| Library / Tipiṭaka / ติปิฎก • Tipiṭaka / สํยุตฺตนิกาย • Saṃyuttanikāya |
๑๐. ธมฺมกถิกปุจฺฉสุตฺตํ
10. Dhammakathikapucchasuttaṃ
๑๕๕. อถ โข อญฺญตโร ภิกฺขุ เยน ภควา เตนุปสงฺกมิ…เป.… เอกมนฺตํ นิสิโนฺน โข โส ภิกฺขุ ภควนฺตํ เอตทโวจ – ‘‘‘ธมฺมกถิโก , ธมฺมกถิโก’ติ, ภเนฺต, วุจฺจติฯ กิตฺตาวตา นุ โข, ภเนฺต, ธมฺมกถิโก โหตี’’ติ?
155. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca – ‘‘‘dhammakathiko , dhammakathiko’ti, bhante, vuccati. Kittāvatā nu kho, bhante, dhammakathiko hotī’’ti?
‘‘จกฺขุสฺส เจ, ภิกฺขุ นิพฺพิทาย วิราคาย นิโรธาย ธมฺมํ เทเสติ, ‘ธมฺมกถิโก ภิกฺขู’ติ อลํวจนายฯ จกฺขุสฺส เจ, ภิกฺขุ, นิพฺพิทาย วิราคาย นิโรธาย ปฎิปโนฺน โหติ, ‘ธมฺมานุธมฺมปฺปฎิปโนฺน ภิกฺขู’ติ อลํวจนายฯ จกฺขุสฺส เจ, ภิกฺขุ, นิพฺพิทา วิราคา นิโรธา อนุปาทาวิมุโตฺต โหติ, ‘ทิฎฺฐธมฺมนิพฺพานปฺปโตฺต ภิกฺขู’ติ อลํวจนาย…เป.… ชิวฺหาย เจ, ภิกฺขุ, นิพฺพิทาย วิราคาย นิโรธาย ธมฺมํ เทเสติ, ‘ธมฺมกถิโก ภิกฺขู’ติ อลํวจนาย…เป.… มนสฺส เจ, ภิกฺขุ, นิพฺพิทาย วิราคาย นิโรธาย ธมฺมํ เทเสติ, ‘ธมฺมกถิโก ภิกฺขู’ติ อลํวจนายฯ มนสฺส เจ, ภิกฺขุ, นิพฺพิทาย วิราคาย นิโรธาย ปฎิปโนฺน โหติ, ‘ธมฺมานุธมฺมปฺปฎิปโนฺน ภิกฺขู’ติ อลํวจนายฯ มนสฺส เจ, ภิกฺขุ, นิพฺพิทา วิราคา นิโรธา อนุปาทาวิมุโตฺต โหติ, ‘ทิฎฺฐธมฺมนิพฺพานปฺปโตฺต ภิกฺขู’ติ อลํวจนายา’’ติฯ ทสมํฯ
‘‘Cakkhussa ce, bhikkhu nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃvacanāya. Cakkhussa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃvacanāya. Cakkhussa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃvacanāya…pe… jivhāya ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃvacanāya…pe… manassa ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃvacanāya. Manassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃvacanāya. Manassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃvacanāyā’’ti. Dasamaṃ.
นวปุราณวโคฺค ปญฺจทสโมฯ
Navapurāṇavaggo pañcadasamo.
ตสฺสุทฺทานํ –
Tassuddānaṃ –
กมฺมํ จตฺตาริ สปฺปายา, อนเนฺตวาสิ กิมตฺถิยา;
Kammaṃ cattāri sappāyā, anantevāsi kimatthiyā;
อตฺถิ นุ โข ปริยาโย, อินฺทฺริยกถิเกน จาติฯ
Atthi nu kho pariyāyo, indriyakathikena cāti.
สฬายตนวเคฺค ตติยปณฺณาสโก สมโตฺตฯ
Saḷāyatanavagge tatiyapaṇṇāsako samatto.
ตสฺส วคฺคุทฺทานํ –
Tassa vagguddānaṃ –
โยคเกฺขมิ จ โลโก จ, คหปติ เทวทเหน จ;
Yogakkhemi ca loko ca, gahapati devadahena ca;
นวปุราเณน ปณฺณาโส, ตติโย เตน วุจฺจตีติฯ
Navapurāṇena paṇṇāso, tatiyo tena vuccatīti.
Related texts:
อฎฺฐกถา • Aṭṭhakathā / สุตฺตปิฎก (อฎฺฐกถา) • Suttapiṭaka (aṭṭhakathā) / สํยุตฺตนิกาย (อฎฺฐกถา) • Saṃyuttanikāya (aṭṭhakathā) / ๙-๑๐. อินฺทฺริยสมฺปนฺนสุตฺตาทิวณฺณนา • 9-10. Indriyasampannasuttādivaṇṇanā
ฎีกา • Tīkā / สุตฺตปิฎก (ฎีกา) • Suttapiṭaka (ṭīkā) / สํยุตฺตนิกาย (ฎีกา) • Saṃyuttanikāya (ṭīkā) / ๙-๑๐. อินฺทฺริยสมฺปนฺนสุตฺตาทิวณฺณนา • 9-10. Indriyasampannasuttādivaṇṇanā
