| Library / Tipiṭaka / திபிடக • Tipiṭaka / ஸங்யுத்தனிகாய • Saṃyuttanikāya |
6. த⁴ம்மகதி²கஸுத்தங்
6. Dhammakathikasuttaṃ
16. ஸாவத்தி²யங் …பே॰… அத² கோ² அஞ்ஞதரோ பி⁴க்கு² யேன ப⁴க³வா தேனுபஸங்கமி; உபஸங்கமித்வா ப⁴க³வந்தங் அபி⁴வாதெ³த்வா ஏகமந்தங் நிஸீதி³. ஏகமந்தங் நிஸின்னோ கோ² ஸோ பி⁴க்கு² ப⁴க³வந்தங் ஏதத³வோச – ‘‘‘த⁴ம்மகதி²கோ த⁴ம்மகதி²கோ’தி, ப⁴ந்தே, வுச்சதி. கித்தாவதா நு கோ², ப⁴ந்தே, த⁴ம்மகதி²கோ ஹோதீ’’தி?
16. Sāvatthiyaṃ …pe… atha kho aññataro bhikkhu yena bhagavā tenupasaṅkami; upasaṅkamitvā bhagavantaṃ abhivādetvā ekamantaṃ nisīdi. Ekamantaṃ nisinno kho so bhikkhu bhagavantaṃ etadavoca – ‘‘‘dhammakathiko dhammakathiko’ti, bhante, vuccati. Kittāvatā nu kho, bhante, dhammakathiko hotī’’ti?
‘‘ஜராமரணஸ்ஸ சே பி⁴க்கு² நிப்³பி³தா³ய விராகா³ய நிரோதா⁴ய த⁴ம்மங் தே³ஸேதி, ‘த⁴ம்மகதி²கோ பி⁴க்கூ²’தி அலங் வசனாய. ஜராமரணஸ்ஸ சே பி⁴க்கு² நிப்³பி³தா³ய விராகா³ய நிரோதா⁴ய படிபன்னோ ஹோதி, ‘த⁴ம்மானுத⁴ம்மப்படிபன்னோ பி⁴க்கூ²’தி அலங் வசனாய. ஜராமரணஸ்ஸ சே பி⁴க்கு² நிப்³பி³தா³ விராகா³ நிரோதா⁴ அனுபாதா³விமுத்தோ ஹோதி, ‘தி³ட்ட²த⁴ம்மனிப்³பா³னப்பத்தோ பி⁴க்கூ²’தி அலங் வசனாய.
‘‘Jarāmaraṇassa ce bhikkhu nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Jarāmaraṇassa ce bhikkhu nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Jarāmaraṇassa ce bhikkhu nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāya.
‘‘ஜாதியா சே பி⁴க்கு²…பே॰… ப⁴வஸ்ஸ சே பி⁴க்கு²… உபாதா³னஸ்ஸ சே பி⁴க்கு²… தண்ஹாய சே பி⁴க்கு²… வேத³னாய சே பி⁴க்கு²… ப²ஸ்ஸஸ்ஸ சே பி⁴க்கு²… ஸளாயதனஸ்ஸ சே பி⁴க்கு²… நாமரூபஸ்ஸ சே பி⁴க்கு²… விஞ்ஞாணஸ்ஸ சே பி⁴க்கு²… ஸங்கா²ரானங் சே பி⁴க்கு²… அவிஜ்ஜாய சே பி⁴க்கு² நிப்³பி³தா³ய விராகா³ய நிரோதா⁴ய த⁴ம்மங் தே³ஸேதி, ‘த⁴ம்மகதி²கோ பி⁴க்கூ²’தி அலங் வசனாய. அவிஜ்ஜாய சே பி⁴க்கு² நிப்³பி³தா³ய விராகா³ய நிரோதா⁴ய படிபன்னோ ஹோதி, ‘த⁴ம்மானுத⁴ம்மப்படிபன்னோ பி⁴க்கூ²’தி அலங் வசனாய. அவிஜ்ஜாய சே பி⁴க்கு² நிப்³பி³தா³ விராகா³ நிரோதா⁴ அனுபாதா³விமுத்தோ ஹோதி, ‘தி³ட்ட²த⁴ம்மனிப்³பா³னப்பத்தோ பி⁴க்கூ²’தி அலங் வசனாயா’’தி.
‘‘Jātiyā ce bhikkhu…pe… bhavassa ce bhikkhu… upādānassa ce bhikkhu… taṇhāya ce bhikkhu… vedanāya ce bhikkhu… phassassa ce bhikkhu… saḷāyatanassa ce bhikkhu… nāmarūpassa ce bhikkhu… viññāṇassa ce bhikkhu… saṅkhārānaṃ ce bhikkhu… avijjāya ce bhikkhu nibbidāya virāgāya nirodhāya dhammaṃ deseti, ‘dhammakathiko bhikkhū’ti alaṃ vacanāya. Avijjāya ce bhikkhu nibbidāya virāgāya nirodhāya paṭipanno hoti, ‘dhammānudhammappaṭipanno bhikkhū’ti alaṃ vacanāya. Avijjāya ce bhikkhu nibbidā virāgā nirodhā anupādāvimutto hoti, ‘diṭṭhadhammanibbānappatto bhikkhū’ti alaṃ vacanāyā’’ti.
Related texts:
அட்ட²கதா² • Aṭṭhakathā / ஸுத்தபிடக (அட்ட²கதா²) • Suttapiṭaka (aṭṭhakathā) / ஸங்யுத்தனிகாய (அட்ட²கதா²) • Saṃyuttanikāya (aṭṭhakathā) / 6. த⁴ம்மகதி²கஸுத்தவண்ணனா • 6. Dhammakathikasuttavaṇṇanā
டீகா • Tīkā / ஸுத்தபிடக (டீகா) • Suttapiṭaka (ṭīkā) / ஸங்யுத்தனிகாய (டீகா) • Saṃyuttanikāya (ṭīkā) / 6. த⁴ம்மகதி²கஸுத்தவண்ணனா • 6. Dhammakathikasuttavaṇṇanā
