇindriyā lokuttarā. Navindriyā siyā lokiyā, siyā lokuttarā. Tayo akusalahetū lokiyā. Cha hetū siyā lokiyā, siyā lokuttarā. Kabaḷīkāro āhāro lokiyo. Tayo āhārā siyā lokiyā, siyā lokuttarā . Cha phassā lokiyā. Manoviññāṇadhātusamphasso siyā lokiyo, siyā lokuttaro. Cha vedanā lokiyā. Manoviññāṇadhātusamphassajā vedanā siyā lokiyā, siyā lokuttarā. Cha saññā lokiyā. Manoviññāṇadhātusamphassajā saññā siyā lokiyā, siyā lokuttarā. Cha cetanā lokiyā. Manoviññāṇadhātusamphassajā cetanā siyā lokiyā, siyā lokuttarā. Cha cittā lokiyā. Manoviññāṇadhātu siyā lokiyā, siyā lokuttarāti.
অভিঞ্ঞা দ্ৰে সারম্মণা, দিট্ঠা কুসলৰেদনা।
Abhiññā dve sārammaṇā, diṭṭhā kusalavedanā;
ৰিপাকা চ উপাদিন্না, ৰিতক্কং রূপলোকিযাতি॥
Vipākā ca upādinnā, vitakkaṃ rūpalokiyāti.
ধম্মহদযৰিভঙ্গো নিট্ঠিতো।
Dhammahadayavibhaṅgo niṭṭhito.
ৰিভঙ্গপকরণং নিট্ঠিতং।
Vibhaṅgapakaraṇaṃ niṭṭhitaṃ.
Footnotes:
Related texts:
অট্ঠকথা • Aṭṭhakathā / অভিধম্মপিটক (অট্ঠকথা) • Abhidhammapiṭaka (aṭṭhakathā) / সম্মোহৰিনোদনী-অট্ঠকথা • Sammohavinodanī-aṭṭhakathā
১. সব্বসঙ্গাহিকৰারৰণ্ণনা • 1. Sabbasaṅgāhikavāravaṇṇanā
২. উপ্পত্তানুপ্পত্তিৰারৰণ্ণনা • 2. Uppattānuppattivāravaṇṇanā
৩. পরিযাপন্নাপরিযাপন্নৰারৰণ্ণনা • 3. Pariyāpannāpariyāpannavāravaṇṇanā
৪. ধম্মদস্সনৰারৰণ্ণনা • 4. Dhammadassanavāravaṇṇanā
৬. উপ্পাদককম্মআযুপ্পমাণৰারৰণ্ণনা • 6. Uppādakakammaāyuppamāṇavāravaṇṇanā
৭. অভিঞ্ঞেয্যাদিৰারৰণ্ণনা • 7. Abhiññeyyādivāravaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-মূলটীকা • Vibhaṅga-mūlaṭīkā / ১৮. ধম্মহদযৰিভঙ্গো • 18. Dhammahadayavibhaṅgo
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / ৰিভঙ্গ-অনুটীকা • Vibhaṅga-anuṭīkā / ১৮. ধম্মহদযৰিভঙ্গো • 18. Dhammahadayavibhaṅgo
