| Library / Tipiṭaka / তিপিটক • Tipiṭaka / পঞ্চপকরণ-অট্ঠকথা • Pañcapakaraṇa-aṭṭhakathā |
৭. ধম্মকথাৰণ্ণনা
7. Dhammakathāvaṇṇanā
৮৮৭-৮৮৮. ইদানি ধম্মকথা নাম হোতি। তত্থ যস্মা রূপাদযো রূপাদিসভাৰেন নিযতা ন তং সভাৰং ৰিজহন্তি, তস্মা সব্বধম্মা নিযতাতি যেসং লদ্ধি, সেয্যথাপি অন্ধকানঞ্চেৰ একচ্চানঞ্চ উত্তরাপথকানং; তে সন্ধায সব্বে ধম্মাতি পুচ্ছা সকৰাদিস্স, পটিঞ্ঞা ইতরস্স। অথ নং ‘‘সচে তে নিযতা, মিচ্ছত্তনিযতা ৰা সিযুং সম্মত্তনিযতা ৰা, ইতো অঞ্ঞো নিযামো নাম নত্থী’’তি চোদেতুং মিচ্ছত্তনিযতাতিআদিমাহ। তত্থ পটিক্খেপো চ পটিঞ্ঞা চ পরৰাদিস্স। রূপং রূপট্ঠেনাতিআদি যেনত্থেন নিযতাতি ৰদতি, তস্স ৰসেন চোদেতুং ৰুত্তং। তত্রাযং অধিপ্পাযো – রূপঞ্হি রূপট্ঠেন নিযতন্তি রূপং রূপমেৰ, ন ৰেদনাদিসভাৰন্তি অধিপ্পাযেন ৰত্তব্বং, ইতো অঞ্ঞথা ন ৰত্তব্বং। কস্মা? রূপট্ঠতো অঞ্ঞস্স রূপস্স অভাৰা। রূপসভাৰো হি রূপট্ঠো, রূপসভাৰো চ রূপমেৰ, ন রূপতো অঞ্ঞো। ৰেদনাদীহি পনস্স নানত্তপঞ্ঞাপনত্থং এস ৰোহারো হোতীতি। তস্মা ‘‘রূপং রূপট্ঠেন নিযত’’ন্তি ৰদন্তেন রূপং নিযতন্তি ৰুত্তং হোতি। নিযতঞ্চ নাম মিচ্ছত্তনিযতং ৰা সিযা সম্মত্তনিযতং ৰা, ইতো অঞ্ঞো নিযামো নাম নত্থীতি। অথ কস্মা পটিজানাতীতি? অত্থন্তরৰসেন। রূপং রূপট্ঠেন নিযতন্তি এত্থ হি রূপং রূপমেৰ, ন ৰেদনাদিসভাৰন্তি অযমত্থো। তস্মা পটিজানাতি। ইতো অঞ্ঞথা পনস্স নিযতত্তং নত্থীতি পুন তেনেৰ নযেন চোদেতুং মিচ্ছত্তনিযতন্তিআদিমাহ । তং সব্বং উত্তানত্থমেৰ। তেন হি রূপন্তি লদ্ধিপি অযোনিসো পতিট্ঠাপিতত্তা অপ্পতিট্ঠিতাৰ হোতীতি।
887-888. Idāni dhammakathā nāma hoti. Tattha yasmā rūpādayo rūpādisabhāvena niyatā na taṃ sabhāvaṃ vijahanti, tasmā sabbadhammā niyatāti yesaṃ laddhi, seyyathāpi andhakānañceva ekaccānañca uttarāpathakānaṃ; te sandhāya sabbe dhammāti pucchā sakavādissa, paṭiññā itarassa. Atha naṃ ‘‘sace te niyatā, micchattaniyatā vā siyuṃ sammattaniyatā vā, ito añño niyāmo nāma natthī’’ti codetuṃ micchattaniyatātiādimāha. Tattha paṭikkhepo ca paṭiññā ca paravādissa. Rūpaṃ rūpaṭṭhenātiādi yenatthena niyatāti vadati, tassa vasena codetuṃ vuttaṃ. Tatrāyaṃ adhippāyo – rūpañhi rūpaṭṭhena niyatanti rūpaṃ rūpameva, na vedanādisabhāvanti adhippāyena vattabbaṃ, ito aññathā na vattabbaṃ. Kasmā? Rūpaṭṭhato aññassa rūpassa abhāvā. Rūpasabhāvo hi rūpaṭṭho, rūpasabhāvo ca rūpameva, na rūpato añño. Vedanādīhi panassa nānattapaññāpanatthaṃ esa vohāro hotīti. Tasmā ‘‘rūpaṃ rūpaṭṭhena niyata’’nti vadantena rūpaṃ niyatanti vuttaṃ hoti. Niyatañca nāma micchattaniyataṃ vā siyā sammattaniyataṃ vā, ito añño niyāmo nāma natthīti. Atha kasmā paṭijānātīti? Atthantaravasena. Rūpaṃ rūpaṭṭhena niyatanti ettha hi rūpaṃ rūpameva, na vedanādisabhāvanti ayamattho. Tasmā paṭijānāti. Ito aññathā panassa niyatattaṃ natthīti puna teneva nayena codetuṃ micchattaniyatantiādimāha . Taṃ sabbaṃ uttānatthameva. Tena hi rūpanti laddhipi ayoniso patiṭṭhāpitattā appatiṭṭhitāva hotīti.
ধম্মকথাৰণ্ণনা।
Dhammakathāvaṇṇanā.
Related texts:
তিপিটক (মূল) • Tipiṭaka (Mūla) / অভিধম্মপিটক • Abhidhammapiṭaka / কথাৰত্থুপাল়ি • Kathāvatthupāḷi / (২০৬) ৭. ধম্মকথা • (206) 7. Dhammakathā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-মূলটীকা • Pañcapakaraṇa-mūlaṭīkā / ৭. ধম্মকথাৰণ্ণনা • 7. Dhammakathāvaṇṇanā
টীকা • Tīkā / অভিধম্মপিটক (টীকা) • Abhidhammapiṭaka (ṭīkā) / পঞ্চপকরণ-অনুটীকা • Pañcapakaraṇa-anuṭīkā / ৭. ধম্মকথাৰণ্ণনা • 7. Dhammakathāvaṇṇanā
