| Library / Tipiṭaka / තිපිටක • Tipiṭaka / සංයුත්‌තනිකාය • Saṃyuttanikāya |
10. ධම්‌මකථිකපුච්‌ඡසුත්‌තං
10. Dhammakathikapucchasuttaṃ
155. අථ ඛො අඤ්‌ඤතරො භික්‌ඛු යෙන භගවා තෙනුපසඞ්‌කමි…පෙ.… එකමන්‌තං නිසින්‌නො ඛො සො භික්‌ඛු භගවන්‌තං එතදවොච – ‘‘‘ධම්‌මකථිකො , ධම්‌මකථිකො’ති, භන්‌තෙ, වුච්‌චති. කිත්‌තාවතා නු ඛො, භන්‌තෙ, ධම්‌මකථිකො හොතී’’ති?
155. Atha kho aññataro bhikkhu yena bhagavā tenupasaṅkami…pe… ekamantaṃ nisinno kho so bhikkhu bhagavantaṃ etadavoca – ‘‘‘dhammakathiko , dhammakathiko’ti, bhante, vuccati. Kittāvatā nu kho, bhante, dhammakathiko hotī’’ti?
‘‘චක්‌ඛුස්‌ස චෙ, භික්‌ඛු නිබ්‌බිදාය විරාගාය නිරොධාය ධම්‌මං දෙසෙති, ‘ධම්‌මකථිකො භික්‌ඛූ’ති අලංවචනාය. චක්‌ඛුස්‌ස චෙ, භික්‌ඛු, නිබ්‌බිදාය විරාගාය නිරොධාය පටිපන්‌නො හොති, ‘ධම්‌මානුධම්‌මප්‌පටිපන්‌නො භික්‌ඛූ’ති අලංවචනාය. චක්‌ඛුස්‌ස චෙ, භික්‌ඛු, නිබ්‌බිදා විරාගා නිරොධා අනුපාදාවිමුත්‌තො හොති, ‘දිට්‌ඨධම්‌මනිබ්‌බානප්‌පත්‌තො භික්‌ඛූ’ති අලංවචනාය…පෙ.… ජිව්‌හාය චෙ, භික්‌ඛු, නිබ්‌බිදාය විරාගාය නිරොධාය ධම්‌මං දෙසෙති, ‘ධම්‌මකථිකො භික්‌ඛූ’ති අලංවචනාය…පෙ.… මනස්‌ස චෙ, භික්‌ඛු, නිබ්‌බිදාය විරාගාය නිරොධාය ධම්‌මං දෙසෙති, ‘ධම්‌මකථිකො භික්‌ඛූ’ති අලංවචනාය. මනස්‌ස චෙ, භික්‌ඛු, නිබ්‌බිදාය විරාගාය නිරොධාය පටිපන්‌නො හොති, ‘ධම්‌මානුධම්‌මප්‌පටිපන්‌නො භික්‌ඛූ’ති අලංවචනාය. මනස්‌ස චෙ, භික්‌ඛු, නිබ්‌බිදා විරාගා නිරොධා අනුපාදාවිමුත්‌තො හොති, ‘දිට්‌ඨධම්‌මනිබ්‌බානප්‌පත්‌තො භික්‌ඛූ’ති අලංවචනායා’’ති. දසමං.
‘‘Cakkhussa ce, bhikkhu nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃvacanāya. Cakkhussa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃvacanāya. Cakkhussa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃvacanāya…pe… jivhāya ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃvacanāya…pe… manassa ce, bhikkhu, nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃvacanāya. Manassa ce, bhikkhu, nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃvacanāya. Manassa ce, bhikkhu, nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃvacanāyā’’ti. Dasamaṃ.
නවපුරාණවග්‌ගො පඤ්‌චදසමො.
Navapurāṇavaggo pañcadasamo.
තස්‌සුද්‌දානං –
Tassuddānaṃ –
කම්‌මං චත්‌තාරි සප්‌පායා, අනන්‌තෙවාසි කිමත්‌ථියා;
Kammaṃ cattāri sappāyā, anantevāsi kimatthiyā;
අත්‌ථි නු ඛො පරියායො, ඉන්‌ද්‍රියකථිකෙන චාති.
Atthi nu kho pariyāyo, indriyakathikena cāti.
සළායතනවග්‌ගෙ තතියපණ්‌ණාසකො සමත්‌තො.
Saḷāyatanavagge tatiyapaṇṇāsako samatto.
තස්‌ස වග්‌ගුද්‌දානං –
Tassa vagguddānaṃ –
යොගක්‌ඛෙමි ච ලොකො ච, ගහපති දෙවදහෙන ච;
Yogakkhemi ca loko ca, gahapati devadahena ca;
නවපුරාණෙන පණ්‌ණාසො, තතියො තෙන වුච්‌චතීති.
Navapurāṇena paṇṇāso, tatiyo tena vuccatīti.
Related texts:
අට්‌ඨකථා • Aṭṭhakathā / සුත්‌තපිටක (අට්‌ඨකථා) • Suttapiṭaka (aṭṭhakathā) / සංයුත්‌තනිකාය (අට්‌ඨකථා) • Saṃyuttanikāya (aṭṭhakathā) / 9-10. ඉන්‌ද්‍රියසම්‌පන්‌නසුත්‌තාදිවණ්‌ණනා • 9-10. Indriyasampannasuttādivaṇṇanā
ටීකා • Tīkā / සුත්‌තපිටක (ටීකා) • Suttapiṭaka (ṭīkā) / සංයුත්‌තනිකාය (ටීකා) • Saṃyuttanikāya (ṭīkā) / 9-10. ඉන්‌ද්‍රියසම්‌පන්‌නසුත්‌තාදිවණ්‌ණනා • 9-10. Indriyasampannasuttādivaṇṇanā
