| Library / Tipiṭaka / திபிடக • Tipiṭaka / பஞ்சபகரண-அனுடீகா • Pañcapakaraṇa-anuṭīkā |
7. த⁴ம்மகதா²வண்ணனா
7. Dhammakathāvaṇṇanā
887-888. ரூபஸபா⁴வோ ரூபட்டோ²தி ஆஹ ‘‘ரூபட்டோ² நாம கோசி ரூபதோ அஞ்ஞோ நத்தீ²’’தி. யங் பன யதோ அஞ்ஞங், ந தங் தங்ஸபா⁴வந்தி ஆஹ ‘‘ரூபட்ட²தோ அஞ்ஞங் ரூபஞ்ச ந ஹோதீ’’தி, ரூபமேவ ந ஹோதீதி அத்தோ². ஏதேன ப்³யதிரேகதோ தமத்த²ங் ஸாதே⁴தி. தஸ்மாதி யஸ்மா ரூபதோ அஞ்ஞோ ரூபட்டோ² நத்தி², ரூபட்ட²தோ ச அஞ்ஞங் ரூபங், தஸ்மா ரூபங் ரூபமேவ ரூபஸபா⁴வமேவாதி ஏவ-காரேன நிவத்திதங் த³ஸ்ஸேதி ‘‘ந வேத³னாதி³ஸபா⁴வ’’ந்தி. அதி⁴ப்பாயேனாதி ரூபரூபட்டா²னங் அனஞ்ஞத்தாதி⁴ப்பாயேன. அஞ்ஞதா²தி தேஸங் அஞ்ஞத்தே ரூபட்டே²ன நியமேன ரூபங் நியதந்தி வத்தப்³ப³ந்தி யோஜனா. த³ஸ்ஸிதோயேவ ஹோதி அத்த²தோ ஆபன்னத்தா. ந ஹி அபி⁴ன்னே வத்து²ஸ்மிங் பரியாயந்தரபே⁴த³ங் கரோதி. அஞ்ஞத்தந்தி ரூபஸபா⁴வானங் ரூபரூபட்டா²னஞ்ச. ஸஸாமினித்³தே³ஸஸித்³தா⁴பே⁴தா³ ‘‘ஸிலாபுத்தகஸ்ஸ ஸரீர’’ந்தி விய, கப்பனாமத்ததோ சாயங் பே⁴தோ³, ந பரமத்த²தோதி ஆஹ ‘‘க³ஹெத்வா விய பவத்தோ’’தி. வேத³னாதீ³ஹி நானத்தமேவாதி வேத³னாதீ³ஹி அஞ்ஞத்தமேவ. ஸோ ஸபா⁴வோதி ஸோ ரூபஸபா⁴வோ. நானத்தஸஞ்ஞாபனத்த²ந்தி ரூபஸ்ஸ ஸபா⁴வோ, ந வேத³னாதீ³னந்தி ஏவங் பே⁴த³ஸ்ஸ ஞாபனத்த²ங். தஞ்ச வசனந்தி ‘‘ரூபங் ரூபட்டே²ன ந நியத’’ந்தி வசனங். வுத்தப்பகாரேனாதி ‘‘ரூபட்ட²தோ அஞ்ஞஸ்ஸ ரூபஸ்ஸ அபா⁴வா’’திஆதி³னா வுத்தாகாரேன. யதி³ ஸதோ³ஸங், அத² கஸ்மா படிஜானாதீதி யோஜனா.
887-888. Rūpasabhāvo rūpaṭṭhoti āha ‘‘rūpaṭṭho nāma koci rūpato añño natthī’’ti. Yaṃ pana yato aññaṃ, na taṃ taṃsabhāvanti āha ‘‘rūpaṭṭhato aññaṃ rūpañca na hotī’’ti, rūpameva na hotīti attho. Etena byatirekato tamatthaṃ sādheti. Tasmāti yasmā rūpato añño rūpaṭṭho natthi, rūpaṭṭhato ca aññaṃ rūpaṃ, tasmā rūpaṃ rūpameva rūpasabhāvamevāti eva-kārena nivattitaṃ dasseti ‘‘na vedanādisabhāva’’nti. Adhippāyenāti rūparūpaṭṭhānaṃ anaññattādhippāyena. Aññathāti tesaṃ aññatte rūpaṭṭhena niyamena rūpaṃ niyatanti vattabbanti yojanā. Dassitoyeva hoti atthato āpannattā. Na hi abhinne vatthusmiṃ pariyāyantarabhedaṃ karoti. Aññattanti rūpasabhāvānaṃ rūparūpaṭṭhānañca. Sasāminiddesasiddhābhedā ‘‘silāputtakassa sarīra’’nti viya, kappanāmattato cāyaṃ bhedo, na paramatthatoti āha ‘‘gahetvā viya pavatto’’ti. Vedanādīhi nānattamevāti vedanādīhi aññattameva. So sabhāvoti so rūpasabhāvo. Nānattasaññāpanatthanti rūpassa sabhāvo, na vedanādīnanti evaṃ bhedassa ñāpanatthaṃ. Tañca vacananti ‘‘rūpaṃ rūpaṭṭhena na niyata’’nti vacanaṃ. Vuttappakārenāti ‘‘rūpaṭṭhato aññassa rūpassa abhāvā’’tiādinā vuttākārena. Yadi sadosaṃ, atha kasmā paṭijānātīti yojanā.
வுத்தமேவ காரணந்தி ‘‘ரூபங் ரூபமேவ, ந வேத³னாதி³ஸபா⁴வ’’ந்தி ஏவங் வுத்தமேவ யுத்திங். பரேன சோதி³தந்தி ‘‘ந வத்தப்³ப³ங் ரூபங் ரூபட்டே²ன நியத’’ந்திஆதி³னா பரவாதி³னோ சோத³னங் ஸந்தா⁴யாஹ. தமேவ காரணங் த³ஸ்ஸெத்வாதி தமேவ யதா²வுத்தங் யுத்திங் ‘‘எத்த² ஹீ’’திஆதி³னா த³ஸ்ஸெத்வா. சோத³னங் நிவத்தேதீதி ‘‘அத² கஸ்மா படிஜானாதீ’’தி வுத்தங் சோத³னங் நிவத்தேதி. யமத்த²ங் ஸந்தா⁴ய ‘‘இதோ அஞ்ஞதா²’’தி வுத்தங், தங் த³ஸ்ஸேதுங் ‘‘ரூபாதீ³’’திஆதி³ வுத்தங்.
Vuttameva kāraṇanti ‘‘rūpaṃ rūpameva, na vedanādisabhāva’’nti evaṃ vuttameva yuttiṃ. Parena coditanti ‘‘na vattabbaṃ rūpaṃ rūpaṭṭhena niyata’’ntiādinā paravādino codanaṃ sandhāyāha. Tameva kāraṇaṃ dassetvāti tameva yathāvuttaṃ yuttiṃ ‘‘ettha hī’’tiādinā dassetvā. Codanaṃ nivattetīti ‘‘atha kasmā paṭijānātī’’ti vuttaṃ codanaṃ nivatteti. Yamatthaṃ sandhāya ‘‘ito aññathā’’ti vuttaṃ, taṃ dassetuṃ ‘‘rūpādī’’tiādi vuttaṃ.
த⁴ம்மகதா²வண்ணனா நிட்டி²தா.
Dhammakathāvaṇṇanā niṭṭhitā.
ஏகவீஸதிமவக்³க³வண்ணனா நிட்டி²தா.
Ekavīsatimavaggavaṇṇanā niṭṭhitā.
Related texts:
திபிடக (மூல) • Tipiṭaka (Mūla) / அபி⁴த⁴ம்மபிடக • Abhidhammapiṭaka / கதா²வத்து²பாளி • Kathāvatthupāḷi / (206) 7. த⁴ம்மகதா² • (206) 7. Dhammakathā
அட்ட²கதா² • Aṭṭhakathā / அபி⁴த⁴ம்மபிடக (அட்ட²கதா²) • Abhidhammapiṭaka (aṭṭhakathā) / பஞ்சபகரண-அட்ட²கதா² • Pañcapakaraṇa-aṭṭhakathā / 7. த⁴ம்மகதா²வண்ணனா • 7. Dhammakathāvaṇṇanā
டீகா • Tīkā / அபி⁴த⁴ம்மபிடக (டீகா) • Abhidhammapiṭaka (ṭīkā) / பஞ்சபகரண-மூலடீகா • Pañcapakaraṇa-mūlaṭīkā / 7. த⁴ம்மகதா²வண்ணனா • 7. Dhammakathāvaṇṇanā
