| Library / Tipiṭaka / တိပိဋက • Tipiṭaka / စူဠဝဂ္ဂပာဠိ • Cūḷavaggapāḷi |
ဓမ္မကမ္မဒ္ဝာဒသကံ
Dhammakammadvādasakaṃ
၅၈. ‘‘တီဟိ , ဘိက္ခဝေ, အင္ဂေဟိ သမန္နာဂတံ, အာပတ္တိယာ အပ္ပဋိကမ္မေ, ဥက္ခေပနီယကမ္မံ ဓမ္မကမ္မဉ္စ ဟောတိ, ဝိနယကမ္မဉ္စ, သုဝူပသန္တဉ္စ။ သမ္မုခာ ကတံ ဟောတိ, ပဋိပုစ္ဆာ ကတံ ဟောတိ, ပဋိညာယ ကတံ ဟောတိ – ဣမေဟိ ခော, ဘိက္ခဝေ, တီဟင္ဂေဟိ သမန္နာဂတံ, အာပတ္တိယာ အပ္ပဋိကမ္မေ, ဥက္ခေပနီယကမ္မံ ဓမ္မကမ္မဉ္စ ဟောတိ, ဝိနယကမ္မဉ္စ, သုဝူပသန္တဉ္စ။
58. ‘‘Tīhi , bhikkhave, aṅgehi samannāgataṃ, āpattiyā appaṭikamme, ukkhepanīyakammaṃ dhammakammañca hoti, vinayakammañca, suvūpasantañca. Sammukhā kataṃ hoti, paṭipucchā kataṃ hoti, paṭiññāya kataṃ hoti – imehi kho, bhikkhave, tīhaṅgehi samannāgataṃ, āpattiyā appaṭikamme, ukkhepanīyakammaṃ dhammakammañca hoti, vinayakammañca, suvūpasantañca.
‘‘အပရေဟိပိ, ဘိက္ခဝေ, တီဟင္ဂေဟိ သမန္နာဂတံ, အာပတ္တိယာ အပ္ပဋိကမ္မေ, ဥက္ခေပနီယကမ္မံ ဓမ္မကမ္မဉ္စ ဟောတိ, ဝိနယကမ္မဉ္စ, သုဝူပသန္တဉ္စ။ အာပတ္တိယာ ကတံ ဟောတိ, ဒေသနာဂာမိနိယာ အာပတ္တိယာ ကတံ ဟောတိ, အဒေသိတာယ အာပတ္တိယာ ကတံ ဟောတိ။ပေ.။ စောဒေတ္ဝာ ကတံ ဟောတိ, သာရေတ္ဝာ ကတံ ဟောတိ, အာပတ္တိံ အာရောပေတ္ဝာ ကတံ ဟောတိ။ပေ.။ သမ္မုခာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ ပဋိပုစ္ဆာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ ပဋိညာယ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ အာပတ္တိယာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ ဒေသနာဂာမိနိယာ အာပတ္တိယာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ အဒေသိတာယ အာပတ္တိယာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ စောဒေတ္ဝာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ သာရေတ္ဝာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ။ပေ.။ အာပတ္တိံ အာရောပေတ္ဝာ ကတံ ဟောတိ, ဓမ္မေန ကတံ ဟောတိ, သမဂ္ဂေန ကတံ ဟောတိ – ဣမေဟိ ခော, ဘိက္ခဝေ, တီဟင္ဂေဟိ သမန္နာဂတံ, အာပတ္တိယာ အပ္ပဋိကမ္မေ, ဥက္ခေပနီယကမ္မံ ဓမ္မကမ္မဉ္စ ဟောတိ, ဝိနယကမ္မဉ္စ, သုဝူပသန္တဉ္စ။
‘‘Aparehipi, bhikkhave, tīhaṅgehi samannāgataṃ, āpattiyā appaṭikamme, ukkhepanīyakammaṃ dhammakammañca hoti, vinayakammañca, suvūpasantañca. Āpattiyā kataṃ hoti, desanāgāminiyā āpattiyā kataṃ hoti, adesitāya āpattiyā kataṃ hoti…pe… codetvā kataṃ hoti, sāretvā kataṃ hoti, āpattiṃ āropetvā kataṃ hoti…pe… sammukhā kataṃ hoti, dhammena kataṃ hoti, samaggena kataṃ hoti…pe… paṭipucchā kataṃ hoti, dhammena kataṃ hoti, samaggena kataṃ hoti…pe… paṭiññāya kataṃ hoti, dhammena kataṃ hoti, samaggena kataṃ hoti…pe… āpattiyā kataṃ hoti, dhammena kataṃ hoti, samaggena kataṃ hoti…pe… desanāgāminiyā āpattiyā kataṃ hoti, dhammena kataṃ hoti, samaggena kataṃ hoti…pe… adesitāya āpattiyā kataṃ hoti, dhammena kataṃ hoti, samaggena kataṃ hoti…pe… codetvā kataṃ hoti, dhammena kataṃ hoti, samaggena kataṃ hoti…pe… sāretvā kataṃ hoti, dhammena kataṃ hoti, samaggena kataṃ hoti…pe… āpattiṃ āropetvā kataṃ hoti, dhammena kataṃ hoti, samaggena kataṃ hoti – imehi kho, bhikkhave, tīhaṅgehi samannāgataṃ, āpattiyā appaṭikamme, ukkhepanīyakammaṃ dhammakammañca hoti, vinayakammañca, suvūpasantañca.
အာပတ္တိယာ အပ္ပဋိကမ္မေ ဥက္ခေပနီယကမ္မေ
Āpattiyā appaṭikamme ukkhepanīyakamme
ဓမ္မကမ္မဒ္ဝာဒသကံ နိဋ္ဌိတံ။
Dhammakammadvādasakaṃ niṭṭhitaṃ.
